Ŋgaŋ tsukɔ kɨgbeyɛ kɨ bibinə lə wɨ
22
Jisɔs chi chanyɛ bə bɔ bəŋgaŋ ntɨŋ, wudɔ kɨ ji lə, 2 “Naji ɨ bə́ fɨkə buŋkuŋ bu bɔ́ bə ŋkuŋ wudɔ wu nə̀ kakɨ kɨgbeyɛ kɨ bibinə lə kɨ wene wu nɨnsə lə. 3 Yu faŋ bənchinda buhu lə bɔ gəŋ bəndiɛ bənɨ bə yu nə̀ tədiə bɔ kɨ kɨgbeyɛ ka lə. Bəmanɨ, bənchinda ba gəŋ, bənɨ ba jikə baha. 4 Yu faŋ bənchinda bədɔ ba tə bə bɔ lə, ‘Bə gə̂ŋ tə bə bənɨ bə nsə ntədiə ba bɔ kɨ kɨgbeyɛ kɨ bibinə lə kɨŋ lə, bə wôkɔ bə wɔ, mɨ' mfə bidiəŋ, mɨ' n'yembiɛ bintsumbɔ bə beŋ bə bənaŋ'ə bəbəŋ bəbəŋ. Mɨ' mfə biɔŋ bichi, lə bɔ ba la kɨgbeyɛ kɨsu lɨ.’ 5 Bəmanɨ, bɔ gəŋ bənɨ ba jikə nyaha kɨgaŋ, bənɨ ba dza fibɔlə kɨ gɨntɨ. Miɨ wudɔ lɛ yu kə, wudɔ lɛ shɨ yihi. 6 Bədɔ ba bənɨ kwe bənchinda ba, funsu bɔ ba kkpɨshɛ bɔ. 7 Shəŋ lɔ ŋkuŋ wa, yu faŋ bənɨ buhu bə dzoŋ'ə, bɔ gəŋ ba jishi bənɨ bə nə̀ kkpɨshɛ ba bənchinda buhu ba tiŋ kɨtuŋ kɨbɔlə. 8 Lə yu fə manɨ, yu tə bə bənchinda buhu bədɔ lə, ‘Mɨ' nachɛ kɨgbeyɛ kɨ bibinə lə. Bəmanɨ bənɨ bə nsə nsa ba dɨ lɨ sə bənɨ kə. 9 Bə gə̂ŋ ləŋ dzə́ lɨ ba bəndɨ bənɨ bəchi bə bə jiba bə ŋəŋ, lə bɔ ba kɨgbeyɛ kɨ bibinə lə kɨŋ ntɨŋ.’ 10 Bənchinda buhu ba fɔ ba gəŋ dzə́ lɨ chi ba bəndɨ bənɨ bəchi bə bɔ nə̀ ŋəŋə, bənɨ bə ndzeŋe bə bənɨ bəbiə ba sɔ kɨgbeyɛ ka ntɨŋ. Tsɔŋ yi bibinə ya yi bə bənɨ.11 Lə ŋkuŋ be tsɔŋ yi bibinə ya ntɨŋ ba ŋəŋ bənɨ bə nə̀ ba ba kɨgbeyɛ ka ntɨŋ, yu ŋəŋ miɨ wudɔ wɨ ɨji yu kə dɔŋkɔ bindzu bi kɨgbeyɛ kɨ bibinə lə. 12 Yu ba ba bi bə yu lə, ‘Mbwə, wə fə nəŋ tə be sɛŋ ndɔŋ sɨŋ bindzu bi kɨgbeyɛ lə?’ Miɨ wa kətə kɨtɔ. 13 Bəma, ŋkuŋ tə bə bənchinda buhu lə, ‘Bə kânsɨ kaŋ yihi bə go ba li yu kɨjuwɔ ntɨŋ sa biŋ, dɨ wu bənɨ ná kɨ dɨ bɔ diɨ gəsɨ.’” 14 Nɨ Jisɔs chanyɛ manɨ, yu tə lə, “Bə kkə̂ lə Nyɔ' bəndɨ bənɨ kɨyɛŋ, bəmanɨ yu sa kwa bə tsəsɨ.”
Bə́ toso Jisɔs tsukɔ kɨŋwatɨ kɨ tsufɔ wɨ
15 Bəfalasi dza ba gəŋ kwe ntsuŋ nɨ bɔ jiba bɔ fə ɨ Jisɔs fɨsə bə nchanyɛ fə bə́ kwɛɛ yu. 16 Bɔ faŋ beŋ bəbɔlə bə nɨŋ'ə ma kɨntsu kɨ bənɨ bə Ŋkuŋ Hɛlɔd lə Jisɔs lɨ. Bɔ gəŋ ba tə bə yu lə, “Miɨ wu Bitɨfiə kə na kkɨ lɨ lə wə na ji miɨ wu kɨyɛyi, wə tɨfiə bənɨ dzə yi Nyɔ dzə yi kɨyɛyi ntɨŋ. Wə ba wə jikə kɨ dze lə miɨ wudɔ na ji chichi, ndzɨ wə jiŋgəhə miɨ nə fiɔŋ fi yu na ji fi lɨ. 17 Tə̂ la bɨ kɔhɔ kɨŋgɔmbiə. Kɨlaŋ' bɨŋ lə naji ɨ kə kɨ tsufu kɨŋwatɨ bə Kaisa ŋkuŋ wu Lom maa kə kə kɨ tsufu lə?”
18 Jisɔs kkə fiɔŋ fi bɔ na wədi bə fi, yu tə bə bɔ lə, “Bəŋ bənɨ bə na lɔshə bɛŋ, bə na tosɔ mɨ ndzɨ la? 19 Bə bâ bə kpə wu bə na ba bə kɨ tsufu kɨŋwatɨ su, ŋŋəŋ.” Bɔ ba bə kpə wu kɨtsu lə ba nya yu. 20 Jisɔs bi bə bɔ lə, “Bushi bu na ji buŋ su na bu yəŋ'ə? Yɨ wa ji wu yəŋ'ə?” 21 Bɔ chi lə, “Bushi bwa na bu Kaisa lə, yɨ wa ji tɨ wuhu.” Yu tə bə bɔ lə, “Bə kɨ nya la Kaisa fiɔŋ fi na ji fi Kaisa lə, bə nya Nyɔ fi na ji fi Nyɔ lə.” 22 Lə bɔ wɔ manɨ, bifuŋ wɨŋ bɔ. Bɔ shə yu ba dza kɨ gɨntɨ.
Bə́ toso Jisɔs tsukɔ ndzakɔ nə kkpə lɨ
23 Butsu bwa kɨbɛɛ, Bəsadusi ba fə Jisɔs ku. Bəsadusi na kɨntsu kɨ bənɨ lə bə nə̀ ba bɔ kɨ tɨdi lə naji ɨ bənɨ ná dzakɔ nə kkpə lɨ kə. Nɨ bɔ ba cha manɨ, bɔ bi bə Jisɔs lə, 24 “Miɨ wu Bitɨfiə, Mose nə̀ tə lə, ‘Ɨ miɨ nyunso kkpə lɨ wɛŋ sɨŋ, tə wəmɛni wu nɨnsə naji lə yu chi kpansɨ wa, bɔ bə yu bɛyɛ beŋ yɨ wu ŋku wəmɛni lə lɨ.’ 25 Fɛŋ, beŋ bə miɨ wudɔ lə nə̀ ji bə bɨ sɛŋ fumba. Wuntaŋ wa dze kpansɨ, yu kkpə bɔ bə yu ŋkeŋkɛ sɨŋ wɛŋ, yu shə kpansɨ wa bə wu na kwɨntɨ wa yu wɨ. 26 Fi kɨ ji tɨ manɨ bə wu na kwɨntɨ wa wudɔ wa wɨ, ma tɨ bə wu na kwɨntɨ tɨ wa wɨ, sɨŋ sɨŋ gəŋ fɔ wu fumba wa bɨŋ. 27 Nəjiŋ wusu, kpansɨ wa kkpə tɨ. 28 Bəma, fɛŋ nɨ bɔ fumba bəchi nə̀ dzɛɛ kpansɨ wa, ná kɨ ji tsa yi bənɨ na dzakɔ nə kkpə lɨ, ɨ kpansɨ wa kɨ ji kpansɨ yəŋ?”
29 Jisɔs chi bə bɔ lə, “Bə' fɨsə kɨtso, ɨji ndzɨ bə na kkəhə fiɔŋ fi na ji bubɔndɔ Kɨŋwatɨ kɨ Nyɔ lə ntɨŋ. Bə na kkəhə tɨ buŋga bu Nyɔ lə. 30 Bə kɨ kkɨ lə tsa yi bənɨ ná dzakɔ nə kkpə lɨ ɨ bənɨnsə bə bəkansɨ tsukə kɨ dze gwɨ́ yibɔlə, ɨ bənɨ tsukə kɨ nya beŋ bə́ tɛshɛ bibinə bə bɔ. Bɔ ná kɨ ji nɨ bənchinda bə Nyɔ lə bɔ́. 31 Fi na tsukɔ ndzakɔ yi bənɨ ná kɨ dzakɔ nə kkpə lɨ, bə kə tanchɛ Kɨŋwatɨ kɨ Nyɔ lə ba wɔ fiɔŋ fi kɨ na chanyɛ bə bəŋ? Nyɔ nə̀ tə lə, 32 ‘Na mɨ Nyɔ wu Ablaham, Nyɔ wu Adze bə Nyɔ wu Jakɔ.’ Fi na ji lə Nyɔ na jimiɛhɛ Nyɔ wu bəŋkkpə, na Nyɔ wu bəwəŋ.” 33 Lə kɨntsu kɨ nə̀ lɨmi mɨ wɔ mfichə yi Jisɔs fichə, kɨgəsə wɨŋ bɔ tsukɔ bitɨfiə bihi wɨ.
Kɨlaŋ kɨ na yakɨ bilaŋ bichi
34 Lə Bəfalasi wɔ lə Jisɔs' baŋ bifuŋ bi Bəsadusi lə, bɔ tɛshɛ gwɨ ba ba fə yu ku. 35 Miɨ wudɔ nə bɔ ntɨŋ wu nə̀ kkɨ bilaŋ bi Nyɔ lə buni, toso yu bə mbi yidɔ lə, 36 “Miɨ wu Bitɨfiə, kɨlaŋ kɨbəŋ kɨ na ko kɨ yakɨ bilaŋ bichi na kɨ la?” 37 Jisɔs chi bə yu lə, “Kɨlaŋ kɨbəŋ na kɨ na tɨdi lə, ‘Lâŋ Baba Nyɔ wɔhɔ bə shəŋ yɔhɔ chi, nyâ gwɨ yɔhɔ bə yu chi, gâ bufɨ bwɔhɔ buchi yu wɨ.’ 38 Kɨŋ na kɨlaŋ kɨ fiəfiə kɨ na ko kɨ yakɨ bilaŋ bichi. 39 Kɨ na kwɨntɨ kɨ wɨ na ji tɨ nɨ kɨ. Kɨ ji lə, ‘Lâŋ miɨ wu na ji fə wə ku nɨ wə na laŋkɨ gwɨ yɔhɔ.’ 40 Biɔŋ bichi bi na ji Kɨŋwatɨ kɨ bilaŋ'ə ntɨŋ, ma bi na ji Biŋwatɨ bi bənɨ bə shɔŋ yi Nyɔ lə ntɨŋ, bi na lɨmi ji bilaŋ bifɛ biŋ wɨ.”
Nchitə wu Nyɔ nə̀ kaa wa na wɛŋ wu yəŋ?
41 Nɨ Bəfalasi nə̀ tɛshɛ mɨ, Jisɔs jiji ba bi mbi yidɔ bə bɔ lə, 42 “Bə na gɔmbiɛ lə la tsukɔ Nchitə wu Nyɔ nə̀ kaa wa wɨ? Bə na gɔmbiɛ lə na wɛŋ wu yəŋ?” Bɔ chi bə yu lə, “Na wɛŋ wu Ŋkuŋ Dɛbi.” 43 Jisɔs chi bə bɔ lə, “Nɨ yu na ji wɛŋ nə kɨtsɔŋ kɨ Ŋkuŋ Dɛbi lə ntɨŋ, fi gəndə nəŋ fə Kɨn'yɨntɨ kɨ Nyɔ lə tə fəə Dɛbi kɨ tsɨsə yu lə Baba wuhu? Dɛbi nə̀ chanyɛ lə,
44 ‘Baba Nyɔ nə̀ tə bə Baba wɛmɨ lə,
“Jîŋ kɨbandə kɛmɨ kɨ nədiɨ wɨ,
gəŋ fɔ tsa yi nná memɛ bənɨ bɔhɔ bə nchɛnɛ lə
ɨ wə tɨŋ go yɔhɔ bɔ bɨŋ.”’