Jisɔs donchɛ bubəŋ buhu bu yu nə̀ keŋkɛ bɔ́
17
Lə díɔ buse chɛ, Jisɔs dze Pita bə Jɛm bə Jɔŋ jimə Jɛm, bɔ bəndɨ dzo yidɔ yi dəŋfɨ bɨŋ, kɨ ji mɨ bɔbɔ. 2 Bɔ jiji ba ŋəŋ gwɨ yi Jisɔs' yashənɨ bɔ yəsɨ, bushi buhu lakiɛ nɨ diɔ, kɨndzu kɨhɨ lakiɛ mɛ mwamwamwam. 3 Mose bə Alaja bu lafu fə bɔ ku ba kɨ chanyɛ bə Jisɔs. 4 Pita bu tə bə Jisɔs lə, “Baba, fi ndzeŋ nɨ kə na ji mɛ. Ɨ wə na se lɨ, ntuŋ bitsawo mɛni bitɛ, kɨdɔ kɔhɔ, kɨdɔ kɨ Mose lə, kɨdɔ kɨ Alaja lə.” 5 Nɨ yu nə̀ bambi yu chanyɛ, kɨku kɨwo boo bu kusə bɔ, diɛ chanyɛ nə kɨku ka ntɨŋ lə, “No na Wɛnɛ wu na ji shəŋ yɛŋ. Nna ŋ'woko buni bə yu kɨtso. Bə kɨ woko bə yu.” 6 Lə beŋ buhu bə nɨŋ'ə wɔ diɛ ya, nyiŋ kwe bɔ, bɔ gbɔyɛ ba tse mənshi koso. 7 Bəmanɨ Jisɔs gəŋ bukɔ bɔ ba tə lə, “Bə dzâ wə. Bə kə̂ lekɛhɛ.” 8 Lə bɔ tɔ yəsɨ bɔ́, bɔ jikə tsɔhɔ ŋəŋə miɨ wudɔ wɨ fiəŋkə Jisɔs kwa.9 Lə bɔ dza nə dzo ya bɨŋ kɨ shichi, Jisɔs loso bɔ lə, “Bə kə̂ tədiə fiɔŋ fi yəsɨ yɛnɨ ŋəŋə bə miɨ, fiəŋkə lə Wɛŋ wu Miɨ' dzakɔ nə kkpə lɨ.” 10 Beŋ buhu bə nɨŋ'ə bi bə yu lə, “Na ndzɨ la fi bənɨ bə na tɨfiə bilaŋ na tɨdi lə Alaja naji lə yu sa ba, fə Nchitə wu Nyɔ nə̀ kaa wa tə ba?” 11 Jisɔs chi lə, “Na yɛyi lə Alaja naji lə yu sa ba nachɛ biɔŋ bichi. 12 Bəmanɨ ntə bəŋ lə Alaja nə ba, bɔ jikə kkə yu, bɔ fə fiɔŋ fi bɔ nə̀ se bə yu. Na tɨ diəŋ nɨ Wɛŋ wu Miɨ jiwa ɨ yu wɔ ŋgə nə bɔ kaŋ.” 13 Nɨ yu tədiə manɨ, beŋ buhu bə nɨŋ'ə tə kkə lə yu na chanyɛ tsukɔ Jɔŋ Nchɛsebiɔ wɨ.
Jisɔs wəmiəsɨ wɛŋ wudɔ wu nə̀ ji bə dzeŋ yi koso
14 Lə Jisɔs bə beŋ buhu bə nɨŋ'ə shi ba fɔ dɨ wu kɨntsu kɨ bənɨ lə nə̀ ji, miɨ wudɔ ba tuŋ nu yu nəfiə ba tə bə yu lə, 15 “Taa, kwêse la yaa bə wɛnɛ. Yu na ji bə dzeŋ yi koso, yu woko ŋgə kɨtso. Yu na ba yu jiji yu gbɔ fətaŋ, tsa yidɔ yu gbɔ ŋgɔŋ ntɨŋ. 16 Nsə mba bə yu fə beŋ bɔhɔ bə nɨŋ'ə ku, bɔ jikə kafɔ ŋ'wəmiəsɨ yu.” 17 Jisɔs tə lə, “Ɔɔɔ! Ŋkɨkɨ wu kɨlɔlɔ no, wu kə galə shəŋ Nyɔ wɨ. Njiwa njiŋ bə bəŋ gəŋ fɔ bu la? Njiwa ŋkansɨ shəŋ bə bəŋ gəŋ fɔ bu la? Bə bâ mɨ bə wɛŋ wa mɛni.” 18 Bə́ ba bə yu, Jisɔs wɛŋ bə tsə wu nə̀ ji wa wɛŋ wa wɨ, yu fɔ. Mɨ kɨsɨkɨ, wɛŋ wa bu wəmiə.
19 Beŋ bə Jisɔs lə bə nɨŋ'ə gəŋ fə Jisɔs ku nəjiŋ nəjiŋ ba bi bə yu lə, “Kə sə fuŋ sɨŋsɨŋ ba jikə kafɔ mfoso tsə wa ndzɨ la?” 20 Yu chi bə bɔ lə, “Na ndzɨ kɨmbɨŋ kɛnɨ na sɨ lɨ. Ntə bəŋ yɛyi lə, ɨ bə na keŋkɛ kɨmbɨŋ kɨ ji tɨmo nɨ shɛmi yi finsonso,ª tə naji ɨ bə tə bə dzo nyi lə, ‘Woɔ nə mɛ wə gəŋ ləŋ maha,’ ɨ yi woɔ, ɨ fiɔŋ jikə jimiə su fi naji ɨ fi ya bəŋ. 21 [Bəmanɨ, naji ɨ ŋgwe yi no tsə fɔ kə, jilə miɨ kə tsɨsə ba chinə bidiəŋ.]”ª
Jisɔs chi chanyɛ tsukɔ ŋgwe yi kkpə yi yu ná kkpə wɨ
(Maku 9:30-32; Luka 9:43b-45)
22 Nɨ Jisɔs bə beŋ buhu bə nɨŋ'ə nə̀ tɛshɛ Galili, yu tə bə bɔ lə, “Bə́ ná nya Wɛŋ wu Miɨ bənɨ kaŋ, 23 ɨ bə́ kkpɨsɨ yu, ɨ kɨ ji díɔ bɨŋ tɛ, ɨ yu dzakɔ nə kkpə lɨ.” Lə bɔ wɔ manɨ, gwɨ kkpə bɔ kɨtso.
Bənchanyɛ tsukɔ kpə wu tsɔŋ yi bintɔfiɛ lə wɨ
24 Lə Jisɔs bə beŋ buhu bə nɨŋ'ə gəŋ fɔ Kapanaum, bənɨ bə nə̀ ləkə kpə wu tsɔŋ yi bintɔfiɛ lə ŋəŋ Pita ba bi bə yu lə, “Miɨ wɛnɨ wu Bitɨfiɛ na ba yu kɨ tsufu tɨ kpəª wu tsɔŋ yi bintɔfiɛ lə?” 25 Yu bɨŋ lə, “Ɨŋŋ.” Lə Pita tsu tsɔŋ, Jisɔs sa ba dzu fiɔŋ fia bə yu, ba bi lə, “Semon, wə ŋəŋ yɔhɔ lə la? Bəŋkuŋ bə sɛŋ koso na ləkə kpə wu bitsufiə lə ɨji nə bəyəŋ'ɨ? Bɔ na ba bɔ kɨ ləkə ji nə beŋ bəbɔlə lɨ, maa nə bənɨ bədɔ lɨ lə?” 26 Pita chi lə, “Bɔ na ba bɔ kɨ ləkə ji nə bənɨ bədɔ lɨ.” Jisɔs tə bə yu lə, “Kɨjilə beŋ bə ŋkuŋ'ə na keŋkɛhɛ ŋgə. 27 Bəmanɨ, bə mfə lə shəŋ kə bəfiə bɔ, gəŋ li ŋgɔlɔ nchɛŋ. Biɔsu yi wə saa ba kwe lɨ, chi wə guyɛ kɨdze kɨ biɔsu ya lə, wə jiwa ɨ wə ŋəŋ kpə wu kɨtsu lə mo, ɨ wə foso ba gəŋ nya lɨ, bitsufiɛ biaha lɨ bɨ bə wə.”