Lukaa 17

Keehnə ki Jisho ki yiwaha bə kimbemi maa nimi

Jisho yɔɔ bə bəne biih bə kintu lə, “Bieŋ bbɨŋ bi lɛ̀ɛnti bəne bənfə yiwaha duŋ ə bi yá jɨnə kə. Kwaalə, ŋgə duŋ bə mbɛɛ nnu i lɛ̀ɛnti bəne lə yee bə́ fə̄ yíwaha. 2 Fi nwaa lə bə́ hə tiɛɛ mbɛɛ yo niɛɛ liŋkuntaŋ ə mɛɛ kiih go, yəə lɛɛ wu ə nɔ mə, kahiŋ lə yee i fə̄lə bwɔni bəhŋ fə̀ yíwaha. 3 Yee bə jə̂ bwɔɔ bə go ŋieeŋ.

Ə mwaa lə fə fieŋ fiwaha bə wə, wə chɔɔ bə wu. Ə mə gaanə wə laamə nə wu. 4 Ə mə lə fə dəŋ wə yíwaha chá fumanyaaŋ ə butuu go, bwɔɔ nnu i fə̀ bwo chu dɨŋ kwi kwáŋ lə i gbee, kəə wə kənə kwaa lə yee wə lāamə nə wu.”

5 Bəne bə hlɨŋ bə Baba ja yɔɔ bə wu lə, “Fə kimbemi kiaa duŋ kintaabə gbaaŋ.” 6 Baba chuu lə, “Ə bə lə kənə kimbemi kkɨŋ ki dùŋ ye munsháŋ muntə lə, kəə duŋ ə bə yɔɔ bə tiɛɛ kiŋkuntaŋ kɨhŋ lə ki ŋəəmə fu gəŋ tɨŋ lemi ə nɔ mə, ə ki wo bəŋ. 7 Bə jə lə mbɛɛ ju ə kintu kieeŋ mə lə kənə mbɛɛ nimi wi, ə mə lə shi bənɨŋ wɛɛh kiih, ləkə i fwòŋ shɔ́ŋ, bwɔɔ nnu mə lə fiimə bwo chu dɨŋ, ə wə yɔɔ bə mbɛɛ nimi wa yo lə i gəŋ jə biləə biih i shii yee i dī lə? 8 Ə duŋ ə fi duŋ lə kə. Fieŋ ffɨŋ duŋ ə i yɔɔ duŋ kwaa lə i gəŋ fwoo bindu biih, i jwa bwo bə biləə, hlə yee i kē bwɔɔ nnu i diee, ŋwi, ə mbɛɛ nimi yo buhuŋ bieŋ bie hlə gəŋ bəndi. 9 Ə mbɛɛ nimi yo lə fə bieŋ bɨhŋ kiɛkiɛ, ə ŋwuŋ ŋkuntaŋ yo nə kimbaafɛɛ bə wu lə? 10 Ə lə dəŋ yəəŋ ye ŋkwo weŋ duŋ. Ə bə lə fə kaa nimi llɨŋ bə́ nə le bəŋ, ə bə yɔɔ kwaa lə, ‘Kkə duŋ fiaa bəne bə nimi, kkə fəə ə duŋ liaa nimi.’”

Jisho ŋwuhuŋ bəne bə jəŋ kinhlanhla yuufi

11 Ye Jisho mà gəŋ lə ə Jelushalɛŋ, yee i kāh ə ju wi kitɨŋ ki Shamalia bə ki Galilii mə. 12 Lə i chu gəŋ lɛɛ ə kwili lidi mə, bənəə bədi yuufi bbəŋ bə́ màa bə́ gɔ̄ŋ jəŋ kinhlanhla ŋəŋ ə wu go je nyɛɛkə, 13 bə́ gbe bənchee wu bə die ntaabə lə, “Jisho che bəne, kwo hlɨŋ bə be.”

14 Ye Jisho ŋəŋ lə ə bə́ go, i yɔɔ lə, “Bə gəŋ nyii go ŋieeŋ bə bəne bəntofi.” Ye bə́ ja lə yee bə́ gə̄ŋ, bə́ bu ŋwunə chaa wɛɛŋ bə kaani mə je. 15 Mbɛɛ ju mwi ə bə́ mə ŋəŋ lə i ŋwuna, i bu fiimə chu dɨŋ ə Jisho go kohi Chu buh. 16 Ye i bwo lə, i gbe ə Jisho fwi baafɛ wu. Mbɛɛ yo mà duŋ ŋwuŋ nnu Shamalia. 17 Jisho yɔɔ lə, “Bəne bə yuufi bbəŋ nhə ŋwuhuŋ bie bə́ cha mi, bə fumayuufi bie lə fəhəŋ lə? 18 Ə chu duŋ lə mbɛɛ ju hləŋ nnu i ŋəŋ lə mə lə fiimə bwo chu dɨŋ nə kimbaafɛɛ bə Chu kahiŋ kwaa nfuuntə nu lə?” 19 Jisho hlə yɔɔ bə wu lə, “Ja fa gəŋ wə fo. Tɔŋ llɨŋ wə yii le ə mi mə fəə wə ŋwuna.”

Muŋkɨŋ mu Chu mu fidiɛɛ bə mmuŋ mu lə bwo mwe

(Matio 24:23-28, 37-41)

20 Bəfalashii duŋ duŋ bii bə Jisho ləə muŋkɨŋ mu Chu yá chɔɔ bwɔɔ nwɛhɛŋ lə. I chuu lə, “Fieŋ hləŋ həmə ffɨŋ fi yáa fi nyīi bwɔɔ nnu Chu yá gbe bənhlaah muŋkɨŋ mwii kə. 21 Mbɛɛ hləŋ həmə nnu i yá yɔɔ lə, ‘Bə kee ŋəŋ, nu Chu nnu i yu hlāah fəŋ’, ləkə, ‘Kwii wu nnu i yu hlāah filii.’ Bə wələ wo, muŋkɨŋ mu Chu mwe ə bəŋ mə.”^ª

22 I hlə fiimə yɔɔ ə duŋ bə bəne biih bə kintu lə, “Bwɔɔ yu bwō nnu bə lə yee bə kīɛɛ lə bə ŋəŋ Ŋwa Mbɛɛ go maa butuu bumwi kwaa, ə bə nakə ŋəŋ nə ə wu go kə. 23 Ə yáa ə dūŋ ə bwɔɔ yo bəŋ ə bəne bədi yɔɔ lə, ‘Bə kee ŋəŋ, nu wu fəŋ’, ləkə, ‘Bə kee ŋəŋ, yo wu fo.’ Bwɔɔ nnu bə́ yɔ̄ɔ nəni, bə kə bələ bə́, ləkə lə bə gəŋ chiini. 24 Bə kələ ye jaŋ bwo lə i lala buh nəni mwaaŋ, bənchi bə mbiŋ bənhliŋ chaa wɛ́ɛ ŋənhliŋ, bəne bənhliŋ ŋəŋ. Ə lə dəŋ yəəŋ ye bəne bənhliŋ yá ŋəŋ li ə Ŋwa Mbɛɛ go butuu bbuŋ i yá baa bwo. 25 Kwaalə, ye i gəŋ lə, bəmbwo chu wi dɨŋ, duŋ i hlaala ŋəŋ bəŋgə kiŋaaŋkə, ə ŋkaani bəne bə fidiɛɛ bəŋ nɨhŋ wu. 26 Ə lə dəŋ yəəŋ ye fi mà duŋ ə bwɔɔ Nuah bəŋ, ye fi yá duŋ li dəŋ ə bwɔɔ Ŋwa Mbɛɛ bəŋ. 27 Bəne màa bə́ dī, bə́ ŋwì, bəkwɛɛ bə bənəə kwàa biah, bəne nə̀ bwɔni bəbə bə bənəə bə́ kwàa biah bə bə́, gəŋ bwii butuu bbuŋ Nuah mà lɛɛ ə kikpɔŋkɔ mə ŋgwiŋ yii laa bə́ bənhliŋ. 28 Fi yá duŋ li dəŋ yəəŋ ye fi mà duŋ lə ə bwɔɔ Lɔt mə. Bəne màa bə́ dī, bə́ ŋwì, bə́ dì shi, bə́ nɨ̀ŋ biwɛŋ, bə́ wɛ̀ɛ maa chə́ŋ. 29 Butuu bbuŋ Lɔt mà fu ə Shidɔŋ, Chu hlə faŋ bwii wi hlili bwɔ bwo wi tɔŋ ə waalə ə muŋkaŋ, hlə bwɔ bwo fii bəne bə Shidɔŋ bənhliŋ. 30 Ye fi yá duŋ li dəŋ butuu bbuŋ Ŋwa Mbɛɛ yá baa fu nyii gbo wiih.

31 Ə yáa ə dūŋ bumbinibwe, mbɛɛ nnu i dùŋ ə kinchu ki chəŋ bəŋ bieŋ biih duŋ chəŋ, i yá kə baa lə fɨhɨŋ gbo wiih bənhlili lɛɛ chəŋ jə fieŋ maa bənlələ kə. Ə lə dəŋ yəəŋ bə mbɛɛ nnu i dùŋ ə sho yá kwələ lə i gəŋ jə fieŋ kə. 32 Bə hle fieŋ ffɨŋ fi mà kah bə kpɛɛ Lɔt. 33 Mbɛɛ nnu i kiɛɛ bəŋkili kinduŋh kiih kəə i laala ki kwaa dəŋ. Mbɛɛ nnu i laa kinduŋh kiih kəə i kila dəŋ ki bu kilinə. 34 N'yɔ̄ɔ bə bəŋ lə, ə yáa ə dūŋ butuu bumbinibwe, bəne yá nɔŋ ta bəfwe, ə bə́ yá jə mwi ə ju she. 35 Bəkwɛɛ bəfwe yáa bə́ gɔ̄ buniɛŋ həniɛɛ, ə bə́ yá jə mwi ə ju she. 36 [Bənəə bəfwe yá duŋ ə sho, ə bə́ yá jə mwi ə ju she.]”^ª 37 Bəne biih bə kintu hlə bii bə wu ləə, “Baba, fieŋ fɨhŋ yá duŋ ə duŋ fəhəŋ lə?” I chuu ə duŋ ə ŋgaŋga mə lə, “Dɔhɔ kkɨŋ kiŋwuuni duŋ, fo fo bəŋgulu bumə həmə.”