Bəŋkɨnə bə Mbɛɛ ŋkee
7
Butuu budi Bəfalashii bə bəne bədi bbəŋ bə́ màa bə́ kēeh bəŋkɨnə bə Chu ja ə Jelushalɛŋ bwo bumə ə Jisho tɨŋ. 2 Bə́ chiini ŋəŋ ye bəne bə kintu ki Jisho bədi dī bə kwáŋ ŋə yili, ə duŋ bə́ mà kə wii lə kə.ª 3 Bəfalashii maa bə Bəjuu bənhliŋ, màa bə́ bə̄lə kwaa ə duŋ too wi kitɨŋ ki bəche tili bəbə bə fwii, lə duŋ ə mbɛɛ nakə diee fieŋ i kaani kə wii lə kwáŋ yəəŋ ye bə́ màa bə́ bā lə bəŋ'wii. 4 Ə mà duŋ ə mbɛɛ kwələ ə shibəŋ bwo di fieŋ i kaani kə wii lə kwáŋ bə wuh ŋiih kə. Bə́ màa bə́ fə̄ dəŋ bieŋ ə too wi kitɨŋ kibə mə kiŋaaŋkə, ye bəŋ'wii bikwooh bə bibi maa bikaŋ.ª 5 Bəfalashii bə bəne bbəŋ bə́ kèeh bəŋkɨnə bie hlə bii bə Jisho ləə, “Ə duŋ yulaha ffɨŋ bəne bwo bə kintu duŋ kə yee bə́ bə̄lə too wi kitɨŋ ki bəche tah biaa bə fwii kə lə? Ə duŋ yulaha ffɨŋ bə́ dì bə kwáŋ ŋə yili lə?” 6 Jisho chuu bə bə́ lə, “Ejaya mbɛɛ hlɨŋ Chu mà yɔɔla kichɛɛŋ kieeŋ lə bə duŋ bəne bbəŋ bə yɔ̀ɔ chili, bə fə̀ chili. Bə fə̀ ə duŋ bieŋ bbɨŋ i mà bieŋ, Chu yɔ̀ɔ lə,‘Bəne bəhŋ bwɔ̀kwe bə mi kwaa ə duŋ bə kijə,
tɔ́ŋ ŋəbə dùŋ je nyɛɛkə ə mi go.
7 Bə́ chèe Chu bə mi ə duŋ nya,
yulahalə bə́ jə̀ bieŋ bbɨŋ bəne hlè,
bə́ kèeh lə ə die njəŋ.’
8 Ə dəŋ ye bə́ tulə kwáŋ ə bəŋkɨnə bə Chu go, yee bə́ chī ə duŋ bə bəne.” 9 Jisho yɔɔ bə bə́ lə, “Bə kəla je nɨhŋnə bəŋkɨnə bə Chu fo bə lə yee bə bə̄lə ə duŋ too weeŋ wi kwili. 10 Mushe mà yɔɔla lə, ‘Yee bə bwɔ̂kwe bə bəchwa bə mwah.’ Baa yɔɔ dəŋ lə, ‘Ə mbɛɛ to tili ləkə mahni, bə́ jii wu.’ 11 Kwaalə, bə yɔ̀ɔ ŋkwo weŋ lə, ‘Ə mbɛɛ kənə fieŋ ffɨŋ duŋ ə i chɨnə tili ləkə mahni mu, ə mə ja yɔɔ bə tili ləkə bə mahni lə fieŋ fie duŋ ə duŋ Kɔbaŋ,’ (fi duŋ lə ə fi Chu,) 12 kəə duŋ ə bə́ nakə baa lə bemi lə duŋ ə i jə fieŋ fie chɨnə tili bə mahni mu kə. 13 Bə fə̀ nəni, bə fə̀ die Chu dùŋ fieŋ finya yu fwɔ weeŋ wi kitɨŋ wwuŋ bə kèeh bəne mu. Bieŋ bidi duŋ dəŋ kiŋaaŋkə ye bɨhŋ bbɨŋ bə fə̀.”
Fieŋ ffɨŋ fi yìhi mbɛɛ
14 Jisho baa chee bəne bə́ bwo, i yɔɔ bə bə́ lə, “Bə wələ wo bəŋ bənhliŋ fieŋ ffɨŋ n'yɔ̄ɔ fie, bə kələ fi kinwaa. 15 Fieŋ fidi hləŋ ffɨŋ fi bwò ə bweenə bwo lɛɛ mbɛɛ bulə yii yìhi wu. Ə fieŋ ffɨŋ fi fù ə wu bulə ffɨŋ fi yìhi wu. [ 16 Mbɛɛ nnu i kə̀nə bituŋ biwonə, i wo.”]ª
17 Jisho she bəne bie, lɛɛ ə chəŋ, bəne biih bə kintu bii bə wu ki ŋgaŋga ye. 18 I chuu bə bə́ lə, “Bəŋ dəŋ kələ lə bieŋ kə lə? Bə kə kələ lə fieŋ finhliŋ ffɨŋ mbɛɛ yìi ə wu jə yìhi lə wu kə lə? 19 Yee fi dûŋ lə, yulahalə fi lɛɛ lə kah gəŋ ə tɔŋ liih mə kə, fi bwɔ gəŋ ə duŋ bulə, fi hlə bwo kah fu.” (Ye Jisho mà yɔɔlə nəni, fi hlə yee fi dūŋ lə bidinə binhliŋ duŋ wɛɛŋ.) 20 I baa yɔɔ lə, “Ə fieŋ ffɨŋ fi fù ə mbɛɛ mə ə fi ffɨŋ fi yìhi mbɛɛ yo, 21 yulahalə bieŋ biwaha bbɨŋ mbɛɛ fə̀, fù ə tɔŋ liih mə. Bieŋ ye munhlenə muŋ'waha, bəŋ'waali kiwaali, bənyi buyi, bənjii mbɛɛ, bənɔŋ bə kpɛɛ mbɛɛ ləkə nyimi mbɛɛ, 22 bəŋge díi ŋə bieŋ, bəmbee bieŋ, bəfihi fihinə, bənfə nyɛninə, bənluhuŋ mɛɛ, bəmbihi yíi ŋə bəne, bənjə gbo maa bənjɨkə jɨkənə. 23 Bieŋ biwaha bɨhŋ binhliŋ fù ə tɔŋ li mbɛɛ mə hlə yee bi yīhi wu.”
Kpɛ nfuntə ju yii tɔŋ ə Jisho mə
24 Jisho ja həmə, gəŋ ə bidi bi Taya bə bi Shidɔŋ mə. Ye i gəŋ lə mə, i lɛɛ ə chəŋ ji mə, i nakə leki lə mbɛɛ ju kələ lə i yo mu kə. Kwaalə, bəne kələ ba. 25 Kpɛ ju mà duŋ həmə fiana yili dùŋ ə ŋiaani kpɛ mə. Cha mi ye i wolə ki Jisho, i bu ja cha mi gbe ə Jisho fwi. 26 Kpɛ yo mà duŋ kpɛ Bəglik, i mà kə duŋ nə kpɛ Bəjuu kə. Bə́ mà bwee wu ə Fonishia kitɨŋ ki Shilia mə. Ye i gbe lə wu fwi nəni, i kɔnɔ Jisho lə i fwoo nchinda hlaata yo ə ŋiaani go. 27 Jisho chuu bə wu lə, “Cheekwaŋ bə́ hlaa lee bwɔni, yulahalə fi kə duŋ nə yəəŋ bənjə bidinə bi bwɔni lɛɛ nə bə bwí kə.” 28 Kpɛ yo chuu bə wu lə, “Ə chɛɛŋ Baba. Kwaalə, bwɔɔ nnu bwɔni dì, bwí dɔ̀ɔ yi dì bimbuunə bbɨŋ bi gbè bie kwe.” 29 Jisho hlə yɔɔ bə wu lə, “Yu fieŋ fi wə chuula fɨhŋ, duŋ ə yee wə gə̄ŋ wə fo, nchinda hlaata yo tookwaŋ ə ŋwa yo go.” 30 Kpɛ yo hlə ja yee i kwə̄lə, i gəŋ ŋəŋ ŋiaŋ yo nɔŋ ta ə duŋ nchinda hlaata yo hə fwoo ə wu go.
Jisho fə mbambituŋ wò bieŋ, i yɔ̀ɔ jə
31 Jisho ja ə bidi bi Taya mə, kahiŋ Shidɔŋ baa kahiŋ bidi bi Bibalaki bi Yuufi, hlə kah je ə Nɔ nnu Galilii mə. 32 Bəne bədi ja bwo bə mbɛɛ ju ə duŋ mbambituŋ i kə kələ n'yɔ̄ɔ jə kə. Bə́ kɔnɔ Jisho lə i chi kwaŋ wiih ə wu bəŋ, i ŋwuhuŋ wu. 33 Jisho hlə jə wu bəə wu fu ə kintu kie mə, yee bə́ dūŋ bə́ bə́. I hlə yii muŋkwaani mwii ə bituŋ bi mbɛɛ yo mə, fə ntɨŋ tuu liniini li mbɛɛ yo go, 34 kee buh, chwaani jə,ª yɔɔ bə wu lə, “Efata” fi duŋ lə, “Wɛɛmə.” 35 Bituŋ bi mbɛɛ yo bie hlə wɛɛmə cha mi, liniini liih yaalə, i hlə yee i yɔ̄ɔ kinwaakə. 36 Jisho hlə looŋkə bəne lə bə́ kə yɔɔ lə bə mbɛɛ kə. Ye i màa i lōoŋkə lə, bə́ bu gaa yɔɔ gəŋ fwi fwi. 37 Gəə yee ki ŋɨ̄ŋ bəne gbaaŋ. Yee bə́ nāamə, bə́ yɔ̀ɔ lə, “Jisho kə̀lə bənfə bieŋ binhliŋ kinwaakə. I fə̀ bəmbambituŋ wò bieŋ, bənfili yɔ̀ɔ jə.”