Maak 8

Jisho lee bəne bənchuku bənua

Ə joo ŋie mə, kimɔ ki bəne baa bumə nəni gbɛɛɛ. Ə bwo duŋ lə bə́ jɨna fidinə, Jisho chee jə bəne biih bə kintu yɔɔ bə bə́ lə, 2 “N'yo bə hlɨŋ yi kwonə bə kimɔ kɨhŋ, yulahalə bə́ duŋna bə mi joo tɔh, fieŋ fidinə hləŋ kə. 3 Ə ntukwaŋ lə yee bə́ kwə̄lə ə bə́ kwuŋ fieŋ ndi hləŋ kə, ə bə́ gəŋ fɨŋ wa jə bə jəbulə yulahalə bədi ə bə́ mə bwo jé yinyɛɛ.” 4 Bəne biih bə kintu chuu lə, “Ə duŋ ə mbɛɛ jə fidinə fəhəŋ yaŋ nji bənlee dɨŋ bəhŋ bəne mu lə?” 5 I bii bə bə́ lə, “Bə kənə chée yí bibele miɛhɛŋ lə?” Bə́ chuu lə, “Ə fumanyaaŋ.” 6 Jisho hlə yɔɔ lə kimɔ ki bəne kie shii həkwe. Bə́ shii, i jə chée yí bibele yé fumanyaaŋ, nə kimbaafɛɛ bə Chu, gaa nə bə bəne biih bə kintu lə bə́ ga nə bə́. bə hlə ga. 7 Bə́ mà kənə dəŋ munfiɔɔnə mundi nəni chɛɛ. I jə dəŋ nə kimbaafɛɛ bə Chu, yɔɔ lə bə́ ga nə bə bəne bie. 8 Mbɛɛ mənhliŋ di fiili. Bə́ buhuŋ biŋkə bbɨŋ bi mà she bie, bi yii bijee fumanyaaŋ. 9 Bəne bbəŋ bə́ mà di bie mà duŋ ye bənchuku bənua lə. 10 I hlə tukwaŋ ə bə́ go, yee bə́ kwə̄lə. I lɛɛ ə kikpɔŋkɔ mə cha mi bəə bəne biih bə kintu bie hlə ja gəŋ ə bidi bi Dalmanuta mə.

Bəfalashii yee bə́ kīɛɛ lə Jisho nyii fieŋ fi ŋɨŋ gəə

(Matio 12:38-42; 16:1-4)

11 Bəfalashii ja bwo ə Jisho tɨŋ, chɔɔ noonə bə wu, yɔɔ lə, i fə fieŋ ffɨŋ fi nyìi muŋgeni mmuŋ mu bwò ə buh. Bə́ màa bə́ yɔ̄ɔ nəni bə́ mɔ̄ŋ wu bumɔŋnə. 12 Jisho chwaani jə gbaaŋ, yɔɔ lə, “Ŋkaani nu kiɛɛ fieŋ ffɨŋ fi nyìi muŋgeni mmuŋ mu bwò buh bənfə laha mu lə? N'yɔ̄ɔ bəŋ kichɛɛŋ lə ə duŋ ə ŋkaani nu ŋəŋ ə fieŋ go kə.” 13 I hlə she bə́, fiimə lɛɛ ə kikpɔŋkɔ mə, yee i lē gəŋ ə wi ju yo mə.

Jisho keeh bəne biih bə kintu lə yee bə́ jə̄ bwɔɔ ki fwɔ wi Bəfalashii bə wi Hɛlɔ

(Matio 16:5-12)

14 Jisho màa i gə̄ŋ ə duŋ bəne biih bə kintu hə laama bənjə kibele, bə́ kənə kwaa ə duŋ chee mi ə kikpɔŋkɔ kie mə. 15 Yee i kēeh bə́ i yɔ̀ɔ lə, “Yee bə chîini kinwaa bə jə̀ bwɔɔ bə jɔ́ yí Bəfalashii maa yí Hɛlɔ.” 16 Bəne biih bə kintu hlə gbe bən'yɔɔ bə́ bə́ ki fieŋ fie, bə́ yɔ̄ɔ lə, “I yɔ̄ɔ ki jɔ ni nəni yulahalə kkə kə duŋ nə bə kibele kə.” 17 Jisho kələ fieŋ ffɨŋ bə́ yɔ̄ɔ fie ki fi, hlə bii bə bə́ ləə, “Bə yɔ̄ɔ ə duŋ ki kibele kkɨŋ bə kə duŋ nə bə ki kə yulaha lə? Bə kə ŋəŋ nə fieŋ ləkə kələ fieŋ kə lə? Ə chu duŋ lə bufe bweeŋ kə wɛɛmə kə lə? 18 Bə bie bə díi kə ŋəŋ nə kə lə? Bə bie bə bituŋ kə woo kə lə? Bə ŋoo lə bieŋ kə lə? 19 Bwɔɔ nnu mmà ŋgaa chée yí bibele yí shiŋ yé, bəne di bənchuku bətiŋ, bə mà buhuŋ biŋkə bbɨŋ bi mà she bie, bi yii bijee bi mwɛhɛŋ lə?” Bə́ chuu lə, “Yuufi ə nchɔ bifwe.” 20 I baa bii ləə, “Ki chée yí fumanyaaŋ yyɨŋ bəne bənchuku bənua hə di yé, bə hə buhuŋ biŋkə bbɨŋ bi hə she bie bi yii bijee bimwɛhɛŋ lə?” Bə́ chuu lə, “Fumanyaaŋ.” 21 I hlə bii bə bə́ ləə, “Bə kaani kə kələ bieŋ kə lə?”

Jisho wɛ díi ŋə mbandii ə kwili li Beshayida mə

22 Lə Jisho bə bəne biih bə kintu le fu ə Beshayida, bəne bədi bwo bə mbandii ju kɔnɔ lə i tuu ə wu go. 23 Jisho kənə wu ə bweenə go, jə wu bəə wu fu ə kwili le mə. I tu ntɨŋ ə díi ŋə mbɛɛ yo ŋie go, chi kwáŋ ŋiih ə wu go hlə bii bə wu ləə, “Wə yu ŋə̄ŋ ə bieŋ go lə?” 24 Mbandii yo tu díi buh, kee yɔɔ lə, “N'yu ŋŋə̄ŋ ə bəne go jɨkə jɨkə, bə́ jāa bə́ dūŋ ye bite lə.” 25 Jisho baa chi kwáŋ ŋiih ə díi ŋə mbɛɛ yo ŋie go, i kee nəni njəəŋ, díi ŋiih hlə chaa, i ŋə̀ŋ ə bieŋ go binhliŋ kinwaakə. 26 Jisho hlə yɔɔ bə wu lə, “Yee wə kwə̂lə, bwɔɔ nnu wə lə yee wə gə̄ŋ wə kə baa lə lɛɛ ə bweenə kə.”

Pita tɔ lə Jisho duŋ Nchuu Fwoo nnu Chu mà kaachi

(Matio 16:13-20; Lukaa 9:18-21)

27 Jisho bə bəne biih bə kintu no həmə yee bə́ gə̄ŋ ə ŋəŋkwili ŋə bidi bi Kashalia Filipi mə. Ye bə́ màa bə́ gə̄ŋ lə, i bii bə bə́ ləə, “Bəne yɔ̀ɔ lə ndùŋ nyəhə lə?” 28 Bə́ chuu lə, “Bəne bədi yɔ̀ɔ lə wə dùŋ Jɔɔŋ N'yiinjɔ, bədi lə Elaja, bədi yɔ̀ɔ lə wə dùŋ mbɛɛ hlɨŋ ju Chu.” 29 I hlə bii chuu bə bə́ ləə, “Bə yɔ̀ɔ ŋkwo weŋ lə ndùŋ nyəhə lə?” Pita chuu lə, “Wə dùŋ Nchuu Fwoo nnu Chu mà kaachi.” 30 Jisho hlə kɨnə lə bə́ kə mɔŋ nə bən'yɔɔ fɨhŋ bə mbɛɛ ju kiih kə.

Jisho yɔɔ ki dɨŋ kpe nni i yá kpe ye

(Matio 16:21-28; Lukaa 9:22-27)

31 I hlə gbe bənlaanə bəne biih bə kintu. I yɔɔ ki kwoo kiih lə, “Ŋwa Mbɛɛ kənə bəŋəŋ bəŋgə kiŋaaŋkə, ə bəne bbəŋ bə́ hlàah kitɨŋ bə bəche ntofi bəŋkuntaŋ bəŋkuntaŋ maa bəne bbəŋ bə́ kèeh bəŋkɨnə bə Chu nɨhŋ wu. Bə́ hlə jii wu, Ə joo bwii tɔh ə i fu ə kpe mə.” 32 I màa i yɔ̄ɔ ki bieŋ bɨhŋ bə bə́ wɛɛŋ. Pita hlə jə wu bəə wu wa gbo, i hlə gbe bənchɔɔ bə wu ki fieŋ fie. 33 Jisho fiimə, kee bəne biih bə kintu, nyieemi Pita yɔɔ lə, “Ja mi dɨŋ hlaata! Wə lèmi lə ə wɛɛ wi Chu mə kə. Wə lèmi ə duŋ ə wɛɛ wi mbɛɛ ŋkee mə.”

34 I hlə dii jə kimɔ ki bəne bə bəne biih bə kintu, yɔɔ bə bə́ lə, “Ə mbɛɛ kiɛɛ lə yee i bə̄lə mi, kəə i kənə bənɨhŋ gbo wiih, tu kiŋgwa kiih yee i bə̄lə mi. 35 Yee bə kə̂lə lə mbɛɛ mənhliŋ nnu i bìaalə kinduŋh kiih lə ki kə laa, mə lə laa ki bu laanə. Kwaalə, mbɛɛ nnu i laa kinduŋh kiih yu mi bə yu hlɨŋ nwaa, kəə i bìaalə ki ə mbiaa lə mə. 36 Ə bə́ buhuŋ mbiŋ mənhliŋ nu nəni nə bə mbɛɛ, ə mə di laa kinduŋh kiih, ə mbɨŋ wi duŋ laha lə? 37 Fieŋ ffɨŋ duŋ ə mbɛɛ gaanə kinduŋh kiih mu duŋ laha lə? 38 Yee bə kə̂lə lə ə gbo lə bee mbɛɛ bəmbələ mi, maa díe yɨŋŋ ə ŋkaani nnu i bee nu bieŋ mə, i duŋ ye mbɛɛ nnu i mà she nyimi ləkə kpɛɛ, yee i fə̄ kiwaali, yee i kə̂lə lə giaali yá yi kwo dəŋ Ŋwa Mbɛɛ bə wu bwɔɔ nnu mə yáa i fīimə i bwō chuu ə kiŋkuntaŋ ki Tili mə bə bənchinda bə Chu bə wɛɛŋ.”