Jisɔs chɨ bənɨ bəntsuku bətɨŋ
6
Nəjiŋ wusu, Jisɔs dza ba gəŋ llə ŋgɔŋ məmbəŋ mə Galili. Ŋgɔŋ məmbəŋ mɛŋ na mə bə́ nə̀ tsɨsə tɨ lə mə Tibɛlias. 2 Kuta wu bənɨ biə yu nəjiŋ ndzɨ bɔ nə̀ ŋəŋ biɔŋ bi na donchɛ bubəŋ buhu, bi yu nə̀ fɨtɨ bə bənɨ bə gwɨ́ lə nɨ yu nə̀ wəmiəsɨ bɔ. 3 Jisɔs bɔ bə beŋ buhu bə nɨŋ'ə dza ba bəndɨ gəŋ jiŋ dzo bɨŋ. 4 Tsa ya wɨ nə̀ ji kɨgbeyɛ kɨ Bəju lə kɨ Nchɛnəbɨŋ'ə ji gwɨgwɨ. 5 Lə Jisɔs bo, yu ŋəŋ nɨ kuta wu bənɨ na ba yu wɨ, yu bi bə Felip lə, “Kə jiba kə fə nəŋ ba tə taŋ bidiəŋ bənɨ bɛŋ diə?” 6 Yu nə̀ bi manɨ yu foko Felip ndzɨ yu kɨbɛɛ nə̀ kkɨ fiɔŋ fi yu jiwa yu fə. 7 Felip chi bə yu lə, “Kpəª wu naji ɨ bə́ sɔmbu miɨ wu nɨŋ su díɔ gɨfɛ naji ɨ wu kwətsə tɨmo kə wu naji ɨ bə́ taŋ bidiəŋ bi naji ɨ miɨ chi nə bɔ ntɨŋ keŋkɛ tsəsɨ tsəsɨ.” 8 Wene wu nɨŋ wudɔ yɨ wuhu ji lə Andulu wu nə̀ ji jimə Semon Pita tə bə yu lə, 9 “Wɛŋ wu nɨnsə wudɔ wa mɛ wu na ji bə bəblɛ bətɨŋ bə bíɔsu fiɛ, bəmanɨ fiŋfi naji ɨ fi fə tɨmo la bə ŋgwe yi bɛŋ bənɨ kɨyɛŋ mɛ?” 10 Jisɔs tə lə, “Bə tə̂ bənɨ jimiɛ fəkoso.” Nə̀ ji wɔŋ ji mɨ kɨtso. Bɔ tə, bənɨ ba jimiɛ. Bənɨnsə kwa nə̀ ji nɨ bəntsuku bətɨŋ. 11 Jisɔs ləkə bəblɛ ba ba nya kɨmbafə bə Nyɔ ba jɛchɛ bə bənɨ bə nə̀ jimiɛ ba. Yu fə tɨ ma bə bíɔsu ya. Miɨ chi keŋkɛ nɨ yu nə̀ se. 12 Bɔ diə ba fulu lɨ, yu tə bə beŋ buhu bə nɨŋ'ə lə, “Bə bânchɛ bidiadia bi' shɛkiɛ bia fiɔŋ fidɔ tə kə laa kɨlɔlɔ.” 13 Bəma, bɔ banchɛ bidiadia bi bəblɛ bə bətɨŋ'ə bi nə̀ shəkiə bia, bi yi bəŋka yɔɔ ntse bəfɛ.14 Lə bənɨ ba ŋəŋ fiɔŋ fi na donchɛ buŋga buhu fi yu fəə, bɔ tə lə, “Miɨ no na Miɨ wu Shɔŋ yi Nyɔ wa yɛyi wu nə̀ji lə yu ba mbi no ntɨŋ.” 15 Lə Jisɔs ŋəŋ lə bənɨ ba na tɨ lə bɔ ba kwe yu buŋga lɨ ba memɛ yu Ŋkuŋ wubɔ lɨ, yu fɔ nə bɔ ntɨŋ ba bəndɨ dzo bɨŋ kɨ ji sɔ yu wumbɔŋ.
Jisɔs gəndə ŋgɔŋ bɨŋ
16 Lə kɨ ji fudiɔ, beŋ buhu bə nɨŋ'ə shi ba gəŋ mɨ fə ŋgɔŋ məmbəŋ ma ku 17 ba be kɨkpɔŋkɔ ntɨŋ gbɔ kɨ llɨ bɔ gɨntɨ Kapanaum ɨji kɨbinchi' jimə, Jisɔs bambi kə baha dɨ wu bɔ nə̀ ji wa. 18 Ŋgɔŋ ma gbɔ kɨ mbwaŋka, ndzɨ kɨkumɔ kɨbəŋ nə̀ chɛti lɨ. 19 Lə bɔ kɨ tsakɨ kɨkpɔŋkɔ bɔ llɨ, bɔ gəŋ nɨ bəmai bətɛ makə bəna, bɔ bo ba ŋəŋ Jisɔs wɨ, yu gəndəə ŋgɔŋ bɨŋ yu baa fə kɨkpɔŋkɔ ka ku, nyiŋ kwe bɔ. 20 Bəmanɨ, yu tə bə bɔ lə, “Nyiŋ bəŋ kə̂ kwekɛhɛ. Na mɨ.” 21 Lə bɔ wɔ manɨ, bɔ kɨ laŋkɨ lə bɔ dze yu kɨkpɔŋkɔ ntɨŋ. Kɨsɨkɨ ka, kɨkpɔŋkɔ fɔ ŋgɔŋ nəkpo dɨ wu bɔ nə̀ gɨntɨ.
22 Lə butsu wɔ, bənɨ bə nə̀ shə ba ŋgɔŋ məmbəŋ ma nəwuŋ se lə kɨkpɔŋkɔ kɨ nə̀ ji mɨ nə̀ kwa kɨmo, lə Jisɔs nə̀ kə bekɛ kɨkpɔŋkɔ ka ntɨŋ bə beŋ buhu bə nɨŋ'ə, lə beŋ buhu bə nɨŋ'ə nə̀ dza ba gəŋ kwa bɔ bɔ. 23 Bikpɔŋkɔ bidɔ nə̀ fɔ nə bidia bi Tibɛlias ba llə ba gwɨgwɨ fə dɨ wu Baba nə̀ dzɛɛ wa blɛ ba nya kɨmbafə bə Nyɔ, bənɨ diə. 24 Nɨ bənɨ ba nə̀ ŋəŋə lə Jisɔs makə beŋ buhu bə nɨŋ'ə na sɨŋ mɨ, bɔ bu bekiɛ bikpɔŋkɔ bia ntɨŋ ba llə gəŋ Kapanaum lə bɔ nɔŋ Jisɔs.
Jisɔs na bidiəŋ bi na nya buwəŋ
25 Bɔ gəŋ ba ŋəŋ yu wɨ nɔ nəwuŋ ba bi bə yu lə, “Labay, wə ba sɛŋ tsa yi la?” 26 Jisɔs chi bə bɔ lə, “Ntə bəŋ yɛyi yɛyi lə bə na noŋkɔhɔ mɨ ndzɨ biɔŋ bi na donchɛ bubəŋ bwɛŋ bi bə na ŋɨntɨ mfɨtɨ. Bə na noŋko mɨ ji ndzɨ bə nə diə bəblɛ ba ba fulu lɨ. 27 Bə kə kɨ nɨntɨ lə bə keŋkɛ bidiəŋ bi naji ɨ bi bəfɨ. Bə kɨ nɨntɨ ji lə bə kêŋkɛ bidiəŋ bi na nya buwəŋ bu kəkaha. Bimbi na ji bi Wɛŋ wu Miɨ jiwa yu nya bəŋ. Na yu wu Tɨɨ Nyɔ nə̀ galə kɨbandə kɨhɨ yu bɨŋ bə ntseyɛ lə yu' bɨŋ yu.” 28 Bɔ bi bə yu lə, “Biɔŋ bi kə naji lə kə kɨ fɨtɨ bi donchɛ lə kə na nɨntɨ nɨŋ yi Nyɔ na bi la?” 29 Jisɔs chi bə bɔ lə, “Nɨŋ yi Nyɔ na nyi yi na ji lə bə gâ shəŋ miɨ wu yu' faŋə wɨ.” 30 Bəma bɔ bi bə yu lə, “Fiɔŋ fi na donchɛ bubəŋ bwɔhɔ fi naji ɨ wə fə, fə kə ŋəŋə ba ga shəŋ wə wɨ na la? Fiɔŋ fi naji ɨ wə fə na la? 31 Bətaa baha nə̀ diə mana kpa, ɨji nɨ fi na ji bubɔndɔ lə, ‘Yu nə̀ nya bɔ bidiəŋ bi nə̀ fɔɔ nə bɔ́, bɔ diə.’” 32 Nɨ bɔ tədiə manɨ, Jisɔs chi bə bɔ lə, “Ntə bəŋ yɛyi yɛyi lə nə̀ Mose kə wu nə̀ nya bəŋ bidiəŋ bi nə̀ fɔɔ nə kɨtuŋ kɨ bɔ́ ntɨŋ. Na Taa wu na nya bidiəŋ bi yɛyi bi na foto nə bɔ́. 33 Bə kɨ kkɨ lə bidiəŋ bi Nyɔ lə na bi na ba nə bɔ́ bi nyaa buwəŋ bə bənɨ bə mbi no lə.” 34 Bɔ tə bə yu lə, “Baba, kɨ nya bɨ bidiəŋ biŋ tsá chi.”
35 Jisɔs tə bə bɔ lə, “Na mɨ bidiəŋ bi na nya buwəŋ. Miɨ wu na ba mɨ wɨ naji ɨ dzɔŋ tsu wɔ yu kə. Miɨ wu galə shəŋ mɨ wɨ naji ɨ mbente tsu ba wɔ yu kə. 36 Bəmanɨ ntə bəŋ lə bə' ŋəŋ mɨ wɨ ba jikə galə shəŋ mɨ wɨ. 37 Bənɨ bəchi bə Taa nya mɨ, bɔ jiba ɨ bɔ ba mɨ wɨ. Miɨ wu na ba mɨ wɨ naji ŋkɔŋ yu kə. 38 Mɨ mfɔ nə bɔ́ ba ba sɛŋ koso. Ŋkə mbaha lə mfə fiɔŋ fi nna nse. Mɨ mba lə mfə ji fiɔŋ fi miɨ wu' faŋə mɨ na se. 39 Fiɔŋ fi miɨ wu' faŋə mɨ na se na fiŋ lə, ŋkə nlasə tɨmo miɨ miu nə bənɨ ntɨŋ bə yu nya mɨ, bəmanɨ lə nná ndzakɔ bɔ nə kkpə lɨ butsu bu nəjiŋ. 40 Bə kkə̂ lə fiɔŋ fi Taa na se na fiŋ lə miɨ chi wu ŋəŋə Wene wɨ ba ga shəŋ yu wɨ, yu jiwa yu keŋkɛ buwəŋ bu kəkaha, njiwa ndzakɔ miɨ wa nə kkpə lɨ butsu bu nəjiŋ.”
41 Bəju gbɔ kɨ nuŋɔ tsukɔ yu wɨ ndzɨ yu nə̀ tə lə yu na ji bidiəŋ bi fɔɔ nə bɔ́ ba ba sɛŋ koso. 42 Bɔ nə̀ nuŋɔ manɨ, bɔ bishɛ lə, “No na kə Jisɔs wɛŋ wu Jɔsɛ? Kə na kkəhə bətɨɨ bə mɛni? Ə fə la fɛŋ fə yu na tɨdi lə yu fɔ ji nə bɔ́?” 43 Jisɔs chi bə bɔ lə, “Bə kə kɨ nuŋɔ bəŋbəŋ. 44 Naji ɨ miɨ ba mɨ wɨ kə fiəŋkə lə Taa wu faŋə mɨ' tsutsu yu mɨ wɨ. Njiwa ndzakɔ jimə wa miɨ nə kkpə lɨ butsu bu nəjiŋ. 45 Bənɨ bə shɔŋ yi Nyɔ lə nə̀ bɔndu lə, ‘Nyɔ jiwa yu tɨfiə bɔ bəchi.’ Bəma miɨ chi wu wɔɔ fiɔŋ fi Taa na tɨfiə ba kkə fi, yu jiwa yu ba mɨ wɨ. 46 Nna nchanyɛhɛ mɛ lə miɨ wa su wu nə̀ ŋəŋə Taa wɨ. Na kwa yu wa wu fɔɔ nə fə Nyɔ ku wu nə̀ ŋəŋə Tɨɨ wɨ. 47 Ntə bəŋ yɛyi yɛyi lə, miɨ wu bɨmiə, yu' keŋkɛ buwəŋ bu kəkaha. 48 Nna nji bidiəŋ bi na nya bənɨ buwəŋ. 49 Bəchaa bɛnɨ nə̀ diə mana kpa, bəmanɨ bɔ kkpəyɛ. 50 Bidiəŋ biŋ ji bi fɔɔ nə bɔ́ ba ba lɨ lə ɨ miɨ diə bi ɨ yu tsɔkə kkpəhə. 51 Na mɨ bidiəŋ bi fɔɔ nə bɔ́ bi na nya bənɨ buwəŋ. Ɨ miɨ diə bidiəŋ biŋ, ɨ yu kətə wuwəŋ, bidiəŋ bi njiwa nnya fə bənɨ bə mbi no lə keŋkɛ buwəŋ na gwɨ yɛŋ.”
52 Bəju gbɔ kɨ yimbiɛ bɔ bɔ, bɔ bishɛ lə, “Miɨ no jiwa yu fə nəŋ tə nya gwɨ yihi lə kə diə?” 53 Jisɔs chanyɛ bə bɔ lə, “Ntə bəŋ yɛyi yɛyi lə ɨ bə jikə diəhə gwɨ yi Wɛŋ wu Miɨ ba mu tɨ ŋgwembe muhu, ɨ bə jikə keŋkɛ buwəŋ bəŋ ntɨŋ. 54 Miɨ wu na diɨ gwɨ yɛmɨ, yu mu tɨ ŋgwembe mɛmɨ, yu na keŋkɛ buwəŋ bu kəkaha. Nná ndzakɔ yu nə kkpə lɨ butsu bu nəjiŋ, 55 ndzɨ gwɨ yɛmɨ na bidiəŋ bi mə bidiəŋ, ŋgwembe mɛŋŋ ji bimunɔ bi yɛyi. 56 Miɨ wu na diɨ gwɨ yɛmɨ yu mu tɨ ŋgwembe mɛmɨ yu na ji mɨ ntɨŋ nji tɨ yu ntɨŋ. 57 Taa wu faŋə mɨ na keŋkɛ buwəŋ, ŋkeŋkɛ tɨ buwəŋ ndzɨ Taa. Bəma miɨ wu na diɨ gwɨ yɛmɨ yu jiwa ɨ yu keŋkɛ buwəŋ ndzɨ mɨ. 58 Biŋ bidiəŋ na bi fɔɔ nə bɔ́ ba ba lɨ. Bi na jimiɛhɛ nɨ bi bəchaa bɛnɨ nə̀ diə ba kkpəyɛ lɨ. Miɨ wu na diɨ biŋ bidiəŋ yu jiwa ɨ yu kɨ tsɨ tsá chi.”
59 Jisɔs nə̀ chanyɛɛ biɔŋ biŋ tsa yi yu nə̀ tɨfiəə bənɨ tsɔŋ yi kɨntsɨsɨ ntɨŋ Kapanaum.
Beŋ bə Jisɔs lə bə nɨŋ'ə kɨyɛŋ lətə yu
60 Beŋ bə Jisɔs lə bə nɨŋ'ə kɨyɛŋ wɔ bitɨfiɛ biŋ mɛ ba tə lə, “Nyi nchanyɛ tɛ kɨtso! Naji ɨ yəŋ bɨŋ jimə nyi nchanyɛ?” 61 Bəmanɨ, Jisɔs kkə lə beŋ buhu bə nɨŋ'ə na nuŋɔ bɔ bɔ tsukɔ nchanyɛ nyi wɨ, yu bi bə bɔ lə, “Fiɔŋ fi mɨ nchanyɛ fiŋ' bɨsɨ shəŋ yənɨ? 62 Jilə fi na ji manɨ, ɨ bə tə fə nəŋ fɛŋ tsa yi bə ŋəŋə Wɛŋ wu Miɨ bɨndɨ yu tsu dɨ wu yu nə̀ sa yu ji? 63 Kɨn'yɨntɨ kɨ Nyɔ lə na fiɔŋ fi nya buwəŋ. Nyɛŋ yi gwɨ na keŋkɛhɛ fiɔŋ fi fənə. Nchanyɛ yi nna nchanyɛ nyi bə bəŋ na yi Kɨn'yɨntɨ, ɨji fiɔŋ fi na nya buwəŋ. 64 Bəmanɨ bəŋ bədɔ basu bə kə bɨmiə nchanyɛ ya.” Jisɔs nə̀ chanyɛɛ mɛ ndzɨ yu nə̀ kkɨ bənɨ bə kə galə shəŋ yu wɨ nə mbɛyɛ bɨŋ, yu kkɨ tɨ miɨ wu jiwa yu taŋŋə yu. 65 Yu chi tədiə bə bɔ lə, “Na fiɔŋ fi mɨ nsə nchanyɛ bə bəŋ lə naji ɨ miɨ ba kə mɨ wɨ ɨji Taa nya sɨŋ yu dzə ya.”
66 Nəjiŋ wusu, beŋ buhu bə nɨŋ'ə kɨyɛŋ bu lətə yu ba tsukə gəndə bə yu. 67 Jisɔs bi bə beŋ buhu bə nɨŋ'ə bə yɔɔ ntse bəfɛ lə, “Bəŋ bə bəŋ'ə bə se ba lə bə nundɔ tɨ?” 68 Semon Pita chi bə yu lə, “Baba, kə gɨntɨ tə yəŋ wɨ? Na wə wu na keŋkɛ nchanyɛ yi na nya buwəŋ bu kəkaha, 69 ɨji kə' bɨŋ ba kkə lə na wə wa wu Ntsaaŋ wu fɔɔ nə fə Nyɔ ku.” 70 Jisɔs tə bə bɔ lə, “Ntɨlə na mɨ wu sabiɛ bəŋ bə yɔɔ ntse bəfɛ bɛŋ? Bəmanɨ, miɨ wudɔ nə bəŋ ntɨŋ na tsə.” 71 Jisɔs nə̀ chanyɛɛ manɨ ɨji tsukɔ Judas wɨ, wɛŋ wu Semon Ɛskaliɔt. Yu nə̀ ji kɨntsu kɨ beŋ bə Jisɔs lə bə yɔɔ ntse bəfɛ ntɨŋ, nə̀ yu wu nə̀ji lə yu taŋŋə Jisɔs.