Jisho baa ŋwuhuŋ mbɛɛ ə bunte mə
14
Lə yee ə dūŋ bunte budi, Jisho gəŋ bəŋgəŋ di biləə ə ŋwuŋ ŋkuntaŋ ju chəŋ. Mbɛɛ yo mà duŋ ŋwuŋ Bəfalashii. Bəne bbəŋ bə́ mà duŋ mu yee bə́ fwōŋ bəŋəŋ fieŋ ffɨŋ Jisho lə fə. 2 Ə mà duŋ nyo ju lema ə Jisho fwi i gɔŋ jəŋ biŋkpuŋ, jəŋ ye mà fəə wuh bə kwáŋ ŋiih mweli. 3 Jisho bii bə Bəfalashii maa bəne bbəŋ bə́ kə̀lə bəŋkɨnə bə Chu, bbəŋ bə́ mà duŋ həmə lə, “Ŋkɨnə ya yii bèmi lə bə́ ŋwuhuŋ mbɛɛ ə bunte mə lə?”4 Bə́ ba shiiiŋ. Jisho kənə ə mbɛɛ yo go, ŋwuhuŋ wu, hlə yɔɔ bə wu lə yee i gə̄ŋ. 5 Jisho hlə fiimə bii bə bəne bie ləə, “Ə mbɛɛ ju ə bəŋ mə lə kənə ŋiaŋª ləkə naŋ, ə mə gbe ə fwoŋ mə ə bunte mə, ə mbɛɛ yo nakə fwoo lə wu cha mi lə?”
6 Bə́ jɨnə fieŋ fi chuunə.
Mbɛɛ bwɔkwe bə gbo wiih
7 Jisho ja chiini ŋəŋ ye bəne shaa bidɔhɔ bi fwi bə́ shii bəŋ, i lɛɛ die bə bə́ lə, 8 “Bwɔɔ nnu bə́ jaŋ mbɛɛ ə chɔnɔ ki biah mə, ə mə gəŋ, i kə shii lə ə dɔhɔ ki fwi bəŋ kə, yulahalə duŋ ə yee ə dūŋ bə́ hə jaŋna mbɛɛ ju ŋkuntaŋ nnu i kò kah wu. 9 Che biah nnu mə hə jaŋ yo bəŋ bənhliŋ həmə lə bwo yɔɔ bə wə lə, ‘Ja fa wə nə dɔhɔ kɨhŋ bə ŋwuŋ ŋkuntaŋ nu.’ Ə wə ja no həmə bə giaali gəŋ shii ə duŋ dɨŋ. 10 Bwɔɔ nnu bə́ jaŋ mbɛɛ ə chɔnɔ ki biah mə, ə mə gəŋ, i shii ə duŋ dɨŋ, fo bwɔɔ nnu che biah yo bwo ə i yɔɔ bə wu lə, ‘Mbweŋ, ja fa fəŋ wə gəŋ shii ə duŋ wa fwi.’ Nəni, ə i hlə kənə kiŋkohi ə bəne bənhliŋ fwi həmə. 11 Ə lə dəŋ yəəŋ bə mbɛɛ mənhliŋ nnu i kòhi gbo wiih, bə́ yá jə wu kwe. Mbɛɛ nnu i bwɔ̀kwe, ə bə́ yá bihiŋ wu buh.”
Yee mbɛɛ fwôŋ ə duŋ bəne bə ŋgə
12 Jisho hlə fiimə yɔɔ bə che chəŋ nnu i mà dii yo wu ə wu chəŋ lə, “Bwɔɔ nnu wə kìɛɛ lə wə dii bəne lə bə́ bwo di biləə, wə kə dii lə ə duŋ bədɔɔ bwo ləkə bwɔni bə mwa ləkə kichəŋ ko ləkə bəne bə kpo ləkə bə kwili lo kwaa kə. Ə wə dii bəmbini bie bəne, ə bə́ yá dii chuu wə dəŋ ə bə́ chəŋ, ə yee fi dūŋ lə bə́ chuula kwaŋ wo. 13 Bwɔɔ nnu wə fə chɔnɔ, dii ə duŋ bəne bənjɨnənə, biŋkəŋkpe bə bəŋkɔya maa bə bəmbandii. 14 Ə wə fə nəni, ə wə hlə kənə kinhləmə, yulahalə bəmbini bie bəne kənə lə fieŋ ffɨŋ bə́ yá chuu wə kə. Ə Chu nnu i yá hluŋ wə butuu bbuŋ bəne bə kiyəyəŋ yá fu ə kpe mə.”
Ŋgaŋga chɔnɔ kiŋkuntaŋ
15 Ye Jisho yɔɔlə nəni, mbɛɛ ju nnu bəə bə́ màa bə́ dī hlə yɔɔ bə wu lə, “Kintɨŋ kiŋkuntaŋ dùŋ ki mbɛɛ nnu i yá di biləə ə muŋkɨŋ mu Chu mə.”
16 Jisho hlə yɔɔ bə wu lə, “Bwɔɔ ju mà duŋ nyo ju dɔ chɔnɔ kiŋkuntaŋ, i jaŋ bəne kiŋaaŋkə. 17 Lə butuu bwe bwo wunə, i faŋ mbɛɛ nimi wi lə i gəŋ jaa yɔɔ bə bəne bənhliŋ bbəŋ i mà jaŋ bie lə bə́ bwo, lə bə́ buhaŋ chi kaa bieŋ bichɔni kiɛkiɛ. 18 Mbɛɛ nimi yo hlə gəŋ ŋəŋ bə́, bə́ gbe bənde gbo mwi mwi. Mbɛɛ nu fwii nnu mə hə hlaa ŋəŋ yo yɔɔ bə wu lə, ‘Mmà ntaŋna wɛɛ kɨŋŋ kifwɔ, ŋkənə bəŋgəŋ chiini ki. Butee, bə kə kee mi kə.’ 19 I baa ŋəŋ ə ju go, mbini yo yɔɔ dəŋ lə, ‘Mmà ntaŋna bənaŋ bəŋŋ bə nimi yuufi, n'yu ŋgə̄ŋ mɔŋ bə́ fidiɛɛ. Butee, bə kə kee mi kə.’ 20 I ŋəŋ mbɛɛ ju yo go, mbɛɛ yo yɔɔ ŋkwo wi lə, ‘Mmà njəə kpɛ fɔ, kwaalə bwɔɔ hləŋ nnu nduŋ ə mbwo.’ 21 Ye bə́ chuulə nəni, mbɛɛ nimi yo hlə chu dɨŋ gəŋ yɔɔ bieŋ bɨhŋ binhliŋ bə ŋwuŋ ŋkuntaŋ wi yo. Che chɔnɔ yo wo, tɔŋ bee wu. I hlə baa faŋ mbɛɛ nimi wi yo yɔɔ lə, ‘Ja chəkə, gəŋ wa nte wə jaa ye jé təhlə bə ə munjeli munhliŋ mə, wə buhuŋ bwo bə bəne bənjɨnənə, biŋkəŋkpe, bə bəmbandii maa bə bəŋkɔya.’ 22 I gəŋ fiimə bwo yɔɔ lə, ‘Ŋwuŋ ŋkuntaŋ, nfəə ye wə hə yɔɔ lə, kwaalə, chəŋ ye kə yii lə kə.’ 23 Ŋwuŋ ŋkuntaŋ wi yo hlə yɔɔ bə wu lə, ‘Fu fidiɛɛ wə jaa ə jé mə bə ə munjeli mə kiɛkiɛ, wə jaa bwo bə bəne, fo chəŋ njəŋ lə yii. 24 Kələ lə mbɛɛ ju hləŋ ə bəne bbəŋ mmà hlaa jaŋ bie mə nnu mə lə mɔŋ fidinə fɨŋŋ jə kə.’”
Ye duŋ ə mbɛɛ bwɛɛ gbo wiih hlə lɛɛ ə kintu ki Jisho mə
25 Jisho baa ja yee i gə̄ŋ, kimɔ ki bəne wūlu bə́ bə̀lə wu dɨŋ. I fiimə yɔɔ bə bə́ lə, 26 “Duŋ ə mbɛɛ nakə yee i dūŋ mbɛɛ kimɔ kɨŋŋ nleki hləŋ mi kah mahni bə tili, baa leki mi kah kpɛɛ bə bwɔni biih maa bəmaani bə jɛ́mi yiih. I kənə dəŋ bənleki mi kah dəŋ ye i lèki lə gbo wiih. 27 Duŋ dəŋ ə mbɛɛ nakə yee i dūŋ mbɛɛ kintu kɨŋŋ nnu duŋ ə i nakə too kiŋgwa kiih yee i bə̄lə mi. 28 Ə nyəhə ə bəŋ mə nnu i kîɛɛ lə i wɛɛ chəŋ ndiɛɛ, ə i nakə hlaa lə shii həkwe hle ləə mə kənə kpo ləhəŋ wwuŋ wi wunə bəŋwɛɛ kaa chəŋ ye mu lə? 29 Ə mə nakə hlaa lə fə lə, ə mə lə bu tɨŋ kichili kie, ə chəŋ ye yá kah wu bə ŋkaa. Ə yee bəne kāh bə́ bə̀ŋ, bə́ yɔ̀ɔ lə, 30 ‘Kimbweŋ kɨhŋ ma chɔɔla bəŋwɛɛ chəŋ, chəŋ ye kah ki bəŋkaa.’ 31 Ə lə dəŋ yəəŋ bə ŋkɨŋ nnu i kiɛɛ lə i tɨmə ntɨmə bə ŋkɨŋ ju, ə mə nakə hlaa lə shii həkwe hle ləə duŋ ə i kaamu bə bəne biih bənchuku yuufi bəntɨmə bə ŋkɨŋ ju nnu i kənə yo bəne bənchuku mbwɛɛnfie lə? 32 Ə mə hle ŋəŋ lə fi lə kah wu, ə i faŋ bəne biih bədi lə bə́ gəŋ ŋəŋ ŋkɨŋ ju yo mə i kaani je nyɛɛkə, kɔnɔ wu lə kindunshiiŋ duŋ ə bə́ mə. 33 Fi hlə duŋ lə, ə mbɛɛ lə nakə tookwaŋ ə bieŋ biih go kiɛkiɛ, ə i yá duŋ mbɛɛ ŋgwəŋ kintu kə.