Lukaa 15

Ŋgaŋga ki shɔŋ nni i mà la

Bəne bbəŋ bə́ kwò kiŋwaati maa bəne bə bieŋ biwaha bədi màa bə́ bwō ə Jisho go lə bə́ bwo wələ fieŋ ffɨŋ i kèeh. 2 Bəfalashii bə bəne bə keehnə bəŋkɨnə bə Chu gbe bəŋwuunə, bə́ yɔ̄ɔ lə, “Mbɛɛ nu yu tɨ̄ŋ i jə̀ bəne bə bieŋ biwaha i baa i dì bə bə́.” 3 Nəni Jisho gba ŋgaŋga ni bə bə́ lə, 4 “Ə nyəhə ə bəŋ mə nnu i kənə shɔ́ŋ gbi, ə mi lə la, ə i ba shiiiŋ lə? Ə i nakə tookwaŋ ə yí gbi fumayuufi ə nchɔ fumayuufi yé go ə nji bəŋgəŋ kiɛɛ mi ye gəŋ bwii bwɔɔ nnu mə lə ŋəŋ ə yi go lə? 5 Ə mə kiɛɛ ŋəŋ ə yi go, ə i wo njənjə, tu yi bweŋ, 6 yee i kwə̄lə bə yi ə chəŋ. Bwɔɔ nnu mə lə bwii chəŋ, ə i hlə buhuŋ bədɔɔ biih bə bəne bənhliŋ bbəŋ bə́ baha ə wu go yɔɔ lə, ‘Bə bwo yee kkə tɨ̄ŋ yu shɔŋ njəŋ nni mə hə la ye, ŋŋəŋna chuu ə yi go.’ 7 N'yɔ̄ɔ bə bəŋ lə, ə lə dəŋ yəəŋ ye kintɨŋ kiŋkuntaŋ yá duŋ li ə Chu kwuŋ, yu mbɛɛ yiwaha mwi nnu mə hə fiila tɔŋ liih. Bə́ yáa bə́ tɨ̄ŋ bə mbini yo mbɛɛ kah bəne gbi fumayuufi ə nchɔ fumayuufi bbəŋ bə́ dùŋ ntiiŋ kə baa lə kiɛɛ kiŋgaanə kə.

Ŋgaŋga ki kpo wi choo wwuŋ wi mà la

8 Lii ə kpɛ nwɛhɛŋ nnu i kənə kpo wi bichu yuufi, ə choo mwe lə la ə i ba shiiiŋ lə? Ə i nakə bəələ mɔɔ chiini, nyaa chəŋ, baa kiɛɛ gəŋ bwii bwɔɔ nnu mə lə ŋəŋ mu lə? 9 Ə mə lə bwuŋ ki, ə i buhuŋ binshiŋ biih bə bəne bbəŋ bə́ nɔ̀ŋ baha ə wu kwuŋ yɔɔ lə, ‘Bə tɨŋ bə mi yu kpo wuŋŋ wi choo, wwuŋ wi hə la we, ŋŋəŋna mu.’ 10 N'yɔ̄ɔ bəŋ lə, ə lə dəŋ yəəŋ ye bənchinda bə Chu yá tɨŋ li yu mbɛɛ bieŋ biwaha mwi nnu mə hə fiila tɔŋ liih.”

Ŋgaŋga ki ŋiaŋ nnu i mà la

11 Jisho baa yɔɔ lə, “Mbɛɛ ju mà kənə bwɔni bəniɛ bəfwe. 12 Nu dɨŋ yo hlə ja yɔɔ bə tili lə, ‘Tah, ga nə mi bɨŋŋ bie bishələ fidiɛɛ.’” Nəni, tili hlə ga bishələ bie ə bə́ go. 13 Ŋiaŋ nu dɨŋ yo je biih bie bishələ, ə chu bwɔɔ nnu dɨŋ ə joo bəŋ chɛɛ, i buhuŋ taa kaa hlə la kiŋgaŋ kiih ə kitɨŋ kidi kwuŋ je nyɛɛkə, gəŋ chɛhi di kaa kpo we ə je kiŋgaŋ mə. 14 Ə chulə i chɛha di kaa kpo wiih we, njɨnənə kiwaha kwo wu ə bwɔɔ nu bəŋ, bwi wintaabə gbe ə kitɨŋ kie kwuŋ, i baa kənə fidinə kə. 15 Nəni, i hlə gəŋ kiɛɛ nimi ə mbɛɛ ju kwáŋ mə kitɨŋ kie kwuŋ lə yee i nɨ̄ŋ bə wu. Mbɛɛ yo hlə faŋ wu i gəŋ yee i fwōŋ jɔ́ŋ yiih. 16 I duŋ duŋ yee i kə̄nə hlɔɔ bəndi biləə bbɨŋ jɔ́ŋ yé ba bie bəndi, kwaalə mbɛɛ nakə nəə wu fieŋ fidinə kə. 17 I gbe bənhle mweŋ, dii chuu bufe bwiih dɨŋ hlə yɔɔ lə, “Bəne bə tah bə nimi kənə biləə kiŋaaŋkə bbɨŋ bi kàh bə́, ndùŋ fəŋ ŋkpè bə jəbulə.” 18 Nlə no, ŋgəŋ ŋŋəŋ tah, n'yɔ̄ɔ bə wu lə, “Tah, nfəə yiwaha bə Chu maa bə wə. 19 Ŋkə baa lə wunə nnu duŋ ə yee bə́ chēe mi lə ŋwa kə. Jə kwaa mi ye ŋwuŋ wa nimi lə.” 20 Nəni, i hlə no chu dɨŋ ə tili kwuŋ. Lə i chu bwo bwii baha ə bweenə, tili lɛɛ díi i bwuŋ wu. Hlɨŋ kwo wu bə ŋiaani, i ja fa, lələ gəŋ kukə jə wu, baa yohi wu. 21 Ŋiaŋ yo hlə yɔɔ bə wu lə, “Tah, mma nfəə yiwaha bə Chu maa bə wə. Ŋkə baa lə wunə nnu duŋ ə yee bə́ chēe mi lə ŋwa kə.” 22 Kwaalə, tili kaka dii bəne biih bə nimi bie yɔɔ lə, “Bə gəŋ chichii, bə kiɛɛ kindu kinwaa kie ba gbaaŋ, bə bwo lee wu go, bə lee wu fifiaŋ ə kwaŋ maa bikpa ə wuh ŋiih mə, 23 bə gəŋ kwo chɔɔ kinaŋ ŋkuntaŋ, bə nyieŋ ki kkə di yee kkə tɨ̄ŋ, 24 yulahalə ŋiaa nu mà kpee i choo. I mà laa, i fwoo bwo.” Nəni, bə́ hlə gbe yee bə́ tɨ̄ŋ.

25 Fieŋ fɨhŋ màa fi kāh nəni, ŋiaŋ cha yo duŋ nji. Bwɔɔ nnu i màa i kwə̄lə, lə i chu bwo baha ə chəŋ go, i wo ye ŋkɔŋ gbe bəne bɨ̄ŋ. 26 I chee ŋwuŋ nimi bə́ ju bii bə wu ləə, bə́ bɨ̄ŋ chəə ə duŋ laha lə. 27 I chuu bə wu lə, “Ə mwaa nnu i kwəla daŋ. Nəni, chwa weŋ nyieŋna chɔɔ kinaŋ ŋkuntaŋ, yulahalə i ŋəŋna ə mwaa go, i yo kɨŋkɨŋkɨŋ i tà gbo.” 28 Lə i wo nəni tɔŋ kaka lo wu, i nɨhŋ kə lɛɛ lə chəŋ kə. Tili fu gəŋ yee i kɔ̄nɔ wu lə i lɛɛ chəŋ lə. 29 Kwaalə, i chuu bə tili lə, “Kee ŋəŋ, nnɨŋna bə wə ye nfwa wa lə ə bigoŋ bɨhŋ mə binhliŋ, ŋkə hlaa lə nɨhŋ bənfə fieŋ fo fidi kə. Wə kə hlaa lə nə mi kwaa fi ŋwa mbi lə ntɨŋ bə bədɔɔ bəŋŋ kə. 30 Ŋwa nnu i mà gəŋ yo gəŋ bihi kaa bishələ bə bəkwɛɛ bə kiwaali, lə i bwo chəə wə kwo chɔɔ kinaŋ ŋkuntaŋ lə bə́ yieŋ yu wu. 31 Tili chuu bə wu lə, ‘Ŋiaa, bee wə dùŋ fəŋ bwɔɔ mənhliŋ, bieŋ binhliŋ bbɨŋ ŋkənə lə bwo. 32 Kwaalə, fi hə nwaa bəntɨŋ yulahalə mwaa nu mà kpee, i choo, i mà laa, i fwoo bwo.’”