Matio 16

Bəne bədi mà kiɛɛ lə Jisho fə fieŋ fi ŋɨŋ gəə

Bəfalashii bə Bəshadushii duŋ duŋ ja bwo ə Jisho tɨŋ lə bə́ mɔŋ wu, bə́ yɔɔ lə i fə fieŋ ffɨŋ fi nyìi muŋgeni mmuŋ mu bwò ə buh. 2 Jisho yɔɔ bə bə́ lə, “Ə bwo chu hə kitaŋ, buuli geenə, yee bə yɔ̄ɔ lə, ‘Butuu ya fu nwaa,’ yulahalə bə ŋəŋna lə buuli le geena. 3 Ə bwo chu hə mbumbwaa buuli geenə, joonə kəəla, yee bə yɔ̄ɔ lə, ‘Kifwuŋ lə kah daŋ’, yulahalə bə ŋəŋna lə buuli le geena, joonə kəəla. Bə kə̀lə bəŋkee buuli hlə yee bə kə̄lə bən'yɔɔ ye kibweenə lə duŋ, kwaalə bə kə kə̀lə kinyii ki bieŋ bbɨŋ bi kàh ə bwɔɔ nu bəhŋ kə yulaha lə? 4 Ŋkaani waha nnu i shiee nu Chu fiimə chu ye kpɛ kiwaali lə, kiɛɛ lə i ŋəŋ fieŋ ffɨŋ fi nyìi muŋgeni mmuŋ mu bwò buh. Duŋ ə nnyii fieŋ bə ŋkaani bəne bəwaha nu kə kahiŋ fi Jɔnah mbɛɛ hlɨŋ Chu.” Ye i yɔɔlə nəni i bu she bə́ ja yee i gə̄ŋ.

Jisho keeh bəne biih lə yee bə́ jə̂ bwɔɔ bə fwɔ wi Bəfalashii maa bə wi Bəshadushii

(Maak 8:14-21)

5 Bəne bə Jisho bə kintu le kwo mə wukwi. Bə́ hlə ŋoo lə bə́ hə laama bənjə kibele. 6 Jisho yɔɔ bə bə́ lə, “Yee bə kêe kinwaa bə jə̀ bwɔɔ bə jɔ́ yí Bəfalashii maa bə yí Bəshadushii.” 7 Bəne biih bə kintu hlə chɔɔ bən'yɔɔ bə́ bə́ ki fieŋ fie, bə́ yɔ̄ɔ lə, “I yɔ̄ɔ ki jɔ́ yɨhŋ nəni yulahalə kkə hə kə bwoo bə kibele kə.” 8 Jisho kələ fieŋ ffɨŋ bə́ yɔ̄ɔ fie ki fi hlə yɔɔ lə, “Hooo bəne bə kimbemi ki tənə bəhŋ! Bə yɔ̄ɔ bəŋ bəŋ ki kibele kkɨŋ bə kə kənə kə duŋ yulaha lə? 9 Bə kə̀lə lə bieŋ kə lə? Bə ŋoo lə chée yí bibele yí shiŋ yyɨŋ bəne ma di yé bənchuku bətiŋ lə? Biŋkə bbɨŋ bə ma buhuŋ bie ma duŋ bijee bimwɛhɛŋ lə? 10 Bə kə ŋoo lə dəŋ chée yí bibele yí fumanyaaŋ yyɨŋ bəne hə di yé bənchuku bənua lə? Bə hə buhuŋ biŋkə bie bi fu bijee bi mwɛhɛŋ lə? 11 Ə fə laha lə bə kə kələ lə n'yɔ̄ɔ lə ə duŋ ki bibele kə lə? N'yu mbaa n'yɔ̄ɔ bə bəŋ lə yee bə jə̂ bwɔɔ ki jɔ́ yí Bəfalashii bə yí Bəshadushii.” 12 Ye i yɔɔlə nəni bə́ hlə kələ lə i yɔ̄ɔ lə ə duŋ lə yee bə jə̄ bwɔɔ ki jɔ nni bə́ tɔ bə kibele kə, lə i yɔ̄ɔ ə duŋ ki keehnə ki Bəfalashii bə Bəshadushii.

Pita tɔhi lə Jisho duŋ Nchuu Fwoo nnu Chu mà kaachi

(Maak 8:27-30; Lukaa 9:18-21)

13 Lə Jisho gəŋ bwii ə wɛɛ wi kitɨŋ ki Kashalia ə Filipi, i bii bə bəne biih bə kintu ləə, “Bəne yɔ̀ɔ lə Ŋwa Mbɛɛ lə nyəhə lə?” 14 Bə́ chuu lə, “Bəne bədi yɔ̀ɔ lə wə duŋ Jɔɔŋ N'yiinjɔ, bədi lə Elaja, bədi yɔ̀ɔ lə wə dùŋ Jelimia ləkə mbɛɛ hlɨŋ Chu ju.” 15 I bii bə bə́ ləə, “Bə yɔ̀ɔ ŋkwo weŋ lə ndùŋ nyəhə lə?” 16 Shaamuŋ Pita chuu lə, “Wə dùŋ Nchuu Fwoo nnu Chu mà kaachi, Ŋwa Nchu, Chu nnu i kə̀nə yo kinduŋh.” 17 Jisho chuu bə wu lə, “Shaamuŋ ŋwa Jɔnah, Chu koha wə, yulahalə fɨhŋ lə n'yɔ̄ɔ mbɛɛ bə wə kə, ə yɔɔ Tah nnu i dùŋ yo ə buh. 18 N'yɔ̄ɔ bə wə lə wə duŋ Pita,^ª ə libwaa lɨhŋ bəŋ llɨŋ nlə ŋ'wɛɛ kimbumə kɨŋŋ ki bəne bə kimbemi. Múŋga mu kpe yá kaah kimbumə kie kə. 19 Nlə nə biwɛnə bi muŋkɨŋ mu buh bə wə. Fieŋ ffɨŋ bə lə kwaa yaŋ kwe, kəə ə fi ffɨŋ bə́ kwaala ə buh. Fieŋ ffɨŋ bə lə hlooli yaŋ kwe, kəə ə fi ffɨŋ bə́ hloola ə buh.” 20 Ye Jisho yɔɔlə nəni, i hlə jə bwɔɔ looŋkə bəne biih bə kintu lə bə́ kə mɔŋ nə bən'yɔɔ bə mbɛɛ lə i dùŋ Nchuu Fwoo nnu Chu mà kaachi yo kə.

Jisho yɔɔ ki dɨŋ kpe nni i yá kpe ye

(Maak 8:31–9:1; Lukaa 9:22-27)

21 Chɔɔ jə ə bwɔɔ yo bəŋ, Jisho hlə chɔɔ bən'yɔɔ wɛɛŋ bə bəne biih bə kintu bie lə, mə lə gəŋ ba ə Jelushalɛŋ. Lə mə lə gəŋ lɛɛ bəŋgə mə kiŋaaŋkə ə kwáŋ ŋə bəne bbəŋ bə́ hlàah kitɨŋ bə bəche ntofi bəŋkuntaŋ bəŋkuntaŋ maa bəne bbəŋ bə́ kèeh bəŋkɨnə bə Chu. Ə bə́ jii wu, ə joo bwii tɔh, ə i fu ə kpe mə. 22 Pita hlə jə wu bəə wu wa gbo. I hlə gbe bənchɔɔ bə wu ki fieŋ fie, yɔɔ lə, “Baba, Chu yee i bāaŋka. Dɨŋ fɨhŋ fieŋ duŋ ə fi tuu ə wə go kə.” 23 Jisho fii gbo yɔɔ bə Pita lə, “Ja mi dɨŋ Hlaata! Wə baŋ mi je bu baŋnə yulahalə, wə lèmi lə ə wɛɛ wi Chu mə kə. Wə lèmi ə duŋ ə wi mbɛɛ ŋkee mə.” 24 Ye Jisho yɔɔlə nəni, i hlə yɔɔ bə bəne biih bə kintu lə, “Ə mbɛɛ lə kiɛɛ lə yee i bə̄lə mi, kəə i kənə bənɨhŋ gbo wiih, tu kiŋgwa kiih yee i bə̄lə mi. 25 Yee bə kə̂lə lə mbɛɛ mənhliŋ nnu i bìaalə kinduŋh kiih lə ki kə laa, kəə i laala ki ə nlaa mə. Kwaalə mbɛɛ nnu i làa kinduŋh kiih yu mi, mbini yo mbɛɛ yá yi kənə kinduŋh. 26 Ə bə́ buhuŋ mbiŋ mənhliŋ nu nəni nə bə mbɛɛ, ə mə di, laa kinduŋh kiih, ə mbɨŋ wi duŋ laha lə? Lii fieŋ fie həmə ffɨŋ duŋ ə mbɛɛ gaanə fiana wi mu lə? 27 Yee bə kə̂lə lə Ŋwa Mbɛɛ yáa i bwō bə bənchinda biih ə kiŋkuntaŋ ki Tili mə, ə i hlə hluŋ mbɛɛ mənhliŋ yu fieŋ ffɨŋ i màa i fə̄. 28 N'yu n'yɔ̄ɔ bəŋ kichɛɛŋ lə, bəne bədi bie bə́ lēmi fəŋ bbəŋ bə́ yá woo chee kpe bə́ kaani kə ŋəŋ nə ye Ŋwa Mbɛɛ bwo ə muŋkɨŋ mwii mə.”