Lukaa 16

Mbɛɛ nimi nnu i mà fihi fihinə

Jisho baa yɔɔ bə bəne biih bə kintu lə, “Che bieŋ ju mà kənə mbɛɛ nimi wi nnu i mà chi lə yee i fwōŋ kpo wiih. I hlə ja wo lə mbɛɛ nimi wi yo yu dī i kāa kpo wiih. 2 I hlə chee mbɛɛ nimi wi yo bii bə wu ləə, ‘Fieŋ ffɨŋ ŋ'wo fɨhŋ ko duŋ lə ləhəŋ lə? Buhuŋ biŋwaati binhliŋ bbɨŋ wə bieŋ kpo wuŋŋ mə wə bwo chuu bə mi. Wə baa lə nɨŋ bə mi kə.’ 3 Mbɛɛ nimi yo gəŋ shii hle ləə, ‘Ye ŋwuŋ ŋkuntaŋ ŋgwəŋ nu koŋ lə mi ə nimi mə, nlə fə ləhəŋ lə? Ye nduŋ lə kə kənə muŋga bənɨŋ bə jii, gbo bee dəŋ mi bənoŋ binoonə.’ 4 I hlə ja hle lə, ‘Ŋkəla fieŋ ffɨŋ nlə nfə, bwɔɔ nnu bə́ lə kohiŋ mi ə nimi lɨhŋ mə, binshiŋ bɨŋŋ lə tɨŋ jə mi ə bə́ chəŋ.’ 5 Nəni, i hlə dii bəne bbəŋ bə́ màa bə́ kə̄nə bie fíe yi ŋwuŋ ŋkuntaŋ wi yo mwi mwi. Nu fwii yo bwo i bii bə wu ləə, ‘Wə duŋ bənhluŋ ŋwuŋ ŋkuntaŋ ŋgwəŋ ləhəŋ lə?’ 6 I chuu lə, ‘Ə bəpampa bə mɛŋ bəŋkuntaŋ bəŋkuntaŋ gbi.’ I yɔɔ lə, ‘Jə kiŋwaati ko ki fíe kɨhŋ wə shii həkwe chəkə, wə gaanə bieŋ lə mbwɛɛnshiŋ.’ 7 I kaanə bii bə ju yo ləə, ‘Wə duŋ bənhluŋ ŋkwo wa ləhəŋ lə?’ I chuu lə, ‘Ə bibwa bi gɨŋ ŋə bəjaa gbi.’ I yɔɔ lə, ‘Jə kiŋwaati ko ki fíe kɨhŋ wə gaanə bieŋ lə bibwa gbi nyaaŋ.’ 8 Ye ŋwuŋ ŋkuntaŋ mbɛɛ nimi yo mà ŋəŋ ye i fiha lə wu nəni, i kaka dohi wu lə i yo bə bufe gbaaŋ.” Jisho hlə kaanə lə, “Bəne bə yaŋ kwe kənə bufe bə bieŋ bbɨŋ bə́ fə̀ kah ye bəne bə kinchaa kə̀nə lə bufe bə bibə bieŋ ə kinchaa mə.

9 Nəni, n'yu n'yɔ̄ɔ bə bəŋ lə, yee bə jə̂ kpo weeŋ wi yaŋ kwe wuhŋ bə́ kwô binshiŋ mu, fo bwɔɔ nnu wi yá kah, ə Chu yá tɨŋ jə bəŋ ə wu kwuŋ ə bə yáa bə dūŋ bwɔɔ mənhliŋ. 10 Mbɛɛ nnu i kə̀lə bənfwoŋ fieŋ fitənə gbaaŋ, kəə duŋ ə i kələ bənfwoŋ dəŋ fiŋkuntaŋ. Mbɛɛ nnu i fìhi fihinə bə fieŋ fitənə, kəə duŋ ə i fihi fihinə dəŋ bə fieŋ fiŋkuntaŋ. 11 Ə bə nakə kələ bənfwoŋ kpo wi yaŋ kwe, ə nə nyəhə bəŋ kpo wi kpo lə? 12 Ə bə nakə kələ bənfwoŋ fieŋ fi mbɛɛ ju kinwaa, ə nə nyəhə bəŋ ŋkwo weŋ lə?

13 Duŋ ə mbɛɛ nimi yee i nɨ̄ŋ bə bəche bikuu bəfwe kə. Ə yee i nɨ̄ŋ nəni, ə yee i lōh bə ju, i lèki ju, i wò bə ju gbaaŋ, i jə̀ ju kwe. Duŋ ə yee bə nɨ̄ŋ bə Chu bə baa bə nɨ̀ŋ dəŋ bə bieŋ kə.”

14 Ye Jisho yɔɔlə nəni, Bəfalashii wo bieŋ bɨhŋ binhliŋ yee bə́ bə̄ŋ wu, yulahalə bə́ mà leki kpo gbaaŋ. 15 Jisho hlə yɔɔ bə bə́ lə, “Ə bəŋ bbəŋ bə nyìi gbo lə bə́ dùŋ bəne bənwaa ə bəne fwi, kwaalə Chu kələ bieŋ binhliŋ bbɨŋ bi dūŋ ə tɔ́ŋ ŋieeŋ mə. Bə kələ lə bieŋ bbɨŋ bəne dòhi lə ə bieŋ, Chu kèe bi bi bèe wu ə mbee mə.”

Ŋkɨnə bə muŋkɨŋ mu Chu

16 Jisho baa yɔɔ lə, “Ə mà duŋ fwii bə́ dòntə ə duŋ bəŋkɨnə bə Mushe bə bieŋ bbɨŋ bəne bə hlɨŋ bə Chu mà bieŋ. Kwaalə gbe jə ye Jɔɔŋ mà bwo, duŋ bə́ donta hlɨŋ nwaa ye muŋkɨŋ mu Chu duŋ. Mbɛɛ mənhliŋ ju bənlɛɛ ə muŋkɨŋ mu Chu mwe mə. 17 Fi duŋ chəkə bə buuli bə shishɔ bəŋkah, kahiŋ lə bieŋnə kiŋwaati ki ŋkɨnə ju la nya.

18 Fi duŋ lə, ə mbɛɛ lə kohiŋ kpɛɛ jə ju, kəə i fəə yiwaha ye bənɔŋ bə kpɛ ju. Ə mbɛɛ jə kpɛ nnu mə hə fwoo ə mbɛɛ ju chəŋ, kəə wu dəŋ jəə kpɛɛ mbɛɛ ju.”

Lashɔlɔ bəə che bieŋ

19 Jisho baa ja yɔɔ lə, “Che bieŋ ju mà duŋ nnu i màa i kwāa gbo bə bindu binta chuŋ binwaa, i dì gbo wiih ju ju.” 20 Mbɛɛ njɨnənə ju mà duŋ dəŋ həmə, yii liih duŋ lə Lashɔlɔ. Nnu bibiaa mà kwoo wu gbo winhliŋ. Bə́ màa bə́ tū bə́ chì wu, i shìi ba ə fwiih wi mbaŋ che bieŋ yo tɨŋ, 21 i kè ləə ə laha ffɨŋ fi lə gbe ə kidaŋ ki che bieŋ yo bəŋ lə yee i dɔ̄ɔ i dì. Ye i màa i nɔ̄ŋ lə nəni, bwí bwò yi kaanə lɛ bibiaa biih bie. 22 Ə bwo duŋ ə bwɔɔ ju bəŋ, mbɛɛ njɨnənə yo kpe, bənchinda bə Chu tu wu buh gəŋ chi ə dɔhɔ ki kinjənjə mə baha Ablahaŋ go. Che bieŋ yo kpe dəŋ bə́ diih wu. 23 I gəŋ ə duŋ ə kitɨŋ ki bəŋkpi kwuŋ i wò ŋgə gbaaŋ. Lə i lɛɛ díi, i ŋəŋ Ablahaŋ go je nyɛɛkə bəə Lashɔlɔ ə wu tɨŋ. 24 I chee lə, “Tah Ablahaŋ kwo hlɨŋ bə mi wə faŋ Lashɔlɔ i yii fiŋkwaani fiih ə ŋgwiŋ mə, i bwo diɛɛ liniini lɨŋŋ, yulahalə n'yu ŋ'wō ŋgə ŋkuntaŋ yaŋ bwii wuhŋ mə gbaaŋ.” 25 Ablahaŋ chuu ŋkwo wi lə, “Ŋiaa, hle bwɔɔ nnu wə màa wə dūŋ yo yaŋ kwe. Wə mà kənə bieŋ binwaa binhliŋ, Lashɔlɔ wò ŋkwo wi ə duŋ ŋgə. Fidiɛɛ Lashɔlɔ yu wō njənjə wə wò ŋgə. 26 Ə fɨhŋ kwaa kə. Kələ dəŋ lə gbɔɔ wuŋkuntaŋ we be hənte wwuŋ bə́ mà fəə fo mbɛɛ lə nakə noo fəŋ le bwo wa ye wə yo lə kə, duŋ dəŋ ə mbɛɛ ja wa ye wə yo lə le bwo yaŋ kə.” 27 Che bieŋ yo baa kɔnɔ wu yɔɔ lə, “Butee tah, faŋ kwaa Lashɔlɔ ə bee kwuŋ. 28 Ŋkənə bəŋgwoŋ bətiŋ, i gəŋ ŋkɨnə bə́ lə bə́ jə bwɔɔ, bə́ yá kə bwoo dəŋ fəŋ ə dɔhɔ ki ŋgə kɨhŋ mə kə.” 29 Ablahaŋ chuu ŋkwo wi lə, bəmwaa bie kə̀nə biŋwaati bbɨŋ Mushe mà bieŋ bə bbɨŋ bəne bə hlɨŋ Chu mà bieŋ, yee bə́ wô bieŋ bbɨŋ bi yɔ̀ɔ. 30 Che bieŋ yo nɨhŋ yɔɔ lə, “Ye tah Ablahaŋ, ə mbɛɛ ju lə jaka ə kpe mə gəŋ dontə bə́, ə bə́ hlə wo fii tɔ́ŋ ŋəbə.” 31 Ablahaŋ chuu bə wu lə, “Ə bə́ lə nɨhŋ kə woo fieŋ ffɨŋ Mushe bə bəne bə hlɨŋ Chu yɔ̀ɔ, kəə duŋ dəŋ ə bə́ nakə woo fieŋ ffɨŋ mbɛɛ nnu i fu ə kpe mə yɔ̀ɔ kə.”