Jisɔs gu kɨnyi kɨ bənɨ bə tɨfiə bilaŋ'ə bə kɨ Bəfalasi lə
23
Jisɔs dza ba chanyɛ bə kɨntsu kɨ bənɨ lə ma bə beŋ buhu bə nɨŋ'ə lə, 2 “Bənɨ bə tɨfiə bilaŋ bə Bəfalasi na bənɨ bə dzɛɛ kɨtɨ kɨ Mose lə. 3 Fi kɨ ji lə, bə kɨ woko fiɔŋ fichi fi bɔ na tɨdi bəŋ, bə fɨtɨ. Bəmanɨ, bə kə kɨ fɨtɨ fiɔŋ fi bɔ na fɨtɨ, ndzɨ bɔ na tɨdi chichi, bɔ fɨtɨ chichi. 4 Bɔ ba bɔ kanshɛ ntə́ yi yakɨ buŋga bu bənɨ lə, bɔ tombi bənɨ bə yi, ɨjikə jimiɛ tɨmo lə bɔ kɨbɛɛ naji ɨ bɔ mɔŋ bə mbukɔ kwa bə kpaŋ lə bɔ chitə bənɨ ba. 5 Biɔŋ bi bɔ na fɨtɨ bichi na kwa bə mfə lə bənɨ kɨ ŋɨntɨ bɔ. Muŋkɔlɔª mumbɔlə mu Kɨŋwatɨ kɨ Nyɔ lə ji mumbəŋ. Bəmbwaŋka bə bindzu bibɔlə nəkpo ji bə dəŋfɨ. 6 Bɔ ba bɔ gəŋ kɨgbeyɛ ntɨŋ, bɔ kɨ laŋkɨ njimiɛ kwa ji dɨ wu bənɨ jiba ɨ bɔ kɨ kuntə bɔ, bɔ ba bɔ gəŋ tsɔ́ŋ yi kɨntsɨsɨ lə ntɨŋ, bɔ kɨ se kwa njiŋ ji bitɨ bi nəfiə bɨŋ. 7 Bɔ ba bɔ kɨ laŋkɨ tɨ ŋgəndə shɨbɨŋ bənɨ tsɨshə bɔ, bɔ laŋkɨ tɨ lə bənɨ kɨ tsɨsə bɔ lə Bəlabai. 8 Bəmanɨ, miɨ kə kɨ bɨmi lə bənɨ kɨ tsɨsə yu lə Miɨ wu Bitɨfiə Wubəŋ, ndzɨ bə na keŋkɛ Miɨ wu Bitɨfiə miu kwa, bəŋ bəchi na ji beŋ bə miɨ miu lə. 9 Bə kə kɨ tsɨsə miɨ wudɔ sɛŋ koso lə na chaa wɛnɨ, ndzɨ bə na keŋkɛ Chaa wɛnɨ miu, wu ji bɔ́. 10 Miɨ kə kɨ bɨmi lə bə́ kɨ tsɨsə yu lə Miɨ Wubəŋ, ndzɨ Miɨ Wubəŋ wɛnɨ na ji kwa miu, əji Klistu. 11 Miɨ wubəŋ nə bəŋ ntɨŋ naji lə yu kɨ ji miɨ wu na nɨntɨ bəŋ'ɨ. 12 Miɨ chi wu na dze gwɨ yihi bɔ́, Nyɔ ná jiwa ɨ yu shisəsɨ yu. Miɨ chi wu na shisəsɨ gwɨ yihi, Nyɔ ná jiwa ɨ yu bəndɨsɨ yu.Jisɔs tsasɨ bənɨ bə na tɨfiə bilaŋ ma bə Bəfalasi
13 Lɔŋ bə bəŋ, bəŋ bənɨ bə na tɨfiə bilaŋ ma bəŋ Bəfalasi. Bə na ji bənɨ bə na lɔshə! Bə na lɨmi bənɨ nəfiə bə baŋkɨ dzə yi na beke buŋkuŋ bu bɔ́ ntɨŋ. Bə jikə sɛhɛ mbe bu ntɨŋ, bə tsu bə baŋkɨ dzə yi bənɨ bə na se lə bɔ be.
[ 14 Lɔŋ bə bəŋ, bəŋ bənɨ bə na tɨfiə bilaŋ ma bəŋ Bəfalasi. Bə na ji bənɨ bə na lɔshə! Bə' dɨsə gwɨ ba chi bəkansɨ bə bəŋku lə koso, bə diɨ kú yibɔlə, bə tsɨsə bintsɨsɨ bidəŋfɨ. Bə kɨ kkɨ lə wɛnɨ ŋgə ná yakɨ lɨ.]ª 15 Lɔŋ bə bəŋ, bəŋ bənɨ bə na tɨfiə bilaŋ ma bəŋ Bəfalasi. Bə na ji bənɨ bə na lɔshə! Bə ba bə gəndə kɨtuŋ kɨchi ntɨŋ, bə llə ŋgɔŋ məmbəŋ lə bə na noŋko miɨ miu wu' fichɛ ba tsu miɨ wɛnɨ wu kɨmbɨŋ. Bə tə fə fiə wuhu kanə bəfiə, yu kɨ ji tɨ miɨ wu boso ntɨŋ nɨ bəŋ.
16 Lɔŋ bə bəŋ. Bə na ji bənyimə, bə tɨdi lə bə na donchɛ bənɨ dzə! Bə na ji bənɨ bə na tɨdi lə, ‘Ɨ miɨ chanyɛ fiɔŋ ba chɛŋ yɨ wu tsɔŋ yi bintɔfiɛ lə wɨ, kɨjilə na fiɔŋ kə. Bəmanɨ, ɨ miɨ chanyɛ fiɔŋ ba chɛŋ ji yɨ wu ŋgusa wu tsɔŋ yi bintɔfiɛ lə wɨ, kɨjilə yu naji lə yu fə nɨ yu' chanyɛ ba chɛŋ'ɨ.’ 17 Bənyimə bɛŋ! Bə na ji bəŋfidi! Fiɔŋ fi na ko fi yakɨ fidɔ na fi la? Kɨtso na ko ŋgusa maa tsɔŋ yi bintɔfiɛ yi na fɨtɨ ŋgusa wa tə ji fiɔŋ fi Nyɔ lə lə? 18 Bə na tɨdi tɨ lə, ‘Ɨ miɨ chanyɛ fiɔŋ ba chɛŋ yɨ wu tanyə wu bintɔfiɛ lə wɨ, tə na fiɔŋ kə. Bəmanɨ ɨ miɨ chanyɛ fiɔŋ ba chɛŋ ji yɨ wu fiɔŋ fi miɨ ba nya bintɔfiɛ su, tə yu naji lə yu fə nɨ yu' chanyɛ ba chɛŋ'ɨ.’ 19 Bənyimə bɛŋ! Fiɔŋ fi na ko fi yakɨ fidɔ na fi la? Na bintɔfiɛ bia bi na ko maa tanyə wu bintɔfiɛ lə wu na fɨtɨ bintɔfiɛ bia tə ji fiɔŋ fi Nyɔ lə lə? 20 Fiɔŋ fi na ji na lə, ɨ miɨ chɛŋ yɨ wu tanyə wu bintɔfiɛ lə wɨ, tə yu chɛŋ manɨ ba chɛŋ tɛshɛ ma biɔŋ bichi wɨ bi na ji su bɨŋ. 21 Ɨ miɨ chɛŋ yɨ wu tsɔŋ yi bintɔfiɛ lə wɨ, tə yu chɛŋ manɨ ba chɛŋ ma Nyɔ wu ji sɔ. 22 Ɨ miɨ chɛŋ kɨtuŋ kɨ bɔ́ wɨ, tə yu chɛŋ kabala wu Nyɔ wɨ ba tɛshɛ ma bə yu Nyɔ wu na jimi wa su bɨŋ.
23 Lɔŋ bə bəŋ, bəŋ bənɨ bə na tɨfiə bilaŋ ma bəŋ Bəfalasi. Bə na ji bənɨ bə na lɔshə! Bə ba bə kɨ nya Nyɔ dɨ mo nə bidɨ ntɨŋ yɔɔ bi biɔŋ'ə chichi chichi bi bə na kɨsɨ bə galɨ bubu ntɨŋ lə bu kɨ ndzeŋe. Bəmanɨ bə' tɔfu fiɔŋ fibəŋ fi kɨlaŋ na chanyɛ tsukɔ fi wɨ lə bə kɨ fɨtɨ, fi ji lə bə kɨ fɨtɨ biɔŋ bi diəŋ bə bənɨ, bə kwesɛ yaa bə bənɨ, bə galɨ shəŋ Nyɔ wɨ. Bə naji lə bə kɨ fɨtɨ biɔŋ bia bichi nshə sɨŋ fidɔ. 24 Bənyimə bə na donchɛ bənɨ dzə! Bə na fosɔ findimbi nə mbiŋ ntɨŋ, bəmanɨ bə mɨyɛ biŋfene!
25 Lɔŋ bə bəŋ, bəŋ bənɨ bə na tɨfiə bilaŋ ma bəŋ Bəfalasi. Bə na ji bənɨ bə na lɔshə! Bə na wwo fío bə muŋkɔ nəbiŋ lɨ, bəmanɨ biɔŋ bi yisə sɔ ji bi bə fashɛ nə bənɨ lɨ ma bi bə na yɨtɨ yəsɨ bə bi. 26 Bəfalasi Bənyimə, bə sa wwɔ fío bə muŋkɔ nəntɨŋ, fə mu tə tsalə nəbiŋ.
27 Lɔŋ bə bəŋ, bəŋ bənɨ bə na tɨfiə bilaŋ ma bəŋ Bəfalasi. Bə na ji bənɨ bə na lɔshə! Bə ji nɨ dzə́ŋ yi bə́' nachɛ ba kushi lɨ, yi kɨ wosɔ, yi yinshi yəsɨ buni, bəmanɨ bikuŋfɔ bi biŋgundu bi bənɨ lə ma biɔŋ bi nyənə bichi' yi dzə́ŋ ya ntɨŋ. 28 Na tɨ diəŋ nɨ bə na yinshi yəsɨ lə bə na ji bənɨ bə diəŋ, bəmanɨ ɨji bə' yi bə biyɔndu ma fiə wubiə nəntɨŋ.
29 Lɔŋ bə bəŋ, bəŋ bənɨ bə na tɨfiə bilaŋ ma bəŋ Bəfalasi. Bə na ji bənɨ bə na lɔshə! Bə na ma dzə́ŋ yi bənɨ bə shɔŋ yi Nyɔ lə, bə dente tɨ dzə́ŋ yi bənɨ bə nə̀ keŋkɛ fiə wu diəŋ'ə. 30 Bə fɨtɨ manɨ bə tɨdi lə, ‘Kə tə nə̀ ji tɨ su tsa yi bəchɛ taa baha wɨ, kə tə nə̀ jikə bɨmiə fiaha fiɔŋ fi bɔ nə̀ fəə bə ŋkkpɨshə yi bənɨ bə shɔŋ yi Nyɔ lə.’ 31 Bə chanyɛ manɨ, bə chanyɛ ji tsukɔ gwɨ́ yɛnɨ wɨ, fi donchɛ nə bifuŋ biɛnɨ wɨ lə bə na ji beŋ bə bənɨ bə nə̀ kkpɨshɛ ba bənɨ bə shɔŋ yi Nyɔ lə. 32 Bə gə̂ŋ fiə ba kanə nɨŋ yi bəchɛ chaa bɛnɨ nə̀ bɛyɛ! 33 Yé yiŋ! Ŋkɨkɨ wu yɛ́tɛ no! Bə na gɔmbiɛ lə bə́ ná jiba bə́ jikə chɛsɛ bəŋ boso ntɨŋ?
34 Nɨ fi na ji manɨ, mɨ mfaŋ bənɨ bə shɔŋ yi Nyɔ lə bəŋ'ɨ ma bənɨ bə bufɨ lə bə bənɨ bə bitɨfiə lə. Bə ná kɨ kkpɨshɛ bədɔ, bə bandiɛ bədɔ bitɨ wɨ, bə shɔkiɛ bədɔ tsɔ́ŋ yɛnɨ yi kɨntsɨsɨ lə ntɨŋ, bə sesɛ gbo bədɔ nəjiŋ kɨtuŋ kɨchi kɨ bɔ na gɨntɨ kɨ ntɨŋ. 35 Bə ná kɨ fɨtɨ manɨ fə ŋgwembe mə bənɨ bəchi bə kɨjimiɛ kɨ diəŋ'ə bə nə̀ ji mbi ntɨŋ bə bə nə̀ kkpɨshə, ɨ mɔ kɨ ji bəŋ fi. Ŋgwembe mɛŋ ná kɨ ji bəŋ fi, dze nə Abɛl bɨŋ, wu bə́ nə̀ kkpɨsə yu sɨŋ bə ŋgbɔ ba fɔ mə Dzakaliya wɛŋ wu Belekaya lə wɨ, wu bə nə̀ kkpɨsə fə tsɔŋ yi bintɔfiɛ ku, gwɨgwɨ fə tanyə wu bintɔfiɛ lə ku. 36 Ntə bəŋ yɛyi lə, lɔŋ wu biɔŋ biŋ bichi ná kwete lɨ ŋkɨkɨ wu fɛŋ no.”
Jisɔs də gwɨ bə Jɛlosalɛm
37 Lə Jisɔs chanyɛ mɛ, yu də gwɨ lə, “Hɛbɛɛ Jɛlosalɛm! Hɛbɛɛ Jɛlosalɛm! Wə wu na kkpɨshɛ bənɨ bə shɔŋ yi Nyɔ lə, wə tumiɛ bənɨ bə Nyɔ na faŋkɨ bɔ wə lɨ bə ta. Na tsá miɛ nɨ mɨ ndiɔɔ lə mbanchɛ beŋ bɔhɔ diəŋ nɨ shə ba yi banchɛ beŋ buhu ba kusə lɨ, wə nɨŋŋ? 38 Bô ŋəŋ, bə́' tɔfu tsɔŋ yɔhɔ, yi jiya ɨ yi tsu kɨchə. 39 Ntə wə lə wə jiwa wə tsukə ŋəŋkəhə mɨ wɨ, gəŋ fɔ tsa yi wə ná tədiə lə, ‘Nyɔ lî budə miɨ wu na ba yɨ wu Baba Nyɔ lə lɨ.’”