Ŋgaŋga ki chɔnɔ ki biah
22
Jisho baa yɔɔ bə bə́ ə ŋgáŋga mə, ji ye duŋ lə, 2 “Muŋkɨŋ mu buh duŋ ə bə́ fɛhiŋ mwi bə ŋkɨŋ ju nnu i mà dɔɔ bənfə chɔnɔ ki biah ki ŋiaani nyo. 3 I faŋ bənchinda biih lə bə́ gəŋ chee bəne bbəŋ i mà jaŋ bie lə bə́ bwo ə chɔnɔ ki biah kie mə. Kwaalə, bənchinda bie gəŋ bəne bie nɨhŋ kə bwoo kə. 4 I baa faŋ bənchinda bədi yɔɔ bə bə́ lə, ‘Bə gəŋ yɔɔ bə bəne bbəŋ nhə njaŋ bie ə chɔnɔ kɨŋŋ ki biah mə lə bə́ wələ wo, nnyieŋna naŋ ŋkuntaŋ bə bichɔɔ bi bənaŋ. Mbwɛɛla chi kaa bieŋ binhliŋ, lə bə́ bwo ə chɔnɔ ki biah kie mə.’ 5 Kwaalə, bə́ gəŋ bəne bie nyɛhiŋ ə nyɛhiŋ mə, no fibə yee bə́ gə̄ŋ. Ju yo mbɛɛ la ə wu sho, ju yo mbɛɛ gəŋ shi yiih. 6 Bədi bie bəne kwo bənchinda bie nə bə giaali, hlə jii bə́. 7 Tɔŋ bee ŋkɨŋ yo, i faŋ bəne biih bə ntɨmə, bə́ gəŋ laa bəne bbəŋ bə́ mà jii bie bənchinda biih, hlə tɔŋ kibalaki kibə kie. 8 Ye i fələ nəni, i hlə yɔɔ bə bənchinda biih bədi bie lə, ‘Ndɔɔ chɔnɔ ki biah. Kwaalə bəne bbəŋ nhə nhlaa jaŋ bie maa bəne kə. 9 Bə gəŋ ye jé yinhliŋ taa, bə chee bəne bənhliŋ bbəŋ bə lə ŋəŋ, lə bə́ bwo ə chɔnɔ kɨŋŋ ki biah mə.’ 10 Bənchinda bie hlə fu gəŋ ə jé yé mə yinhliŋ, buhuŋ bəne bənhliŋ bbəŋ bə́ ŋə̄ŋ, bəne bənwaa bə bəwaha bə́ bwo həmə. Chəŋ biah ye hlə yii bə bəne.11 Lə ŋkɨŋ yo lɛɛ mu chəŋ biah ye mə ŋəŋ bəne bbəŋ bə́ bwo bie ə chɔnɔ kie mə, i ŋəŋ ə mbɛɛ ju go mu nnu i mà kə lee lə kindu ki chɔnɔ ki biah kə. 12 I bwo bii bə wu ləə, ‘Mbweŋ, wə kah ləhəŋ hlə lɛɛ yuŋ nlee hləŋ kindu ki chɔnɔ lə?’ Mbɛɛ yo ba shiiiŋ. 13 Nəni, ŋkɨŋ yo yɔɔ bə bənchinda biih bie lə, ‘Bə kwaa kwáŋ ŋiih maa wuh ŋiih, bə lɛɛ wu ə jɨbə mə wa bweenə, dɔhɔ kkɨŋ bəne dè bə́ dì bigəə.’” 14 Ye Jisho yɔɔlə nəni, i hlə yɔɔ lə, “Bə kələ lə Chu jaŋna bəne kiŋaaŋkə, kwaalə i shaala bə chɛɛ.”
Bə́ bii Jisho ki kiŋwaati ki chuuŋkənə
15 Bəfalashii hlə ja gəŋ chuŋ ye bə́ lə fə ə Jisho jɨnə fieŋ fiyɔɔnə ə bə́ kwo wu. 16 Bə́ faŋ bəne bəbə bə kintu maa kintu ki bəne bə Ŋkɨŋ Hɛlɔ ə Jisho go. Bə́ gəŋ yɔɔ bə wu lə, “Mbɛɛ Keehnə kkə kə̀lə ba lə wə dùŋ mbɛɛ kichɛɛŋ, wə kèeh bəne ə jé yí Chu yí kichɛɛŋ mə. Wə jə̀ lə lə mbɛɛ ju dùŋ chili kə, yulahalə wə kèelə mbɛɛ yu fieŋ ffɨŋ i dùŋ kə. 17 Yɔɔ kwaa be kinhle ko. Ŋkɨnə yii bèmi lə yee kkə chūuŋkə kiŋwaati bə Kayisha ŋkɨŋ nu Luŋ, lii kkə kə chuuŋkə kə lə?”
18 Jisho kələ fieŋ ffɨŋ bə́ wɛ̄ɛnə fie bə fi, i yɔɔ bə bə́ lə, “Bəŋ bəne bbəŋ bə́ yɔ̀ɔ chili, bə fə̀ chili, bə mɔŋ mi yulaha lə? 19 Bə bwo bə kpo wwuŋ bə chùuŋkə we kiŋwaati mu ŋŋəŋ.” Bə́ bwo bə dii li kpoª, nə wu. 20 Jisho bii bə bə́ ləə, “Kwoo kɨhŋ mu lə ki nyəhə lə? Yii le duŋ li nyəhə lə?” 21 Bə́ chuu lə, “Ə ki Kayisha, yii le duŋ dəŋ liih.” I hlə yɔɔ bə bə́ lə, “Yee bə nə̂ bə Kayisha fieŋ ffɨŋ fi dùŋ fi Kayisha, bə nə̀ bə Chu fieŋ ffɨŋ fi dùŋ fi Chu.” 22 Bə́ wo nəni, gəə ŋɨŋ bə́. Bə́ hlə tukwaŋ ə wu go ja yee bə́ gə̄ŋ.
Bə́ tuulə Jisho ki nfu ə kpe mə
23 Bumbini bwe kibɛɛ, Bəshadushii ja bwo ə Jisho go. Bəshadushii duŋ kintu ki bəne bbəŋ bə́ màa bə́ yɔ̄ɔ lə bəne yá fwoo ə kpe mə kə. Ye bə́ bwolə, bə́ bii bə Jisho ləə, 24 “Mbɛɛ Keehnə, Mushe mà yɔɔla lə, ‘Ə mbɛɛ lə kpe ŋiaŋ hləŋ, kəə maani kənə bənchee kpɛ yo, ə bəə wu bwee bwɔni ə yii li ŋkwu maani yo bəŋ.’ 25 Fidiɛɛ, mbɛɛ ju mà kənə bwɔni bəniɛ fumanyaaŋ, nnu fwii yo jə kpɛ, i bwo kpe bəə wu ŋkənə ŋiaŋ hləŋ, i she kpɛ yo bə maani nnu i bàŋ yo ə wu go. 26 Fi duŋ dəŋ nəni maa bə nnu dɨŋ yo, gəŋ bwii ə fumanyaaŋ yo go. 27 Bwɔɔ nnu dɨŋ, kpɛ yo dəŋ bwo kpe. 28 Ye bəne bə fumanyaaŋ bie mà chee lə kpɛ yo bənhliŋ, ə yá duŋ bwɔɔ nnu bəne yáa bə́ fū ə kpe mə, ə i yá duŋ kpɛɛ nyəhə lə?”
29 Jisho chuu bə bə́ lə, “Bə bie bə gbenə gbaaŋ, yulahalə bə kə kələ fieŋ ffɨŋ bə́ bieŋna ə Kiŋwaati ki Chu mə kə. Bə kə kələ dəŋ muŋga mu Chu kə. 30 Yee bə kə̂lə lə ə yá bwo duŋ bwɔɔ nnu bəne yáa bə́ fū ə kpe mə, bənəə bə bəkwɛɛ yá baa lə baanə biah kə, bəne yá baa lə nə bwɔni lə bə́ baanə biah kə. Bə́ yáa bə́ dūŋ ye bənchinda bə Chu lə ə buh. 31 Ki nfu ə kpe mə, bə kə hlaa lə chee ə Kiŋwaati ki Chu mə wo fieŋ ffɨŋ ki yɔ̀ɔ bə bəŋ kə lə? Chu mà yɔɔla lə, 32 ‘Ə mi Chu Ablahaŋ bə Chu Ayjik maa Chu Jekɔb.’ Fi duŋ lə Chu duŋ nə Chu bəŋkpi kə, i duŋ Chu bəŋkee.” 33 Kintu ki bəne kkɨŋ ki màa ki lēmi kie həmə wo bichuunə bbɨŋ Jisho chūu bie, gəə ŋɨŋ bə́ bə kinlaanə kiih.
Ŋkɨnə nnu i kàh bəŋkɨnə bənhliŋ
34 Ə chulə Bəfalashii woo lə Jisho maala kijə ki Bəshadushii, bə́ hlə buhuŋ go ŋəbə bwo ə wu go. 35 Mbɛɛ ju ə bə́ mə nnu i màa i kə̄lə bəŋkɨnə bə Chu kinwaa, hlə mɔŋ wu bə bibiinə bidi lə, 36 “Mbɛɛ Keehnə, ŋkɨnə ŋkuntaŋ nnu i kàh bəŋkɨnə bənhliŋ duŋ nwɛhɛŋ yo lə?” 37 Jisho chuu bə wu lə, “Ŋkɨnə ŋkuntaŋ duŋ nnu i yɔ̀ɔ yo lə, ‘Leki Baba Chu wa bə tɔŋ lo linhliŋ, nə gbo wo bə wu winhliŋ, yii bufe bwo ə wu mə bunhliŋ.’ 38 Yo ŋkɨnə nnu fwii ŋkuntaŋ nnu i kàh bəŋkɨnə bənhliŋ. 39 Nnu i bə̀lə mu duŋ dəŋ ye mbini yo lə. I duŋ lə, ‘Leki mbɛɛ nnu i dùhŋ ə wə tɨŋ ye wə lèki lə gbo wo.’ 40 Bieŋ binhliŋ bbɨŋ bi dùŋ ə Kiŋwaati ki bəŋkɨnə kɨhŋ mə, maa bbɨŋ bi dùŋ ə Biŋwaati bi bəne bə hlɨŋ Chu mə, lèmi ə duŋ ə bəŋkɨnə bə bəfwe bəhŋ bəŋ.”
Nchuu Fwoo nnu Chu mà kaachi yo duŋ ŋwa nyəhə lə?
41 Ye Bəfalashii mà bumə lə həmə, Jisho hlə ja bii bibiinə bidi bə bə́ ləə, 42 “Bə hlè lə laha ki Nchuu Fwoo nnu Chu mà kaachi yo lə? Bə hlè lə ə ŋwa nyəhə lə?” Bə́ chuu bə wu lə, “Ə ŋwa Ŋkɨŋ Daafi.” 43 Jisho bii chuu bə bə́ lə, “Ə fi duŋ lə ə ŋwa kichəŋ ki Ŋkɨŋ Daafi, ə fi kah ləhəŋ maa Fiana Chu hlə fə Daafi chèe wu lə Baba lə? Daafi mà yɔɔla lə,
44 ‘Baba Chu mà yɔɔla bə Baba ŋgwəŋ lə
i shii ə kwaŋ wiih wi diee mə,
gəŋ bwii bwɔɔ nnu mə nɔhiŋ bəne biih bbəŋ bə́ dùŋ kə diee njənə bə wu
ə i diɛŋ wuh ŋiih ə bə́ bəŋ.’