Jisho faŋ bəne biih bə kintu bə yuufi ə nchɔ bəfwe
9
Jisho ja dii bəne biih bə kintu bə yuufi ə nchɔ bəfwe bie, bə́ bumə bwo. I nə bə́ muŋga bə muŋgeni mmuŋ bə́ lə yee bə fwōo muŋkwini mu hlaata munhliŋ ə bəne go maa bəŋwuhuŋ jə́ŋ mu, 2 i hlə faŋ bə́ lə bə́ gəŋ yee bə́ kēeh bəne ye muŋkɨŋ mu Chu duŋ maa bəŋwuhuŋ bəne bə jə́ŋ. 3 I yɔɔ dəŋ bə bə́ lə, “Bwɔɔ nnu bə gəŋ, mbɛɛ kə jəə fieŋ kə. Mbɛɛ kə jəə tələ, ləkə kibwa, ləkə fieŋ fidinə, ləkə kpo. Mbɛɛ kə jəə bindu bifwe. 4 Bwɔɔ nnu bə gəŋ lɛɛ ə dɔhɔ mə, chəŋ nni bə́ chi ye bəŋ mu, yee bə nɔ̂ŋ kwaa ə duŋ mu gəŋ bwii bwɔɔ nnu bə no ə dɔhɔ kie mə. 5 Kwili llɨŋ li nɨhŋ kə tɨŋ nə jə bəŋ, bə no həmə, bwɔɔ nnu bə nò həmə, bə kwili luu le ə wuh ŋieeŋ go, ə fɨhŋ nyii lə bə́ nɨhŋna bəŋ.”6 Bə́ hlə no yee bə́ gə̄ŋ, gəŋ yee bə́ jāa ə kwili kwili, bə́ yɔ̀ɔ hlɨŋ nwaa ye muŋkɨŋ mu Chu duŋ, bə́ ŋwùhuŋ dəŋ bəne bə jə́ŋ bənhliŋ.
Hlɨŋ Jisho fɨhɨŋ Hɛlɔ
7 Hɛlɔ nnu i màa i hlāah wɛɛ wi kitɨŋ ki Galilii mə wo bieŋ bɨhŋ kiɛkiɛ ye bi mà kah'lə, bi fɨhɨŋ wu yulahalə bəne bədi mà jaa yee bə́ yɔ̄ɔ lə Jisho nu lə Jɔɔŋ N'yiinjɔ nnu i fwoo ə kpe mə bwo. 8 Bədi yɔ̀ɔ lə ə Elaja nnu i fu bwo. Bədi yɔ̀ɔ fibə lə ə mbɛɛ hlɨŋ Chu nnu fwii ju nnu i jaka fu ə kpe mə. 9 Hɛlɔ hlə yee i nāamə ləə, “Jɔɔŋ nnu mmà ŋkɨŋ yo kwoo kiih. Nu mbɛɛ lə nyəhə chəə fidiɛɛ nnu n'yu ŋ'wō yo kiih lə?” I hlə yee i kīɛɛ lə mə hə ŋəŋ ə Jisho go.
Jisho lee bəne bənchuku bətiŋ
10 Bəne bə faŋnə bə Jisho jaa bwo chu dɨŋ, bə́ yɔɔ bieŋ binhliŋ bbɨŋ bə́ fəə yu wu. I hlə ja jə bə́, bə́ wa gbo, fu gəŋ ə kibalaki ki Beshayida mə. 11 Kwaalə, bimɔ bi bəne bu kələ koŋ bələ dəŋ wu, i jə bə́ hlə chɔɔ yee i dōntə ki muŋkɨŋ mu Chu baa ŋwuhuŋ bəne bə jə́ŋ.
12 Bwɔɔ nnu kitaŋ mà chu gəŋ chɨŋ, bəne bə Jisho bə kintu bə yuufi ə nchɔ bəfwe bie baha bwo yɔɔ bə wu lə, “Yɔɔ bə bəne bəhŋ lə bə́ gəŋ ə bitɨŋ bə ŋəŋkwili mə ŋŋəŋ ŋə dùŋ baha baha, bə́ gəŋ kiɛɛ bieŋ bibə bidinə maa bidɔhɔ bi nɔŋnə, yulahalə fəŋ duŋ nji.”
13 Jisho chuu ŋkwo wi lə, “Ə nə bəŋ bə́ fieŋ fidinə.” Bə́ yɔɔ bə wu lə, “Fieŋ ffɨŋ kkə kənə kwaa duŋ chée yí bibele shiŋ bə fiɔŋ fie, wə kiɛɛ lə kkə gəŋ taŋ biləə bu taanə bwo nə bə bəne bəhŋ bənhliŋ lə?” 14 Bə́ mà yɔɔ nəni yulahalə bəne mà duŋ həmə kiŋaaŋkə, bənəə kwaa mà duŋ ye bənchuku bətiŋ lə. Jisho hlə yɔɔ bə bəne biih bə kintu lə, “Bə yɔɔ bəne bie shii həkwe ə bintu mə, ye mbwɛɛnshiŋ mbwɛɛnshiŋ lə.” 15 Bə́ yɔɔ lə, bə́ shii həkwe kiɛkiɛ. 16 Jisho jə chée yí bibele yé shiŋ bə fiɔŋ yé fie, kee buh, nə kimbaafɛɛ bə Chu, hlə gaa nə bə bəne biih bə kintu lə bə́ ga bə bintu bi bəne bie. 17 Bə́ ga, bəne bənhliŋ di fiili, bəne bə Jisho bə kintu buhuŋ biŋkə bbɨŋ bi mà dɨlə bie, bi yii bijee yuufi ə nchɔ bifwe.
Pita yɔɔ tɔhi lə Jisho duŋ Nchuu Fwoo nnu Chu mà kaachi
18 Ə yee ə dūŋ chuu butuu budi, Jisho yee i chēe Chu wuu mboŋ, bəne biih bə kintu duŋ baha ə wu go. I ja bii bə bə́ ləə, “Bəne yɔ̀ɔ lə nduŋ nyəhə lə?” 19 Bə́ chuu lə, “Bəne bədi yɔ̀ɔ lə wə duŋ Jɔɔŋ N'yiinjɔ, bədi lə Elaja, bədi yɔ̀ɔ lə wə dùŋ mbɛɛ hlɨŋ Chu nnu fwii ju nnu i fu ə kpe mə.” 20 I hlə bii bə bə́ ləə, “Bə hlè ŋkwo weŋ lə nduŋ nyəhə chəə lə?” Pita chuu lə, “Wə duŋ Nchuu Fwoo nnu Chu mà kaachi yo.” 21 Jisho hlə looŋkə bə́ lə bə́ kə mɔŋ nə lə bə́ yɔɔ fɨhŋ bə mbɛɛ ju kə.
Jisho yɔɔ ki bəŋgə bə kpe yi
22 I hlə yee i yɔ̄ɔ bə bə́ lə, “Ŋwa Mbɛɛ kənə bəŋəŋ bəŋgə kiŋaaŋkə, bəne bbəŋ bə́ hlàah kitɨŋ bə bəche ntofi bəŋkuntaŋ maa bəne bbəŋ bə́ kèeh bəŋkɨnə bə Chu nɨhŋ wu. Ə bə́ hlə jii wu, ə joo bwii tɔh, ə i fu ə kpe mə.”
Kiŋgwa ki mbɛɛ nnu i bə̀lə Jisho
23 Jisho hlə yee i yɔ̄ɔ ə duŋ bə bəne bənhliŋ lə, “Ə mbɛɛ lə kiɛɛ lə yee i bə̄lə mi, kəə i kənə bənɨhŋ gbo wiih, tu kiŋgwa joo ŋənhliŋ i bə̀lə mi. 24 Bə kələ lə mbɛɛ nnu i bìaalə kinduŋh kiih lə ki kə laa kəə i laala ki ə laa mə, kwaalə, mbɛɛ nnu i làa kinduŋh kiih yu mi, kəə i kila ki ə ŋkili mə. 25 Ə bə́ buhuŋ mbiŋ mənhliŋ nu nəni nə bə mbɛɛ, ə mə di, laa tələ kinduŋh kiih ləkə jɨnə, ə mbɨŋ wi duŋ laha lə? 26 Yee bə kə̂lə lə ə gbo lə bee mbɛɛ bəmbələ mi maa díe yɨŋŋ, yee i kə̂lə lə Ŋwa Mbɛɛ yá nə dəŋ wu gbo wibeenə bwɔɔ nnu i yá fiimə bwo ə kiŋkuntaŋ kiih mə kkɨŋ ki dùŋ dəŋ ki Tili Chu bə bənchinda bə wɛɛŋ. 27 N'yɔ̄ɔ bəŋ kichɛɛŋ lə, bəne bədi bie bə́ lēmi fəŋ bbəŋ bə́ yá woo chee kpe bə́ kaani kə ŋəŋ nə ye Chu hlàah muŋkɨŋ mwii.”
Bushi bu Jisho gaanə
28 Ə bwo duŋ ye joo nyaaŋ lə, ye Jisho yɔɔlə bieŋ bɨhŋ, i jə Pita bə Jɔɔŋ maa Jɛŋ bə biŋ ə kɔnɔ kidi go lə bə gəŋ chee Chu. 29 I gəŋ lə ə chu bwɔɔ cheenə Chu yee i chēe, bushi bwii gaanə, bindu biih dəŋ gaanə yee bi tə̄ nəni mwamwamwa. 30 Fi duŋ lə bəne bəfwe, ə duŋ Mushe bə Elaja bbəŋ bə́ mà ja fu bwo həmə yee bə yɔ̄ɔ bə Jisho. 31 Kinchaa ki Chu yee ki tə̄ ə bə́ go. Bəə bə́ yee bə́ yɔ̄ɔ ki kpe nni Jisho mà kənə bəŋgəŋ kpe ə Jelushalɛŋ bənfə lə fi bwo wunə yəəŋ ye Chu mà kaachi lə. 32 Bə́ màa bə́ yɔ̄ɔ nəni, ə duŋ kinɨŋ gɔ Pita bə Jɔɔŋ maa Jɛŋ. Bə́ ŋənə, bə́ ŋəŋ ye kinchaa ki Chu tə̄ ə Jisho go, baa ŋəŋ bəne bəfwe bbəŋ bə́ lema bə wu. 33 Bəne bə bəfwe bie baŋka gbo, Pita bu no gəŋ yɔɔ bə Jisho lə, “Che kwoo, fi nwaala ye kkə bie lə fəŋ. Chee kwaŋ kkə wɛɛ bichaŋ bitɔh, kidi duŋ ko, kidi ki Mushe, ə kidi duŋ ki Elaja.” I màa i yɔ̄ɔ nəni, i kə kə̄lə fieŋ ffɨŋ i yɔ̄ɔ fie kə.
34 Ye i màa i kaani lə i yɔ̄ɔ nəni, joonə hlili bwo kəə bə́. Bə́ kənə nɨŋ ye bə́ mà duŋ lə ə joonə kie mə. 35 Die yɔɔ mə joonə kie mə lə, “Nu lə Ŋiaa nnu nshaala. Yee bə́ wô ə duŋ wu.” 36 Ye die ye mà yɔɔlə kaa nəni, bə́ ja ŋəŋ Jisho lēmi həmə wuu mboŋ. Bə́ maalə biwu nakə baa lə yɔɔ mbɛɛ ə bwɔɔ yo bəŋ fieŋ ffɨŋ bə́ hə ŋəŋna ə kɔnɔ kie go kə.
Jisho fwoo fiŋkwini ə ŋiaŋ nyo go
37 Lə butuu fu wu, bə́ bəə Jisho no ə kɔnɔ kie go yee bə́ bwɔ̄. Lə bə́ bwɔ, bə́ bənə bə kimɔ ki bəne kiŋkuntaŋ. 38 Lə bə́ kee, bə́ ŋəŋ mbɛɛ ju jaa yee i gɛ̄ɛmə ə kimɔ kie mə lə, “Mbɛɛ Keehnə, butee chiini mi ŋiaa nu. Ə ka kwaa wu ŋiaa. 39 Bə wələ wo, fiana ju bwò i jə̀ i lɛ̀ɛ wu, i jù, i chwà, i hlùŋ, fuu tùu wu jə. I gə̀ŋ bə wu, i kə bèmi lə i ŋɔɔni kə. 40 Nhə ŋkɔna lə bwɔni bwo bə kintu fwoo fiana yo bə́ mɔŋ hləŋ hləŋ.”
41 Jisho wo nəni yɔɔ lə, “Hooo! Ŋkaani bəne bə nya nnu i kə yii lə tɔŋ ə Chu mə kə. Nlə nduŋ bə bəŋ gəŋ bwii fəhəŋ, ŋkwàa tɔŋ bə bəŋ gəŋ bwii fəhəŋ lə?” I hlə yɔɔ bə che ŋiaŋ yo lə, “Bwo bə ŋwa yo fəŋ.” 42 Ə chulə i jə ŋiaŋ yo yee i bwō bə wu, fiŋkwini baa hla jə ŋiaŋ yo lɛɛ wu həkwe, yee i jū. Jisho nyieemi fiana yili yo i fu ə ŋiaŋ yo go, i hlə ŋwunə. Jisho hlə nə wu bə tili. 43 Bəne bənhliŋ ŋəŋ muŋgeni mmuŋ mu duŋ mu Chu, gəə ŋɨŋ bə́.
Jisho baa yɔɔ ki bəŋgə biih bə kpe yi
Ye bə́ màa bə́ kaani lə bə́ kə̄nə gbo wi kpenə yu bieŋ binhliŋ bbɨŋ Jisho mà fə bie, i yɔɔ bə bəne biih bə kintu bie lə, 44 “Bə wɛ nə bituŋ bieeŋ bə fieŋ ffɨŋ nlə n'yɔɔ bə bəŋ. Ŋwa Mbɛɛ duŋ nnu bə́ yá nə wu ə kwáŋ ŋə bəne bə bieŋ biwaha kwáŋ.” 45 Lə i yɔɔ nəni, bə́ nakə kələ fieŋ ffɨŋ i yɔ̄ɔ fie kə, yulahalə fieŋ fidi mà fuula bə́ kiŋgbaŋ lə bə́ kə kələ, kwaalə yee bə́ lɔ̄ bəmbii bə wu ki biyɔɔnə bɨhŋ.
Ə nyəhə ŋwuŋ ŋkuntaŋ lə?
46 Bə́ ja gbe bə noo noonə ə bə́ mə ləə ə nyəhə nnu i dùŋ ŋwuŋ ŋkuntaŋ. 47 Jisho kələ fieŋ ffɨŋ bə́ hlē ə tɔ́ŋ ŋəbə mə, hlə jə ŋiaŋ wɛ chi baha ə wu tɨŋ, 48 yɔɔ bə bə́ lə, “Ə mbɛɛ tɨŋ jə ŋiaŋ ye nu lə ə yii lɨŋŋ bəŋ, kəə i tɨ̀ŋ jə ə duŋ mi. Ə mbɛɛ tɨ̀ŋ jə mi, kəə i tɨ̀ŋ jə ə duŋ mbɛɛ nnu i faŋ yo mi. Fi duŋ lə, ə mbɛɛ lə bwɔkwe ə bəŋ mə ə i yá duŋ ŋwuŋ ŋkuntaŋ.”
Ə mbɛɛ nakə looh bə wə, kəə i chɨna wə
49 Jɔɔŋ hlə ja chee Jisho, yɔɔ bə wu lə, “Che kwoo, kkə hə ŋəŋna ə mbɛɛ ju go i chēe yii lo, i fwōo muŋkwini ə bəne go, kkə looŋkə wu, yulahalə i kə duŋ nə mbɛɛ ə kintu kiaa mə kə.”
50 Jisho chuu ŋkwo wi lə, “Bə tukwaŋ ə dɨŋ nu mbɛɛ go kwaa, yulahalə ə mbɛɛ nakə looh bə bəŋ, kəə i fwɔ̀ŋ bəŋ.”
Jisho chɔŋ lə mə lə gəŋ ba ə Jelushalɛŋ, bəne bə Shamalia nɨhŋ bəntɨŋ jə wu
51 Bwɔɔ nnu Chu mà duŋ bənjə Jisho lə i biŋ buh mà chu bwo wunə, Jisho hə bwɛɛla gbo bəŋgəŋ ə Jelushalɛŋ, i too bəŋgəŋ. 52 Lə yee i jā, i faŋ bəne bədi fwi. Bə́ gəŋ lɛɛ ə kibalaki ki Shamalia mə lə bə́ bwɛɛ chi dɔhɔ həmə yu wu. 53 Bəne bə həmə nɨhŋ kə tɨŋnə jə wu kə, yulahalə bə́ mà kəla lə i yu kāh gəŋ ə duŋ ə Jelushalɛŋ. 54 Jɛŋ bə Jɔɔŋ bəne bə Jisho bə kintu wo fieŋ fie, bə́ bii bə wu ləə, “Baba, kkə dii bwii yaa buh wi bwɔ bwo tɔŋ fii laa bəne bəŋ lə?”ª 55 Jisho kaka fiimə nyieemi bə́,ª 56 hlə no bə bəne biih bə kintu kah yee bə́ gə̄ŋ ə kwili lidi mə chili.
Mbɛɛ ə kintu ki Jisho mə kə kee lə dɨŋ kə
57 Ye bə́ màa bə́ gə̄ŋ lə, mbɛɛ ju bwo yɔɔ bə Jisho lə, “Nlə n'yee mbə̄lə wə bidɔhɔ binhliŋ bbɨŋ wə lə yee wə gə̄ŋ.” 58 Jisho chuu bə wu lə, “Bididi kə̀nə bibwɔɔ bibi, munyini mmuŋ mu tìɛŋ buh kə̀nə chə́ŋ yimwi, kwaalə Ŋwa Mbɛɛ kənə lə dɔhɔ kkɨŋ duŋ ə i nɔhiŋ kwoo kiih kə.”
59 Jisho ja yɔɔ bə mbɛɛ ju lə, “Yee wə bə̂lə mi.” Mbɛɛ yo chuu lə, “Baba, hlaa tukwaŋ ə mi go ŋgəŋ ndiih kaa tah nhlə n'yee mbə̄lə wə.” 60 Kwaalə Jisho chuu bə wu lə, “Cheekwaŋ bəne bbəŋ bə́ dùŋ lə bə́ kpee diih go ŋəbə, gəŋ ŋkwo wa yee wə dôntə ki muŋkɨŋ mu Chu.”