Maak 9

Jisho baa yɔɔ bə bə́ lə, “N'yɔ̄ɔ bəŋ kichɛɛŋ lə, bəne bədi bie bə́ lēmi fəŋ bbəŋ bə́ yá woo chee kpe bə́ kaani kə ŋəŋ nə ye muŋkɨŋ mu Chu bwō bə muŋga kə.”

Gbo wi Jisho gaanə

(Matio 17:1-13; Lukaa 9:28-36)

2 Joo kah buhlɔ, Jisho jə Pita bəə Jɛŋ maa Jɔɔŋ bə́ biŋ ə kɔnɔ kindiɛɛ kidi go, yee bə́ dūŋ mə bə́ bə́. Bə́ duŋ duŋ ŋəŋ gbo wi Jisho gaana ə bə́ dí, 3 bindu biih yee bi chāa bi tə̄ buuu kah ye duŋ ə mbɛɛ yaŋ ə mbiŋ nte wii ə bi chaa. 4 Bə́ bu gənə ŋəŋ Elaja bə Mushe fwoo bwo ə bə́ dí, yee bə́ yɔ̄ɔ bəə Jisho. 5 Pita duŋ duŋ yɔɔ bə Jisho lə, “Mbɛɛ Keehnə Ŋkuntaŋ, fi nwaala ye kkə bie lə fəŋ. Tukwaŋ kkə wɛɛ bichaŋ bitɔh, kidi duŋ ko, kidi ki Mushe, ə kidi duŋ ki Elaja.” 6 I mà yɔɔ nəni yulahalə nɨŋ mà kwoo bə́ gbaaŋ, i nakə baa lə kələ fieŋ ffɨŋ duŋ ə i yɔɔ kə. 7 Kwaa ye i yɔɔlə nəni, joonə bu bwo kəə bə́, die yɔɔ ə joonə kie mə lə, “Nu lə Ŋiaa, i duŋ tɔŋ lɨŋŋ. Yee bə wô ə duŋ bə wu.” 8 Kichə shəəŋ, lə bə́ kee bə́ nakə baa lə ŋəŋ ə bəne bie go kə, kahiŋ Jisho kwaa wuu mboŋ.

9 Bə́ ja ə kɔnɔ kie go, yee bə́ bwɔ̄, Jisho kɨnə bə́ lə bə́ kə yɔɔ lə fieŋ ffɨŋ bə́ ŋəŋna bə mbɛɛ kə, kahiŋ kwaa bwɔɔ nnu Ŋwa Mbɛɛ yá fu ə kpe mə. 10 Bə́ wo kwaa nəni chi hədɨŋ, kwaalə yee bə́ nāamə bə́ bə́ ləə nfu wi nu ə kpe mə duŋ lə ləhəŋ lə. 11 Bə́ hlə bii bə Jisho ləə, “Ə duŋ yulaha ffɨŋ bəne bə keehnə bəŋkɨnə yɔ̀ɔ lə, Elaja kənə bənhlaa bwo, ə Nchuu Fwoo nnu Chu mà kaachi yo yá hlə bwo lə?” 12 Jisho chuu bə bə́ ləə, “Ə chɛɛŋ lə Elaja yá yi hlaa bwo bwɛɛ bieŋ binhliŋ ə bi chu ye bi mà hlaa duŋ lə. Kwaalə, fieŋ ffɨŋ fi dùŋ fɨhŋ ki bieŋ lə, Ŋwa Mbɛɛ kənə bəmbwo ŋəŋ bəŋgə kiŋaaŋkə, ə bəne nɨhŋ wu, fi duŋ lə yulaha lə? 13 Kwaalə n'yu n'yɔ̄ɔ bə bəŋ lə Elaja mà hlaa bwo, bəne yee bə́ fə̄ fieŋ ffɨŋ bə́ lèki bə wu. Ə duŋ kwaa ye bə́ mà bieŋ kiih.”

Jisho fwoo fiana waha ə ŋiaŋ ju mə

(Matio 17:14-21; Lukaa 9:37-43a)

14 Jisho bə bəne biih bə kintu bie hlə bwɔ bwo bwii həmə ye bəne biih bə kintu bədi bie mà duŋ lə, ŋəŋ kimɔ kiŋkuntaŋ ki bəne kaala bə́ kunə, bəne bədi bbəŋ bə́ màa bə́ kēeh bəŋkɨnə bə Chu noo noonə bə bə́. 15 Cha mi ye kimɔ kie kinhliŋ mà ŋəŋ lə ə Jisho go, bə́ gəhlə gbaaŋ, lələ gəŋ chee wu. 16 I bii bə bə́ ləə, “Bə́ noo bə bə́ ə duŋ ə laha bəŋ lə?” 17 Mbɛɛ ju chuu ə kimɔ kie mə lə, “Mbɛɛ Keehnə, nhə mbwoo bə ŋiaa nyo nu yulahalə fiana ju yo ə wu mə, ə duŋ nnu i bwò i fə̀ mbɛɛ chù nfili. 18 Fiana yo bwò i tà jə wu, i gbè həkwe, fuu tùu wu jə, i dì bigəə, i tàta. N'yɔɔ lə bəne bwo bə kintu bəhŋ fwoo fiana yo, bə́ nakə kaa lə mu kə.” 19 Jisho wo nəni, yɔɔ bə bə́ lə, “Hooo! Ŋkaani nnu i kə yii lə tɔŋ ə Chu mə kə. Nlə nduŋ bə bəŋ gəŋ bwii bwɛhɛŋ lə? Nlə ŋkwaa tɔŋ bə bəŋ gəŋ bwii bwɛhɛŋ lə? Bə́ bwo nə mi ŋiaŋ yo fəŋ.” 20 Bə́ hlə jə ŋiaŋ yo yee bə́ bwō bə wu ə Jisho go. Ye fiana yo ŋəŋ lə ə Jisho go, i hlə hla jə ŋiaŋ yo cha mi lɛɛ həkwe yee i bɨ̄nə həmə, fuu tūu wu jə. 21 Jisho bii bə che ŋiaŋ yo ləə, “Fieŋ fɨhŋ mà chɔɔ wu bwɔɔ nwɛhɛŋ lə?” I chuu lə, “Fi mà chɔɔ wu i kaani wɛ. 22 Fiana yo lɛɛla wu chá kiŋaaŋkə ə bwii mə maa ə ŋgwiŋ mə i kìɛɛ lə i jii wu. Ə duŋ lə wə lə kaamu bənfə fieŋ, butee, kwo kwaa hlɨŋ bə be, wə chɨnə be.” 23 Jisho chuu bə wu ləə, “Wə bii lə nduŋ ə nfə fieŋ fidi lə? Nduŋ ə fə fieŋ finhliŋ bə mbɛɛ nnu i yiila tɔŋ ə mi mə.” 24 Cha mi che ŋiaŋ yo hlə gɛɛmə buh gbaaŋ lə, “N'yiila tɔŋ ə Chu mə. Fə fo nlə n'yii kah lə.” 25 Ə chulə Jisho ŋəŋ ye kimɔ ki bəne lə̄lə ki bwō būmə həmə ye bə́ mà duŋ lə, i nyieemi fiana waha yo yɔɔ lə, “Wə, fiana waha nu, nnu i fə̀ ŋiaŋ nu kə baa lə yɔ̄ɔ jə, i dùŋ kə woo dəŋ bieŋ, n'yɔ̄ɔ bə wə, fu ə ŋiaŋ nu mə, gəŋ bu gəŋnə. Wə yá kə baa lə lɛɛ ə wu mə kə.” 26 Fiana yo gɛɛmə buh gbaaŋ, nɛhiŋ ŋiaŋ yo, lɛɛ ə je waha mə, hlə fu ə wu mə. I nɔŋ həkwe ye mbɛɛ ŋkpi lə. Bəne kiŋaaŋkə ŋəŋ nəni, bə́ hlə yee bə yɔ̄ɔ lə, “I kpee.” 27 Jisho kənə wu ə kwaŋ go, jaa wu, i lemi fa.

28 Lə Jisho bə bəne biih bə kintu gəŋ lɛɛ ə chəŋ, bə́ bii bə wu dɨŋ dɨŋ ləə, “Kkə hə kə kaa lə mu bənfwoo fiŋkwini fie yulaha lə?”

29 I chuu bə bə́ lə, “Fieŋ ffɨŋ fi dùŋ ə fi fwoo dɨŋ fɨhŋ fiŋkwini, duŋ kwaa Chu cheenə. Fieŋ fidi chili duŋ ə fi fwoo kə.”

Jisho baa yɔɔ ki dɨŋ kpe nni i yá kpe ye

(Matio 17:22-23; Lukaa 9:43b-45)

30 Bə́ hlə ja həmə kah ə je nni Galilii mə, Jisho nakə kiɛɛlə lə mbɛɛ kələ kə, 31 yulahalə i màa i jāa i kèeh bəne biih bə kintu. I màa i kēeh bə́ lə, “Bəne yá yi nə Ŋwa Mbɛɛ ə kwáŋ ŋə bəne bə bieŋ biwaha mə ə bə́ jii wu. Ə chulə bə́ jiila wu nəni, ə ya bwo chu ə joo bəŋ tɔh, ə i ya fu ə kpe mə.” 32 Ye i yɔɔlə nəni, bə́ nakə baa lə kələ fieŋ ffɨŋ i yɔɔ fie kə, kwaalə, yee bə́ lɔ̄ bəmbii bə wu.

Mbɛɛ ŋkuntaŋ duŋ nwɛhɛŋ lə?

(Matio 18:1-5; Lukaa 9:46-48)

33 Bə gəŋ bwii ə Kapanahuŋ, ə chulə yee bə́ dūŋ chəŋ, Jisho bii bə bə́ ləə, “Bə həə bə nōo noonə wa je ki laha lə?” 34 Bə́ də ba shiiiŋ, yulahalə bə́ màa bə́ jāa mə je bə́ nōo noonə bə go ŋəbə ləə ə mbɛɛ nwɛhɛŋ nnu i dùŋ ŋkuntaŋ lə. 35 Jisho shii həkwe, chee bə yuufi ə nchɔ bəfwe yɔɔ bə bə́ lə, “Ə mbɛɛ lə kiɛɛ bənduŋ mbɛɛ nnu fwi, kəə i kənə bənjə gbo wiih lə i duŋ mbɛɛ nnu dɨŋ, i duŋ dəŋ mbɛɛ nnu i nɨ̀ŋ bə bəne bənhliŋ.” 36 Ye i yɔɔlə nəni, i hlə jə ŋiaŋ wɛ chi ə bə́ mə, hlə fiimə kənə wu ə kwáŋ ŋiih go yɔɔ bə bə́ lə, 37 “Ə mbɛɛ lə tɨŋ jə ŋiaŋ wɛ ye nu lə ə yii lɨŋŋ bəŋ, kəə i tɨ̀ŋ jə ə duŋ mi. Ə mbɛɛ lə tɨŋ jə mi, kəə i kə tɨŋ nə jə ə duŋ mi kə, kəə i tɨ̀ŋ jə ə duŋ mbɛɛ nnu i faŋ yo mi.”

Ə mbɛɛ lə nakə yee i nōo bə be, kəə i yu bēmi be

(Lukaa 9:49-50)

38 Jɔɔŋ yɔɔ bə wu lə, “Mbɛɛ Keehnə, kkə ma ŋəŋna ə mbɛɛ ju go i fwòo muŋkwini ə bəne go ə yii lo bəŋ, kkə looŋkə wu, yulahalə i kə duŋ nə mbɛɛ ə kintu kiaa mə kə.” 39 Kwaalə Jisho chuu bə bə́ lə, “Bə kə looŋkə mbini yo mbɛɛ kə. Bə kələ lə ə mbɛɛ lə fə fieŋ fi ŋɨŋ gəə, ə mə chee yii lɨŋŋ, həmə həmə kəə ə duŋ ə i baa fiimə yɔɔ fieŋ fiwaha ə mi go kə. 40 Ə mbɛɛ lə nakə nɨhŋnə be, kəə i fwɔ̀ŋ be. 41 N'yɔ̄ɔ bəŋ kichɛɛŋ lə, ə mbɛɛ nə bəŋ kwooh ki ŋgwiŋ yulahalə bə́ chèe bəŋ lə bəne bə Kleto, kəə duŋ dəŋ ə i yá jɨnə ba bikoonə biih kə.”

Bieŋ bbɨŋ bi fə̀ lə yee bəne fə̄ yíwaha

(Matio 18:6-9; Lukaa 17:1-2)

42 Jisho baa yɔɔ lə, “Ə duŋ lə mbɛɛ ju fə lə ŋiaŋ mwi ə kintu ki bwɔni bə wɛ bbəŋ bə́ yiila tɔ́ŋ ə mi mə fə yiwaha, ə fi nwaa lə bə́ hlu mbini yo mbɛɛ niɛɛ liŋkuntaŋ ə mɛɛ kiih go, yəə lɛɛ wu ə nɔ mə. 43-44 Fi baa duŋ dəŋ lə, ə bweenə ko lə fə lə yee wə fə̄ yiwaha, wə kaalə fwoo bweenə kimbini kie. Fi nwaa lə wə lɛɛ ə kinduŋh ki kə kaa mə bə bweenə ko kiŋkaanə, kahiŋ bəŋkənə bibweeni bwo binhliŋ ə wə gəŋ ə bwii wuŋkuntaŋ mə wwuŋ wi fì bwɔɔ mənhliŋ kə nyɨŋ nə kə.^ª 45-46 Ə gbu wo lə fə lə yee wə fə̄ yiwaha, wə kaalə fwoo wi. Fi nwaa lə wə lɛɛ ə kinduŋh ki kə kaa mə ə duŋ bə gbu mwe, kahiŋ bəŋkənə wuh ŋo ŋənhliŋ ə wə gəŋ lɛɛ ə bwii wuŋkuntaŋ mə. 47 Ə dii lo lə fə lə yee wə fə̄ yiwaha, wə chɔ fwoo dii le. Fi nwaa lə wə lɛɛ ə muŋkɨŋ mu Chu mə bə dii mwe, kahiŋ bəŋkənə díi ŋo ŋənhliŋ, lə bə́ lɛɛ wə ə bwii wuŋkuntaŋ mə. 48 Dɔhɔ kɨhŋ duŋ kkɨŋ nyóŋ yyɨŋ yí dì bəne duŋ kə kpee kə, bwii dəŋ nyɨ̀ŋ nə həmə kə. 49 Yee bə kə̂lə lə bwii yá yi tuu ə mbɛɛ mənhliŋ go dəŋ ye bə́ chaalə fieŋ bə kichibi. 50 Kichibi duŋ fieŋ finwaa, kwaalə ə ki lə laa kinjənjə ki ki, ə wə baa fə ləhəŋ ə ki hlə yee ki jə̄njə chuu lə? Yee bə dûŋ ye kichibi kkɨŋ ki jə̀njə, bə mbɛɛ bə mbɛɛ yee bə dūŋ ə kindunshiiŋ mə.”