Matio 24

Jisho yɔɔ lə bə́ lə bwu chəŋ ntofi

Jisho bwo fu ə chəŋ ntofi mə, ə chu lə yee i gə̄ŋ, bəne biih bə kintu bwo baha ə wu go yee bə́ nyīi wu chə́ŋ yyɨŋ yí dùŋ ə mbaŋ chəŋ ntofi mə. 2 Kwaalə, Jisho yɔɔ bə bə́ lə, “Bə ŋəŋna chə́ŋ yɨhŋ lə? N'yɔ̄ɔ bəŋ kichɛɛŋ lə tə mwe yá shee ə lidi bəŋ, bə́ kaani kə yəə lə tələ li həkwe kə.”

(Maak 13:3-13; Lukaa 21:7-19)

3 Ə chulə Jisho gəŋ shii ə Kɔnɔ ki Bite bi Olif go, bəne biih bə kintu baŋ bwo ə wu go bə́ bə́ bii ləə, “Bu yɔɔ be bwɔɔ nnu fɨhŋ fieŋ yá duŋ, maa kinyii kkɨŋ ki yá nyii bwɔɔ nnu wə yáa wə fīimə bwo, maa lə mbiŋ nu yu kā lə?” 4 Jisho chuu bə bə́ lə, “Bə jə bwɔɔ lə mbɛɛ yá kə bwoo fihi bəŋ lə bə nyɔkɔ je kə. 5 Yee bə kə̂lə lə bəne kiŋaaŋkə yáa bə́ bwō bə́ tɨ̀ŋ yii lɨŋŋ fwi, mbɛɛ yɔ̀ɔ lə, ə mi Nchuu Fwoo nnu Chu mà kaachi yo. Bwɔɔ nnu bə́ fə̀ nəni, bə́ fìhi bəne kiŋaaŋkə bə́ nyɔ̀kɔ je. 6 Bə yáa bə wō ye bə́ tɨ̀mə bəntɨmə, ə yee bə wō dəŋ hlɨŋ lə bəntɨmə bie. Bwɔɔ nnu bə wò nəni, tɔŋ kə bee lə bəŋ kə. Bieŋ bɨhŋ kənə bənduŋ. Kwaalə bi nyìi lə lə mbiŋ nu yu kā kə. 7 Kitɨŋ yáa ki tɨ̄mə bə kidi, ə ŋkɨŋ ju yee i tɨ̄mə bə ju. Jəbulə yá yi duŋ, shishɔ nə̀nə ə bidɔhɔ mə bidɔhɔ mə. 8 Bieŋ bɨhŋ kiɛkiɛ yá duŋ ye nlogo kpɛ lə, bwɔɔ nnu te hə kwo wu.

9 Bəne yáa bə́ kwō bəŋ, bə́ nə̀ lə bə́ fɨ̀hɨŋ bəŋ, bə́ jìi bəŋ. Bitɨŋ binhliŋ yáa bi lōh bə bəŋ yu yii lɨŋŋ. 10 Nəni ə bəne kiŋaaŋkə yá tu wuh ə mi dɨŋ, bə́ lòh, bə́ tàa go ŋəbə. 11 Ə bəne kiŋaaŋkə bbəŋ bə́ kàalə yo lə ə faŋ Chu bə́ yá fu bwo hlə yee bə́ fīhi bəne kiŋaaŋkə. 12 Ye yiwaha yáa yi ŋāŋ lə yi gə̀ŋ fwi fwi, duŋ ə fɨhŋ hlə fə ə kinleki ki bəne kiŋaaŋkə də. 13 Kwaalə, mbɛɛ nnu i yá kwaa tɔŋ gəŋ bwii həŋgbɔŋ ə wu nnu i yá fukwoo. 14 Bə́ kənə dəŋ bəndontə hlɨŋ nwaa ni ki muŋkɨŋ mu Chu gəŋ bwii ə mbiŋ mənhliŋ mə, ə bitɨŋ binhliŋ wo, nəni ə mbiŋ mənhliŋ nu hlə ka.

Keehnə ki bwɔɔ ŋgə ŋkuntaŋ

(Maak 13:14-23; Lukaa 21:20-24)

15 Nəni bwɔɔ nnu bə ŋəŋ fieŋ fi nchiŋ kindɔ ffɨŋ duŋ ə fi bihi dɔhɔ kkɨŋ mbɛɛ hlɨŋ Chu Dania mà yɔɔ fie ki fi, lə fie fi lēmi ə chəŋ ntofi mə, (mbɛɛ nnu i chèe kiŋwaati kɨhŋ, i wo fɨhŋ kinwaa), 16 ə bəne bbəŋ bə́ dùŋ bie ə Judia lɔ biŋ ə bikɔni go. 17 Mbɛɛ nnu i dùŋ ə kinchu ki chəŋ bəŋ, i kə baa lə hlili lɛɛ chəŋ lə i jə fieŋ ffɨŋ fi dùŋ mu kə. 18 Nnu i dùŋ ə sho, kə kwələ bəŋgəŋ jə kindu ki fuunə kə. 19 Ŋgə ŋkuntaŋ yá yi duŋ ə joo ŋie mə bə bəkwɛɛ bbəŋ bə́ dùŋ bə té, maa bbəŋ bə́ mwàhiŋ bwɔni. 20 Yee bə chêe Chu lə dɨŋ lɨhŋ lili kə duŋ nə ə bwɔɔ kifwuŋ mə kə, ləkə ə bunte mə kə, 21 yulahalə ŋgə ŋkuntaŋ yá yi duŋ ə bwɔɔ yo bəŋ, dɨŋ mbini yo ŋgə kə hlaa lə duŋ chɔɔ jə ye mbiŋ mà chɔɔ bwo bwii daŋ kə, dɨŋ mbini yo ŋgə yá baalə duŋ dəŋ kə. 22 Ə Chu màa nakə kwohi ə joo ŋə ŋgə ŋie go, ə mbɛɛ ŋkee mwi yá nakə bwoo fukwoo kə. Kwaalə Chu kwoha joo ŋie yu bəne biih bbəŋ i shaala. 23 Ə yá chu bwo duŋ ə bwɔɔ yo bəŋ ə mbɛɛ yɔɔ bə bəŋ lə, ‘Bə kee ŋəŋ, Nchuu Fwoo nnu Chu mà kaachi yo yo fəŋ!’ Ləkə lə, ‘I yo filii!’ Bə kə bemi kə. 24 Yee bə kə̂lə lə bəne yáa bə́ bwō, bə yo kaalənə lə bə́ dùŋ bənchuu fwoo bbəŋ Chu mà kaachi, bədi yɔ̀ɔ lə bə́ dùŋ bəne bə hlɨŋ Chu, hlə yee bə́ fə̄ bieŋ bintaabə bbɨŋ bi nyìi muŋgeni mubə, fə dəŋ bieŋ bi ŋɨŋ gəə bənfihi bəne lə bə́ nyɔkɔ je, fihi dəŋ maa bəne bbəŋ Chu shaala, ə je lə duŋ. 25 Bə wələ wo, mmà n'yɔɔla bieŋ bɨhŋ bə bəŋ bi kaani kə duŋ nə kə. 26 Nəni, ə bəne lə yɔɔ bə bəŋ lə, ‘Bə kee ŋəŋ, Nchuu Fwoo nnu Chu mà kaachi yo yo ə nji,’ bə kə gəŋnə mə kə. Ləkə lə, ‘Bə kee ŋəŋ, i yo ə chəŋ nni nte mə,’ bə kə bemi bə bə́ kə. 27 Yee bə kə̂lə lə ye jaŋ lala lə ə buh wɛɛ wwuŋ kitaŋ bɛ̀ɛ, gəŋ bwii ye kitaŋ gəŋ chɨ̀ŋ, duŋ dəŋ yəəŋ ye mbwo Ŋwa Mbɛɛ yá duŋ li. 28 ‘Maa fəhəŋ nnu kiŋwuuni dùŋ, ə həmə nnu bəŋgulu bùmə.’

Ki mbwo Jisho

(Maak 13:24-27; Lukaa 21:25-28)

29 Cha mi bwɔɔ nnu ŋgə ŋkuntaŋ nu lə bwo kah, ə kitaŋ nyɨŋ, kpii baa tə kə, ə muntoola ja gbe, ə bieŋ bi buh kiɛkiɛ bbɨŋ bi kə̀nə múŋga yáa bi nə̄nə. 30 Ə kinyii ki Ŋwa Mbɛɛ hlə nyiee ə buh. Ə bitɨŋ binhliŋ bi yaŋ mbiŋ nu mə hlə chɔɔ bə njuuli kpe. Bəne yá ŋəŋ ye Ŋwa Mbɛɛ bwō ə joonə mə ə buh bə muŋga maa bə kiŋkuntaŋ kiih. 31 Bwɔɔ nnu kiŋgbu kiŋkuntaŋ yá de ə buh, ə i hlə faŋ bənchinda biih lə bə́ gəŋ ə bənchi bə mbiŋ bə bənua go maa buh, buhuŋ bəne biih bbəŋ i mà shaala.

(Maak 13:28-31; Lukaa 21:29-33)

32 Bə laanə bufe ə findəŋ go. Nyáŋ yé hlee, lə bibiaa bie chɔɔla bənjɛki mu go, bə kələ lə kibweenə chɔɔla bəŋgaanə. 33 Ə lə dəŋ yəəŋ ye bə yá ŋəŋ bwɔɔ nnu bieŋ bɨhŋ binhliŋ duŋ, ə bə hlə kələ lə bwɔɔ yo yo baha baha ə fwih. 34 N'yɔ̄ɔ bəŋ kichɛɛŋ lə ŋkaani bəne bə fidiɛɛ bəhŋ yá kaah bieŋ bɨhŋ binhliŋ kaani kə duŋ nə kə. 35 Buuli bə shishɔ yá yi kah, kwaalə die njəŋ yá kaah kə.

Mbɛɛ hləŋ həmə nnu i kə̀lə butuu bbuŋ Jisho yá bwo

(Maak 13:32-37; Lukaa 17:26-30, 34-36)

36 Mbɛɛ hləŋ həmə nnu i kə̀lə butuu bwe ləkə bwɔɔ yo. Maa bənchinda bbəŋ bə́ dùŋ buh ləkə Ŋwa Nchu kə̀lə lə dəŋ kə. Ə kə̀lə kwaa Tili Chu wuu mboŋ. 37 Dəŋ yəəŋ ye fi mà duŋ lə ə bwɔɔ Nuah bəŋ ə dəŋ lə yəəŋ ye fi yá duŋ li ə bwɔɔ nnu Ŋwa Mbɛɛ yá bwo chuu. 38 Bwɔɔ nnu ŋgwiŋ mà kaani kə yii lə ə mbiŋ nte kə, bəne mà duŋ fibə bə́ dì bə́ ŋwì, bəkwɛɛ bə bənəə baanə biah, bəne nə̀ bwɔni bə bənəə bə́ baanə biah bə bə́, gəŋ bwii butuu bbuŋ Nuah mà lɛɛ ə kikpɔŋkɔ mə, 39 bəne bie nakə kələ fieŋ ffɨŋ fi lə duŋ kə, gəŋ bwii bwɔɔ nnu ŋgwiŋ mà yii ə mbiŋ nte, tu bə́ bənhliŋ gəŋ bə bə́. Ə dəŋ yəəŋ ye fi yá duŋ li ə bwɔɔ nnu Ŋwa Mbɛɛ yáa i bwō yo bəŋ. 40 Bənəə bəfwe yáa bə́ dūŋ sho, ə bə́ yá jə mwi ə mwi she. 41 Bəkwɛɛ bəfwe yáa bə́ gɔ̄ buniɛŋ həniɛɛ ə bə́ yá jə mwi ə mwi she. 42 Nəni, yee bə kê yulahalə bə kə kələ butuu bbuŋ Baba yá bwo kə. 43 Yee bə kə̂lə lə ə che chəŋ lə kələ bwɔɔ nnu ŋwuŋ buyi lə bwo ə butuu, ə yee i kē, ə i nakə tookwaŋ lə bə́ bwo kpee chəŋ yi kə. 44 Fi hlə yee fi dūŋ lə, bə dùŋ dəŋ lə yee bə kē yulahalə Ŋwa Mbɛɛ yá bwo ə bwɔɔ nnu bə dùŋ kə kələ bəŋ kə.

Keehnə ki mbɛɛ nimi kichɛɛŋ maa nnu i mà duŋ kichɛɛŋ hləŋ

(Lukaa 12:41-48)

45 Mbɛɛ nimi nnu i dùŋ bə kichɛɛŋ maa bufe duŋ nwɛhɛŋ lə? Nhle lə ə mbini yo nnu che kwoo kiih mà chi wu lə yee i fwōŋ chəŋ yi, lə bwɔɔ nnu bwɔɔ wunə, ə i nə biləə bə bəne bə nimi bəbə lə? 46 Kintɨŋ kiŋkuntaŋ dùŋ ki mbɛɛ nimi bwɔɔ nnu che kwoo wi lə bwo ŋəŋ wu i nɨŋna nimi liih yəəŋ ye i mà bemi lə bənɨŋ. 47 N'yɔ̄ɔ bəŋ kichɛɛŋ lə che kwoo wi lə bihiŋ wu ə yee i fwōŋ bieŋ biih kiɛkiɛ. 48 Kwaalə ə mbɛɛ nimi yo lə ja kənə fwɔ wiwaha, yɔɔ bə gbo wiih lə, ‘Che kwoo ŋgwəŋ lə keelə bəmbwo kə’, 49 hlə chɔɔ bəŋkwuŋ bəne bə nimi bədi bbəŋ bəə bə́ nɨ̄ŋ bie, i dì i ŋwì bə bəne bbəŋ bə́ kpà kiŋwi, 50 kəə che kwoo wi lə ja buhla wu butuu budi bbuŋ i yá duŋ kə kələ bwɔɔ yo kə. 51 Bwɔɔ nnu i yá buhla nəni, ə i nə ŋwuŋ nimi wi yo ŋgə, faŋ wu ə i gəŋ yee i dūŋ bə bəne bbəŋ bə́ yɔ̀ɔ chili, bə́ fə̀ chili, ə duŋ dɔhɔ kkɨŋ bəne dè bə́ dì bigəə.”