Bənɨ bədɔ nə̀ se lə Jisɔs fə fiɔŋ fi kɨgəsə kɨ wɨŋə lə
16
Bəfalasi bə Bəsadusi jiji ba ba fə Jisɔs ku lə bɔ fɔ yu, bɔ tə lə yu fə fiɔŋ fi na donchɛ buŋga bu fɔɔ nə bɔ́. 2 Jisɔs tə bə bɔ lə, “Tsa yi na ji fudiɔ bɔlu yɨtɨ, bə kɨ tɨdi lə, ‘Kɨbinchi jika kɨ ndzeŋ.’ 3 Ɨ dze kɨ ji fuwɔki, bɔlu yɨtɨ, kɨku tɛshɛ, bə kɨ tɨdi lə, ‘Kɨfuŋ jika kɨ chɛ ndɛŋ,’ ndzɨ bə' ŋəŋ bɔlu yɨtɨ, kɨku tɛshɛ. Bə na kkɨ njiŋgə bɔlu bə tɨdi nɨ kɨbinchi jika ɨ kɨ kɨ ji, bəmanɨ bə jikə kkə fiɔŋ fi biɔŋ bi na tɨchə tsa nyi wɨ na tseyɛ ndzɨ la? 4 Ŋkɨkɨ wubiə wu shə no Nyɔ ba kɨ ji nɨ kpansɨ wu sə fɔɔ nə nomo tsɔŋ kɨ dzenɛ, yu se wa fiɔŋ fi jifia fi donchɛ buŋga bu fɔɔ nə bɔ́. Naji ndonchə fiɔŋ bə bəŋ kə, fiəŋkə fi Jɔna miɨ wu shɔŋ yi Nyɔ lə.” Lə yu tə manɨ, yu bu shə bɔ ba dza kɨ gɨntɨ.Jisɔs loso beŋ buhu lə bɔ kɨ dze tsa tsukɔ fiə wu Bəfalasi lə wɨ bə wu Bəsadusi lə
5 Beŋ bə Jisɔs lə bə nɨŋ'ə llə nɔ nəwuŋ. Bɔ' se lə bɔ sə gufiɛ ndze blɛ. 6 Jisɔs tə bə bɔ lə, “Bə kɨ dze tsa bə dzé yi Bəfalasi lə ma yi Bəsadusi lə.” 7 Beŋ buhu bə nɨŋ'ə gbɔ kɨ chanyɛ bɔbɔ tsukɔ fiɔŋ fisu wɨ, bɔ tɨdi lə, “Yu na chanyɛ kɨ dzé yiŋ'ə mɛ ndzɨ kə sə kə baha bə blɛ.” 8 Jisɔs kkə fiɔŋ fi bɔ na chanyɛ kɨ fi lə ba tə lə, “Ɔɔɔ bənɨ bə kɨmbɨŋ kɨntse lə bɛŋ! Bə na chanyɛ bəŋbəŋ ji tsukɔ blɛ wu bə na sɨŋ bə yu ndzɨ la? 9 Bə bambi ba kə kkə biɔŋ? Bə na gɔmbiɛhɛ bəblɛ bətɨŋ bə bənɨ bəntsuku bətɨŋ nə̀ diə ba? Bidiadia bi bə nə̀ banchɛ bia nə̀ bəŋka bəmɛ? 10 Bə na gɔmbiɛhɛ tɨ bəblɛ fumba bə bənɨ bəntsuku bəna nə diə ba? Bə nə banchɛ bidiadia bia bi fɔ bəŋka bəmɛ? 11 Ə fə la lə bə kə kkə lə nna nchanyɛhɛ ji tsukɔ blɛ wɨ? Mɨ ŋkɨ nchisə tədiə lə bə kɨ dze tsa tsukɔ dzé yi Bəfalasi lə wɨ bə yi Bəsadusi lə.” 12 Lə yu chanyɛ manɨ, bɔ tə kkə lə yu na chanyɛhɛ lə bɔ kɨ dze tsa ji tsukɔ dzé yi bə́ na nyishɛ blɛ su, lə yu na chanyɛ ji tsukɔ bitifiə bi Bəfalasi lə bə bi Bəsadusi lə wɨ.
Pita shafu lə Jisɔs na Nchitə wu Nyɔ nə̀ kaa
13 Lə Jisɔs gəŋ fɔ sha yi Kasaliya Filipi ntɨŋ, yu bi bə beŋ buhu bə nɨŋ'ə lə, “Bənɨ na tɨdi lə Wɛŋ wu Miɨ na ji yəŋ?” 14 Bɔ chi bə yu lə, “Bənɨ bədɔ na tɨdi lə wə na ji Jɔŋ Nchɛsebiɔ, bədɔ lə Alaja, bədɔ tɨdi lə wə na ji Jɛlimia makə miɨ wu shɔŋ yi Nyɔ wudɔ.” 15 Yu bi bə bɔ lə, “Tsutə bəŋ, bə na tɨdi yənɨ lə nna nji yəŋ?” 16 Semon Pita chi lə, “Wə na ji Nchitə wu Nyɔ nə̀ kaa, wə ji Wɛŋ wu Nyɔ, Nyɔ wu buwəŋ.” 17 Jisɔs chi bə yu lə, “Semon wɛŋ wu Jɔna, Nyɔ' kuntə wə, ndzɨ na miɨbəwəŋ kə wu tədiə wə fiŋ, na Taa wu ji bɔ́ wu tədiə wə. 18 Mɨ ŋkɨ ntɨdi bə wə lə wə na ji Pitaª, ɨji biansɨ wuŋ bɨŋ wu njiwa ŋ'wɛyɛ ntɛshɛ yəmɨ yi bənɨ bə kɨmbɨŋ'ə. Buŋga bu kkpə lə naji ɨ bu ya ntɛshɛ ya kə. 19 Njiwa nnya wə kɨguyɛ kɨ buŋkuŋ bu bɔ́ lə.ª Fiɔŋ fi wə jiwa wə kansɨ sɛŋ mbi no ntɨŋ, tə bə́ jiba ɨ bə́ kansɨ tɨ fi bɔ́. Fiɔŋ fi wə jiwa wə yanshɛ mbi no ntɨŋ, tə bə́ jiba ɨ bə́ yanshɛ tɨ fi bɔ́.” 20 Nɨ Jisɔs nə̀ tədiə manɨ, yu dze tsa ba loso beŋ buhu bə nɨŋ'ə lə bɔ dzê tsa, bɔ kə̂ mɔŋkɔ lə bɔ tə bə miɨ lə yu na ji Nchitə wu Nyɔ nə̀ kaa.
Jisɔs chanyɛ tsukɔ ŋgwe yi kkpə yi yu ná kkpə wɨ
21 Dze nə tsa ya wɨ, Jisɔs gbɔ kɨ tɨdi ŋgbooŋ bə beŋ buhu bə nɨŋ'ə lə yu jiwa yu gəŋ Jɛlosalɛm, lə yu jiwa ɨ yu gəŋ wɔ ŋgə kɨtso nə bənɨ bə sakɨ kɨtuŋ kaŋ, bə bəchɛ bintɔfiɛ bəbəŋ, ma bənɨ bə na tɨfiə bilaŋ bi Nyɔ lə. Bɔ kkpɨsɨ yu, ɨ kɨ ji díɔ bɨŋ tɛ, ɨ yu dzakɔ nə kkpə lɨ. 22 Pita dze yu bɔ bə yu baŋgə gwɨ. Yu gbɔ kɨ chɛŋiɛ Jisɔs kɨ nchanyɛ ya lə, yu tɨdi lə, “Baba, Nyɔ kɨ bakɨ. Fiŋ fiɔŋ naji ɨ fi tɨchə wə kə.” 23 Jisɔs fichə gwɨ ba tə bə Pita lə, “Dzâ mɨ nəjiŋ Satan! Wə na baŋkɨ mɨ dzə ndzɨ wə na lɨmiɛhɛ dia wu Nyɔ lə. Wə na lɨmi ji dia wu miɨbəwəŋ'ə.” 24 Nɨ Jisɔs chanyɛ manɨ, yu tə bə beŋ buhu bə nɨŋ'ə lə, “Ɨ miɨ na se lə yu kɨ ji miɨ wɛmɨ wu nɨŋ, tə yu naji lə yu nɨŋŋ gwɨ yihi ba tɔ kɨtɨ kɨhɨ kɨ ŋ'wa lə kɨ biəlɨ mɨ. 25 Bə kkə̂ lə, miɨ wu na bətə buwəŋ buhu, yu jiwa yu lasɨ bu. Bəmanɨ miɨ wu na lasə buwəŋ buhu ndzɨ mɨ, wa miɨ ná keŋkɛ lɨ buwəŋ. 26 Jilə bə́' tɛshɛ mbi no chi ba nya bə miɨ lə yu diə ba lasɨ buwəŋ buhu, ɨ mbɨ wusu kɨ ji la? Makə lə fiɔŋ fiasu fi naji ɨ miɨ nya ba taŋ kɨn'yɨntɨ kɨhɨ lə? 27 Bə kkə̂ lə Wɛŋ wu Miɨ ná ba bə bənchinda buhu bə bubəŋ bu Tɨɨ lə, ɨ yu tə sɔmbu miɨ chi fiɔŋ fi miɨ nə̀ fɨtɨ wɨ. 28 Ntə bəŋ yɛyi lə, bənɨ bədɔ lɨmi ba mɛ bə ná jɛkə wɔkɔhɔ ntsɔŋfu yi kkpə fiəŋkə lə bɔ' ŋəŋ nɨ Wɛŋ wu Miɨ na ba bə buŋkuŋ buhu.”