Jisɔs wəmiəsɨ miɨ wu nə̀ gweŋɛ biya mbaatiɛ ntse yaŋ
5
Nəjiŋ wusu kɨgbeyɛ kɨ Bəju lə kɨdɔ nə̀ ji Jɛlosalɛm, Jisɔs bəndɨ sɔ. 2 Fɔŋ wu ŋgɔŋ'ə wudɔ ji sɔ, bə́ tsɨsə wu díɛ yi Hiblu ntɨŋ lə Bɛtɛdza, wu ji gwɨgwɨ fə Fiənsɨ wu Mbaŋ wu Shíŋ'ə ku. Nə̀ ji bə́' wɛyɛ bifufiɛ mɨ bitɨŋ, 3 bənɨ bə gwɨ́ lə nə̀ ba bɔ kɨ ji mɨ kɨyɛŋ, bənyimə, bəŋkpesɛ, bə bənɨ bə nə̀ kkpə dia mo. [Bɔ nə̀ ba bɔ kɨ me mɨ bɔ wokɔ tsa yi ŋgɔŋ ma nɨkə. 4 Nchinda wu Baba wudɔ nə̀ ba yu kɨ ba tsa lɨ tsa lɨ, yu beke, yu nɨkə ŋgɔŋ ma. Miɨ wu fiəfiə wu saa ba be sɔ tsa yi nchinda wa' nɨkə ŋgɔŋ ma, tə yu jiwa ɨ yu wəmiə nə gwɨ yihi lɨ, ma yi ji tɨmo nəŋ.]ª 5 Miɨ wudɔ nə̀ ji mɨ ɨji yu' gweŋ biya mbaatiɛ ntse yaŋ. 6 Lə Jisɔs ba ŋəŋ yu wɨ mɨ, yu kkə lə yu nə̀ jiŋ mɨ kɨtso, yu bi bə yu lə, “Wə na se lə wə wəmiə?” 7 Miɨ wu gwɨ wa chi lə, “Miɨ wubəŋ, nna nsɨŋ bə miɨ wu naji ɨ yu chɛse mɨ ŋgɔŋ mɛŋ ntɨŋ tsa yi mɔ' nɨkə. Na ba ji tsa yi mɔ na nɨkə, ndze kɨ gɨntɨ lə mbe, kɨ ji miɨ wudɔ' sa ba be nə mɨ lɨ.” 8 Jisɔs tə bə yu lə, “Dzâ wə, dzê kɨga kɔhɔ wə kɨ gɨntɨ.” 9 Kɨsɨkɨ ka, miɨ wa bu wəmiə, yu dza ba dze kɨga kɨhɨ kɨ gɨntɨ.Nə̀ ji butsu bwa ji butsu bu fufiɛ. 10 Bəju tə bə miɨ wu bə́ nə̀ wəmiəsɨ wa lə, “Ndɛŋ na butsu bu fufiɛ, kɨlaŋ kə bɨmiə lə wə tɔ kɨga kɔhɔ.” 11 Yu chi bə bɔ lə, “Miɨ wu sə wəmiəsɨ wa mɨ sə tə lə ndze kɨga kɛmɨ ŋkɨ ŋgɨntɨ.” 12 Bɔ bi bə yu lə, “Na yəŋ wa wu sə tədiə bə wə lə wə dze kɨga kɔhɔ wə kɨ gɨntɨ?” 13 Miɨ wu bə́ nə̀ wəmiəsɨ wa nə̀ kkəhə tɨmo miɨ wu wəmiəsɨ wa yu, ndzɨ nə̀ ji Jisɔs' dza ba be gəŋ kɨntɨŋ kɨntɨŋ kɨ kɨntsu kɨ bənɨ lə kɨ nə̀ ji mɨ.
14 Nəjiŋ wusu, Jisɔs ŋəŋ yu wɨ mbaŋ wu tsɔŋ yi bintɔfiɛ ntɨŋ ba tə bə yu lə, “Bô ŋəŋ nɨ wə wəmiə. Wə kə̂ tsɔhɔ fəə bubiə. Ɨ wə fə lɨ, ɨ fiɔŋ fidɔ tɨchə wə fi na yakɨ fiŋ.” 15 Miɨ wa dza ba gəŋ tə bə Bəju lə na Jisɔs wu sə wəmiəsɨ yu. 16 Bəju tə gbɔ kɨ sesɛ gbo Jisɔs nəjiŋ, ndzɨ yu nə̀ wəmiəsɨ miɨ no ji butsu bu fufiɛ. 17 Jisɔs tə bə bɔ lə, “Taa na ba yu kɨ nɨntɨ tsá chi, nnɨntɨ manɨ tɨ.” 18 Nchanyɛ nyi fə Bəju kanə sɛ kɨtso lə bɔ kkpɨsɨ yu, ndzɨ nə̀ kə kwa lə yu nə̀ bunchi kɨlaŋ kɨ butsu bu fufiɛ lə, yu nə̀ tsɨsə tɨ Nyɔ lə Tɨɨ, yu fɨkə gwɨ yihi lə yu na ji diəŋ bə Nyɔ.
Buŋga bu Nyɔ nya bə Wene
19 Jisɔs tə bə bɔ lə, “Ntə bəŋ yɛyi yɛyi lə Wɛŋ naji ɨ yu kɨ fɨtɨ fiɔŋ nə buŋga buhu ntɨŋ kə. Yu ba yu kɨ fɨtɨ kwa ji fiɔŋ fi yu' ŋəŋə Tɨɨ fɨtɨ. Fiɔŋ fi Tɨɨ na fɨtɨ, na tɨ fi fi Wene na fɨtɨ, 20 ndzɨ Tɨɨ wa' laŋ Wene ba donchɛ yu biɔŋ bichi bi yu wu Tɨɨ na fɨtɨ. Yu bambi lə yu donchɛ yu biɔŋ bi na yakɨ biŋ, yu kɨ fɨtɨ bə ŋɨntɨ, kɨgəsə wɨntɨ bəŋ. 21 Nɨ Tɨɨ wa na dzakɔ bənɨ nə kkpə lɨ yu nyaa bɔ buwəŋ, na tɨ diəŋ nɨ Wene na nya buwəŋ bə miɨ chi wu yu na se. 22 Bə n'yinə su, Tɨɨ na sakəhə miɨ wudɔ. Yu' nya nsa chi ji Wene kaŋ, 23 fə bənɨ bəchi kɨ kuntə Wene diəŋ nɨ bɔ na kuntə Tɨɨ. Ɨ miɨ na kuntəhə Wene wa, kɨ ji tɨ lə yu na kuntəhə Tɨɨ wu faŋə wa yu.
24 Ntə bəŋ yɛyi yɛyi lə miɨ wu wɔɔ diɛ yɛmɨ ba bɨŋ bə miɨ wu faŋə mɨ, yu' keŋkɛ buwəŋ bu kəkaha. Wa miɨ naji ɨ bə́ tsu ba sa yu kə, yu' fɔ nə kkpə kaŋ ba be buwəŋ ntɨŋ. 25 Ntə bəŋ yɛyi yɛyi lə tsa ba ya, yi' ba, yi bənɨ bəŋkkpə jiba bɔ wɔ diɛ yi Wɛŋ wu Nyɔ, bə wɔɔ ba jiba bɔ keŋkɛ buwəŋ. 26 Fi ji manɨ ndzɨ nɨ buwəŋ na foto nə Tɨɨ wɨ, na tɨ diəŋ nɨ yu nya buŋga bwa bə Wene lə buwəŋ kɨ foto tɨ nə yu wɨ. 27 Yu nya tɨ buŋga bə Wɛŋ lə yu kɨ kɨmbɨ bənsa, ndzɨ yu na ji Wɛŋ wu Miɨ.
28 Kɨgəsə kə kɨ wɨntɨ bəŋ bə fiŋ. Tsa ba ya yi bənɨ bəchi bə na ji dzə́ŋ ntɨŋ ná wɔɔ diɛ yihi, 29 ba fɔ nə dzə́ŋ ya ntɨŋ, ɨ bə nə̀ fɨtɨ biɔŋ bi ndzeŋe fɔ ba be buwəŋ ntɨŋ, ɨ bə nə̀ fɨtɨ biɔŋ bibiə fɔ ɨ bə́ sa bɔ, ɨ bɔ gbɔ nsa. 30 Fiɔŋ na sɨŋ su fi naji mfə nə buŋga bwɛŋ ntɨŋ. Nsakɨ nsa mbiəlɨ nɨ nna ŋ'woko, dzə́ yi nna ŋkɨmbɨ ji yi diəŋ, ndzɨ nsɛhɛ mfə fiɔŋ ji nə kɨnse kɛŋ ntɨŋ. Mba ŋkɨ mfɨtɨ ji fiɔŋ fi miɨ wu faŋə mɨ na se.
Biɔŋ bi na donchɛ miɨ wu Jisɔs ji yu lɨ
31 Jilə nna nlɨmi nsa yɛmɨ nəjiŋ, tə fiɔŋ fi nna nchanyɛ na jimiɛhɛ diəŋ. 32 Bəmanɨ, miɨ wudɔ wa su wu na lɨmi nsa yɛmɨ nəjiŋ, ŋkkɨ lə fiɔŋ fi yu na chanyɛ tsukɔ mɨ wɨ na yɛyi. 33 Bə nə̀ faŋ bənɨ Jɔŋ'ɨ, yu gəŋ ləŋ nsa tsukɔ kɨyɛyi wɨ. 34 Fi na jimiɛhɛ lə nna nse lə miɨbəwəŋ chanyɛ tsukɔ miɨ wu nna nji yu lɨ. Bəmanɨ, nna nchanyɛ mɛ fə bə fɔɔfo. 35 Jɔŋ nə̀ ji nɨ kɨbɨlə kɨ bə́' bɨlə, kɨ kɨ tsalə kɨ nyaa kɨŋgbooŋ, bə jiŋ kɨŋgbooŋ kɨhɨ ntɨŋ kwa tsa ntɨŋ tsəsɨ bə kɨnlaŋ. 36 Fiɔŋ fidɔ fia su fi na donchɛ miɨ wu nna nji yu lɨ fi yakɨ Jɔŋ. Fi na ji lə, nɨŋ yi Taa nya lə nnɨŋ ba kanə lɨ na biɔŋ bi nna mfɨtɨ biŋ bi donchɛ lə na Taa wu faŋə mɨ. 37 Taa wu faŋə wa mɨ kɨbɛɛ na tɨ yu wu na lɨmi nsa yɛmɨ nəjiŋ. Bə kə saa wɔ diɛ yihi kə, bə kə saa ŋəŋ tɨ nɨ yu ji. 38 Bə na keŋkɛhɛ tɨ diɛ yihi bəŋ shəŋ, ndzɨ bə kə galə shəŋ miɨ wu yu' faŋə wɨ. 39 Bə na chənə Kɨŋwatɨ kɨ Nyɔ lə ndzɨ bə na gɔmbiɛ lə na sɔ wu bə ná keŋkɛ fiɔŋ fi ná fəə lə bə keŋkɛ buwəŋ bu kəkaha. Fiɔŋ fi na ji Kɨŋwatɨ kɨŋ ntɨŋ na chanyɛ ji tsukɔ mɨ wɨ. 40 Bəmanɨ, bə tsu bə nɨnntɨ mba mɨ wɨ lə bə keŋkɛ buwəŋ.
41 Nna nsɛhɛ bubəŋ bu na foto ji nə miɨbəwəŋ'ɨ. 42 Bəmanɨ nna ŋkkɨ bəŋ. Nna Ŋkkɨ lɨ lə bə na keŋkɛhɛ kɨnse kɨ Nyɔ lə bəŋ shəŋ. 43 Mɨ mba yɨ wu Taa lə lɨ, bə jikə ləkə mɨ. Tə sə ba miɨ wudɔ yɨ wuhu lɨ, tə kɨ ji wa miɨ wu bə tə ləkə. 44 Naji ɨ bə fə nəŋ tə bɨŋ mɨ, ɨji bə ji bənɨ bə na noŋko bubəŋ bu fɔɔ nə gwɨ́ yɛnɨ wɨ, bə jikə nɔŋkɔhɔ bubəŋ bu na foto ji nə Nyɔ wu na ka kwa yu lɨ. 45 Bə kə kɨ gɔmbiɛ lə na mɨ wu ná kɨ tseyɛ fiə yɛnɨ yibiə bə Taa. Na Mose wu bə galə bufɨ yu wɨ wu na tseyɛ fiə yɛnɨ bə Taa. 46 Bə tə nə̀ bɨŋ bə Mose yɛyi, bə tə bɨŋ bə mɨ ndzɨ yu nə̀ bɔndu ji tsukɔ mɨ wɨ. 47 Bəmanɨ nɨ bə kə bɨmiə tɨmo biɔŋ bi yu nə̀ bɔndɔ, naji ɨ bə fə nəŋ tə bɨŋ fiɔŋ fi nna nchanyɛ?”