Jisɔs bəndɨ Jɛlosalɛm Kɨgbeyɛ kɨ Bitsawu lə lɨ
7
Nəjiŋ wusu Jisɔs kətə kwa yu gəndəə sha yi Galili ntɨŋ. Yu nə̀ kə tsɔhɔ gəŋə Judɛya, ndzɨ Bəju nə̀ se lə bɔ kkpɨsɨ yu. 2 Lə tsa yi kɨgbeyɛ kɨ Bəju lə kɨ bə́ nə̀ tsɨsə lə Kɨgbeyɛ kɨ Bitsawu lə kɨ ba gwɨgwɨ, 3 bəjimə Jisɔs tə bə yu lə, “Fɔ̂ nə sɛŋ wə gəŋ Judɛya fə bənɨ bɔhɔ bə nɨŋ'ə ŋəŋə nɨŋ yi wə na nɨntɨ. 4 Ɨ miɨ na nɨntɨ nɨŋ yu se lə bənɨ kkə yu, ɨ yu jikə kɨ nɨntɨ ji bunyələ. Nɨ wə na fɨtɨ biɔŋ biŋ, gə̂ŋ donchɛ gwɨ yɔhɔ bə mbi.” 5 Bəwəmɛni ba nə̀ chanyɛɛ manɨ ndzɨ bɔ nə̀ kə galə tɨmo shəŋ yu wɨ. 6 Jisɔs chi bə bɔ lə, “Tsa yɛmɨ bambi ya kə kwətsə. Nə bəŋ'ɨ tsá chi na kwətsə lɨ. 7 Naji ɨ bənɨ bə mbi no lə kɨ ti bə bəŋ kə. Bəmanɨ, bɔ na ti bə mɨ ndzɨ nna nchanyɛ bə bɔ lə fiə wubɔlə na wubiə. 8 Bə kɨ bɨndɨ fiɛnɨ bə gɨntɨ kɨgbeyɛ ntɨŋ. Naji mbəndɨ sɔ kə. Tsa yɛmɨ bambi ya kə kwətsə.” 9 Lə yu tə manɨ, yu kətə Galili.10 Bəmanɨ tsa yi bəwəmɛni nə̀ bəndə kɨgbeyɛ ka ntɨŋ, yu shə ba bəndɨ tɨ sɔ. Tsa yi yu nə̀ bɨndɨ, yu nə̀ sɛhɛ lə yu kɨ bɨndɨ bənɨ ŋɨntɨ yu wɨ, yu bəndɨ fihi bunyələ. 11 Nə̀ ji Bəju noŋko yu kɨgbeyɛ ka ntɨŋ bɔ bishɛ lə, “Yu na ji məŋ lə?” 12 Bənɨ gbɔ kɨ wənə kɨtso tsukɔ yu wɨ. Bədɔ sɛnti lə, “Yu na ji miɨ wu ndzeŋe.” Bədɔ nɨnntɨ lə, “Yu na fukiɛ bənɨ bufukiɛ.” 13 Bəmanɨ miɨ nə̀ sɨŋ su wu nə̀ji ɨ yu chanyɛ ŋgbooŋ tsukɔ yu wɨ, ndzɨ bɔ nə̀ lete fó yi Bəju lə.
Jisɔs tɨfiə bənɨ kɨgbeyɛ ntɨŋ
14 Lə butsu bu kɨgbeyɛ ka lə jɛnɛ, Jisɔs gəŋ ba be mbaŋ wu tsɔŋ yi bintɔfiɛ ntɨŋ kɨ tɨfiə bənɨ. 15 Fó yi Bəju lə kɨ woko yi keŋkɛɛ kɨgəsə kɨ wɨŋə, yi masə lə, “Miɨ no fə nəŋ fə yu kɨ kkɨ biɔŋ mɛ ɨji yu kə fɨyə Kɨŋwatɨ kɨ Nyɔ lə?” 16 Jisɔs jiji ba tə lə, “Bitɨfiɛ bi nna ntɨfiə biŋ na biɛmɨ kə, na bi miɨ wu faŋə mɨ lə. 17 Ɨ miɨ na se lə yu fə fiɔŋ fi Nyɔ na se, ɨ yu kkə lə fa bitɨfiə biŋ fɔ ji nə Nyɔ lɨ maa nna ntɨfiə bə buŋga bwɛŋ lə. 18 Miɨ wu na chanyɛ bə buŋga buhu ba yu kɨ noŋko yɨ wubəŋ ji gwɨ yihi lɨ. Bəmanɨ miɨ wu noŋko yɨ wubəŋ ji miɨ wu faŋə yu lɨ ba yu kɨ ji miɨ wu kɨyɛyi, yu jikə jimiɛ miɨ wu dyɛ. 19 Ntɨlə Mose nə̀ nya bəŋ bilaŋ sɨŋ? Bəmanɨ miɨ wudɔ nə bəŋ ntɨŋ na galəhə bilaŋ bia! Bə na se lə bə kkpɨsɨ mɨ ndzɨ la?”
20 Bənɨ chi bə yu lə, “Wə na keŋkɛ tsə wə wɨ. Miɨ wu na se lə yu kkpɨsɨ wə na yəŋ?” 21 Jisɔs tə bə bɔ lə, “Nnə̀ mfə fiɔŋ fimo kɨgəsə wɨŋ bəŋ. 22 Mose nə̀ nya bəŋ kɨlaŋ lə bə kɨ sɔmbiɛ beŋ dzɔ́, bəma bə kɨ sɔmbiɛ, ma ji tɨ butsu bu fufiɛ. Kɨlaŋ kɨŋ nə̀ kə fɔkɔ tɨmo nə Mose lɨ, kɨ nə̀ fɔ ji nə bəchɛ bəchaa bɛnɨ lɨ. 23 Jilə bə́ na sombo dzɔ yi miɨ butsu bu fufiɛ bə́ tə kə gbosɔ kɨlaŋ kɨ Mose lə, bə tə kɨ lo bə mɨ lə nnə̀ ŋ'wəmiəsɨ miɨ butsu bu fufiɛ, yu wəmiə gwɨ chi ndzɨ la? 24 Bə kə kɨ sakɨ nsa bə kɨmbɨ, ɨji bə kə saa ba chənə ŋəŋ'ɨ. Bə kɨ sakɨ dzə yi diəŋ ntɨŋ.”
Bənɨ kɨ kpənə lə fa Jisɔs na Nchitə wu Nyɔ nə̀ kaa wa lɛɛ
25 Bənɨ bə Jɛlosalɛm bədɔ bi lə, “Ntɨlə no na miɨ wu bə́ na se wa lə bə́ kkpɨsɨ sɨŋ? 26 Bə ŋə̂ŋ, yu no mɛ wu na chanyɛ toko, miɨ nchanyɛ sɨŋ fiɔŋ bə yu. Naji ɨ kɨ ji lə fó yi kɨtuŋ'ə' dɨsɨgwɨ ba kkə lə miɨ no na Nchitə wu Nyɔ nə̀ kaa wa? 27 Bəmanɨ, kə na kkɨ dɨ wu miɨ no fɔɔ. Tsa yi Nchitə wu Nyɔ nə̀ kaa wa ná ba, miɨ ná kkəhə dɨ wu yu fɔɔ.” 28 Lə Jisɔs kɨ tɨfiə bənɨ mbaŋ wu tsɔŋ yi bintɔfiɛ ntɨŋ, yu jiji ba chanyɛ bə diɛ bɔ́ lə, “Bə na kkɨ mɨ, bə kkɨ tɨ dɨ wu mɨ mfɔɔ. Bəmanɨ ŋkə mbaha mɛ buŋga bwɛmɨ lɨ. Miɨ wu faŋə mɨ na miɨ wu kɨyɛyi, bə jikə kkə yu. 29 Nna ŋkkɨ yu ndzɨ mɨ mfɔ nə fə yu ku, ɨji yu wu faŋə mɨ.” 30 Nɨ yu chanyɛ manɨ, bənɨ bədɔ kɨ se lə bɔ kwe yu. Bəmanɨ miɨ jikə fiɔhɔ yu wɨ, ndzɨ tsa yihi nə̀ bambi kə kwətsə. 31 Bənɨ kɨyɛŋ ga shəŋ yu wɨ kɨ bi lə, “Tsa yi Nchitə wu Nyɔ nə̀ kaa wa ná ba, naji ɨ yu fə biɔŋ bi na donchɛ bubəŋ bu Nyɔ lə ya bi miɨ no fəə?”
Bə́ faŋ bənɨ bə bitsa lə lə bɔ gəŋ kwe Jisɔs
32 Lə Bəfalasi wɔ nɨ kɨntsu kɨ bənɨ lə na wənə tsukɔ Jisɔs wɨ, bɔ bə bəchɛ bintɔfiɛ bəbəŋ faŋ bənɨ bə bitsa lə lə bɔ gəŋ kwe yu. 33 Lə bɔ gəŋ, Jisɔs tə lə, “Njiwa njiŋ bə bəŋ kwa tsa ntɨŋ tsəsɨ, ntə mfichə ba tsu jiŋ fə miɨ wu faŋə mɨ ku. 34 Bə shɨkɨ nɔŋ mɨ ba jikə ŋəŋkəhə mɨ wɨ. Dɨ wu nna ŋgɨntɨ naji ɨ bə ba mɨ kə.” 35 Bəju tə bə gwɨ́ yibɔlə lə, “Miɨ no na se lə yu gəŋ ji məŋ dɨ wu naji ɨ kə nɔŋ yu ba jikə ŋəŋkəhə yu wɨ? Yu na se lə yu gəŋ bituŋ bi bənɨ baha nə̀ tsaŋə ba gəŋ kɨ ji bi ntɨŋ fə yu gəŋə ba tɨfiə bənɨ ba? 36 Fiɔŋ fi yu na tɨdi lə, ‘Bə jiba bə nɔŋ mɨ ba jikə ŋəŋkəhə mɨ wɨ, dɨ wu nna ŋgɨntɨ naji ɨ bə ba mɨ kə,’ yu na tɨdi ma fi ji lə la?”
Jisɔs ka bənɨ ŋgɔŋ mə nya buwəŋ
37 Lə kɨ ji butsu bu Kɨgbeyɛ lə bu nəjiŋ bu nə̀ ji butsu bubəŋ bu Kɨgbeyɛ ka lə, Jisɔs ləŋ wə ba wunə lə, “Jilə mbente na wo miɨ, miɨ wa ba fə mɨ ku ba mu lɨ. 38 Miɨ wu galə shəŋ mɨ wɨ fi ná kɨ ji bə yu diəŋ nɨ Kɨŋwatɨ kɨ Nyɔ lə na tɨdi lə, ‘Ŋgɔŋ mə buwəŋ'ə ná kɨ foto nə shəŋ yihi ntɨŋ mɔ shichi mɛ wɔɔɔ.’” 39 Jisɔs nə̀ chanyɛɛ fiŋ ɨji tsukɔ Kɨn'yɨntɨ kɨ bənɨ bə' galə shəŋ yu wɨ ná keŋkɛ. Tsa nyi wɨ nə̀ ji bə́ bambi kə nyaha Kɨn'yɨntɨ ka bə bɔ, ndzɨ nə̀ ji bə́ bambi kə bəndəsɨ Jisɔs lə yu be bubəŋ ntɨŋ.
Bənɨ jɛ gwɨ ndzɨ Jisɔs
40 Lə bənɨ wɔ fiɔŋ fi Jisɔs nə̀ chanyɛ fiŋ, bədɔ tə lə, “Miɨ no na Miɨ wu Shɔŋ yi Nyɔ wa kɨbɛɛ.” 41 Bədɔ tə lə, “No na Nchitə wu Nyɔ nə̀ kaa wa.” Bəmanɨ, bədɔ bi lə, “Nchitə wu Nyɔ nə̀ kaa wa nə̀ji lə yu fɔ ji nə Galili? 42 Ntɨlə Kɨŋwatɨ kɨ Nyɔ lə na tɨdi lə Nchitə wa ná foto nə kɨtsɔŋ kɨ Ŋkuŋ Dɛbi lə ntɨŋ, kɨtuŋ kɨ Bɛtɨlhɛm ntɨŋ, ɨji kɨtuŋ kɨ Dɛbi lə sɨŋ?” 43 Lə bənɨ tə manɨ, kɨnjɛgwɨ ba bɔ ntɨŋ ndzɨ Jisɔs. 44 Bənɨ bədɔ nə bɔ ntɨŋ kɨ se lə bɔ kwe yu, bəmanɨ miɨ jikə fiɔhɔ yu wɨ.
Fó yi Bəju lə nɨŋŋ Jisɔs
45 Bənɨ bə bitsa lə ba dza ba fichə tsu jiŋ fə bəchɛ bintɔfiɛ bəbəŋ bə Bəfalasi ku, bɔ bi bə bənɨ bə bitsa lə ba lə, “Bə kə baha bə yu ndzɨ la?” 46 Bənɨ bə bitsa lə ba chi bə bɔ lə, “Miɨ kə saa kɨ chanyɛ nɨ miɨ no kə.” 47 Bəfalasi bi bə bɔ lə, “Yu gəŋ ba fukiɛ tɨ bəŋ maa? 48 Bə' ŋəŋ fó yi kɨtuŋ'ə makə Bəfalasi' ga shəŋ yu wɨ? 49 Na kwa kɨntsu kɨŋ kɨ na kkəhə kɨlaŋ kɨ Nyɔ lə. Lɔŋ na ji bɔ fi.” 50 Nikɔdɛmus wu nə̀ ji miɨ wudɔ nə kɨntsu kɨ Bəfalasi lə ntɨŋ, wu nə̀ gəŋə butsu budɔ ba ŋəŋ Jisɔs wɨ nə̀ ji mɨ. Yu bi bə bɔ lə, 51 “Kɨlaŋ kaha na bɨmi lə naji ɨ bə́ kəmbɨ nsa yi miɨ ɨji bə́ kə saa ba wokɔ lə bə́ wɔ fiɔŋ fi yu chanyɛ?” 52 Bɔ tə bi bə yu lə, “Wə fɔ tɨ nə Galili? Chə̂nə Kɨŋwatɨ kɨ Nyɔ lə ntɨŋ buni wə jiwa ɨ wə ŋəŋ lə miɨ wu shɔŋ yi Nyɔ wudɔ naji ɨ yu shəshə ba fɔ nə Galili kə.” 53 ª[Bɔ dza kɨ kwəyə miu miu.