Bəne chuŋ bəŋkwo jii Jisho
14
Ə mà she joo fwe lə yee ə dūŋ butuu bu Chɔnɔ ki Ŋkabəŋ maa Chɔnɔ ki Kibele kkɨŋ bə́ kə yii lə Jɔ mə kə. Bəche ntofi bəŋkuntaŋ bəŋkuntaŋ bə bəne bbəŋ bə́ kèeh bəŋkɨnə bə Chu yee bə́ kīɛɛ je nni bə́ lə kwo Jisho ə nələ mə, jii. 2 Bə́ chuŋ bə́ bə́ lə, “Kkə kə mɔŋ nə fieŋ fɨhŋ ə bwɔɔ Chɔnɔ kɨhŋ mə kə, yulahalə ə kkə lə mɔŋ, ə fi bwo bə bəŋgə ə bəne mə.”Kpɛ ju lɔɔ Jisho bə mɛŋ mənfuchee nwaa
3 Lə Jisho yee i dūŋ ə kwili li Betani mə, ə Shaamuŋ chəŋ, nnu i mà hlaa duŋ mbɛɛ jəŋ kinhlanhla, bə́ shiila yee bə́ dī, kpɛ ju duŋ duŋ lɛɛ bə fikaª fi mɛŋ məndi mənfuchee nwaa. Mɛŋ mie mà duŋ məntachuŋ gbaaŋ, mməŋ bə́ mà fə bə fieŋ fidi fi fi bə́ chee lə naad. Ye i lɛɛlə, i hlə kpee chi ye tuŋ mɛŋ mie ə Jisho fi. 4 Bəne bədi bu kaka ja yee bə́ ŋwūunə bə́ bə́, bə́ yɔ̄ɔ lə, “I bìhi mɛŋ məhŋ nəni yulaha lə? 5 Ə hə duŋ ə bə́ hə taa mɛŋ məhŋ ə mə kah kpo bənchuku gi tɔh, nə kpo we bə bəne bənjɨnənə.” Yee bə́ lōh bə wu. 6 Kwaalə, Jisho yɔɔ bə bə́ lə, “Bə chi wu lə. Bə nə̄ wu ŋgə yulaha lə? I fəə ə duŋ fieŋ finwaa bə mi. 7 Yee bə kə̂lə lə bəne bənjɨnənə lə yee bə́ dūŋ bə bəŋ bwɔɔ mənhliŋ. Duŋ ə yee bə chɨ̄nə bə́ bwɔɔ nnu bə lèki. Kwaalə, nduŋ nə bə bəŋ bwɔɔ mənhliŋ kə. 8 Kpɛ nu fəə fieŋ ffɨŋ mə hə duŋ lə i fə. I lɔɔ mɛŋ məhŋ ə mi go nəni, i bwɛɛ gbo wuŋŋ ə kaani ye bə́ yá diih mi. 9 N'yɔ̄ɔ bəŋ kichɛɛŋ lə maa fəhəŋ nnu bə́ yáa bə́ dōntə hlɨŋ nwaa ni ə mbiŋ mənhliŋ mə, bə́ yáa bə́ yɔ̄ɔ fieŋ ffɨŋ kpɛ nu fəə, bənhle wu.”
Juda gəŋ lə i gəŋ taa Jisho
10 Judash Ishkalɔt nnu i mà duŋ mbɛɛ ə kintu ki bəne bə Jisho bə yuufi ə nchɔ bəfwe mə, hlə ja gəŋ chili bəche ntofi bəŋkuntaŋ bəŋkuntaŋ lə i taa Jisho bə bə́. 11 Ə chulə bə́ wo nəni, bə́ wo njənjə gbaaŋ, hlə kaachi lə bə́ lə nə wu kpo. I hlə chɔɔ bəŋkiɛɛ je nni mə lə nə Jisho ə bə́ kwáŋ.
Jisho bə bəne biih di biləə bi həŋgbɔŋ
12 Butuu bu fwii bu Chɔnɔ ki Kibele kkɨŋ bə́ kə yii lə Jɔ mə kə bbuŋ bə́ màa bə́ nyīeŋ ŋwa kintɔnɔ ki Chɔnɔ ki Ŋkabəŋ mà bwo wunə, bəne bə Jisho bə kintu bii bə wu ləə, “Wə kiɛɛ lə kkə gəŋ bwɛɛ chi dɔhɔ fəhəŋ kkɨŋ wə lə di Chɔnɔ ki Ŋkabəŋ lə?” 13 I hlə faŋ bəne biih bə kintu bədi bəfwe, yɔɔ bə bə́ lə, “Bə gəŋ ə kibalaki kie mə, bwɔɔ nnu bə lə yee bə gə̄ŋ, bə lə ŋəŋ ə mbɛɛ ju go ə duŋ i too ŋgwiŋ ə sho mə, bə bələ wu. 14 Bwɔɔ nnu mə lə gəŋ lɛɛ ə chəŋ nni mə lə lɛɛ ye mu, bə bii bə mbɛɛ nnu i kə̀nə yo chəŋ ye ləə, Mbɛɛ Keehnə biila ləə fəhəŋ chəŋ nni nte nni bəne bə kpuuni maa bəne biih bə kintu lə di Chɔnɔ ki Ŋkabəŋ mu lə? 15 Mə lə nyii bəŋ chəŋ nni fa gbɔɔŋkɔ nni bə́ hə jəə bwɔɔ bwɛɛ chi yi kwe kwe, ə bə hlə bwɛɛ chi bidinə bie mu.” 16 Lə bəne bə kintu bie ja gəŋ ə kibalaki kie mə, bə́ gəŋ ŋəŋ bieŋ dəŋ yəəŋ ye Jisho hə yɔɔ lə bə bə́. Bə́ hlə bwɛɛ chi biləə bi Chɔnɔ ki Ŋkabəŋ mu. 17 Ə bwo duŋ hə kitaŋ, Jisho bə bəne biih bə kintu bə yuufi ə nchɔ bəfwe bumə həmə. 18 Bə́ shii yee bə́ dī, Jisho duŋ duŋ yɔɔ bə bə́ lə, “N'yɔ̄ɔ bəŋ kichɛɛŋ lə mbɛɛ ju ə bəŋ mə lə taa mi, mbɛɛ nu lə nnu i yu dī bə mi.” 19 Lə bə́ wo nəni, yee bə́ dūŋ juu juu, hlə yee bə́ yɔ̄ɔ bə wu mbɛɛ mwi mwi lə, “Ə kə duŋ nə mi kə” 20 I chuu lə, “Ə mbɛɛ ju ə bəŋ bə yuufi ə nchɔ bəfwe bəhŋ mə, nnu bee wu bie kkə dūulə kibele ə nchwa mə. 21 Ŋwa Mbɛɛ yu gə̄ŋ dəŋ ye fi duŋ bə́ bieŋna kiih. Kwaalə, ŋgə ŋkuntaŋ dùŋ bə mbɛɛ nnu i taa yo Ŋwa Mbɛɛ. Fi màa nwaa gbaaŋ bə mbini yo mbɛɛ lə bə́ kə bwee lə wu kə.”
Jisho bə bəne biih di biləə bi Chu
22 Ye bə́ màa bə́ dīlə, Jisho ja jə kibele, nə kimbaafɛɛ bə Chu, hlə gaa nə bə bəne biih bə kintu yɔɔ lə, “Bə jə di, wuhŋ lə gbo wuŋŋ.” 23 I hlə jə dəŋ kwooh, nə kimbaafɛɛ bə Chu, hlə nə bə́ kwooh kie, bə́ bənhliŋ ŋwi. 24 I yɔɔ bə bə́ lə, “Məhŋ lə ŋgɔŋ məŋŋ mməŋ Chu shwaana tɨmə mu, mə shoo kwe yu mbɛɛ mənhliŋ. 25 N'yɔ̄ɔ bəŋ chɛɛŋ lə, mbaalə ŋŋwi mbihŋ mə gbɛŋ wi tiɛɛ kkɨŋ ki dìɛɛni kɨhŋ kə, gəŋ bwii butuu bbuŋ n'yá ŋŋwi mənfwɔ ə muŋkɨŋ mu Chu mə.” 26 Ə chulə Jisho bə bəne biih bə kintu kaa, bə́ sheeni yii li kiŋkohi, hlə fu biŋ gəŋ ə Kɔnɔ ki Bite bi Olif go.
Jisho yɔɔ lə Pita lə nɨhŋ wu
27 Jisho duŋ duŋ ja yɔɔ bə bə́ lə, “Bəŋ bənhliŋ lə lɔ she mi. Ə duŋ ye bə́ bieŋna Chu yɔ̄ɔ lə,
‘Nlə njii nfwoŋ shɔ́ŋ yo ə shɔ́ŋ yé hlaamə.’
28 Kwaalə, bwɔɔ nnu Chu lə fwoo mi ə kpe mə, nlə ŋkah bəŋ fwi gəŋ ə Galilii.” 29 Pita chuu bə Jisho lə, “Maa bəne bənhliŋ lə lɔ wə, ə nlɔ wə kə.” 30 Jisho yɔɔ bə wu lə, “N'yɔ̄ɔ wə kichɛɛŋ lə daŋ butuu, kikɔkɔlɔ lə chu tɔŋ chá fie, duŋ wə nɨhŋna mi chá shɔ.” 31 Pita yɔɔ bə die ntaabə lə, “Ə lə duŋ lə ŋkpe ba bee wə, kəə duŋ ə nɨhŋ wə kə.” Ye i yɔɔlə nəni, bə bənhliŋ yɔɔ dəŋ yəəŋ ye i yɔɔ lə.
Jisho chee Chu ə Getshemani
32 Lə bə́ gəŋ lɛɛ ə wɛɛh kidi ki bite bi sháŋ mə, kkɨŋ bə́ chèe lə Getshemani, Jisho yɔɔ bə bəne biih bə kintu lə, “Bə shii fəŋ, ŋgəŋ nchee Chu.” 33 I hlə jə Pita bə Jɛŋ maa Jɔɔŋ, bəə bə́ no həmə. I ja yee i hlē bieŋ tɔŋ fɨhɨŋ wu. 34 I yɔɔ bə bə́ lə, “Tɔŋ lɨŋŋ le bə munhlenə gbaaŋ, ye nduŋ lə ə ŋkpe ə ŋkpe mə. Bə she yee bə dūŋ fəŋ bə kē.” 35 Jisho ja həmə baŋ gəŋ fwi chɛɛ, hlə gbe həkwe, chee Chu lə, ə duŋ lə je ye mu, bwɔɔ ŋgə yo kah ə wu go. 36 I chee Chu lə, “Aba,ª Tah, duŋ ə wə fə fieŋ finhliŋ. Fwoo kwooh ki ŋgə kɨhŋ nlə ŋkə ŋŋwee ki kə. Kwaalə, fə kwaa ye wə leki lə. Wə kə fəə ye nlēki lə kə.” 37 Jisho fiimə chu dɨŋ gəŋ chili bə́, ŋəŋ bə́ nɔ̄ŋ kinɨŋ. I bii bə Pita ləə, “Shaamuŋ, wə nɔŋ ə duŋ kinɨŋ lə? Duŋ ə wə nakə duŋ nə fa bwii ntaŋ bwɔɔ mwi kə lə? 38 Yee bə dûŋ fa, bə chèe Chu lə bimɔŋnə kə bwoo ə bəŋ mə. Ə chɛɛŋ lə tɔŋ yii lèki, kwaalə gbo we dùŋ wɛɛɛ.” 39 Ye i yɔɔlə nəni i fiimə chu dɨŋ gəŋ yee i chēe Chu dəŋ yəəŋ ye mə hə hlaalə chee. 40 I fiimə chu dɨŋ baa ŋəŋ bəne biih bə kintu nɔ̄ŋ kinɨŋ yulahalə kinɨŋ màa ki jɨ̄ɨŋkə bə́ gbaaŋ. Bə́ nakə kənə fieŋ ffɨŋ bə́ lə chuu bə wu kə. 41 I fiimə chu dɨŋ ə chá bəŋ shɔ, bii bə bə́ ləə, “Bə bie bə kaani dəŋ bə nɔ̄ŋ kinɨŋ bə ŋɔɔni ŋkwo weŋ lə? Ki wuna. Bə́ taala Ŋwa Mbɛɛ bə bəne bə bieŋ biwaha. 42 Bə ja fa yee kkə gə̄ŋ. Bə kee ŋəŋ, mbɛɛ nnu i taa yo mi yo wu nnu i yu bwō.”
Bə kwo Jisho
43 Kwaa ye Jisho màa i kaani lə i yɔ̄ɔ nəni, həmə həmə Judash nnu i mà duŋ yo mbɛɛ ə kintu ki bəne bə Jisho bə yuufi ə nchɔ bəfwe mə hlə fu bwo. I màa i bwō bə kimɔ ki bəne bə́ kəna bihlo bə muŋkwuŋ, ə mà faŋ bəche ntofi bəŋkuntaŋ bəŋkuntaŋ bə bəne bbəŋ bə́ kèeh bəŋkɨnə maa bəne bbəŋ bə́ hlàah kitɨŋ bə́. 44 Ə mà duŋ mbɛɛ nnu i taa yo Jisho hə bwɛɛla chi kinyii bə bəne bie yɔɔ lə, “Mbɛɛ nnu nlə nchee yo wu, kwaamə yohiŋ lə wu, bə bu kwo jə yee bə gə̄ŋ bə wu, bə jə bwɔɔ lə i kə lɔɔ kə.” 45 Ye Judash bwolə nəni, i hlə gəŋ cha mi ə Jisho tɨŋ, chee wu lə, “Mbɛɛ Keehnə.” Ye i cheelə nəni, i hlə kwaamə wu yilə wu. 46 Bəne bie hlə kwo Jisho, shaŋ kənə wu. 47 Mbɛɛ ju nnu i màa i lēmi bəə Jisho hlə bwa mbieelə, hlɛɛ tiɛɛ ki nfwa che kwoo ki bəche ntofi mu. 48 Jisho bii bə bəne bie ləə, “Bə bwo lə bə kwo mi, bə hlə yee bə bwō bə bihlo bi ntɨmə maa bə muŋkwuŋ ə waalə bə bwo bəŋkwo ə duŋ ŋwuŋ buyi lə? 49 Mmaa nshi bə bəŋ joo ŋənhliŋ ə chəŋ ntofi mə, ŋkēeh bəne bə dùŋ həmə bə nakə kwoo mi kə. Kwaalə, fɨhŋ kah nəni fidiɛɛ fo fieŋ ffɨŋ fi mà duŋ ki bieŋ ə Kiŋwaati ki Chu mə lə bwo fu yəəŋ.” 50 Bəne bə Jisho bə kintu bie bənhliŋ she wu həmə, bwaalə bə lili. 51 Hlɔŋ ŋiaŋ nyo ju yee i bə̄lə wu, ə duŋ i kə lee lə fieŋ ə go kə, i fuula kwaa ə duŋ fi kindu. Bə́ gəŋ lə bə́ gəŋ kwo dəŋ wu, 52 fi kindu fie hloonə, i tukwaŋ ə fi go lələ no kichi kindende.
Bə́ hlaah nhlaa Jisho
53 Bə́ hlə jə Jisho, gəŋ bə wu ə che kwoo ki bəche ntofi kwuŋ. Bəche ntofi bəŋkuntaŋ bəŋkuntaŋ bə bəne bbəŋ bə́ hlàah kɔnɔ maa bəne bbəŋ bə́ kèeh bəŋkɨnə bə bumə həmə. 54 Bə́ màa bə́ gə̄ŋ bə Jisho Pita bə̄lə wu dɨŋ je nyɛɛkə. I gəŋ bwii ba ə kwili li che kwoo ki bəche ntofi kwuŋ, hlə shii bə bəne bbəŋ bə́ màa bə́ fwōŋ bie kwili le yee i wūu bwii. 55 Bəche ntofi bəŋkuntaŋ bəŋkuntaŋ bə bəne bənhliŋ bbəŋ bə́ hlàah bənhlaa hlə yee bə́ kīɛɛ fieŋ ffɨŋ bə́ lə bwɛɛ ə Jisho go, fo bə́ lə fə ə bə́ jii wu. Kwaalə, bə́ nakə bənə fieŋ kə. 56 Bənə kiŋaaŋkə lemi ə kidɨŋ ki nhlaa yo ə Jisho dɨŋ. Kwaalə, mbɛɛ yɔ̄ɔ fieŋ ffɨŋ fi dùŋ ə fi nakə bwoo gbeemə bə fi mbɛɛ ju kə. 57 Bəne bədi ja lemi fa, hlə kaalə ŋkwo bə́ yo ə wu go lə, 58 “Kkə mà woo ye i yɔ̄ɔ lə, mə lə bwu chəŋ ntofi nni bəne bəŋkee mà wɛɛ, ə i wɛɛ chuu yi ə joo bəŋ tɔh ə kə duŋ nə ŋwɛɛ bəne bəŋkee kə.” 59 Maa ye bə́ màa bə́ yɔ̄ɔ lə nəni, biyɔɔnə bibə bie nakə bwoo gbeemə yəəŋ kə. 60 Che kwoo ki bəche ntofi hlə ja lemi fa ə bəne fwi, bii bə Jisho ləə, “Wə lə bə fieŋ fi chuunə kə lə? Wə kə woo dəŋ bieŋ bbɨŋ bəne bəhŋ yɔ̄ɔ bie ə wə go kə lə?” 61 Jisho ba shiiiŋ, nakə chuulə fieŋ kə. Che kwoo ki bəche ntofi baa bii bə Jisho lə, “Ə wə Nchuu Fwoo nnu Chu mà kaachi yo nnu i dùŋ yo Ŋwa Nchu, Chu nnu bə dohi yo lə?” 62 Jisho chuu lə, “Ə mi. Bə yá yi ŋəŋ Ŋwa Mbɛɛ shiila ə kwaŋ wi diee wi Mbɛɛ nnu i kə̀nə yo Muŋga, baa ŋəŋ ye i hlīli i bwō ə joonə ki buh mə.” 63 Che kwoo ki bəche ntofi wo nəni, hlə shwaŋ bindu go, bii ləə, “Mbɨŋ ju yo nnu duŋ ə yee kkə kīɛɛ mbɛɛ lə i lemi yɔɔ fɨhŋ fieŋ lə?ª 64 Bə kə woo ye i jə dɔhɔ ki Chu kie kə lə? Bə́ yɔɔla lə ləhəŋ lə?” Bəne bənhliŋ hlə kaalə lə i duŋ mbɛɛ nnu bə́ duŋ bənjii kwaa. 65 Bəne bədi hlə gbe bəntu Jisho bə ntɨŋ, kwaa díi ŋiih, kɔɔ wu bə muŋkɔɔ, yɔɔ lə, “Fə ki nyo ki mbɛɛ hlɨŋ Chu fidiɛɛ.” Bəne bə bicha bie hlə ja jə Jisho həmə chɔɔ bəŋkwuŋ.
Pita nɨhŋ Jisho
66 Ye Pita mà duŋ lə je munhlili ə kwili le mə, ŋiaŋ kpɛ ju nnu i màa i nɨ̄ŋ bə che kwoo ki bəche ntofi ja bwo ə wu tɨŋ. 67 Ye i ŋəŋ lə Pita wūu bwii, i kee wu jwaaŋ, yɔɔ lə, “Wə hə duŋ dəŋ bə Jisho Mbɛɛ nnu Nashalit yo.” 68 Pita nɨhŋ, yɔɔ lə, “Ŋkə ŋkələ fieŋ ffɨŋ wə yɔ̄ɔ fie kə. Ŋkə kələ kə.” Ye i yɔɔlə nəni, i hlə ja həmə gəŋ ə fwiih wi mbaŋ we tɨŋ, kikɔkɔlɔ hlə tɔŋ jə.ª 69 Lə ŋiaŋ kpɛ yo baa ŋəŋ dəŋ ə wu go, i yɔɔ bə bəne bbəŋ bə́ màa bə́ lēmi bie həmə lə, “Mbɛɛ nnu lə ju ə bə́ mə.” 70 Pita baa nɨhŋ. Lə bwɔɔ gəŋ chɛɛ, bəne bbəŋ bə́ màa bə́ lēmi bie həmə baa yɔɔ bə Pita lə, “Ə chɛɛŋ lə wə duŋ ju ə bə́ mə, yulahalə wə duŋ dəŋ mbɛɛ nnu Galilii.” 71 Pita kaŋ muŋkaŋ, dii kida ə wu fi, yɔɔ lə, “Ŋkə ŋkələ mbɛɛ nnu bə yɔ̄ɔ yo kiih kə.” 72 Cha mi kikɔkɔlɔ hlə baa tɔŋ ə chá fie bəŋ. I hlə ŋoo biyɔɔnə bbɨŋ Jisho hə yɔɔ bie bə wu lə, “Kikɔkɔlɔ lə chu tɔŋ ə chá bəŋ fie, duŋ wə nɨhŋna mi chá shɔ.” I hlə buuu ndəŋ.