Ŋgaŋga ki kpɛɛ ŋkwu bəə mbɛɛ nnu i hlâah bənhlaa
18
Jisho hlə gba ŋgaŋga ji bəŋkeeh bəne biih bə kintu lə bə́ kənə bənchee Chu bwɔɔ mənhliŋ kə fɨ̀ŋ nə kə. 2 I yɔ̄ɔ lə, “Mbɛɛ ju nnu i hlâah bənhlaa mà duŋ ə kibalaki kidi mə, i kə lɔɔ Chu, i ŋəŋ nə mbɛɛ bu fieŋ kə. 3 Kpɛɛ ŋkwu ju duŋ dəŋ ə kibalaki kie mə. I màa i bā bəŋgəŋ bwɔɔ mənhliŋ i kwì mbɛɛ bənhlaa yo kwáŋ lə i chɨnə kaalə wu hlaa wi yo bəə mbɛɛ nnu i lo yo bə wu. 4 Mbɛɛ yo nakə nəə wu bituŋ ə bwɔɔ ju bəŋ, kpɛɛ ŋkwu yo dəŋ nakə tookwaŋ mu kə. Ə chu bwɔɔ nnu dɨŋ, mbɛɛ yo yɔɔ bə gbo wiih lə, ‘Ye nduŋ lə maa kə lɔɔ Chu, maa ye nduŋ lə kə ŋəŋ nə mbɛɛ bu fieŋ kə, 5 kwaalə ye kpɛɛ ŋkwu nu yu bwō lə i fɨ̄hɨŋ mi, ŋŋəŋna lə nlə ŋkaalə wu nhlaa wi yo ye i kiɛɛ lə, ə nakə duŋ nə nəni, ə yee i baa i bwō fɨ̄hɨŋ mi, ə mbɛɛ kpe ə wu kwáŋ.’” 6 Ye Baba gbalə nəni, i hlə yɔɔ lə, “Bə wo fieŋ ffɨŋ mbɛɛ nnu i dùŋ nu kə hlaa lə bənhlaa bə kiyəyəŋ mà yɔɔ fie. 7 Ye i mà chɨnə lə kpɛɛ ŋkwu nu nəni, ə chu duŋ lə duŋ ə Chu nakə chɨnə dəŋ biih bie bəne bbəŋ bə́ dè bie bə wu ə butuu bə bushi lə? Ə duŋ ə yee i baa i kpā gbo ə ŋkpa mə lə? 8 N'yɔ̄ɔ bə bəŋ lə ye Chu yá kaalə li nhlaa bə́ chəkə chəkə. Kwaalə bwɔɔ nnu Ŋwa Mbɛɛ yá fiimə bwo, ə i yá ŋəŋ bəne yaŋ kwe ə duŋ bə́ yiila tɔŋ ə Chu mə nəni lə?”Ŋgaŋga ki ŋwuŋ Bəfalashii, bəə mbɛɛ nnu i kwō kiŋwaati
9 Jisho baa ja gba ŋgaŋga ji ə duŋ bə bəne bbəŋ bə́ ŋə̀ŋ go ŋəbə lə bə́ duŋ bəne bə kiyəyəŋ, bə́ hlə yee bə́ nyɛ̄hiŋ bədi bie. 10 I yɔɔ lə, “Bəne bədi bəfwe mà biŋna gəŋ ə chəŋ ntofi Chu mə bəŋgəŋ chee Chu. Ju yo mà duŋ ŋwuŋ Bəfalashii, ju yo duŋ mbɛɛ kwonə kiŋwaati. 11 Bə́ gəŋ lɛɛ, ŋwuŋ Bəfalashii yo gəŋ lemi wuu mboŋ chee Chu lə, ‘Chu, nnə̀ kimbaafɛɛ bə wə yulahalə nduŋ nə ye bəne bədi bie kə. Ŋgè lə díi bə bieŋ kə. Nfìhi lə fihinə kə. Nlà lə bəkwɛɛ bə bəne kə, ndùŋ nə dəŋ ye mbɛɛ nnu i kwò nu kiŋwaati kə. 12 Nshì biləə joo fwe ə kibumwe go. Ə bieŋ bɨŋŋ mə binhliŋ bbɨŋ ŋkə̀nə yuufi n'yii nə̀ Chu fieŋ fimwi.’ 13 Kwaalə, ŋwuŋ nnu i kwò yo kiŋwaati lemi ŋkwo wi je nyɛɛkə, nakə kee lə dəŋ buh kə, chɨŋ kwoo kwe, chi kwáŋ ə kɔŋ go hlə chee Chu lə, ‘Hooo Chu, ndùŋ fɨŋŋ mbɛɛ bieŋ biwaha, kwo kwaa hlɨŋ bə mi.’” 14 Ye Jisho yɔɔlə nəni, i hlə yɔɔ lə, “N'yɔ̄ɔ bə bəŋ lə mbɛɛ nnu i kwò yo kiŋwaati mà fwoo yee i gə̄ŋ bwɔ kwələ ə wu chəŋ i duŋ wɛɛŋ ə Chu fwi ə kə duŋ nə ŋwuŋ Bəfalashii yo kə. Ə lə dəŋ yəəŋ bə mbɛɛ mənhliŋ nnu i kòhi gbo wiih ə bə́ yá jə wu kwe, mbɛɛ mənhliŋ nnu i bwɔ̀kwe ə bə́ yá bihiŋ wu buh.”
Jisho lèki bwɔni bə wɛ
15 Bəne ja yee bə́ bwō bə bwɔni bə wɛ ə Jisho go lə i tuu ə bə go. Bəne biih bə kintu ŋəŋ lə, chɔɔ bə bə́. 16 Kwaalə, Jisho chee bwɔni bie lə yee bə bwō, i hlə yɔɔ bə bəne biih bə kintu bie lə, “Bə cheekwaŋ ə bwɔni bə wɛ bie go yee bə bwō ə mi go. Bə kə looŋkə bə kə, yulahalə muŋkɨŋ mu Chu duŋ ə duŋ bə bəne ye bə́ lə. 17 N'yɔ̄ɔ bəŋ kichɛɛŋ lə, ə mbɛɛ lə nakə tɨŋ nə jə muŋkɨŋ mu Chu ye ŋiaŋ wɛ lə, ə i nakə lɛɛ lə ə muŋkɨŋ mwi mə kə.”
Jisho bəə che bieŋ
18 Ŋwuŋ ŋkuntaŋ ju bii bə Jisho ləə, “Mbɛɛ Keehnə, wə nnu wə duŋ yo mbɛɛ nwaa, fieŋ ffɨŋ nduŋ nfə ə nhlə kənə kinduŋh ki kə kaa duŋ laha lə?” 19 Jisho bii bə wu ləə, “Wə chee mi lə mbɛɛ nwaa yulaha lə? Mbɛɛ nwaa hləŋ həmə kə. Ə kwaa Chu wuu mboŋ nnu i dùŋ nwaa. 20 Kwaalə, nchu hə fieŋ ffɨŋ wə hə bii fie, wə yii kə̀lə lə bəŋkɨnə yɔ̀ɔ lə,
‘Wə kə laa kpɛɛ mbɛɛ kə,
wə kə jii lə mbɛɛ kə,
wə kə yee buyi kə,
wə kə fwɔŋ nə kah bə nhlaa yo kə,’
Bə nnu i dùŋ yo lə,
‘Yee wə bwɔ̂kwe bə bəchwa bə mwah.’”
21 I chuu lə, “Bəŋkɨnə bəhŋ bənhliŋ mmà nchiee bə ŋkaani hlɔŋ ŋiaŋ nyo.” 22 Jisho wo nəni, yɔɔ bə wu lə, “Kəə ə she fieŋ fimwi ffɨŋ wə lə fə. Gəŋ taa bieŋ bwo binhliŋ, gah kpo we bə bəne bənjɨnənə, ə wə hlə kənə bieŋ ə duŋ ə Chu kwuŋ. Bwɔɔ nnu wə fəə nəni, ə wə hlə bwo yee wə bə̄lə mi.” 23 I wo nəni, gbo kpe wu, yulahalə i mà kənə bieŋ gbaaŋ. 24 Jisho chiini wu nəni, yɔɔ lə, “Fi duŋ ntakə gbaaŋ bə mbɛɛ bieŋ bi kiŋaŋ bənlɛɛ ə muŋkɨŋ mu Chu mə.” 25 Fi duŋ chəkə bə kikwuŋ bənlɛɛ ə dii li fileeŋgbe mə,ª kah bə mbɛɛ bieŋ bənlɛɛ ə muŋkɨŋ mu Chu mə. 26 Bəne bbəŋ bə́ mà duŋ bie həmə wo nəni, bə́ hlə bii ləə, “Ə fi lə duŋ nəni, ə yá fu nyəhə kwoo lə?” 27 Jisho chuu lə, “Fieŋ ffɨŋ duŋ ə fi kah bəne bənfə duŋ ə fi kah Chu bənfə kə.”
28 Pita yɔɔ bə wu lə, “Kee ŋəŋ, kkə shee bieŋ biaa binhliŋ, yee kkə bə̄lə wə.” 29 Jisho chuu bə bə́ lə, “N'yɔ̄ɔ bəŋ kichɛɛŋ lə mbɛɛ hləŋ həmə nnu i shee chəŋ yi, ləkə kpɛɛ, ləkə bəmaani, ləkə tili bə mahni, ləkə bwɔni biih yu muŋkɨŋ mu Chu, 30 nnu mə lə nakə duŋ nə nnu i kə̀nə bəne bə bieŋ kiŋaaŋkə ə kinchaa kɨhŋ mə bbɨŋ bi kàh bbɨŋ i shee. Ə yá chu duŋ ə bwɔɔ kinduŋh kkɨŋ ki bwō kie mə, ə i yá kənə kinduŋh ki kə kaa.”
Jisho baa yɔɔ ki kpe yi
31 Jisho hlə ja jə bəne biih bə kintu bə yuufi ə nchɔ bəfwe bie bə gahi gbo. I yɔɔ bə bə́ lə, “Bə́ wələ wo, kkə bie kkə bīŋ gəŋ ə Jelushalɛŋ, bwɔɔ nnu kkə biŋ bwii mə, fieŋ finhliŋ ffɨŋ bəne bə hlɨŋ Chu mà bieŋ ki Ŋwa Mbɛɛ, bwoo wunə yəəŋ. 32 Fɨhŋ duŋ lə bə́ yá nə wu ə kwáŋ ŋə bitɨŋ mə, ə bə́ nɨhŋ wu, nə wu bə bəne bə bieŋ biwaha, ə yee bə́ fē bə wu, bə́ tō wu, bə́ tū wu bə ntɨŋ. 33 Bə́ yá kwuŋ wu bə muntələ, jii wu, ə chu ə joo bəŋ tɔh, ə i fu ə kpe mə.”
34 Jisho yɔɔ nəni, fi fɨhɨŋ bə́, bə́ nakə baa lə kələ dəŋ ləə i yɔ̄ɔ lə laha lə, yulahalə fieŋ fidi mà fəə lə bə́ kə kələ kə.
Jisho fə mbaŋ díi ŋəŋ
35 Lə Jisho yee i bwō baha ə kwili li Jeliku go, mbandii ju shiila baha ə je i nōŋ bieŋ. 36 I wo ye kimɔ ki bəne yɔ̄kɔ ki kāh, i hlə bii ləə ə laha chəə kibɛɛ lə.
37 Bə́ chuu bə wu lə, “Ə Jisho nnu Nashalit nnu i yu kāh.” 38 I hlə chɔɔ bə ŋgɛɛmə lə, “Jisho, ŋwa Ŋkɨŋ Daafi, bu kwo kwaa hlɨŋ bə mi.”
39 Bəne bbəŋ bə́ mà kah bie fwi nyieemi wu yɔɔ lə i maalə biwu. Kwaalə i bu gaa ŋgɛɛmə bu gbaaŋ lə, “Ŋwa Ŋkɨŋ Daafi, kwo hlɨŋ bə mi.”
40 Lə Jisho wo, i lemi yɔɔ lə bə́ bwo bə wu. Bə́ bwo bə wu, Jisho bii bə wu ləə, 41 “Wə kiɛɛ lə nfə wə laha lə?” I chuu lə, “Baba, fə n'yee ŋŋə̄ŋ bieŋ.”
42 Jisho hlə yɔɔ bə wu lə, “Yee wə ŋə̂ŋ bieŋ. Tɔŋ lo llɨŋ wə yii le ə mi mə fəə díi ŋo wɛɛma.”
43 Cha mi nəni, i hlə gbe bəŋəŋ ə bieŋ go. I bu ja yee i bə̄lə Jisho, i nə̄ kiŋkuntaŋ bə Chu. Bəne bənhliŋ bbəŋ bə mà duŋ bie həmə ŋəŋ lə, bə gbe bənə kiŋkohi bə Chu.