Jɔɔŋ 11

Lashɔlɔ dɔɔ Jisho kpe

Mbɛɛ ju nnu yii liih mà duŋ lə Lashɔlɔ gbe jəŋ. I mà duŋ ŋwuŋ nnu Betani, i duŋ mə bə jɛ́ɛmi yiih ə duŋ bə Meeli bə Maata. 2 Meeli nnu maani Lashɔlɔ màa i gɔ̄ŋ yo, wu nnu i mà tee yo mɛŋ mənfuchee nwaa ə wuh ŋə Baba go, giaali bə fwee kiih ki fi. 3 Ye i màa i gɔ̄ŋ lə nəni, jɛ́ɛmi yiih yé hlə faŋ hlɨŋ bə Jisho lə, “Baba, mbɛɛ nnu i dùŋ yo ba biwɛɛ bwo yu gɔ̂ŋ.” 4 Bwɔɔ nnu Jisho mà wo hlɨŋ ye, i yɔɔ lə, “Jəŋ ni kə duŋ nə kpe kə. Mə lə nyii ə duŋ kiŋkuntaŋ kkɨŋ ki dùŋ ki Chu, fo Ŋwa Nchu lə kənə yii liŋkuntaŋ yu yi.”

5 Jisho màa i lēki Maata bə maani Meeli maa Lashɔlɔ gbaaŋ. 6 Kwaalə, bwɔɔ nnu i mà wo lə Lashɔlɔ yu gɔ̄ŋ, i baa nɔŋ ə dɔhɔ kkɨŋ i màa i dūŋ kie mə joo fwe. 7 Bwɔɔ nnu dɨŋ, i yɔɔ bə bəne biih bə kintu lə, “Kkə fiimə chu dɨŋ ə Judia.” 8 Bə́ bii bə wu ləə, “Labi, ə maa kwaa fogbu fogbu nnu Bəjuu maa bə́ kīɛɛ lə bə́ tɨŋ jii wə bə tə́, wə baa yee wə gə̄ŋ chuu mə lə?” 9 Jisho chuu bə bə́ lə, “Nhle lə bəntaŋ bə bwɔɔ duŋ kwaa yuufi ə nchɔ bəfwe ə butuu go lə? Ə mbɛɛ lə jaa ə bushi, kəə duŋ ə i kɔɔ gbo ə fieŋ go kə, yulahalə kinchaa ki yaŋ ə mbiŋ nte kie ki tə̄ ə wu go. 10 Kwaalə, ə mbɛɛ lə jaa ə butuu, kəə duŋ ə i kɔɔ gbo, yulahalə mə lə bə kinchaa kie kə.”

11 Ye i yɔɔlə nəni, i hlə yɔɔ bə bə́ lə, “Mbweŋ ya Lashɔlɔ hə gbee kinɨŋ, kwaalə nlə ŋgəŋ ŋŋɛhiŋ wu.” 12 Bəne biih bə kintu yɔɔ bə wu lə, “Baba, ə lə duŋ lə i yu nɔ̄ŋ kinɨŋ, kəə mə lə ŋwunə.” 13 Jisho màa i yɔ̄ɔ ə duŋ ki kpe Lashɔlɔ, kwaalə yee bə́ wō lə i yɔ̄ɔ ə duŋ ki kinɨŋ kkɨŋ i yu nɔ̄ŋ. 14 Jisho hlə yɔɔ bə bə́ wɛɛŋ lə, “Lashɔlɔ ma kpee. 15 Kwaalə ŋ'wò njənjə lə mma ŋkə duŋ nə dəŋ həmə kə, fo bə́ lə yii tɔŋ ə mi mə. Yee kkə gə̂ŋ mə lə.” 16 Tɔma nnu bə́ màa bə́ chēe yii liih lidi lə Didimu, yɔɔ bə bəne bədi bə kintu lə, “Kkə gəŋ dəŋ bə wu fo kkə lə kpe bə wu.”

Jisho ŋɛhiŋ Lashɔlɔ ə kpe mə

17 Jisho bwii həmə, i wo lə Lashɔlɔ duŋna ə ke joo na. 18 Betani nu mà duŋ baha ə Jelushalɛŋ kwaa ye bəmaay bəfwe lə. 19 Bəjuu kiŋaaŋkə mà bwoo həmə ə bə Maata bə Meeli kwuŋ bəmbwo juuli bə bə́ ki kpe maani bə́. 20 Bwɔɔ nnu Maata mà wo lə Jisho yu bwō, i hlə fu bəŋgəŋ lə bəə wu bənə, kwaalə Meeli she ə chəŋ. 21 Maata gəŋ yɔɔ bə Jisho lə, “Baba, wə maa duŋ fəŋ, ə ŋgwoŋ maa kpe kə. 22 Kwaalə, ŋkə̀lə lə fidiɛɛ maa laha ffɨŋ wə noŋ bə Chu duŋ ə i nə wə fi.” 23 Jisho yɔɔ bə wu lə, “Mwaa lə jaka fu ə kpe mə.” 24 Maata yɔɔ bə wu lə, “Ŋkələ wɛɛŋ lə i yá yí fu butuu bu həŋgbɔŋ bbuŋ bəne yáa bə́ fū ə kpe mə.” 25 Jisho yɔɔ bə wu lə, “Ə mi nnu nfwòo bəne ə kpe mə, ə mi kinduŋh. Mbɛɛ nnu i yìi tɔŋ ə mi mə ə mə lə kpe dəŋ, ə i chu, 26 maa nyəhə nnu i yò həmə fidiɛɛ ə mə yii tɔŋ ə mi mə, ə i yá baa kpe kə. Wə bema fɨhŋ nəni lə?” 27 I bemi lə, “Eee Baba, mbema lə wə dùŋ mbɛɛ nnu Chu mà kaachi yo. Wə dùŋ Ŋwa Nchu nnu i mà duŋ yo bəmbwo ə mbiŋ nu mə.”

28 Ye Maata yɔɔlə nəni, i hlə gəŋ chee maani Meeli, ŋwuunə bə wu lə, “Mbɛɛ Keehnə bwiila fəŋ, i yu chēe wə.” 29 Ye i wolə nəni, i bwaalə bəŋgəŋ ŋəŋ wu. 30 Ə mà duŋ Jisho kaani kə lɛɛ lə ba bweenə kə. I kaani dəŋ həmə ye Maata hə gəŋ lə ŋəŋ ə wu go. 31 Bəjuu bbəŋ bə́ mà duŋ bie bəə Meeli bə́ juuli ŋəŋ ye i hlahi lə gbo fu mu chəŋ, bə́ hlə yee bə́ bə̄lə wu bə́ hlē lə ləkə i yu gə̄ŋ ə jəŋ ye bəŋ bəŋgəŋ yee i dē həmə.

32 Lə Meeli gəŋ bwii həmə ye Jisho mà duŋ lə, ŋəŋ ə wu go, i hlə gbe ə wuh ŋiih bəŋ yɔɔ lə, “Baba, ə wə maa duŋ fəŋ, ə ŋgwoŋ maa kpe kə.” 33 Bwɔɔ nnu Jisho mà ŋəŋ ye i dē lə, Bəjuu bbəŋ bə́ màa bə́ bə̄lə bie wu bə de dəŋ, fieŋ fie nɛhiŋ tɔŋ liih gbaaŋ, bikəllə kpe wu. 34 I ja bii ləə, “Bə diih wu fəhəŋ lə?” Bə́ yɔɔ bə wu lə, “Baba, bwo ŋəŋ.” 35 Jisho de. 36 Bəjuu ŋəŋ nəni yɔɔ lə, “Bə kee ŋəŋ ye i mà leki wu.” 37 Kwaalə bədi kaka yɔɔ ŋkwo bə́ lə, “Nhle lə ə wu nnu i mà wɛ díi ŋə mbandii lə, i taŋnə kpe mbɛɛ nu lə i kə kpee kə lə?”

38 Tɔŋ liih baa nənə gbaaŋ. I no gəŋ bwii ə jəŋ ye bəŋ. Joo kie mà duŋ ə duŋ butiɛ bbuŋ bə́ mà baŋ fwiih we bə tə liŋkuntaŋ. 39 Jisho yɔɔ lə, “Bə́ tuuli tə le.” Maata dɨŋ ŋkwu yo yɔɔ bə Jisho lə, “Baba, fidiɛɛ nəni duŋ i fwɔɔ kaa. Ə joo na ye i ma kpe.” 40 Jisho bii bə wu ləə, “Ŋkə n'yɔɔ lə bə wə lə ə wə yii tɔŋ ə mi mə, ə wə ŋəŋ kiŋkuntaŋ kkɨŋ ki dùŋ ki Chu lə?” 41 Nəni, bə́ hlə bɨhɨŋ tə le. Jisho kee buh yɔɔ lə, “Tah, nnəə kimbaafɛɛ bə wə ye wə wo lə Chu cheenə kɨŋŋ. 42 Ŋkə̀lə lə wə ba bəŋ'wo cheenə kɨŋŋ bwɔɔ mənhliŋ. Kwaalə, n'yɔ̄ɔ fɨhŋ ə duŋ yu bəne bbəŋ bə́ lēmi bie fəŋ, fo bə́ lə bemi lə ə faŋ wə mi.” 43 Ye i yɔɔlə nəni, i diimə bə die ntaabə lə, “Lashɔlɔ, fu yaŋ!” 44 Mbɛɛ nnu i ma kpe yo bu fu, kwáŋ ŋiih bə wuh ŋiih duŋ bə́ hə bina bənshɛŋkɛ yi bindu, bini dəŋ bushi bwii bənshɛŋkɛ yi bindu. Jisho yɔɔ bə bə́ lə, “Bə hluuli wu, bə tukwaŋ ə wu go yee i gə̄ŋ.”

Bikuu bi kitɨŋ chuŋ bənjii Jisho

(Matio 26:1-5; Maak 14:1-2; Lukaa 22:1-2)

45 Bəjuu kiŋaaŋkə bbəŋ bə́ mà bwo ə Meeli kwuŋ ŋəŋ fieŋ ffɨŋ Jisho fə fie, bə́ hlə yii tɔŋ ə wu mə. 46 Kwaalə, bədi bie kaka gəŋ chu fibə gəŋ ŋəŋ ə duŋ Bəfalashii, yɔɔ bə bə́ fieŋ ffɨŋ Jisho fəə. 47 Bəche ntofi bəŋkuntaŋ bəŋkuntaŋ bə Bəfalashii hlə chee bikuu bi kitɨŋ yɔɔ lə, “Duŋ ə kkə fə ləhəŋ lə? Mbɛɛ nu yu fə̄ nyíŋ. 48 Ə kkə tukwaŋ mu lə yee i gə̄ŋ fwi fwi, kəə bəne bənhliŋ lə yii tɔ́ŋ ə wu mə, ə bəne biaa bə Luŋ bbəŋ bə́ hlàah be bwo bihi dɔhɔ kiaa ki cheenə Chu bə kitɨŋ kiaa.”^ª

49 Kwaalə, mbɛɛ ju ə bə́ mə nnu yii liih mà duŋ lə Kayifa, I mà duŋ che kwoo ki bəche ntofi ə kigoŋ kie mə i ja yɔɔ ŋkwo wi bə bə́ lə, “Bə kə̀lə lə fieŋ kə dududu. 50 Bə kə kələ lə fi nwaa lə mbɛɛ mwi kpe ə bəne bəŋ bənhliŋ kahiŋ lə kitɨŋ kie kinhliŋ la nya lə?” 51 Kayifa mà kə yɔɔ lə fieŋ fɨhŋ bə kinhle kiih kə. Wu ye che kwoo ki bəche ntofi ə kigoŋ kie mə i mà yɔɔ nəni i yɔ̄ɔ ə duŋ hlɨŋ Chu lə Jisho mà kənə bəŋkpe yu kitɨŋ ki Bəjuu. 52 Ə kə duŋ nə yu kitɨŋ kie kwaa kə, i mà duŋ bəŋkpe bəmbuhuŋ bəne bbəŋ bə́ dùŋ bə Chu bənhliŋ bbəŋ bə́ mà hlaamə ə bitɨŋ bidi mə, bənduŋ fieŋ fimwi. 53 Gbe jə bumbini bwe, bikuu bi kitɨŋ hlə chɔɔ yee bə́ chūŋ ye bə́ lə jaa maa bənjii Jisho.

54 Nəni, Jisho nakə baa lə yee i jāa wɛɛŋ ə Bəjuu mə kə. I no wu fiih həmə gəŋ wɛɛ widi wwuŋ wi duŋ baha ə kitɨŋ ki choo mə bə bəne biih bə kintu yee bə́ nɔ̄ŋ həmə ə kibalaki kidi mə kkɨŋ bə́ chèe lə Efeleŋ.

55 Chɔnɔ ki Bəjuu ki Ŋkabəŋ mà chu bwo baha ba chəkə chəkə, bəne nō ə wɛ́ɛ ŋie mə bə́ bīŋ ə Jelushalɛŋ ə joo ŋie mə bəŋgəŋ wii bikuu bibə butuu bwe hlə wunə. 56 Bə́ gəŋ gbe yee bə́ kīɛɛ Jisho bə́ bīi bə́ bə́ ye bə́ mà lemi lə həmə ə chəŋ ntofi mə bə́ yɔ̄ɔ lə, “Bə hle laha lə? Duŋ ə i bwo ə chɔnɔ kɨhŋ mə lə?” 57 Ə mà duŋ bəche ntofi bəŋkuntaŋ bəŋkuntaŋ maa Bəfalashii hə nəə ŋkɨnə lə ə mbɛɛ duŋ həmə nnu i kələ dɔhɔ kkɨŋ Jisho duŋ, i fə bə́ kələ, fo bə́ lə kwo wu.