Jisɔs chanyɛ bə Nikɔdɛmus kɨ mbɛyɛ yifa lə
3
Miɨ wudɔ nə kɨntsu kɨ Bəfalasi lə ntɨŋ nə̀ ji su bə́ tsɨsə yu lə Nikɔdɛmus, yu ji miɨ nə fó yi kɨtuŋ kɨ Bəju lə ntɨŋ. 2 Miɨ no ba fə Jisɔs ku bbutsu ba tə bə yu lə, “Labay, kə na kkɨ lɨ lə wə na ji Miɨ wu Bitɨfiə wu fɔɔ nə fə Nyɔ ku, ndzɨ miɨ na sɨŋ wu naji ɨ yu kɨ fɨtɨ ŋgwe yi biŋ biɔŋ bi na donchɛ bubəŋ bu Nyɔ lə bi wə na fɨtɨ biŋ Nyɔ jikə jimiɛ bə yu.” 3 Jisɔs chi bə yu lə, “Ntə wə yɛyi yɛyi lə, ɨ bə́ kə bɛyɛ miɨ mbɛyɛ yifa, ɨ miɨ wa jikə ŋəŋkəhə buŋkuŋ bu Nyɔ lə wɨ.” 4 Nikɔdɛmus bi bə Jisɔs lə, “Naji ɨ bə́ fə nəŋ tə chi bɛyɛ miɨ ɨji yu' tɛ mɛ? Naji ɨ yu tsu mɛni shəŋ ɨ mɛni chi bɛyɛ yu?” 5 Jisɔs chi bə yu lə, “Ntə wə yɛyi yɛyi lə, jilə miɨ kə keŋkɛ mbɛyɛ yi ŋgɔŋ bə yi Kɨn'yɨntɨ, tə naji ɨ yu be buŋkuŋ bu Nyɔ lə ntɨŋ kə. 6 Miɨbəwəŋ na bɛyɛ miɨbəwəŋ, Kɨn'yɨntɨ bɛyɛ kɨn'yɨntɨ. 7 Kɨgəsə kə kɨ wɨntɨ wə lə mɨ ntə bə wə lə bə́ naji lə bə́ bɛyɛ bəŋ bəchi mbɛyɛ yifa. 8 Fiəfɨ ba yi kɨ foŋko nɨ yi na se, wə gəŋ wə kɨ woko nɨ yi na foŋko, bəmanɨ naji ɨ wə tə dɨ wu yi fɔɔ makə dɨ wu yi na gɨntɨ kə. Na tɨ diəŋ nɨ fi na ji bə miɨ wu na keŋkɛ mbɛyɛ yi Kɨn'yɨntɨ.”9 Nikɔdɛmus masə lə, “Naji ɨ fiŋfi gəndə nəŋɨlɨ?” 10 Jisɔs chi bə yu lə, “Wə na ji miɨ wu bitɨfiə wu bənɨ bə Isla, wə ji fiŋ kə kkə? 11 Ntə wə yɛyi yɛyi lə, kə na chanyɛ ji fiɔŋ fi kə na kkɨ, kə lɨmi ji nsa yi fiɔŋ fi kə' ŋəŋə, bəmanɨ bə jikə bɨmiə fiɔŋ fi kə na chanyɛ. 12 Jilə nna ntɨdi bəŋ biɔŋ bi sɛŋ koso bə mbɨŋ sɨŋ, ɨ bə fə nəŋ ba tə bɨŋ'ɨ tsa yi ntədiə bəŋ ji bi kɨtuŋ kɨ Nyɔ lə? 13 Miɨ na sɨŋ su wu nə̀ bəndə Nyɔ ku. Na kwa miɨ wu nə̀ fɔɔ nə mɨ ba shi sɛŋ koso, ɨji miɨ no ji Wɛŋ wu Miɨ. 14 Nɨ Mose nə̀ tiyɛ ye kɨtɨ wɨ kpa yi bə́ nə̀ fəə bə kɨdəŋkə, na tɨ diəŋ nɨ bə́ jiba bə́ tiyɛ Wɛŋ wu Miɨ, 15 lə ma yəŋ wu galə shəŋ yu wɨ, ɨ yu keŋkɛ buwəŋ bu kəkaha.
16 Nyɔ nə̀ laŋ mbi no kɨtso, bəma yu faŋ Wene wu na ka kwa yu lɨ, lə ma yəŋ wu galə shəŋ yu wɨ, ɨ miɨ wa jikə kkpəhə, ɨ yu keŋkɛ ji buwəŋ bu kəkaha. 17 Nyɔ nə̀ kə faŋkəhə Wene mbi no ntɨŋ lə yu ba jishi mbi. Yu nə̀ faŋ lə ma mbi foto fo.
18 Miɨ wu galə shəŋ yu wɨ naji ɨ yu gbɔ nsa kə. Bəmanɨ miɨ wu kə galə shəŋ yu wɨ, yu' gbɔ nsa ndzɨ yu kə galə shəŋ yɨ wu Wɛŋ wu Nyɔ lə wɨ wu na ka kwa yu lɨ. 19 Bə́ ná kɨmbɨ nsa dzə nyi ntɨŋ, ndzɨ kɨŋgbooŋ' ba mbi ntɨŋ, bənɨ tsu kɨ laŋkɨ fibɔlə ji kɨjuwɔ. Bɔ laŋkɨ manɨ ndzɨ fiə wubɔlə na ji wubiə. 20 Miɨ chi wu na fɨtɨ fiə wubiə ba kɨ jikə sɛhɛ kɨŋgbooŋ. Yu sɛhɛ mfɔ dɨ wu kɨŋgbooŋ ji ndzɨ fiə wuhu tə kə yinshɛ ŋgbooŋ. 21 Bəmanɨ miɨ wu na fɨtɨ fiɔŋ fi diəŋ ba kɨ ba fə kɨŋgbooŋ ku, fə wuhu fiə kɨ yinshi lə na wu miɨ wu Nyɔ lə.”
Jɔŋ tə lə Jisɔs na ko ba ya yu
22 Nəjiŋ wusu, Jisɔs bə beŋ buhu bə nɨŋ'ə dza ba gəŋ kɨtuŋ kɨdɔ ntɨŋ sha yi Judɛya ntɨŋ. Bɔ gəŋ kɨ ji sɔ yu chɛsɛ bənɨ biɔ. 23 Jɔŋ nə̀ chɛsɛ tɨ bənɨ biɔ kɨtuŋ kɨ Ɛnɔn ntɨŋ, gwɨgwɨ fə Salim ku ndzɨ ŋgɔŋ nə̀ ji mɨ kɨtso. Bənɨ baa yu chɛsɛ bɔ biɔ. 24 Tsa ya nə̀ ji bə́ bambi kə galə yu tsɔŋ yi buŋfia ntɨŋ.
25 Beŋ bə Jɔŋ'ə bə nɨŋ'ə bədɔ bə Miɨbəju wudɔ dza ba gbɔ yímbiɛ tsukɔ gwɨ́ yi bə́ na wwo wɨ lə bə́ kɨ ji ntsaaŋ Nyɔ yəsɨ. 26 Beŋ bə nɨŋ'ə bə Jɔŋ'ə dza ba gəŋ fə Jɔŋ ku ba tə bə yu lə, “Labay, miɨ wu nə̀ ji wa bə wə Kɨnchɛŋ kɨ Jɔdan nəwuŋ, wu wə nə̀ chanyɛɛ wa kɨhɨ wa wu na chɛsɛ bənɨ biɔ, bənɨ bəchi gɨntɨ yu wɨ.” 27 Jɔŋ chi bə bɔ lə, “Naji ɨ miɨ kɨ ji fiɔŋ'ɨ ɨjikə jimiə mfə yi Nyɔ lə yu kɨ ji fi lɨ kə. 28 Bəŋ kɨbɛɛ naji ɨ bə ləŋ nsa yɛmɨ nəjiŋ lə nnə̀ ntə lə nna njimiɛhɛ Nchitə wu Nyɔ nə̀ kaa wa. Bəmanɨ bə́ nə̀ faŋ mɨ lə nsa yu fiə. 29 Na nomə kpansɨ wufa wu na keŋkɛ kpansɨ. Nsɨnə nomo wa wu na lɨmi fə yu ku yu woko diɛ yihi, yu ba yu kɨ laŋkɨ kɨtso nɨ yu na woko diɛ ya. Na tɨ diəŋ nɨ nna nji fɛŋ mɨ n'yi bə kɨnlaŋ. 30 Yu naji lə yu kɔ ba gəŋ fiə, ntsu tə jiŋ.
31 Miɨ wu' fɔɔ nə bɔ́ na ko ba ya bənɨ bəchi. Miɨ wu sɛŋ koso ji miɨ wu sɛŋ koso, yu chanyɛɛ kwa ji biɔŋ bi sɛŋ koso. Miɨ wu' fɔɔ nə bɔ́ na ko ba ya bənɨ bəchi, 32 yu lɨmi nsa nəjiŋ ɨji yi yu' ŋəŋə ba wɔ lɨ. Bəmanɨ, miɨ na sɨŋ su wu na bɨmi fiɔŋ fi yu na chanyɛ. 33 Miɨ wu na bɨmi fiɔŋ fi yu na chanyɛ na wu na donchɛ lə yu na tambi fiɔŋ fia lə Nyɔ na tɨdi kɨyɛyi. 34 Miɨ wu Nyɔ' faŋə ba yu kɨ chanyɛ kwa ji diɛ yi Nyɔ ndzɨ Nyɔ' nya yu Kɨn'yɨntɨ kɨhɨ mfɨkə ji su sɨŋ. 35 Chɛ Wɛŋ' laŋ Wɛŋ ba nya biɔŋ bichi yu kaŋ. 36 Miɨ wu galə shəŋ Wɛŋ wɨ, yu jiwa ɨ yu keŋkɛ buwəŋ bu kəkaha. Miɨ wu jɛkə wɔkɔhɔ bə yu, ɨ yu jikə keŋkɛ buwəŋ. Nyɔ na lo bə wa miɨ kɨtso.”