Matio 19

Keehnə ki kohinə kpɛ

Jisho yɔɔ kaa bieŋ bɨhŋ, i hlə no ə bidi bi kitɨŋ ki Galilii mə gəŋ le Kibee ki Joodaŋ wi kwi. 2 Ye i màa i gə̄ŋ lə, bimɔ bi bəne bə̄lə wu dɨŋ gbɛɛɛ, i ŋwùhuŋ bəne bənhliŋ bbəŋ bə́ màa bə gɔ̄ŋ həmə.

(Maak 10:13-16; Lukaa 18:15-17)

3 Bəfalashii hlə ja bwo ə wu tɨŋ bəmɔŋ wu, hlə bii ləə, “Ŋkɨnə yii bèmi lə duŋ ə mbɛɛ kohiŋ kpɛɛ yu fieŋ fidi ləkə maa ə duŋ fi laha lə?” 4 Jisho chuu bə bə́ lə, “Bə kə hlaa lə chee fieŋ ffɨŋ bə́ bieŋna lə, ‘Foo mà duŋ mbɛɛ nnu i mà fə yo bəne, i mà fəə bə nyo bə kpɛ kə lə?’” 5 I mà fə bə́ nəni i hlə yɔɔ lə, “Ə yu fɨhŋ ffɨŋ nyo she tili bə mahni gəŋ buhuŋ bəə kpɛɛ, ə bə́ bəfwe hlə chu mbili mwi kə lə?” 6 Nəni, bə́ kaani bəne bəfwe kə, bə́ choo mbili mwi. Fiee fieŋ ffɨŋ fi dùŋ fie lə, fieŋ ffɨŋ Chu buhaŋ, mbɛɛ kə mɔŋ nə bəŋga fi kə.

7 Bəne bie hlə bii bə Jisho ləə, “Ə màa yulaha nnu Mushe mà yɔɔ lə mbɛɛ kənə bəmbieŋ kiŋwaati nə bə kpɛ yo kkɨŋ ki nyìi lə i kohaŋ ba wu, i hlə kohiŋ wu lə?” 8 Jisho chuu lə, “Ə màa yu bikuu bieeŋ bintaabə bbɨŋ bi mà fə Mushe hlə cheekwaŋ lə mbɛɛ duŋ ə i kohiŋ kpɛɛ. Kwaalə, fɨhŋ mà kə duŋ nə həmɛɛ kə. 9 N'yɔ̄ɔ ŋkwo ŋgwəŋ bə bəŋ lə, ə mbɛɛ lə kohiŋ kpɛɛ jə ju, ə nakə duŋ nə lə kpɛ yo yu fə̄ kiwaali, kəə wu dəŋ fəə yiwaha dəŋ ye bənla kpɛ ju.”

10 Lə bəne bə Jisho bə kintu wo fɨhŋ, bə yɔɔ bə wu lə, “Ə duŋ lə ə li nəni ye fi duŋ ki bə nyo bə kpɛ, ə finwaa lə mbɛɛ hə ba wu fiih nəni kə kwaalə biah kə.” 11 Jisho yɔɔ bə bə́ lə, “Ə kə duŋ nə mbɛɛ mənhliŋ nnu i dùŋ ə i bemi fɨhŋ fieŋ kə. Ə duŋ ə bemi kwaa bəne bbəŋ Chu fəə lə bə́ bemi. 12 Yee bə kə̂lə lə bəne bədi bie həmə bbəŋ bə́ dùŋ kə kənə ŋgɨŋ kpɛ kə, ə duŋ ye bə́ mà bwee bə́, bə́ dùŋ. Bədi dùŋ nəni ə duŋ nfə bəne bie bə kwáŋ ŋəbə lə yee bə́ dūŋ lə. Bədi dùŋ fibə lə ə duŋ nfə bə́ bə kwáŋ ŋəbə lə yee bə́ dūŋ lə yu muŋkɨŋ mu buh. Mbɛɛ nnu i dùŋ ə i bemi fɨhŋ i bemi.”

Jisho lɛɛ kindunshiiŋ ə bwɔni bə wɛ bəŋ

13 Bəne ja yee bə́ bwō bə bwɔni ə Jisho go lə i tuu ə bə́ go, chee Chu ə bə́ bəŋ, bəne biih bə kintu hlə yee bə́ chɔ̄ɔ bə bəne bie. 14 Jisho yɔɔ ŋkwo wi lə, “Bə cheekwaŋ bwɔni bie bwo ə mi go. Bə kə looŋkə bə́ kə, yulahalə muŋkɨŋ mu buh duŋ ə duŋ yu bəne ye bəhŋ lə.” 15 Ye i yɔɔlə nəni, i hlə chi kwáŋ ŋiih ə bə́ bəŋ hlə no yee i gə̄ŋ.

Jisho bə che bieŋ

(Maak 10:17-31; Lukaa 18:18-30)

16 Fi bwo duŋ lə mbɛɛ ju mà noo bwo ə Jisho go, bii bə wu ləə, “Mbɛɛ Keehnə, fieŋ finwaa ffɨŋ nduŋ nfə ə nhlə kənə kinduŋh ki kə kaa duŋ laha lə?” 17 Jisho bii bə wu ləə, “Wə bii ə duŋ bə mi ki fieŋ finwaa yulaha lə? Mbɛɛ nnu i dùŋ nwaa duŋ kwaa mwi. Ə wə kiɛɛ lə wə gəŋ lɛɛ ə kinduŋh ki kə kaa mə, yee wə chî bəŋkɨnə bə Chu.” 18 Mbɛɛ yo bii bə Jisho ləə, “Bəŋkɨnə bə Chu duŋ biɛhɛŋ bie lə?” Jisho chuu lə, “Wə kə jii lə mbɛɛ, wə kə laa kpɛɛ mbɛɛ, wə kə yee buyi, wə kə bemi kah bə nhlaa yo kə, 19 bwɔkwe bə bəchwa bə mwah, maa lə, yee wə lêki mbɛɛ nnu i dùhŋ ə wə tɨŋ ye wə lèki lə gbo wo.” 20 Hlɔŋ ŋiaŋ nyo yo hlə yɔɔ bə wu lə, “Bəŋkɨnə bəhŋ bənhliŋ mmà nchiee bə́. Ə baa she laha lə?” 21 Jisho chuu bə wu lə, “Ə wə fəŋ lə kiɛɛ lə yee wə dūŋ mbɛɛ nwaa gəŋ kpee həŋgbɔŋ həŋgbɔŋ, wə gəŋ taa bieŋ bwo binhliŋ bbɨŋ wə kənə, wə ga kpo we bə bəne bənjɨnənə, ə wə hlə kənə nchu bieŋ ə duŋ ə Chu kwuŋ. Ə wə fə nəni ə wə hlə bwo yee wə bə̄lə mi.” 22 Lə hlɔŋ ŋiaŋ nyo yo wo nəni, i fiimə yee i gə̄ŋ i dūŋ juu juu, yulahalə i mà kənə bieŋ gbaaŋ.

23 Jisho hlə yɔɔ bə bəne biih bə kintu lə, “N'yɔ̄ɔ bəŋ kichɛɛŋ lə fi yá yi ta bə mbɛɛ bieŋ bənlɛɛ ə muŋkɨŋ mu buh mə. 24 Mbaa n'yɔ̄ɔ bə bəŋ lə, fi duŋ chəkə bə kikwuŋ bənlɛɛ ə dii li fileeŋgbe mə kah bə mbɛɛ bieŋ bənlɛɛ ə muŋkɨŋ mu Chu mə.” 25 Lə bəne bə Jisho bə kintu wo fɨhŋ, gəə ŋɨŋ bə́ gbaaŋ. Bə́ bii ləə, “Ə fi duŋ nəni, ə yá fu nyəhə kwoo lə?” 26 Jisho kee bə́ nəni, yɔɔ bə bə́ lə, “Ə duŋ lə ə mbɛɛ, kəə fi ta. Kwaalə ə duŋ bə Chu ə fɨhŋ fieŋ nakə taa kah wu kə.” 27 Pita yɔɔ bə wu lə, “Kee ŋəŋ, kkə shee bieŋ biaa binhliŋ yee kkə bə̄lə wə. Kkə yá bənə laha kibɛɛ lə?” 28 Jisho yɔɔ bə bə́ lə, “N'yɔ̄ɔ bəŋ kichɛɛŋ lə bwɔɔ nnu Ŋwa Mbɛɛ yá shii ə kabala ŋkuntaŋ bəŋ ə mbiŋ fwɔ mə, ə bəŋ bbəŋ bə́ màa bə bə̄lə bie mi, yá shii dəŋ ə bəkabala bəŋ yuufi ə nchɔ bəfwe yee bə hlāah bichəŋ bi Ishlael bi yuufi ə nchɔ bifwe bie. 29 Mbɛɛ mənhliŋ nnu i shiee kwili liih, ləkə no she bwɔni bə mahni, ləkə no she maa nyəhə, ləkə no she tili, ləkə no she maani, ləkə no she bwɔni biih, ləkə no she biwɛŋ biih, ə mə no she bi yu mi, ə i yá kənə bəne bə bieŋ chá gbi kah ye i mà hlaalə kənə. I yá kənə dəŋ kinduŋh ki kə kaa. 30 Kwaalə, bəne kiŋaaŋkə bbəŋ bə́ dùŋ fwi fidiɛɛ yáa bə́ dūŋ dɨŋ, ə bə kiŋaŋ bbəŋ bə́ dùŋ dɨŋ fidiɛɛ yáa bə́ dūŋ fwi.”