Jisɔs be Jɛlosalɛm nɨ Ŋkuŋ
11
Jisɔs bə beŋ buhu bə nɨŋ'ə kɨ gɨntɨ gwɨgwɨ fə Jɛlosalɛm ku, bɔ gɨntɨ fɔɔ kɨtuŋ kɨ Bɛtfash bə kɨ Bɛtani, bi na ji gwɨgwɨ fə Dzo yi Bitɨ bi Ɔlif lə ku, yu tsɔ beŋ buhu bə nɨŋ'ə bəfɛ ba faŋ'ɨ 2 ba tə bə bɔ lə, “Bə gə̂ŋ kɨtuŋ ka ntɨŋ sa fiə. Tsa yi bə kɨ beke sɔ tɨmɛ, bə jiba bə ŋəŋ wɛŋ wu sɔmbwa wɨ, bə́' su, ɨji miɨ kə saa bəndɨ yu bɨŋ, bə yanshɛ ba ba bə yu. 3 Ɨ miɨ bi bə bəŋ lə ‘Bə na yanshɛ yu ndzɨ la?’ bə chi lə, ‘Miɨ Wubəŋ na keŋkɛ nɨŋ bə yu, yu jiwa ɨ yu chi yu jiŋ fɛŋ fɛŋ.’” 4 Bɔ gəŋ ba ŋəŋ wɛŋ wu sɔmbwa wa, ɨji bə́' su yu fə fiənsɨ wu tsɔŋ yidɔ lə ku, fə dzə ku. Bɔ se. 5 Tsa yi bɔ nə̀ sete, bənɨ bədɔ bə nə̀ lɨmi mɨ bi bə bɔ lə, “Bə na sete wɛŋ wu sɔmbwa wa ndzɨ la?” 6 Bɔ tə bə bənɨ ba fiɔŋ fi Jisɔs sə tədiə. Bənɨ ba tə gama lə bɔ kɨ gɨntɨ bə yu. 7 Bɔ ba bə yu fə Jisɔs ku ba tsu bindzu bibɔlə bi nəbiŋ nyɛŋ ya bɨŋ, Jisɔs bəndɨ bɨŋ. 8 Bənɨ kɨyɛŋ kɨ tsuku bindzu dzə, bədɔ shɔkiɛ bíatə nə ji bɔ tsuku dzə. 9 Bənɨ bə nə̀ gɨntɨ Jisɔs nəfiə ma bə nə̀ biəlɨ nəjiŋ kɨ wudiə lə, “Lililililili,ª bubəŋ kɨ ji bə Nyɔ lɔɔɔ! Budə kɨ ji bə miɨ wu na ba yɨ wu Baba lə lɨ lɔɔɔ! 10 Budə kɨ ji bə buŋkuŋ bu taa waha Dɛbi lə bu na ba! Lililililili, bubəŋ kɨ ji bə Nyɔ wu ji bɔ́ lɔɔɔ!” 11 Jisɔs gəŋ fɔ Jɛlosalɛm ba be mbaŋ wu tsɔŋ yi bintɔfiɛ ntɨŋ ba ŋəŋ nɨ biɔŋ bichi na ji. Yu kanə ji tsa' chɛ, bɔ bə beŋ buhu bə nɨŋ'ə bə yɔɔ ntse bəfɛ dza ba gəŋ Bɛtani.Jisɔs nya kɨtɨ kɨdɔ lɔŋ
12 Butsu wɔ, Jisɔs bə beŋ buhu bə nɨŋ'ə dza nə Bɛtani kɨ tsu Jɛlosalɛm, dzɔŋ kɨ wo yu. 13 Yu bo ba ŋəŋ kɨtɨ kɨdɔª dzəbudə ɨji kɨ' be. Yu gəŋ ma yu ŋɨntɨ muntaŋ kɨ wɨ. Yu gəŋ fɔ mɨ ba jikə ŋəŋkəhə fiɔŋ kɨ wɨ, yu ŋəŋ kwa ji nyí, ndzɨ tsa ya nə̀ jimiɛhɛ yi kɨ nə̀ ba kɨ muŋ. 14 Yu tə bə kɨtɨ ka lə, “Naji ɨ miɨ shəshə yu' diə fiɔŋ nə wə wɨ kə.” Nɨ yu tədiə manɨ, beŋ buhu bə nɨŋ'ə wɔ.
Jisɔs kɔŋ bənɨ bə shɨ lə nə mbaŋ wu tsɔŋ yi bintɔfiɛ ntɨŋ
15 Bɔ gəŋ fɔ Jɛlosalɛm, Jisɔs gəŋ mbaŋ wu tsɔŋ yi bintɔfiɛ ntɨŋ ba kɨ koŋko bənɨ bə nə̀ diɨ shɨ sɔ. Yu nə̀ koŋko manɨ yu gboshɛ bita bi bənɨ bə nə̀ yashɛnɨ kpə lə, ma bi bənɨ bə nə̀ taŋŋə biyakiki lə. 16 Yu nə̀ kə tsɔhɔ bɨmiə lə miɨ tɔ fiɔŋ ba chɛ bə fi fə tsɔŋ yi bintɔfiɛ ku. 17 Yu kɨ tɨfiə bɔ yu tɨdi lə, “Ntɨlə bə́ nə̀ bɔndu Nyɔ tɨdi lə,
‘Tsɔŋ yɛmɨ na yi bə́ ná kɨ tsɨsə lə tsɔŋ yi kɨntsɨsɨ yi bituŋ bichi?’
Bəmanɨ bə' fə yi tsu ji kɨnyələ kɨ bənɨ bə buyi lə.” 18 Bəchɛ bintɔfiɛ bəbəŋ bə bənɨ bə nə̀ tɨfiə bilaŋ wɔ ba kɨ noŋko dzə́ yi bɔ kkpɨsə yu. Bɔ nə̀ lete yu ndzɨ kuta wu bənɨ nə̀ woko bitɨfiə bihi gwɨ ndzeŋe bɔ. 19 Lə kɨ ji fudiɔ, Jisɔs bə beŋ buhu bə nɨŋ'ə fɔ nə kɨtuŋ ka ntɨŋ.
Bitɨfiə bi na foto nə kɨtɨ wɨ kɨ Jisɔs nə̀ nya ka kɨ lɔŋ
20 Lə Jisɔs bə beŋ buhu bə nɨŋ'ə fɔ kɨ chɛti fuwɔki, bɔ ŋəŋ ɨji kɨtɨ ka' wɨŋ ba fɔ gaŋ wɨ. 21 Pita se fiɔŋ fi nə tɨchə ba tə bə Jisɔs lə, “Miɨ wu Bitɨfiə, ŋəŋ! Kɨtɨ kɨ wə nə nya ka kɨ lɔŋ nə wɨŋ!” 22 Jisɔs tə bə bɔ bəchi lə, “Bə gâ shəŋ Nyɔ wɨ. 23 Ntə bəŋ yɛyi lə, ɨ miɨ tə bə dzo nyi lə, ‘Woɔ nə mɛ, wə gəŋ gbɔ ŋgɔŋ məmbəŋ ntɨŋ’, yu tɨdi manɨ masə sɨŋ nə yu shəŋ, yu bɨmi lə fiɔŋ fi yu' tədiə jifia fi tɨchə, ɨ fi fɔ diəŋ. 24 Bəma ntə bəŋ lə, fiɔŋ fichi fi bə na nende kɨntsɨsɨ ntɨŋ, bə bɨmi lə bə jiba ɨ bə keŋkɛ, tə bə keŋkɛ lɨ. 25 Tsa yi bə sə ləmiə lə bə tsɨsɨ, jilə miɨ na ji bə miɨ wudɔ shəŋ bɨŋ, yu gufiɛ yu. Bə kɨ fɨtɨ manɨ fə chaa wɛnɨ wu na ji bɔ́ kɨ gufiɛ tɨ mɛnɨ məmbiə. [ 26 Ɨ bə na gufiɛhɛ məmbiə mə bənɨ bədɔ lə, ɨ chaa wɛnɨ wu ji bɔ́ jikə kɨ gufiɛ tɨ mɛnɨ.]”ª
Bə́ bi dɨ wu buŋga bu Jisɔs lə fɔɔ
27 Jisɔs bə beŋ buhu bə nɨŋ'ə chi gəŋə Jɛlosalɛm. Lə yu kɨ gəndə mbaŋ wu tsɔŋ yi bintɔfiɛ ntɨŋ, bəchɛ bintɔfiɛ bəbəŋ bə bənɨ bə tɨfiə bilaŋ bi Nyɔ lə ma bənɨ bə sakɨ kɨtuŋ ŋəŋ yu wɨ 28 ba bi bə yu lə, “Wə dze buŋga nə məŋ ba tə kɨ fɨtɨ biɔŋ biŋ? Ə nya yəŋ wə buŋga bwa lə wə kɨ fɨtɨ biɔŋ biŋ?” 29 Jisɔs chi bə bɔ lə, “Njiwa mbi fiɔŋ bə bəŋ fimo, ɨ bə fichə lɨ, ntə ntə bəŋ miɨ wu nya mɨ buŋga lə ŋkɨ mfɨtɨ biɔŋ biŋ. 30 Nə̀ nya yəŋ buŋga lə Jɔŋ kɨ chɛsɛ bənɨ biɔ? Nə̀ nya Nyɔ maa miɨbəwəŋ lə? Bə fîchə mɨ ŋ'wɔ!” 31 Bɔ gbɔ kɨ nuŋɔ bɔbɔ lə, “Ɨ kə chi lə nə̀ nya Nyɔ, ɨ yu bi bə bɨ lə, nə̀ fə la lə kə kə̂ bɨmiə bə Jɔŋ? 32 Ɨ kə chi lə nə̀ nya miɨbəwəŋ, ɨ fi kɨ ji nəŋ?” Bɔ nə̀ lete bənɨ, ndzɨ bənɨ bəchi nə̀ bɨŋ lə Jɔŋ nə̀ miɨ wu shɔŋ yi Nyɔ yɛyi yɛyi. 33 Bəma, bɔ tə chi bə Jisɔs lə, “Kə na kkəhə.” Jisɔs tə tə bə bɔ lə, “Tə naji ntə tɨ bəŋ miɨ wu nya mɨ buŋga lə ŋkɨ mfɨtɨ biɔŋ biŋ kə.”