Jisɔs bə kpansɨ wudɔ wu Samaliya bɨkənɨ fə fɔŋ wu ŋgɔŋ'ə ku
4
Jisɔs kkə lə Bəfalasi sə wɔ lə yu na fɨtɨ bənɨ bə nɨŋ'ə baa yu wɨ, yu chɛsɛ bɔ biɔ yu yakɨ Jɔŋ. 2 Bəmanɨ nə̀ tɨmo yu wu nə̀ chɛsɛ bɔ biɔ kə, nə̀ kwa beŋ buhu bə nɨŋ'ə bə nə̀ chɛsɛ. 3 Lə yu kkə manɨ, yu dza nə sha yi Judɛya ya ntɨŋ kɨ tsu Galili. 4 Yu nə̀ji lə yu chɛ sha yi Samaliya ntɨŋ. 5 Yu gəŋ fɔ kɨtuŋ kɨ Samaliya kɨdɔ ntɨŋ bə́ tsɨsə lə Sika, kɨ ji gwɨgwɨ fə kə wu Jakɔ nə̀ nya bə wene Jɔsɛ. 6 Fɔŋ wu ŋgɔŋ'ə wu Jakɔ nə̀ chiŋɛ nə̀ ji mɨ. Lə Jisɔs gəndə ba fuŋ'ɨ, yu jiŋ gwɨgwɨ fə fɔŋ wa ku. Tsa nə̀ ji nɨ tsá yɔɔ ntse fiɛ bbushə.7 Kpansɨ wudɔ nə sɔ Samaliya dza ba ba lə yu kpa ŋgɔŋ mɨ, Jisɔs tə bə yu lə, “Nyâ mɨ ŋgɔŋ mmu.” 8 Nə̀ ji beŋ bə nɨŋ'ə bə Jisɔs lə sə gəŋ toko lə bɔ gəŋ taŋ bidiəŋ. 9 Kpansɨ wa bi bə Jisɔs lə, “Wə na ji Miɨbəju, nji miɨ Bəsamalita, ə fə la lə wə kɨ nende ŋgɔŋ nə mɨ lɨ?” Kpansɨ wa nə̀ tɨdi manɨ ndzɨ Bəju nə̀ ba bɔ kɨ nyənə Bəsamalita. 10 Jisɔs chi bə yu lə, “Wə tə na kkɨ kɨnya kɨ Nyɔ lə, makə miɨ wu na tɨdi wa bə wə lə wə nya yu ŋgɔŋ, wə tə nende yu lə yu nya wə ŋgɔŋ mə na shichi tsá chi.” 11 Kpansɨ wa fichə ba bi bə Jisɔs lə, “Miɨ wubəŋ, wə na sɨŋ bə fiɔŋ fi kpanə ŋgɔŋ su, ɨji fɔŋ wuŋ dzumbi mɛ, wə jiwa wə dze ma ŋgɔŋ mə na jikə kaha nə məŋ? 12 Kɨjilə wə na ko wə yakɨ taa waha Jakɔ wu nə̀ chiŋɛ wa fɔŋ wu ŋgɔŋ'ə wuŋ ba ga bɨ lɨ, ɨji yu kɨbɛɛ bə beŋ buhu bə nyɛ́ŋ yihi nə̀ muu ŋgɔŋ nə nɔ?” 13 Jisɔs chi bə yu lə, “Miɨ chi wu jiwa yu mu ŋgɔŋ mɛŋ, mbente jiwa wu chisə wɔ yu. 14 Bəmanɨ, ma yəŋ wu jiwa yu mu nə ŋgɔŋ mə njiwa nnya wɨ, naji ɨ mbente tsu ba wɔ yu kə. Ŋgɔŋ mə njiwa nnya yu, mɔ ná tsu tsambo yi na foto nə yu wɨ tsá chi, sɨŋsɨŋ ɨ mɔ ná nya yu buwəŋ bu kəkaha.” 15 Kpansɨ wa tə bə Jisɔs lə, “Miɨ wubəŋ, nyâ mɨ jimə ma ŋgɔŋ fə mbente tsɔ kə kɨ wo mɨ, ntsu kə baha mɛ ŋgɔŋ tɔɔ.”
16 Jisɔs tə bə yu lə, “Gə̂ŋ bəndɨ nya bəŋ bə yu bə ba.” 17 Kpansɨ wa chi bə yu lə, “Nna nsɨŋ bə nyunso.” Jisɔs tə bə yu lə, “Wə chanyɛ diəŋ nɨ wə tədiə lə wə na sɨŋ bə nyunso. 18 Wə jiŋ bə bənɨnsə bətɨŋ, wu bəŋ bə yu na ji fɛŋ na tɨmo nya kə. Fiɔŋ fi wə chanyɛ na yɛyi.” 19 Kpansɨ wa tə bə Jisɔs lə, “Miɨ wubəŋ, mɨ ŋŋəŋ fɛŋ lə wə na ji miɨ wu shɔŋ yi Nyɔ. 20 Bətaa baha nə̀ ba bɔ kɨ tsɨsə Nyɔ dzo nyi bɨŋ, bəŋ Bəju tɨdi yɛnɨ lə dɨ wu bənɨ naji lə bɔ kɨ tsɨsə Nyɔ na kwa Jɛlosalɛm.” 21 Jisɔs chi bə yu lə, “Kpansɨ, bɨ̂ŋ fiɔŋ fi nna ntɨdi fiŋ. Tsa ba ya yi bə jiba bə kɨ tsɨsə Taa waha Nyɔ ə jikə jimiɛ dzo nyi bɨŋ makə Jɛlosalɛm. 22 Bəŋ bənɨ bə Samaliya na tsɨsə bə fiɔŋ fi bə na ji fi kə kkə, bɨ Bəju kə na tsɨsə kə kkɨ fiɔŋ fi kə na tsɨsə bə fi, ndzɨ mfɔ yi fo na ba ji nə Bəju wɨ. 23 Bəmanɨ, tsa ba ya, yi ya mɛ fɛŋ yi bənɨ bə yɛyi bə na tsɨsə Nyɔ jiba bɔ kɨ tsɨsə Nyɔ kɨn'yɨntɨ ntɨŋ bə kɨyɛyi. Na ŋgwe yi bənɨ bə Taa waha Nyɔ na se lə bɔ kɨ tsɨsə bə yu. 24 Nyɔ na ji Kɨn'yɨntɨ, bənɨ bə na tsɨsə bə yu naji lə bɔ kɨ tsɨsə kɨn'yɨntɨ ntɨŋ bə kɨyɛyi.” 25 Kpansɨ wa tə bə Jisɔs lə, “Nna ŋkkɨ lə Nchitə wu Nyɔ nə̀ kaa wa ba wa, bə́ tsɨsə yu lə Klistu. Tsa yi yu ná ba, ɨ yu nachɛ bɨ biɔŋ bichi.” 26 Jisɔs tə bə yu lə, “Mɨ wu nna nchanyɛ no bə wə na mɨ yu.”
27 Mɨ tsa ya bɨŋ, beŋ bə Jisɔs lə bə nɨŋ'ə fichə ba ba lɨ. Kɨgəsə wɨŋ bɔ lə yu na chanyɛ bə miɨ kpansɨ. Bəmanɨ, miɨ wudɔ nə bɔ ntɨŋ jikə biɛhɛ bə yu lə, “Wə na se la?” Makə lə, “Wə na chanyɛ bə kpansɨ wa ndzɨ la?” 28 Kpansɨ wa bu shə kpənsɨ wuhu wu ŋgɔŋ'ə wa mɨ ba gəŋ toko ba tə bə bənɨ lə, 29 “Bə bâ ŋəŋ miɨ wudɔ wu ba ba tə mɨ fiɔŋ fichi fi nnə̀ mfəə. Naji ɨ kɨ ji miɨ no ji Nchitə wu Nyɔ nə̀ kaa wa?” 30 Bənɨ fɔ nə kɨtuŋ ka ntɨŋ kɨ gɨntɨ fə Jisɔs ku.
31 Nə̀ ji beŋ bə nɨŋ'ə bə Jisɔs lə' shə kɨ nende Jisɔs bɔ tɨdi bə yu lə, “Labay, dîə la.” 32 Bəmanɨ, Jisɔs chi bə bɔ lə, “Nna ŋkeŋkɛ bidiəŋ bi diənə bi bə na kkəhə bi.” 33 Beŋ buhu bə nɨŋ'ə kpə maa lə, “Miɨ wudɔ sə shə ba ba yu bə bidiəŋ maa?” 34 Jisɔs tə bə bɔ lə, “Bidiəŋ biɛŋ na lə ŋkɨ mfɨtɨ fiɔŋ fi miɨ wu' faŋə mɨ na se ba kanə nɨŋ yihi chi. 35 Ntɨlə bə na tɨdi yənɨ lə, ‘Ə shə fiə nna lə kɨ ji tsa yi banchɛ?’ Ntə bəŋ lə, bə tɔ̂ yəsɨ bɔ́ bə bo, bə ŋə̂ŋ nɨ bidiəŋ tɛɛ kə́ lɨ lə bə́ banchɛ. 36 Miɨ wu banchɛ na keŋkɛ bikwəntsə bihi, yu banchɛ bidiəŋ yu galɨ buwəŋ bu kəkaha lɨ, fə miɨ wu tishɛ bə miɨ wu banchɛ kɨ ji bə kɨnlaŋ. 37 Fiŋfi na donchɛ lə ŋgaŋ wu na tɨdi no lə, ‘Miɨ wudɔ ba yu tishɛ, wudɔ banchɛ, na yɛyi.’ 38 Mɨ mfaŋ bəŋ lə bə gəŋ banchɛ bidiəŋ bi bə nə̀ kə nɨŋkə. Bənɨ bədɔ nə̀ nɨŋ, bə diə mbɨ wu funyi wubɔlə.”
Bənɨ bə Samaliya kɨyɛŋ ga shəŋ Jisɔs wɨ
39 Bənɨ bə Samaliya kɨyɛŋ nə̀ ga shəŋ Jisɔs wɨ ndzɨ fiɔŋ fi kpansɨ wa nə̀ chanyɛ bə bɔ lə, “Yu sə tə mɨ fiɔŋ fichi fi nnə̀ mfəə.” 40 Bəma bɔ ba ba ŋəŋ Jisɔs ba nende yu lə yu gəŋ jiŋ bə bɔ. Yu bɨŋ ba gəŋ jiŋ díɔ fɛ bə bɔ. 41 Bənɨ kɨyɛŋ chi galə shəŋ Jisɔs wɨ ndzɨ nchanyɛ yihi. 42 Bənɨ ba tə bə kpansɨ wa lə, “Kə ga shəŋ yu wɨ ɨ jikə jimiɛ ndzɨ nchanyɛ yɔhɔ. Kə' wɔ tɨ bə bitiu biaha ba kkə lə miɨ no na Nchitə wu mbi no wu yɛyi.”
Jisɔs wəmiəsɨ wɛŋ wu miɨ wubəŋ
43 Lə díɔ ya fɛ chɛ, Jisɔs dza kɨ gɨntɨ Galili. 44 Nə̀ ji yu kɨbɛɛ' sa tə lə bə́ ba bə́ jikə kɨ kuntə miɨ wu shɔŋ yi Nyɔ kɨtuŋ kɨhɨ ntɨŋ. 45 Lə yu gəŋ fɔ Galili, bənɨ bə sɔ ləkə yu ndzɨ bɔ nə̀ ŋəŋ biɔŋ bi yu nə̀ fəə mɨ kɨgbeyɛ kɨ Jɛlosalɛm ntɨŋ, ndzɨ bɔ nə̀ ji tɨ mɨ kɨgbeyɛ ka ntɨŋ.
46 Jisɔs chi tsɔ Kana sha yi Galili ntɨŋ dɨ wu yu nə̀ fəə wa ŋgɔŋ mɔ tsu mbiŋ. Nə̀ ji miɨ wubəŋ wudɔ ji kɨtuŋ kɨ Kapanaum ntɨŋ, wene wu nɨnsə gwente. 47 Lə miɨ wubəŋ wa wɔ lə Jisɔs' dza nə Judɛya ba ba Galili, yu gəŋ mɨ yu lɨ ba ku kaŋ lə Jisɔs shi ba ba lɨ, yu ba wəmiəsɨ wene, lə wene wa shə nchitə bɨŋ. 48 Jisɔs tə bə yu lə, “Ɨ bə kə ŋəŋkəhə biɔŋ bi na donchɛ bubəŋ bu Nyɔ lə, ba ŋəŋ tɨ biɔŋ bi kɨgəsə kɨ wɨŋə lə, ɨ bə jikə galə shəŋ mɨ wɨ.” 49 Miɨ wubəŋ wa tə bə yu lə, “Miɨ wubəŋ, bâ la kə kɨ shichi, wɛnɛ tə kə kkpə.” 50 Jisɔs chi bə yu lə, “Kɨ gɨntɨ, wana jiwa yu diə buwəŋ.” Miɨ wa bɨŋ fiɔŋ fi Jisɔs nə̀ chanyɛ bə yu, yu bu dza kɨ gɨntɨ. 51 Nɨ yu nə̀ shichi, bɔ bə beŋ buhu bə nɨŋ'ə bɨkənɨ, bɔ tə bə yu lə wene wa' wəmiə. 52 Yu bi bə bɔ tsa yi wene wa nə gbɔɔ ŋ'wəmiə. Bɔ tə bə yu lə, “Nə̀ fəkwəŋ gɨntɨ nɨ tsa bɨŋ miu bbushə, fiəfɨ ya bu shə yu.” 53 Chɛ wɛŋ wa bu se lə na tɨ tsa ya wɨ yi Jisɔs nə̀ tədiə bə yu lə, “Wana jiwa yu diə buwəŋ.” Yu bə kɨtsɔŋ kɨhɨ kɨchi bu ga shəŋ Jisɔs wɨ. 54 Fiɔŋ fi na donchɛ fiŋ bubəŋ bu Jisɔs lə nə̀ fi tsá fiɛ bɨŋ fi yu nə̀ fəə tsa yi yu nə̀ fɔɔ nə Judɛya ba ba Galili.