Maak 13

Bieŋ bi ŋɨŋ gəə bbɨŋ bi yáa bi dūŋ bwɔɔ nnu mbiŋ nu yá kah

Lə Jisho yee i fū ə chəŋ ntofi mə, ŋwa kintu wi ju yɔɔ bə wu lə, “Mbɛɛ Keehnə, kee ŋəŋ tə́ ŋəŋkuntaŋ ŋŋəŋ ŋə dùŋ ŋəhŋ ə chə́ŋ yɨhŋ go. Ə chə́ŋ yí ŋɨŋ gəə ba!” 2 Jisho chuu bə wu lə, “Wə ŋəŋna chə́ŋ yí ŋɨŋ gəə yɨhŋ lə? Tə mwe yá shee ə lidi bəŋ bə́ kaani kə yəələ tələ li həkwe kə.”

(Matio 24:3-14; Lukaa 21:7-19)

3 Jisho bwo gəŋ shii ə Kɔnɔ ki Bite bi Olif go ə wɛɛ wwuŋ wi kèe chəŋ ntofi, Pita, Jɛŋ, Jɔɔŋ bə Andulu gəŋ bə́ bə́ bii bə wu ləə, 4 “Yɔɔ kwaa be bwɔɔ nnu fieŋ fɨhŋ yá duŋ, wə yɔɔ dəŋ be kinyii kkɨŋ ki yá nyii bwɔɔ nnu bieŋ bɨhŋ binhliŋ yá duŋ.” 5 Jisho hlə yɔɔ bə bə́ lə, “Bə jə bwɔɔ lə mbɛɛ yá kə bwoo fihi bəŋ lə bə nyɔkɔ je kə.” 6 Bəne kiŋaaŋkə yáa bə́ bwō bə́ tɨ̀ŋ yii lɨŋŋ fwi, mbɛɛ yɔ̄ɔ lə, “Ə mi wu.”^ª Bwɔɔ nnu bə́ yáa bə́ fə̄ nəni, bə́ fìhi bəne kiŋaaŋkə bə́ nyɔ̀kɔ je. 7 Bwɔɔ nnu bə wòlə bie bə́ tɨ̄mə bəntɨmə ləkə lə ntɨmə lə duŋ, tɔ́ŋ kə yee ŋə kāanə bəŋ kə. Bieŋ bɨhŋ binhliŋ duŋ lə bi yá bwo duŋ. Kwaalə bi nyìilə lə mbiŋ nu yu ka kə. 8 Kitɨŋ yáa ki tɨ̄mə bə kidi, ə ŋkɨŋ ju yee i tɨ̄mə bə ju. Jəbulə yá yi duŋ, shishɔ nə̀nə ə bidɔhɔ mə bidɔhɔ mə. Bieŋ bɨhŋ kiɛkiɛ yá duŋ ye nlogo kpɛ lə, bwɔɔ nnu te kwo wu.

9 Yee bə dûŋ bə jə̀ bwɔɔ. Yee bə kə̂lə lə bə́ yá yi nə bəŋ ə bəne bbəŋ bə́ hlàah bənhlaa kwáŋ. Bə́ yáa bə́ kwūŋ bəŋ ə chə́ŋ yí cheenə Chu mə. Bə yá yi lemi ə bəne bbəŋ bə́ hlàah kitɨŋ fwi, maa bəŋkɨŋ fwi yu mi, fo bə lə yɔɔ bə bə́ kɨŋŋ. 10 Kwaalə bə kənə bənhlaa dontə hlɨŋ nwaa Chu bə bitɨŋ binhliŋ. 11 Bwɔɔ nnu bə́ kwò gəŋ bə bəŋ ə chəŋ nhlaa mə, gbo kə shee bəŋ ləə bə lə gəŋ yɔɔ lə laha lə. Ə bwɔɔ mbini yo bəŋ, yee bə yɔ̂ɔ ba ə duŋ fieŋ ffɨŋ fi fù ə kijə kieeŋ mə, ə bwɔɔ yo bəŋ, yulahalə ə baa yɔɔ ə duŋ bəŋ kə. Ə yá nə Fiana Wɛɛŋ bəŋ fieŋ ffɨŋ bə yá yɔɔ. 12 Mbɛɛ yá ja jə maani nə bə́ jii, ə che ŋiaŋ jə ŋiaani nə bə́ jii. Bəne yá ja yee bə́ bɛ̄ŋ dəŋ kinjɔŋ ə bətili bə bəmahni bəbə dɨŋ, bə́ fə̀ bə́ jìi bə́. 13 Bəne bənhliŋ yáa bə́ lōh bə bəŋ yu yii lɨŋŋ. Kwaalə mbɛɛ nnu i yá kwaa tɔŋ gəŋ bwii həŋgbɔŋ ə wu nnu i yá fukwoo.

Ki bieŋ biŋwi gbo bbɨŋ bi yá duŋ

(Matio 24:15-28; Lukaa 21:20-24)

14 (Mbɛɛ nnu i chèe kiŋwaati kɨhŋ, i wo fɨhŋ kinwaa,) bwɔɔ nnu bə yá ŋəŋ lə fieŋ fi ŋwi gbo ffɨŋ ə duŋ ə fi bihi bieŋ fi lema ə dɔhɔ kkɨŋ duŋ ə fi nakə lemi kə, ə bəne bbəŋ bə́ dùŋ bie ə Judia lɔ biŋ ə bikɔni go. 15 Mbɛɛ nnu i dùŋ ə kinchu ki chəŋ bəŋ, i kə baa lə hlili lə i lɛɛ chəŋ jə fieŋ mu kə. 16 Mbɛɛ nnu i dùŋ sho kə baa lə kwələ lə i bwo jə kindu kiih ki fuu kə. 17 Ŋgə ŋkuntaŋ yá yi duŋ ə joo ŋie mə bə bəkwɛɛ bbəŋ bə́ dùŋ bə té, maa bbəŋ bə́ mwàhiŋ bwɔni. 18 Yee bə chêe Chu lə fieŋ fɨhŋ yá kə duŋ nə ə duŋ bwɔɔ kifwuŋ mə kə. 19 Bəne yá yi ŋəŋ ŋgə ə joo ŋie mə, dɨŋ mbini yo ŋgə kə hlaa lə duŋ chɔɔ jə bwɔɔ nnu Chu mà fə mbiŋ bwo bwii fidiɛɛ. Dɨŋ mbini yo ŋgə yá baalə duŋ kə. 20 Ə Tah màa nakə kwohi ə joo ŋə ŋgə ŋie go, ə mbɛɛ mwi yá nakə fwoo kwoo kə. Kwaalə, yu bəne biih bbəŋ i mà shaala chi, i kwohi joo ŋie. 21 Ə mbɛɛ yá yɔɔ bə bəŋ ə joo ŋie mə lə, “Bə kee ŋəŋ, Nchuu fwoo nnu Chu mà kaachi yo yo fəŋ!” Ləkə lə, “Bə ŋəŋ kwii wu filii!” Bə kə bemi kə. 22 Yee bə kə̂lə lə bəne yáa bə́ bwō bə yo kaalənə lə bə́ dùŋ bənchuu fwoo bbəŋ Chu mà kaachi, ə bədi yɔɔ lə bə́ dùŋ bəne bə hlɨŋ Chu, hlə yee bə́ fə̄ bieŋ bbɨŋ bi nyìi muŋgeni mubə, hlə yee bə́ fə̄ dəŋ bieŋ bi ŋɨŋ gəə, mɔŋ lə ləkə ə je lə duŋ mu, bənfihi bəne bbəŋ Chu mà shaala fo bə́ lə nyɔkɔ je. 23 Bə jə bwɔɔ. N'yɔɔla bieŋ bɨhŋ binhliŋ bə bəŋ, maa bi chu bwo duŋ.

Ye fi yá duŋ ə bwɔɔ nnu Ŋwa Mbɛɛ yáa i bwō

(Matio 24:29-31; Lukaa 21:25-28)

24 Ə yá duŋ ə joo ŋie mə, bwɔɔ nnu bəŋgə bie kaah, ə kitaŋ yá nyɨŋ, ə kpii nakə baa lə tə dəŋ kə, 25 muntoola yáa mu fū buh mu bwō gbe, ə bieŋ binhliŋ bi buh bbɨŋ bi kə̀nə múŋga yáa bi nə̄nə. 26 Nəni ə bəne hlə ŋəŋ ye Ŋwa Mbɛɛ hlīli i bwō ə joonə mə i kə̄nə muŋga muŋkuntaŋ maa kiŋkuntaŋ. 27 Ə i hlə faŋ bənchinda biih lə bə́ gəŋ ə bənchi bə mbiŋ bə bənua go ə shishɔ mə maa buh, buhuŋ bəne biih bbəŋ i shaala.

(Matio 24:32-35; Lukaa 21:29-33)

28 Bə laanə bufe ə findəŋ go. Nyáŋ yé hlee lə bibiaa bie chɔɔla bənjɛki mu go, bə kələ lə kibweenə chɔɔla bəŋgaanə. 29 Ə lə dəŋ yəəŋ ye bə yá ŋəŋ bwɔɔ nnu bieŋ bɨhŋ duŋ, ə bə hlə kələ lə bwɔɔ yo yo baha baha ə fwih. 30 N'yɔ̄ɔ bəŋ kichɛɛŋ lə ŋkaani bəne bə fidiɛɛ bəhŋ yá kaah bieŋ bɨhŋ binhliŋ kaani kə duŋ nə kə. 31 Buuli bə shishɔ yá yi kah, kwaalə die njəŋ yá kaah kə dududu.

(Matio 24:36-44)

32 Kwaalə mbɛɛ hləŋ həmə nnu i kə̂lə butuu bwe ləkə bwɔɔ yo kə. Maa bənchinda bə Chu bə buh ləkə Ŋwa Nchu kələ lə dəŋ kə. Ə kələ kwaa Tili wuu mboŋ. 33 Nəni yee bə jə̂ bwɔɔ dəŋ bə kè,^ª yu bə kə kələ bwɔɔ yo kə. 34 Fi yá duŋ ye mbɛɛ nnu i la gbɛŋ, bwɔɔ nnu i too, i chi chəŋ yi ə kwáŋ ŋə bəne biih bə nimi mə, mbɛɛ bə lii nimi, mbɛɛ bə lii nimi, yɔɔ bə mbɛɛ nnu i fwòŋ yo fwiih we lə i she yee i fwōŋ wi kinwaa. 35 Nəni, yee bə kê yulahalə bə kə kələ bwɔɔ nnu che chəŋ yo yá fiimə bwo kə. Ə duŋ ə i bwo ə kitaŋ, ləkə butuu kintekinte, ləkə bwɔɔ nnu kikɔkɔlɔ ki fwii tɔŋ jə, ləkə həmbumbwaa. 36 Mə ya kə ja gənə ŋəŋ bəŋ bə nɔ̄ŋ kinɨŋ. 37 Fieŋ ffɨŋ n'yɔ̄ɔ fɨhŋ bə bəŋ n'yu n'yɔ̄ɔ fi dəŋ bə mbɛɛ mənhliŋ lə, “Mbɛɛ mənhliŋ yee i kê.”