Jisho lɛɛ ə Jelushalɛŋ ye Ŋkɨŋ lə
21
Ə chulə Jisho bə bəne biih bə kintu baha ə Jelushalɛŋ, bə́ duŋ ə kwili li Betfa llɨŋ li dùŋ ə Kɔnɔ ki Bite bi Olif go, i hlə bwa bəne biih bə kintu bədi bəfwe faŋ, 2 yɔɔ bə bə́ lə, “Bə gəŋ ə kwili li fwi le mə. Bə lə gəŋ ŋəŋ kimahni ki hlɔmbwaa kkɨŋ bə́ hə luula, ŋiaani duŋ baha ə wu tɨŋ, bə hluuli bwo mi bə bə́.” 3 Ə mbɛɛ lə bii fieŋ fidi bə bəŋ, bə chuu lə, “Che Kwoo yu kīɛɛ bə́, mə lə tukwaŋ mu cha mi ə bə bwo bə bə́.” 4 Fɨhŋ nəni mà duŋ bənfə lə fi bwo gbeemə yəəŋ ye mbɛɛ hlɨŋ Chu ju mà yɔɔla, i yɔ̀ɔ lə,5 “Mbɛɛ yu yɔ̄ɔ bə kwili li Jayɔŋª lə,
‘Bə kee ŋəŋ, Ŋkɨŋ weŋ yu bwō ə bəŋ mə.
I bwɔɔkwe bə gbo wiih,
i biŋna ə hlɔmbwaa bəŋ, ə duŋ ŋwa hlɔmbwaa,
hlɔmbwaa nnu i kaani wɛ.’”
6 Lə bəne bə Jisho bə kintu bie gəŋ, bə́ fə kwaa yəəŋ ye mə hə yɔɔ lə. 7 Bə́ bwo bə hlɔmbwaa yo maa ŋiaani yo, tu bindu bibə bəŋ, Jisho biŋ shii ə ju yo bəŋ, yee i gə̄ŋ. 8 Kimɔ ki bəne kiŋaaŋkə yee bə́ tū dəŋ bindu bibə ə je, bədi shɔ̄ki nyáŋ yí bite bə́ chī ə je. 9 Bimɔ bbɨŋ bi màa bi gə̄ŋ bie ə Jisho fwi bə bbɨŋ bi màa bi bə̄lə bie dɨŋ yee bi wīli lə, “Ayililili,ª kiŋkohi duŋ bə Ŋwa Ŋkɨŋ Daafi nu looo! Chu lɛɛla kindunshiiŋ ə mbɛɛ nnu i yu bwō yo ə yii li Baba bəŋ looo! Ayililili, kiŋkohi duŋ bə Chu nnu buh yo looo!” 10 Lə Jisho gəŋ bwii ə Jelushalɛŋ, kibalaki kie kinhliŋ nənə. Kindɔchiŋ bəne bie, bə́ bii ləə, “Nu lə nyəhə chəə lə?” 11 Bimɔ bi bəne bie chuu lə, “Ə Jisho mbɛɛ hlɨŋ Chu nnu i fù ə kwili li Nashalit mə, ə Galilii.”
Jisho kohiŋ bəne bə shi ə chəŋ ntofi Chu mə
12 Jisho ja gəŋ ə kwili li chəŋ ntofi Chu mə, i kōhiŋ bəne bənhliŋ bbəŋ bə́ màa bə́ tāa bieŋ bə bbəŋ bə́ màa bə́ tāŋ bie bieŋ həmə, i yə̄ə i tə̄lə bidaŋ bi bəne bbəŋ bə́ màa bə́ gāanə bie kpo, bə biŋkaa bi bəne bbəŋ bə́ màa bə́ tāa bie bikuuku. 13 Yee i kōhiŋ bə́ i yɔ̄ɔ lə, “Fi duŋ bə́ bieŋna Chu yɔ̄ɔ lə, ‘Bə́ yáa bə́ chēe chəŋ njəŋ lə chəŋ cheenə Chu.’ Kwaalə bə fiila chuu yi butiɛ bu bəne bəbuyi.”
14 Jisho yee i dūŋ ə chəŋ ntofi mə, bəmbandii bə biŋkəŋkpe bwō i ŋwūhuŋ bə́. 15 Kwaalə, bəche ntofi bəŋkuntaŋ bəŋkuntaŋ bə bəne bbəŋ bə́ kèeh bəŋkɨnə bə Chu ŋəŋ bieŋ bi ŋɨŋ gəə bbɨŋ i màa i fə̄ bie, bə ye bwɔni bəwɛ màa bə́ wīli lə ə chəŋ ntofi mə bə́ yɔ̄ɔ lə, “Ayililili, kiŋkohi yee ki dūŋ bə Ŋwa Ŋkɨŋ Daafi looo,” fi loo bə́ tɔŋ. 16 Bə́ hlə bii bə Jisho ləə, “Wə yu wō dəŋ fieŋ ffɨŋ bwɔni bəhŋ bie bə́ yɔ̄ɔ fie lə?” I chuu bə bə́ lə, “Eee, n'yu ŋ'wō. Ə chu duŋ lə bə́ kə hlaa lə chee fieŋ ffɨŋ bə́ bieŋna lə, ‘Chu fəə kiŋkohi kinwaa yee ki fū ə biwu bi bwɔni bəwɛ jə́, maa dəŋ bə bwɔni bəwɛ bbəŋ bə́ kaani bə́ mwàŋ biŋ kə lə?’” 17 Jisho duŋ duŋ bwo she bə́ fu ə kibalaki kie mə, gəŋ ə kwili li Betani mə, nɔŋ mə.
Jisho chɨŋ tiɛɛ kidi kkɨŋ ki chɔ̀ŋ sháŋ
18 Lə yee ə dūŋ həmbumbwaa, ye Jisho màa i fīimə lə i chū dɨŋ ə kibalaki ki Jelushalɛŋ kie mə, ə duŋ jəbulə wū wu. 19 I ŋəŋ tiɛɛ ki sháŋ kidi baha ə je, kkɨŋ bə́ màa bə́ dī sháŋ yí tiɛɛ kie,ª i gəŋ həmə, kwaalə i nakə ŋəŋ nə fieŋ ə ki go kə, i ŋəŋ kwaa ə duŋ bibiaa ə ki go. I hlə chɨŋ tiɛɛ kie yɔɔ lə, “Shaŋ kə baa lə chɔŋ ə wə go kə!” Cha mi, tiɛɛ kie bu ŋɨŋ. 20 Bwɔɔ nnu bəne bə kintu bə Jisho mà ŋəŋ nəni, gəə ŋɨŋ bə́. Yee bə́ nāamə ləə, “Ə laha ffɨŋ fi fə maa tiɛɛ kie ŋɨŋ cha mi nəni lə?” 21 Jisho chuu bə bə́ lə, “N'yɔ̄ɔ bəŋ kichɛɛŋ lə, ə bə yii tɔ́ŋ ə Chu mə, nakə yee bə kə̄nə naamənə kə, ə bə nakə fəə kwaa ə duŋ fieŋ ffɨŋ nfə fɨhŋ bə tiɛɛ kɨhŋ kwaa kə. Ə bə yɔɔ dəŋ bə kɔnɔ kɨhŋ lə, ‘Ŋəəmə fu fəŋ gəŋ gbe ə nɔ mə,’ ə yee fi dūŋ lə. 22 Maa laha ffɨŋ bə nōŋ ə Chu cheenə mə, duŋ ə bə́ yá kənə fi ə duŋ lə bə yiila tɔ́ŋ ə Chu mə.”
Bə́ bii dɔhɔ kkɨŋ muŋgeni mu Jisho fù kie
23 Jisho baa fiimə lɛɛ chuu ə chəŋ ntofi mə, bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ ki Bəjuu bwo ŋəŋ ye i laanə lə bəne, bə́ bii bə wu ləə, “Wə jə muŋgeni munfənə bieŋ bɨhŋ fəhəŋ lə? Ə nə nyəhə wə muŋgeni mwe lə?” 24 Jisho chuu bə bə́ lə, “Nduŋ ə mbii dəŋ fieŋ bə bəŋ. Ə bə chuu mi, ə n'yɔɔ bəŋ mbɛɛ nnu i nə̀ yo mi muŋgeni mwe lə n'yee nfə̄ bieŋ bɨhŋ. 25 Jɔɔŋ màa i yīi bəne ə njɔ bə muŋgeni mmuŋ mu mà bwo fəhəŋ lə? Ə mà nə Chu lii mbɛɛ ŋkee lə?” Ye i biilə nəni, yee bə́ ŋwūunə bə́ bə́, bə́ yɔ̄ɔ lə, “Ə kkə chuu lə ə mà nə Chu, ə i bii bə be ləə ə mà fə laha lə kkə nakə bemi bə Jɔɔŋ lə? 26 Kwaalə, duŋ ə kkə chuu lə, ‘Ə mà nə mbɛɛ ŋkee,’ yulahalə kkə lɔ̄ kimɔ ki bəne kɨhŋ, ye bə́ bənhliŋ bema lə lə Jɔɔŋ mà duŋ mbɛɛ hlɨŋ Chu.” 27 Nəni, bə́ hlə chuu bə Jisho lə, “Kkə kə kələ kə.” Jisho hlə yɔɔ bə bə́ lə, “Kəə n'yɔɔ lə dəŋ bəŋ mbɛɛ nnu i nə̀ yo mi muŋgeni mwe lə n'yee nfə̄ bieŋ bɨhŋ kə.”
Ŋgaŋga ki bwɔni bəniɛ bəfwe
28 Jisho gəŋ fwi bəmbii ləə, “Bə hlè lə laha ki fɨhŋ lə? Mbɛɛ ju mà kənə bwɔni biih bəniɛ bəfwe. I yɔɔ bə ŋiaŋ nnu fwii yo lə, ‘Ŋiaa, gəŋ la nɨŋ ə mi sho daŋ.’ 29 I chuu lə, ‘Ŋgəŋ nə kə.’ Kwaalə i duŋ duŋ gaanə tɔŋ liih hlə gəŋ la mə sho. 30 Mbɛɛ yo gəŋ chili dəŋ nnu dɨŋ yo yɔɔ fieŋ ffɨŋ mə hə hlaa fie yɔɔ bə nnu fwii yo. Mbini yo chuu bə wu lə, ‘Nlə ŋgəŋ tah.’ Kwaalə, i nakə gəŋ nə kə. 31 Ə bwɔni bə bəfwe bəhŋ mə, nnu i mà fə fieŋ ffɨŋ tili mà kiɛɛ fie mà duŋ nwɛhɛŋ lə?” Bə́ chuu lə, “Ə nnu fwii yo.” Jisho hlə yɔɔ bə bə́ lə, “N'yɔ̄ɔ bəŋ chɛɛŋ lə, bəne bbəŋ bə́ kwò kiŋwaati maa bəkwɛɛ bə kiwaali yá hlaa lɛɛ ə muŋkɨŋ mu Chu mə bə bəŋ. 32 N'yɔ̄ɔ nəni yulahalə Jɔɔŋ N'yiinjɔ mà bwo lə i nyii bəŋ je ntiiŋ, bə nakə bemi bə wu kə, kwaalə bəne bbəŋ bə́ kwò kiŋwaati bə bəkwɛɛ bə kiwaali bemi bə wu. Lə bə ŋəŋ dəŋ ye bə́ bemi lə nəni, bə nakə fii lə tɔ́ŋ ŋieeŋ bəmbemi dəŋ bə wu kə.”
Ŋgaŋga ki bəne bbəŋ mbɛɛ mà yii ə wu sho
33 Jisho baa yɔɔ lə, “Bə wo dəŋ ŋgaŋga ji. Che kwili ju mà nɨŋna wɛɛh kiih ki sháŋ yyɨŋ bə́ fə̀ mbihŋ mu, kwuu mbaŋ taa ki kunə gbaaaŋ, tɨŋ dɔhɔ həmə kkɨŋ duŋ ə yee bə́ kwī sháŋ yé bə́ kìaŋ mbihŋ fù, tɨŋ taa ki mbɛɛ fwoŋnə wɛɛh kie həmə, yii bəne bədi mə sho, hlə ja gəŋ ə kitɨŋ kidi kwuŋ. 34 Bwɔɔ kwinə sháŋ yé bwo wunə, i faŋ bəne biih bə nimi ə bəne bbəŋ i mà yii bie mə sho lə, bə́ gəŋ jə yiih sháŋ. 35 Ə chulə bə́ gəŋ, bəne bbəŋ i mà yii bie mə sho kwo bə́, kwuŋ ju yo, jii ju yo, tɨŋ ju yo bə tə́. 36 I baa faŋ bədi bəne bə nimi ŋaŋ kah bə fwii bie, bəne bie baa fə dəŋ yəəŋ ye bə́ mà hlaalə fə bə bə fwii bie. 37 Ə chu bwɔɔ nnu dɨŋ, i faŋ ə duŋ ŋiaani i hlē lə duŋ ə bə́ bwɔkwe bə ŋiaani yo. 38 Kwaalə, i gəŋ, bəne bie ŋəŋ ə wu go, yɔɔ bə́ bə́ lə, ‘Nu lə ndikwili mbɛɛ wɛɛh kɨhŋ. Bə bwo kkə jii wu fo kkə di bishələ bie.’ 39 Bə́ hlə kwo fwoo wu mə sho jii.”
40 Ye Jisho yɔɔlə nəni, i hlə bii ləə, “Bwɔɔ nnu che wɛɛh yo bwo, ə i fə ləhəŋ bə bəne bie lə?” 41 Bə́ chuu lə, “Mə bwo laa mune mwe, yii chuu bəne bədi mə sho bbəŋ bə́ yáa bə́ nə̄ wu yiih sháŋ ə bwɔɔ kwinə bəŋ.” 42 Jisho bii bə bə́ ləə, “Bə kə hlaa lə chee ə Kiŋwaati ki Chu mə lə,
‘Tə llɨŋ bəne bə wɛɛnə mà nɨhŋ le,
mà bwoo chu tə li hənchi chəŋ.
Fɨhŋ lə nfə Baba,
bəne kèe gəə ŋɨ̀ŋ bə́ lə’?
43 Nhlə n'yee n'yɔ̄ɔ bə bəŋ lə, Chu yá jə muŋkɨŋ mwii ə bəŋ kwáŋ, nə ə duŋ bə kitɨŋ kkɨŋ ki fə̀ ye i kìɛɛ lə.” 44 [“Tə lɨhŋ nini duŋ llɨŋ ə mbɛɛ lə gbe ə li bəŋ, ə i chɛɛmə, ə li gbe ə mbɛɛ bəŋ, ə li gɔhɔ wu.”]ª