Matio 15

Too wi kitɨŋ bə die Chu

Bəfalashii bə bəne bədi bbəŋ bə́ màa bə́ kēeh bəŋkɨnə bə Chu ja ə Jelushalɛŋ bwo bumə ə Jisho tɨŋ bii bə wu ləə, 2 “Ə duŋ yulaha ffɨŋ bəne bwo bə kintu bìhi too wi kitɨŋ wwuŋ bəche tah biaa bə fwii mà chiee lə? Bə́ wìilə kwáŋ bə́ hlə di ə je nni ŋkɨnə kìɛɛ lə yee bə́ dī kə.” 3 Jisho chuu bə bə́ lə, “Ə yulaha ffɨŋ bə bìhi bəŋkɨnə bə Chu ŋkwo weŋ, bə bə̀lə ə duŋ too weeŋ wi kwili lə? 4 N'yɔ̄ɔ nəni, yulahalə Chu mà yɔɔla lə, ‘Bwɔkwe bə bəchwa bə mwah,’ baa yɔɔ dəŋ lə, ‘Ə mbɛɛ to tili ləkə mahni, bə́ jii wu.’ 5 Kwaalə, bə yɔ̀ɔ ŋkwo weŋ lə, ə mbɛɛ lə yɔɔ bə tili ləkə bə mahni lə, ‘Fieŋ ffɨŋ wə hə duŋ lə wə bənə ə mi kwáŋ, nhə nnəə fi ə duŋ bə Chu,’ 6 kəə duŋ ə i nakə baa lə bwɔkwe bə bətili bə mahni bənjə fieŋ fie nə bə bə́ kə. Ye bə fə̀ li die Chu chù fieŋ finya ye bə bə̀lə lə ŋkɨnə weŋ kitɨŋ. 7 Bəŋ bəne bbəŋ bə yɔ̀ɔ chili, bə fə̀ chili! Fieŋ ffɨŋ Ejaya mbɛɛ hlɨŋ Chu mà yɔɔ kieeŋ duŋ chɛɛŋ, ye i mà yɔɔlə lə,

8 ‘Bəne bəhŋ bwɔ̀kwe bə mi kwaa ə duŋ bə kijə,

tɔ́ŋ ŋəbə dùŋ je nyɛɛkə ə mi go.

9 Bə́ chèe Chu bə mi ə duŋ nya,

yulahalə bə́ jə̀ bieŋ bbɨŋ bəne hlè bə́ kèeh lə ə die njəŋ.’”

Fieŋ ffɨŋ fi dùŋ ə fi yihi bihi mbɛɛ

(Maak 7:14-23)

10 Jisho ja chee jə kintu ki bəne kie, ki bwo. I yɔɔ bə bə́ lə, “Bə wələ wo fieŋ ffɨŋ n'yɔ̄ɔ fie, bə kələ fi kinwaa. 11 Fieŋ ffɨŋ fi lɛ̀ɛ ə mbɛɛ jə yìhi lə bihi wu kə. Ə fieŋ ffɨŋ fi fù ə mbɛɛ jə ffɨŋ fi yìhi bihi wu.”

12 Bəne bə Jisho bə kintu bie bwo yɔɔ bə wu lə, “Wə yu kə̄lə dəŋ lə Bəfalashii hə woo fieŋ ffɨŋ wə hə yɔɔ fie fi bee bə́ lə?” 13 I chuu bə bə́ lə, “Tiɛɛ kinhliŋ kkɨŋ Tah nnu i dùŋ yo ə buh kə dɔɔ, bə́ lə bwa ki. 14 Bə tukwaŋ ə bə́ go, ə bəmbandii bbəŋ bə́ nyìi je bə bəne. Ə mbandii lə chɛchɛ ju ə bə́ bənhliŋ gəŋ gbe ə joo mə.” 15 Pita yɔɔ bə Jisho lə, “Baba nachɛ kwaa be fieŋ ffɨŋ ŋgaŋga ye yɔ̄ɔ fie ki fi.” 16 I chuu lə, “Bəŋ dəŋ kə kələ bieŋ kə lə? 17 Bə kə kələ lə fieŋ finhliŋ ffɨŋ mbɛɛ yìi ə wu jə bwɔ gəŋ bulə bwo fi kah fu kə lə? 18 Kwaalə, fieŋ ffɨŋ fi fù ə mbɛɛ jə bwo ə duŋ ə tɔŋ liih mə. Ə duŋ fi ffɨŋ fi yìhi mbɛɛ. 19 Bi fù ə tɔŋ li mbɛɛ mə, mbɛɛ hlə yee i kə̄nə munhlenə muŋ'waha, bənjii mbɛɛ, bənɔŋ bə kpɛɛ mbɛɛ ləkə nyimi mbɛɛ, ŋ'waali kiwaali, nyi buyi, mbemi kah bə nhlaah yo kaalənə ləkə bən'yihi yii li mbɛɛ. 20 Bɨhŋ lə bieŋ bbɨŋ duŋ ə bi yihi bəne. Bəndi kwáŋ kə wii lə yìhi lə mbɛɛ kə.”

Kpɛ ju nnu i mà duŋ nfuntə yii tɔŋ ə Jisho mə

(Maak 7:24-30)

21 Jisho ja həmə wa gbo gəŋ ə bidi bi Taya bə Shidɔŋ mə. 22 Fi duŋ lə kpɛ ju nnu Kana nnu i mà duŋ həmə mà jaa bwo ŋəŋ Jisho, de bə wu lə, “O Baba, Ŋwa Ŋkɨŋ Daafi, kwo kwaa hlɨŋ bə mi lə. Ŋiaa kpɛ yo nnu fiŋkwini fɨ̀hɨŋ wu gbaaŋ.” 23 Kwaalə Jisho wo nəni nakə chuu lə wu jə kə. Bəne biih bə kintu baŋ bwo kɔnɔ wu yɔɔ lə, “Yɔɔ bə kpɛ nu lə yee i gə̄ŋ. Yu dē i bə̄lə be.” 24 Jisho chuu lə, “Bə́ mà faŋ mi kwaa ə duŋ yu bəne Bəishlael. Bə́ dùŋ ye shɔ́ŋ yyɨŋ yí mà laa.” 25 Kwaalə kpɛ yo bu baa bwo bɛŋ núh ə Jisho fwi yɔɔ lə, “Baba, butee chɨnə kwaa mi lə.” 26 Jisho chuu bə wu lə, “Fi duŋ nə yəəŋ bənjə biləə bi bwɔni lɛɛ nə bə bwí kə.” 27 Kpɛ yo yɔɔ lə, “Ə chɛɛŋ Baba. Kwaalə maa bwí yii dɔ̀ɔ di bimbuunə bbɨŋ bi gbè bie kwe ə kidaŋ ki che kwoo bəŋ bwɔɔ nnu i dì.” 28 Jisho hlə chuu bə wu lə, “O kpɛ, kimbemi ko kie kintaabə. Fi duŋ bə wə ye wə kiɛɛ lə.” Kwaa nəni ŋiaani yo bu ŋwunə.

Jisho lee bəne bənchuku bənua

29 Jisho ja həmə yee i gə̄ŋ, i gəŋ kah baha ə Nɔ nnu Galilii tɨŋ, biŋ gəŋ ə kɔnɔ go, shii həmə. 30 Bimɔ bi bəne kiŋaaŋkə bwo ə wu go nəni gbɛɛɛ. Bədi tū bə́ bwō bə bəne bbəŋ bə́ dùŋ bəŋkɔkɔ kaa, maa bəŋkɔya, maa bbəŋ bə́ dùŋ bəmbandii, maa bbəŋ bə́ dùŋ bəmbambituŋ, maa bədi bə jə́ŋ kiŋaaŋkə. Bə bwō bə bə́, bə́ nɔ̀hiŋ ə wu fwi i ŋwùhuŋ bə́. 31 Gəə ŋɨŋ kimɔ kie ye bə́ mà ŋəŋ lə bənfili yɔ̄ɔ, bəŋkɔya ŋwūnə, bəŋkɔkɔ kaa jāa dəŋ ntiiŋ, bəmbandii ŋə̄ŋ bieŋ. Bə́ faŋ kiŋkohi bə Chu bəne Bəishlael.

(Maak 8:1-10)

32 Jisho chee jə bəne biih bə kintu, bə́ bwo. I yɔɔ bə bə́ lə, “N'yo bə hlɨŋ yi kwonə bə kimɔ kɨhŋ, yulahalə bə́ duŋna bə mi joo tɔh, fieŋ ffɨŋ bə́ lə di kə baa lə duŋ kə. Ŋkə ŋkiɛɛ lə lə ntukwaŋ ə bə́ go lə yee bə́ gə̄ŋ bə jəbulə kə, yulahalə duŋ ə bə́ gəŋ gbe wa je bə jəbulə.” 33 Bəne biih bə kintu bii bə wu ləə, “Ə duŋ ə kkə jə biləə fəhəŋ yaŋ nji bbɨŋ duŋ ə bi wunə bənlee dɨŋ kɨhŋ kimɔ ki bəne mu lə?” 34 Jisho bii bə bə́ ləə, “Bə kənə chée yí bibele miɛhɛŋ lə?” Bə́ chuu lə, “Yí duŋ fumanyaaŋ bə munfiɔɔnə nəŋ chɛɛ.” 35 Jisho hlə yɔɔ lə kimɔ ki bəne kie shii həkwe. 36 Bə́ shii, i jə chée yí bibele yé fumanyaaŋ bə munfiɔɔnə mwe, nə kimbaafɛɛ bə Chu, hlə gaa nə bə bəne biih bə kintu, bə́ hlə ga bə bəne bie. 37 Mbɛɛ mənhliŋ di fiili. Bə́ buhuŋ biŋkə bbɨŋ bi mà she bie, bi yii bijee fumanyaaŋ. 38 Bəne bbəŋ bə́ mà di bie mà duŋ bənəə bənchuku bənua, ə duŋ bə́ kə faa bəkwɛɛ bə bwɔni buhuŋ mu kə. 39 I hlə chii bimɔ bie lə yee bi kwə̄lə. I lɛɛ ə kikpɔŋkɔ mə gəŋ wɛɛ wi Magadaŋ.