Jɔɔŋ 12

Meeli lɔɔ Jisho ə kitɨŋ ki Betani mə

Ə mà she kwaa ye joo buhlɔ lə lə ə hlə duŋ bwɔɔ Chɔnɔ ki Ŋkabəŋ, Jisho no gəŋ ə kwili li Betani mə dɔhɔ kkɨŋ Lashɔlɔ nnu Jisho mà fwoo yo ə kpe mə mà duŋ. 2 Ye i gəŋ lə mə bə́ fə biləə bənchu wu mu. Maata duŋ mbɛɛ ganə, Lashɔlɔ duŋ mbɛɛ ə kintu ki bəne bbəŋ bə́ mà shii bie yee bə́ dī bə Jisho. 3 Ə bwo duŋ bwɔɔ nnu bə́ màa bə́ dī yo, Meeli hlə ja jə fika fi mɛŋ məndi mənfuchee nwaa, tuŋ ə wuh ŋə Jisho go, giaali bə fwee kiih ki fi. Mɛŋ məhŋ mà duŋ məntachuŋ gbaaŋ, mməŋ bə́ mà fə bə nad kwaa. Ye i tuŋ lə nəni, chəŋ ye chɔɔ bənfuchee mu kiɛkiɛ.

4 Judash Ishkalɔt nnu i mà duŋ yo mbɛɛ ə kintu ki bəne bə Jisho mə, (nnu i mà gəŋ taa yo wu) kaka ja yɔɔ lə, 5 “Ə hə fə laha lə bə́ kə taalə mɛŋ məhŋ bibwa gi tɔh,^ª nə kpo we bə bəne bənjɨnənə lə?” 6 Judash mà yɔɔ nəni ə kə duŋ nə lə i mà kənə bwɔɔ bə bəne bənjɨnənə kə. I mà duŋ ŋwuŋ buyi i duŋ mbɛɛ nnu i kìli kibwa kikpo, i hlə yee i yīi kwáŋ mə i chɨ̀nə gbo wiih mu. 7 Jisho yɔɔ lə, “Cheekwaŋ ə wu go. Mə hə chi mɛŋ məhŋ nəni bəmbwɛɛ kiŋwuuni kɨŋŋ mu. 8 Bəne bbəŋ bə́ jɨ̀nə yáa bə dūŋ bə bəŋ bwɔɔ mənhliŋ, kwaalə nlə n'yee ndūŋ kə duŋ nə bə bəŋ bwɔɔ mənhliŋ kə.”

9 Kimɔ ki Bəjuu kɨhŋ wo lə Jisho yo mu, bə́ hlə bwo həmə. Bə́ mà kə bwoo ə duŋ yu Jisho kwaa kə. Bə́ mà bwo dəŋ bəŋəŋ Lashɔlɔ nnu Jisho mà fwoo yo ə kpe mə. 10 Nəni, bəche ntofi bəŋkuntaŋ bəŋkuntaŋ yee bə́ dɔ̄ lə bə́ lə jii dəŋ Lashɔlɔ, 11 yulahalə ə màa yu wu nnu Bəjuu kiŋaaŋkə mà shee bə́, yii tɔ́ŋ ə duŋ ba ə Jisho mə.

Jisho lɛɛ ə Jelushalɛŋ ye Ŋkɨŋ lə

(Matio 21:1-11; Maak 11:1-11; Lukaa 19:28-40)

12 Butuu fu wu, kimɔ ki bəne kkɨŋ ki mà bwo ə chɔnɔ kie mə wo lə Jisho yo ə je bəmbwo ə Jelushalɛŋ. 13 Bə́ hlə jə bibaanə fu bəŋgəŋ tɨŋ jə wu mə je. Yee bə́ gə̄ŋ bə́ wīli bə́ yɔ̄ɔ lə, “Ayililili, hoshana! Chu lɛɛla kinhləmə ə mbɛɛ nnu i yu bwō yo ə yii li Baba bəŋ looo! Ə wu Ŋkɨŋ nnu Ishlael looo!” 14 Jisho kiɛɛ ŋwa hlɔmbwaa, biŋ bəŋ. Ye fi mà duŋ bə́ bieŋna lə,

15 “Bəne bə Jayɔŋ, bə kə yee bə lɔ̂ kə.

Bə bwo kee ŋəŋ, Ŋkɨŋ weŋ yu bwō,

I biŋna ə ŋwa hlɔmbwaa bəŋ.”

16 Bəne bə Jisho bə kintu mà kə kələ kinuu ki fieŋ fie ye fi mà chɔɔ lə kə. Ə chulə Jisho lɛɛla ə kiŋkuntaŋ kiih mə, bə́ hlə ŋoo lə bə́ mà bieŋna fieŋ fɨhŋ ə duŋ yu wu baa ŋoo ye fi kah lə, fi bwoo wunə dəŋ yəəŋ ye bə́ mà bieŋna lə. 17 Kimɔ kkɨŋ ki mà duŋ kie bə Jisho butuu bbuŋ i mà chee bwe Lashɔlɔ ə joo mə fwoo wu ə kpe mə gəŋ bən'yɔɔ ye bə́ mà ŋəŋ. 18 Fiee fieŋ ffɨŋ kimɔ kie mà fu fie bəŋgəŋ tɨŋ jə wu ə je yu bə́ mà woo lə i mà fəə fieŋ ffɨŋ fi nyīi kiŋkuntaŋ ki Chu. 19 Bəfalashii ŋəŋ nəni hlə yee bə́ yɔ̄ɔ bə́ bə́ lə, “Bə kə ŋəŋ nə lə? Fieŋ hləŋ həmə ffɨŋ duŋ ə bə baa fə kə. Mbiŋ mənhliŋ buma chu bə̄lə wu.”

Bəglik bədi yee bə́ kīɛɛ bəŋəŋ ə Jisho go

20 Bəne bədi mà duŋ ə kintu ki bəne bbəŋ bə́ màa bə́ bīŋ bie ə Jelushalɛŋ bəŋgəŋ chee Chu ə bwɔɔ chɔnɔ ki Ŋkabəŋ mə. 21 Bəglik bəŋ gəŋ kə ŋəŋ Filip nnu i mà duŋ mbɛɛ ə kibalaki ki Beshayida mə ə wɛɛ wi Galilii, yɔɔ bə wu lə, “Ŋwuŋ ŋkuntaŋ, kkə kiɛɛ lə kkə ŋəŋ ə Jisho go.”

22 Filip hlə gəŋ chee Andulu mə, bəə wu hlə gəŋ yɔɔ bə Jisho. 23 Jisho chuu bə bə́ lə, “Bwɔɔ yo wuna nnu Ŋwa Mbɛɛ lə kənə yii liŋkuntaŋ. 24 N'yɔ̄ɔ bəŋ chɛɛŋ chɛɛŋ lə, ŋgɔ nnu bə́ lɛɛ ə shishɔ mə lə nakə gbee kpe, ə i ba kwaa wuu mboŋ. Kwaalə ə mə kpe, ə i hlə chɔŋ sháŋ kiŋaaŋkə. 25 Mbɛɛ nnu i lèki kinduŋh kiih lə laa ki, mbɛɛ nnu i taala kinduŋh kiih yaŋ mbiŋ nu mə i kila ki ə kinduŋh ki kə kaa mə. 26 Ə duŋ lə mbɛɛ nɨ̀ŋ bə mi, kəə i kənə ba bəmbələ mi, maa fəhəŋ nnu ndùŋ, mbɛɛ ŋgwəŋ nimi yo dəŋ həmə. Ə mbɛɛ yee i nɨ̄ŋ bə mi, kəə Tah lə yee i kōhi wu.”

Jisho yɔɔ ki kpe yi

27 Jisho ja yɔɔ lə, “Tɔŋ lɨŋŋ le li bēe mi fidiɛɛ. Duŋ ə n'yɔɔ lə laha lə? Lə Tah fwoo mi ə bwɔɔ ŋgə nu mə lə? Ye, ə yu bwɔɔ nu nnu mmà mbwo. 28 Tah, fə fieŋ ffɨŋ bəne lə dohi yii lo.” Ye i yɔɔlə nəni, die bwɔ bwo buh lə, “Mmà nfəə ba li koo, mbaa fə.”

29 Kimɔ kkɨŋ ki mà lemi kie həmə ə bwɔɔ yo bəŋ wo die ye, yɔɔ fibə lə, “Ə kiŋgbaŋgba ki jaŋ.” Bədi yɔɔ lə, “Ə yɔ̄ɔ nchinda Chu bə wu.” 30 Jisho chuu lə, “Die ni bwo yu bəŋ. I bwo lə yu mi kə. 31 Fidiɛɛ lə bwɔɔ nnu bə́ lə hlaah mbiŋ nu. Fidiɛɛ bə́ lə fwoo hlə koŋ mbɛɛ nnu i hlaah yo mbiŋ nu. 32 Ə ŋkwo ŋgwəŋ hlə duŋ lə bwɔɔ nnu bə́ lə tiɛɛ mi fa, ə ŋkpa bəne bənhliŋ ə bə́ bwo ə mi go.” 33 Jisho mà yɔɔ nəni i nyīi ə duŋ dɨŋ kpe nni mə lə kpe ye. 34 Kimɔ ki bəne kie chuu bə wu lə, “Kkə yii wò ə Kiŋwaati ki bəŋkɨnə mə lə Nchuu Fwoo nnu Chu mà kaachi yo yá yi duŋ bwɔɔ mənhliŋ. Wə kah ləhəŋ hlə yee wə yɔ̄ɔ lə bə́ kənə bəŋgəŋ tiɛɛ Ŋwa Mbɛɛ ə buh lə? Ŋwa Mbɛɛ duŋ nwɛhɛŋ lə?” 35 Jisho yɔɔ bə bə́ lə, “Kinchaa lə duŋ bə bəŋ bwɔɔ chɛɛ kwaa. Bə kənə bənjaa ə kinchaa mə bəə bə́, fo jɨbə lə nakə baŋ nə bəŋ. Mbɛɛ nnu i jàa ə jɨbə mə kələ lə dɔhɔ kkɨŋ i gə̀ŋ kie kə. 36 Ye bə kənə lə kinchaa, bə bemi bə kinchaa kie, fo bə ləə bə dūŋ bwɔni bə kinchaa.”

Die Jisho yá yi hlaah mbɛɛ nnu i nɨhŋ bəntɨŋ jə die ye

Ye Jisho yɔɔ lə bieŋ bɨhŋ nəni, i hlə no gəŋ nimi. 37 Maa ye i mà fə lə bieŋ kiŋaaŋkə bbɨŋ bi nyìi kiŋkuntaŋ kiih bə́ ŋəŋ, bə́ nakə baa lə yii tɔ́ŋ ə wu mə kə. 38 Fi mà duŋ nəni bənfə lə fi wunə ye Ejaya mbɛɛ hlɨŋ Chu mà yɔɔlə lə,

“Baba, ə nyəhə nnu duŋ ə i bemi fieŋ ffɨŋ kkə yɔ̀ɔ lə?”

Ə bə nyəhə bbəŋ bə́ bema Baba.

39 Nəni kəə ə duŋ ə bə́ yii tɔ́ŋ ə wu mə kə, yulahalə Ejaya mà baala yɔɔ ə dɔhɔ kidi mə lə,

40 “I baŋna díi ŋəbə,

i fəə tɔ́ŋ ŋəbə tata,

fo bə́ lə nakə ŋəŋ nə bə díi ŋəbə,

kələ bieŋ bə tɔ́ŋ ŋəbə,

fiimə chu dɨŋ ə ŋŋwuhuŋ bə́.”

41 Ejaya mà yɔɔ bieŋ bɨhŋ yulahalə i mà ŋəŋna kiŋkuntaŋ ki Jisho, hlə yee i yɔ̄ɔ kiih. 42 Maa ye bəne mà na lə kə yii lə tɔ́ŋ ə Jisho mə kə, bəne kiŋaaŋkə bbəŋ bə́ mà duŋ maa bikuu bi bitɨŋ mà yiila tɔ́ŋ ə wu mə, kwaalə bə nakə baa lə yɔɔ bə biwu bibə kə, yulahalə bə́ màa bə́ lɔ̄ Bəfalashii lə bə́ kə kohiŋ bə́ ə chəŋ cheenə Chu mə. 43 Bə́ mà lɔ nəni yulahalə bə́ màa bə́ lēki bəŋkənə kiŋkohi ə duŋ kkɨŋ ki bwò ə bəne kwáŋ kahiŋ bəŋkənə ə duŋ kkɨŋ ki bwò ə Chu kwáŋ.

44 Jisho ja diimə gbaaŋ yɔɔ lə, “Mbɛɛ nnu i yìi tɔŋ ə mi mə, i yìi lə ə duŋ ə mi mə kwaa kə. I yìi dəŋ ə duŋ ə mbɛɛ nnu i faŋ yo mi mə. 45 Ə mbɛɛ ŋəŋ mi, kəə i ŋəŋna ə duŋ mbɛɛ nnu i faŋ yo mi. 46 Mbwoo ye kinchaa lə ə mbiŋ nte lə maa nyəhə nnu i yìi tɔŋ ə mi mə ə i nakə baa lə duŋ ba ə jɨbə mə kə. 47 Ə mbɛɛ lə wo die njəŋ, nɨhŋ kə chiee yi, ə nnakə nhlaalə wu kə, yulahalə ŋkə mbwoo ə mbiŋ nu mə bənhlaah bəne lə bə gbe nhlaa kə. Mbwo bənfə lə bə́ fukwoo. 48 Mbɛɛ nnu i lɛ̀ɛ tələ mi nɨhŋ bəntɨŋ jə die njəŋ yo bə fieŋ ffɨŋ fi yá hlaah wu. Die ni mmà n'yɔɔ ye bə wu ə yi nni bə́ yá hlaah wu mu ə i yá gbe nhlaa ə butuu bu həŋgbɔŋ bəŋ. 49 Yee fi dûŋ lə yulahalə n'yɔ̄ɔ lə ə duŋ bə muŋgeni muŋŋ kə. Tah nnu i mà faŋ yo mi ə wu nnu i yɔɔ lə n'yɔɔ lə, ə wu nnu i nə̀ mi fieŋ fi yɔɔnə, nyii mi ye nləə n'yɔ̄ɔ. 50 Ŋkələ lə fieŋ ffɨŋ i yɔɔ lə n'yɔɔ nə kinduŋh ki kə kaa. Nəni fieŋ ffɨŋ n'yɔ̄ɔ duŋ ffɨŋ Tah yɔɔ lə n'yɔɔ.”