Ki ŋkohiŋ kpɛ
10
Jisho ja no həmə, gəŋ bidi bi kitɨŋ ki Judia mə, le Kibee ki Joodaŋ wi kwi. Bimɔ bi bəne bumə bi bwò ə wu go, yee i kēeh bə́ dəŋ ye i màa i bā lə bəŋkeeh bə́. 2 Bəfalashii duŋ duŋ bwo bəmɔŋ wu, bii bə wu ləə, “Ŋkɨnə yii bèmi lə mbɛɛ kohiŋ kpɛɛ lə?” 3 Jisho fiimə bii dəŋ bə bə́ ləə, “Mushe mà nə ŋkɨnə lə bə fə laha lə?” 4 Bə́ chuu lə, “Mushe mà bema lə ə mbɛɛ kohiŋ kpɛɛ. Bwɔɔ nnu i kòhiŋ wu, i bieŋ kiŋwaati nə bə kpɛ yo kkɨŋ ki nyìi lə i kohaŋ ba wu.”5 Jisho chuu bə bə́ lə, “Ə màa yu bituŋ bieeŋ bintaabə bbɨŋ bi mà fə Mushe hlə bieŋ ŋkɨnə nu. 6 Kwaalə, foo mà duŋ ye Chu mà fə bieŋ, i fə ə duŋ bə nyo bə kpɛ. Ye i mà fələ nəni i yɔɔ lə, 7 ‘Ə yu fɨhŋ ffɨŋ nyo bwo i she tili bə mahni gəŋ buhuŋ bəə kpɛɛ, 8 ə bə́ bəfwe hlə chu mbɛɛ mwi.’ Nəni, bə́ kaani bəne bəfwe kə, bə́ choo mbili mwi. 9 Fiee fieŋ ffɨŋ fi dùŋ fie lə, fieŋ fɨhŋ Chu buhaŋ, mbɛɛ kə mɔŋ nə bəŋga fi kə.”
10 Bwɔɔ nnu Jisho bə bəne biih bə kintu mà duŋ chəŋ, bə́ baa bii bə wu ki fieŋ fie. 11 I chuu bə bə́ lə, “Maa nyəhə nnu i kòhiŋ kpɛɛ, jə ju, kəə i fəə yiwaha bənɔŋ bə kpɛ ju. 12 Ə kpɛ lə fu ə nyimi chəŋ, gəŋ lɛɛ ə nyo ju chəŋ, kəə i fəə yiwaha bə nyimi bənɔŋ bə nyo ju.”
Jisho lɛɛ kinhləmə ə bwɔni bə wɛ bəŋ
13 Bəne ja yee bə́ bwō bə bwɔni ə Jisho go lə i tuu ə bə́ go, bəne biih bə kintu yee bə́ chɔ̄ɔ bə bə́. 14 Bwɔɔ nnu Jisho mà ŋəŋ nəni, tɔŋ lo wu, i yɔɔ bə bə́ lə, “Bə cheekwaŋ yee bwɔni bie bwò ə mi go, bə kə yee bə bâŋ bə́ jə kə, yulahalə muŋkɨŋ mu Chu dùŋ ə duŋ yu bəne ye bəhŋ lə. 15 N'yɔ̄ɔ bəŋ chɛɛŋ lə ə mbɛɛ lə nakə tɨŋ nə jə muŋkɨŋ mu Chu ye ŋiaŋ wɛ lə, kəə duŋ ə i nakə lɛɛ lə ə muŋkɨŋ mwi mə kə.” 16 Ye i yɔɔlə nəni, i hlə yee i tū bə́, i chī kwáŋ ə bə́ bəŋ, i hlə̄mə bə́ mu.
Jisho bəə che bieŋ
17 Jisho bwo ja həmə lə i yu gə̄ŋ, mbɛɛ ju lələ bwo gəŋ bɛŋ núh ə wu fwi bii bə wu ləə, “Mbɛɛ Keehnə nwaa, fieŋ ffɨŋ fi dùŋ lə nfə ə nhlə kənə kinduŋh ki kə kaa duŋ laha lə?” 18 Jisho bii bə wu ləə, “Wə chee mi lə mbɛɛ nwaa yulaha lə? Mbɛɛ nwaa hləŋ həmə. Ə kwaa Chu wuu mboŋ nnu i dùŋ nwaa. 19 Wə yii kə̀lə lə bəŋkɨnə yɔ̀ɔ lə, ‘Wə kə jii lə mbɛɛ kə, wə kə laa kpɛɛ mbɛɛ kə, wə kə yee buyi kə, wə kə fwɔŋ nə kah bə nhlaa yo kə, wə kə fihi fihinə, bə nnu i dùŋ yo lə, yee wə bwɔ̂kwe bə bəchwa bə mwah lə?’” 20 Mbɛɛ yo chuu bə Jisho lə, “Mbɛɛ Keehnə, mmà nchiee bəŋkɨnə bəhŋ bənhliŋ ŋkaani hlɔŋ ŋiaŋ nyo.” 21 Jisho kee wu nəni jwaaŋ, leki wu, hlə yɔɔ bə wu lə, “Kəə fieŋ shee kwaa fimwi ffɨŋ wə yu kaani kə fəə. Gəŋ taa bieŋ bwo binhliŋ bbɨŋ wə kə̀nə, wə ga kpo we bə bəne bənjɨnənə. Wə hlə kənə bieŋ ə duŋ ə Chu kwuŋ. Bwɔɔ nnu wə lə fə nəni, wə hlə bwo yee wə bə̄lə mi.” 22 Ye Jisho yɔɔlə nəni, mbɛɛ yo wo, bushi bwii bee, i fiimə yee i gə̄ŋ i dùŋ juu juu, yulahalə i mà kənə bieŋ gbaaŋ.
23 Jisho fiimə kee taa bəne biih bə kintu bie, hlə yɔɔ bə bə́ lə, “Fi yá duŋ ntakə gbaaŋ bə bəne bə bieŋ bənlɛɛ ə muŋkɨŋ mu Chu mə.” 24 Biyɔɔnə bie fɨhɨŋ bəne biih bə kintu. Jisho baa yɔɔ bə bə́ lə, “Bəne bəŋŋ, fi yá duŋ ntakə gbaaŋ bə mbɛɛª bənlɛɛ ə muŋkɨŋ mu Chu mə! 25 Fi duŋ chəkə bə kikwuŋ bənlɛɛ ə dii li fileeŋgbe mə, kah bə mbɛɛ bieŋ bənlɛɛ ə muŋkɨŋ mu Chu mə.” 26 Lə bə́ wo nəni gəə ŋɨŋ bə́ gbaaŋ, yee bə́ nāamə ləə, “Ə fi lə duŋ nəni, ə yá fu nyəhə kwoo lə?” 27 Jisho kee bə́ nəni, yɔɔ bə bə́ lə, “Fɨhŋ fieŋ duŋ ə mbɛɛ ŋkee kaamu kə, kwaalə ə Chu nnu i duŋ ə i kaamu, yulahalə ə Chu nnu i duŋ ə i fə fieŋ finhliŋ.” 28 Pita hlə yɔɔ bə Jisho lə, “Kee ŋəŋ, kkə shee bieŋ binhliŋ yee kkə bə̄lə wə.” 29 Jisho chuu bə wu lə, “N'yɔ̄ɔ wə kichɛɛŋ lə, mbɛɛ hləŋ həmə nnu i shee chəŋ yi, ləkə bəmaani bəniɛ, ləkə bəkwɛ, ləkə mahni, ləkə tili, ləkə bwɔni, ləkə biwɛŋ, ə duŋ i tookwaŋ yu mi bə yu hlɨŋ nwaa Chu, 30 mə yá yi kənə chə́ŋ maa bəmaani bəniɛ, maa bəkwɛ, maa bəmahni, maa bwɔni, maa biwɛŋ bə kinduŋh ə bwɔɔ nnu bəhŋ chá gbi. Bəne lə yee bə́ hlɔ̄ɔ dəŋ wuh ə wu dɨŋ, ə yee ə dūŋ bwɔɔ nnu i yá bwo yo, ə i yá kənə kinduŋh ki kə kaa. 31 Kwaalə, bəne kiŋaaŋkə bbəŋ bə́ dùŋ fwi fidiɛɛ yáa bə́ dūŋ dɨŋ, ə bə kiŋaŋ bbəŋ bə́ dùŋ dɨŋ fidiɛɛ yáa bə́ dūŋ fwi.”
Jisho baa yɔɔ ə chá bəŋ shɔ ki kpe yi
32 Jisho bə bəne biih bə kintu ja jə je, yee bə́ bīŋ ə Jelushalɛŋ, i kaah bə́ fwi. Yee gəə ŋɨ̄ŋ bəne biih bə kintu. Bəne bbəŋ bə́ màa bə́ bə̄lə bie yee bə́ kə̄nə nɨhŋ. Jisho baa jə bəne biih bə kintu bə yuufi ə nchɔ bəfwe bie bəə bə́ wa gbo yee i yɔ̄ɔ bə́ fieŋ ffɨŋ fi yá kah bə wu. 33 I yɔɔ bə bə́ lə, “Bə wələ wo, kkə bie kkə bīŋ gəŋ ə Jelushalɛŋ, bə́ lə gəŋ nə Ŋwa Mbɛɛ ə kwáŋ ŋə bəche ntofi bəŋkuntaŋ bəŋkuntaŋ bə bəne bbəŋ bə́ kèeh bəŋkɨnə bə Chu. Ə bə́ hlaah wu kaalə lə bə́ jii wu, hlə nə wu ə bəne bbəŋ bə́ dùŋ kə duŋ nə Bəjuu kwáŋ, 34 ə yee bə́ fē bə wu, bə́ tū wu bə ntɨŋ, kwuŋ wu, hlə jii wu, ə bwo chu ə joo bəŋ tɔh, ə i fu ə kpe mə.”
Jɛŋ bə Jɔɔŋ noŋ biŋkaa biŋkuntaŋ bə Jisho
35 Jɛŋ bə Jɔɔŋ bbəŋ bə́ mà duŋ bwɔni bə Jebedee duŋ duŋ baŋ bwo ə Jisho fwi yɔɔ bə wu lə, “Mbɛɛ Keehnə, fieŋ fidi fie həmə ffɨŋ kkə kiɛɛ lə wə fə be.”
36 I bii bə bə́ ləə, “Bə kiɛɛ lə nfə bəŋ laha lə?” 37 Bə́ chuu lə, “Kkə kiɛɛ lə bwɔɔ nnu wə yá shii ə kiŋkaa ko kiŋkuntaŋ mə, ə kkə shii dəŋ ə biŋkaa biŋkuntaŋ bəŋ, mbɛɛ ju ə kwaŋ wo wi diee mə, ju yo ə kwaŋ wo wi məə mə.”
38 Jisho chuu bə bə́ lə, “Bə kə kələ fieŋ ffɨŋ bə bīi fie kə. Ə duŋ ə bə yá kaamu bəŋwi ə kwooh ki ŋgə kkɨŋ n'yá ŋwi kie mə, ləkə bənlɛɛ ə dɨŋ ŋgə ŋkuntaŋ nnu nlə nlɛɛ yo ə wu mə lə?” 39 Bə́ chuu bə wu lə, “Duŋ ə kkə kaamu.” Jisho yɔɔ bə bə́ lə, “Bə lə ŋwi ə kwooh ki ŋgə kkɨŋ nlə ŋŋwi kie mə, lɛɛ dəŋ dɨŋ ŋgə ŋkuntaŋ nnu nlə nlɛɛ yo mə, 40 kwaalə, bənshii ə kwaŋ wuŋŋ wi diee mə, ləkə wi məə mə, ə kə duŋ nə dɔhɔ kɨŋŋ bənnə bə mbɛɛ kə. Bidɔhɔ bɨhŋ duŋ yu bəne bbəŋ bə́ mà bwɛɛla chi yu bə́.”
41 Ə chulə bəne bədi bə kintu bə Jisho bə yuufi bəhŋ wo ki fieŋ fie, hlə yee bə́ lō bə Jɛŋ maa bə Jɔɔŋ. 42 Jisho chee bə́ bənhliŋ, bə́ bwo, i yɔɔ bə bə́ lə, “Nhlè lə bə kə̀lə lə bəne bbəŋ bə́ hlàah ə bitɨŋ bidi mə bà bənshii ə bəne bəbə bəŋ, bəne bəŋkuntaŋ bəbə nyìi muŋgeni mubə ə bə́ bəŋ. 43 Dɨŋ fimbini fie fieŋ kə duŋ nə lə yee fi dūŋ ə bəŋ mə kə. Mbɛɛ nnu i kìɛɛ lə yee i dūŋ ŋwuŋ ŋkuntaŋ ə bəŋ mə kənə bənduŋ nnu i nɨ̀ŋ bu nɨŋnə bə bəŋ. 44 Mbɛɛ nnu i kìɛɛ lə yee i dūŋ mbɛɛ nnu fwi ə bəŋ mə, kəə i kənə bənduŋ nfwa mbɛɛ mənhliŋ. 45 Yee bə kə̂lə lə Ŋwa Mbɛɛ mà kə bwoo lə yee bəne nɨ̄ŋ ə wu dɨŋ kə. I mà bwo lə i nɨŋ ə duŋ bə bəne, i nə kinduŋh kiih bən'yah bəne kiŋaaŋkə ə kpe mə.”
Jisho wɛ díi ŋə Batimayu
46 Bə́ jaa gəŋ bwii ə kwili li Jeliku. Lə Jisho ja həmə bə bəne biih bə kintu maa bə kimɔ ki bəne kiŋkuntaŋ, ə duŋ mbandii ju shiila baha ə je, i nōŋ bieŋ. Yii liih duŋ lə Batimayu, ŋwa Timayu. 47 Ə chulə i wo lə ə Jisho nnu Nashalit, i hlə chɔɔ bəŋgɛɛmə gbaaŋ lə, “Jisho, Ŋwa Ŋkɨŋ Daafi, kwo hlɨŋ bə mi.” 48 Bəne kiŋaaŋkə yee bə́ nyīeemi wu bə́ yɔ̄ɔ lə, i maalə. Kwaalə i bu gaa gɛɛmə bu gbaaŋ lə, “Ŋwa Ŋkɨŋ Daafi, kwo hlɨŋ bə mi.”
49 Jisho lemi yɔɔ lə, “Bə́ chee wu.” Bə́ chee mbandii yo, yɔɔ lə, “Gbo nwaala wə, ja fa, i yu chēe wə.” 50 Mbandii yo hlə ŋwaŋ kindu kiih ki bəŋ lɛɛ həkwe, jiŋ hə bu yee i gə̄ŋ ə Jisho go. 51 Jisho bii bə wu ləə, “Wə kiɛɛ lə nfə wə laha lə?” Mbandii yo chuu lə, “Mbɛɛ Keehnə Ŋkuntaŋ, ŋkiɛɛ lə n'yee ŋŋə̄ŋ.” 52 Jisho hlə yɔɔ bə wu lə, “Yee wə gə̂ŋ fo. Tɔŋ llɨŋ wə yii le ə mi mə fəə wə ŋwuna.” Cha mi nəni díi ŋiih ŋie wɛɛmə, i gbe bəŋəŋ chuu ə bieŋ go, i hlə yee i bə̄lə Jisho dɔhɔ kkɨŋ i gə̀ŋ.