Bilaŋ bi bəko lə
7
Butsu budɔ Bəfalasi bə bənɨ bədɔ bə nə̀ tɨfiə bilaŋ bi Nyɔ lə dza nə Jɛlosalɛm ba tɛshɛ fə Jisɔs ku. 2 Bɔ bo ba ŋəŋ nɨ beŋ bə nɨŋ'ə bə Jisɔs lə bədɔ na diɨ bə kaŋ yi yidi lə, fi ji lə bɔ nə̀ kə wwɔɔ kaŋ yibɔlə tsɔnyɔ.ª 3 Bəfalasi mɛ tɨ Bəju bəchi nə̀ biəlɨ ji fiə wu ku lə wu bətɨɨ bəbɔlə bə fiəfiə nə̀ ji bə wu, lə nə̀ji ɨ miɨ diə fiɔŋ kə yu ŋ'wwɔ sɨŋ kaŋ diəŋ nɨ bɔ ba bɔ wwɔ. 4 Nə̀ji ɨ miɨ kwə nə shɨbɨŋ ba diə fiɔŋ kə yu ŋ'wwɔ sɨŋ go bə bibandə dzə́ ya ntɨŋ. Bɔ nə̀ ji bə fiə yi ku lə yidɔ kɨyɛŋ, nɨ ŋ'wwɔ yi bwaŋ ma bibə ma biyɨsɨ.ª 5 Bəfalasi bə bənɨ bə tɨfiə bilaŋ bi bə Jisɔs lə, “Beŋ bɔhɔ bə nɨŋ'ə na ba bɔ jikə kɨ biəlɨ fiə wu ku lə wu bətaa baha bə fiəfiə lə ndzɨ la? Bɔ na diɨ bə kaŋ yi yidi lə ndzɨ la?” 6 Jisɔs chi bə bɔ lə, “Adzaya miɨ wu shɔŋ yi Nyɔ nə̀ chanyɛ yɛyi tsukɔ bəŋ wɨ lə bə na ji bənɨ bə na lɔshə. Bə na fɨtɨ ji fiɔŋ fi yu nə̀ bɔndɔ, Nyɔ tɨdi lə,‘Bənɨ bɛŋ na kuntə mɨ kwa nə bifuŋ wɨ,
shəŋ yibɔlə ji dzəbudə nə mɨ wɨ.
7 Bɔ kuntə mɨ kwa kɨlɔlɔ,
ndzɨ bɔ na dze bənchi bə bənɨ lə,
bɔ tɨfiə lə na diɛ yɛmɨ.’
8 Na tɨ nɨ bə na shɨkɨ bilaŋ bi Nyɔ lə, bə galɨ ji bi bənɨ lə.” 9 Jisɔs tə bə bɔ lə, “Bə na kkɨ lɨ dzə́ yɛnɨ yi bufɨ lə yi nɨŋŋə bilaŋ bi Nyɔ lə yɛyi fə bə kɨ biəlɨ ji biɛnɨ. 10 Mose nə̀ tə lə, ‘Kûntə chaa bə ma.’ Yu chi tədiə tɨ lə, ‘Ɨ miɨ sɛyi tɨɨ makə mɛni, bə́ kkpɨsɨ miɨ wa.’ 11 Bəmanɨ, bə na tɨdi yɛnɨ lə ɨ miɨ na ji bə fiɔŋ fi naji ɨ yu chitə tɨɨ makə mɛni su, ɨ yu dza ba tə bə tɨɨ makə bə mɛni lə, ‘Fiɔŋ fia' tsu ji Kɔban,’ ma ji lə na fi Nyɔ lə, 12 tə bə́ tsɔhɔ bɨmiə lə yu dze fiɔŋ fia ba chitə tɨɨ makə mɛni su. 13 Bə fiə wuŋ mɛ, bə na fɨtɨ diɛ yi Nyɔ tsu fiɔŋ fi kɨlɔlɔ lə ndzɨ fiə wɛnɨ wu ku lə wu bə na tɨfiə bənɨ. Biɔŋ kɨyɛŋ jimə biŋ bia su tɨ bi bə na fɨtɨ.”
Fiɔŋ fi na yidiɛ miɨ
14 Jisɔs chi bəndə bənɨ ba bɔ ba, yu tə bə bɔ lə, “Bəŋ bəchi bə wôkɔ, bə wɔ fiɔŋ fi nna nchanyɛ, bə kkə̂ fi buni. 15 Fiɔŋ na sɨŋ nəbiŋ fi naji ɨ fi be miɨ ntɨŋ ba yidiɛ yu. Na fiɔŋ fi na foto nə miɨ ntɨŋ fi na yidiɛ yu. [ 16 Miɨ wu na ji bə bitiu, yu wɔ̂.”]ª
17 Jisɔs shə bənɨ ba ba be tsɔŋ, beŋ buhu bə nɨŋ'ə bi bə yu kɨ ŋgaŋ wa lə. 18 Yu chi bə bɔ lə, “Bə na kkəhə biɔŋ tɨ? Bə na kkəhə lə fiɔŋ fichi fi na beke miɨ ntɨŋ na yidiɛhɛ yu? 19 Fi na ji manɨ ndzɨ naji ɨ fi be ba gəŋ yu shəŋ bɨŋ kə, fi na beke ji kɨtɔ kɨhɨ ntɨŋ, fi chɛ ba fɔ lɨ.” (Nɨ Jisɔs nə̀ chanyɛ mɛ, kɨjilə yu' shafu lə biɔŋ bi diənə bichi na tsalə lɨ.) 20 Yu chi tədiə lə, “Na fiɔŋ fi na foto nə miɨ ntɨŋ fi na yidiɛ miɨ wa, 21 ndzɨ biɔŋ bibiə bi miɨ fɨtɨ foto nə yu shəŋ nɨ biŋgɔmbiɛ bibiə, ndzenɛ, buyi, ŋkkpɨsɨ yi miɨ, ndze yi kpansɨ miɨ makə nomə miɨ, 22 yəsɨ yiyə, kɨbiə, kɨn'yalə, bushi, nti bə miɨ, mbɨsɨ yi yɨ yi bənɨ lə, ndze yi gwɨ, bə buŋfidi. 23 Biɔŋ bibiə biŋ bichi na foto ji nə shəŋ yi miɨ lə ntɨŋ, bi tə yidiɛ miɨ wa.”
Kɨmbɨŋ kɨ kpansɨ miɨ kɨtuŋ'ə
24 Jisɔs dza nə sɔ ba gəŋ sha yi Taya bə yi Sidɔn ntɨŋ. Lə yu gəŋ sɔ, yu be tsɔŋ yidɔ ntɨŋ, yu jikə sɛhɛ lə miɨ kkə lə yu wa sɔ. Bəmanɨ, bənɨ kkə. 25 Kpansɨ wudɔ nə̀ ji sɔ, kɨn'yɨntɨ kɨbiə ji wene wu kansɨ wɨ. Lə yu wɔ kɨ Jisɔs lə, yu bu dza tsa miu ba ba gbɔ Jisɔs nəfiə. 26 Kpansɨ wa nə̀ miɨ Bəglek, yu nə̀ jimiɛhɛ Miɨbəju. Bə́ nə̀ bɛyɛ yu Fɔnisha sha yi Silia ntɨŋ. Nɨ yu nə̀ gbɔɔ manɨ, yu nende Jisɔs lə yu foso tsə wa nə wene wɨ. 27 Jisɔs chi bə yu lə, “Gâma bə́ sa chɨ beŋ, ndzɨ fi na jimiɛhɛ diəŋ lə bə́ dze bidiəŋ bi beŋ'ə ba tɔfu bə bíə.” 28 Kpansɨ wa chi bə yu lə, “Na yɛyi taa. Bəmanɨ, beŋ ba bɔ dze kɨ diɨ, bíə kɨ dete tɨ mənambo mə na gbɔyɛ ma fəkoso.” 29 Jisɔs tə bə yu lə, “Ndzɨ fiɔŋ fi wə fichə fiŋ, naji ɨ wə kɨ gɨntɨ fiɔhɔ, tsə wa' tɔkaŋ nə wana wɨ.” 30 Kpansɨ wa bu dza kɨ kwəlɨ, yu gəŋ ŋəŋ ji wene wa me ta ɨji tsə wa sə fɔ nə yu wɨ.
Jisɔs fə nchindiɛ kɨ woko, yu chanyɛ
31 Jisɔs dza nə sha yi Taya ntɨŋ ba chɛ Sidɔn tə chɛ dia wudɔ ntɨŋ bə́ tsɨsə lə Bituŋ bi Yɔɔ ntɨŋ ba tsu fə ŋgɔŋ məmbəŋ mə Galili ku. 32 Bənɨ bədɔ ba bə miɨ wudɔ ɨji nchindiɛ, yu jikə kkə nchanyɛ. Bɔ nende Jisɔs lə yu ga kaŋ yihi yu bɨŋ ba wəmiəsɨ yu. 33 Jisɔs dze yu, bɔ bə yu fɔ nə kuta ntɨŋ kɨ ji bɔbɔ. Yu chɛse muŋkantɨ bitiu bi miɨ wa lə ntɨŋ ba chə mənchəŋ bukɔ lɨmɨ wu miɨ wa lə, 34 ba tɔ bushi bɔ́ fieŋ'ɨ,ª ba tə bə miɨ wa lə, “Ɛfata,” ma ji lə, “Gûlɔ.” 35 Bitiu bi miɨ wa lə bu gulɔ tsa miu, lɨmɨ wuhu yɨŋkɨlɨ, yu kɨ chanyɛ fɛŋ buni. 36 Jisɔs chɛŋiɛ bənɨ ba lə bɔ kə̂ tədiə bə miɨ. Bəmanɨ, nɨ yu nə̀ chɛŋiɛ bɔ manɨ, na nɨ bɔ nə̀ bu chanyɛ bɔ gɨntɨ fiə. 37 Kɨgəsə kɨ wɨntɨ bənɨ ba kɨtso. Bɔ masə, bɔ tɨdi lə, “Jisɔs na kkɨ mfə biɔŋ bichi mɛ buni tɔchi. Yu na fɨtɨ bənchindiɛ woko, bənɨ bə na jikə chanyɛ, bɔ chanyɛ.”