Matio 23

Jisho tɔ kinuu ki bəne bbəŋ bə́ kèeh bəŋkɨnə maa Bəfalashii

(Maak 12:38-39; Lukaa 11:43, 46; 20:45-46)

Jisho hlə ja yɔɔ bə bimɔ bi bəne maa bə bəne biih bə kintu ləə, 2 “Bəne bbəŋ bə́ kèeh bəŋkɨnə maa bə Bəfalashii bə́ dùŋ bəne bbəŋ bə́ jəə kiŋkaa ki Mushe. 3 Fi hlə yee fi dūŋ lə, yee bə wô fieŋ finhliŋ ffɨŋ bə́ yɔ̀ɔ bə bəŋ, bə fə̀. Kwaalə, bə kə fəə fieŋ ffɨŋ bə́ fə̀ fie kə, yulahalə bə́ yɔ̀ɔ chili, bə́ fə̀ chili. 4 Bə́ kwàa bəntiɛ bəndili bbəŋ bə́ kàh muŋga mu bəne, bə́ yìilə bəne mu, bə́ kibɛɛ duŋ ə bə́ nakə tuu lə mu bə fiŋkwaani chɨnə bə́ kə. 5 Bieŋ bbɨŋ bə́ fə̀ binhliŋ duŋ kwaa bənfə lə bəne ŋəŋ ə bə́ go. Muŋkɔlɔ mubə mu Kiŋwaati ki Chu duŋ ba muŋkuntaŋ.^ª Munhlahla mu bindu bibə duŋ ba mundiɛɛ. 6 Bwɔɔ nnu bə́ gəŋ ə chɔnɔ mə, bə́ lèki bənshii ə duŋ ə bidɔhɔ bbɨŋ bəne lə yee bə́ bwɔ̄kwe bə bə́. Bwɔɔ nnu bə́ gəŋ ə chə́ŋ yí cheenə Chu mə, bə́ lèki kwaa bənshii ə duŋ ə biŋkaa bi fwi bəŋ. 7 Bə́ lèki dəŋ bənjɨɨŋkə ə shibəŋ bə́ yɔ̀ɔ bə bəne, baa leki lə bəne yee bə́ chēe bə́ lə Bəlabi. 8 Kwaalə, mbɛɛ kə bemi lə bəne chee wu lə Labi kə, yulahalə bə kənə Mbɛɛ Keehnə mwi kwaa, bəŋ bənhliŋ duŋ bwɔni bə kpɛ. 9 Bə kə yee bə chêe mbɛɛ ju yaŋ mbiŋ nte lə i dùŋ chwa weŋ kə, yulahalə bə kə̀nə Chwa weŋ mwi nnu i dùŋ buh. 10 Mbɛɛ kə bemi lə yee bə́ chêe wu lə che kwoo kə, yulahalə che kwoo weŋ dùŋ kwaa mwi nnu i dùŋ Kleto. 11 Mbɛɛ ŋkuntaŋ ə bəŋ mə kənə bənduŋ mbɛɛ nnu i nɨ̀ŋ ə bəŋ mə. 12 Maa nyəhə nnu i kòhi gbo wiih, duŋ ə Chu jə wu kwe, maa nyəhə nnu i bwɔ̀kwe bə bəne, duŋ ə Chu bihiŋ wu.

Jisho hla bəne bbəŋ bə́ kèeh bəŋkɨnə maa Bəfalashii

(Maak 12:40; Lukaa 11:39-42, 44, 52; 20:47)

13 Ŋgə ŋkuntaŋ dùŋ weŋ, bəŋ bəne bbəŋ bə́ kèeh bəŋkɨnə maa bəŋ Bəfalashii. Bə dùŋ bəne bbəŋ bə yɔ̀ɔ chili, bə fə̀ chili! Bə lèmi bəne fwi bə bàŋ je nni i lɛ̀ɛ ə muŋkɨŋ mu buh mə. Bə lèki lə bənlɛɛ mə kə, baa yee bə bāŋ je bə bəne bbəŋ bə́ lèki bənlɛɛ. [ 14 Ŋgə ŋkuntaŋ dùŋ weŋ, bəŋ bəne bbəŋ bə́ kèeh bəŋkɨnə maa bəŋ Bəfalashii. Bə fìhi bəkwɛɛ bə bəŋkwu, bə chèe Chu ndiɛɛ bənyii gbo. Bə kələ lə weŋ yo ŋgə yá yi bee ə mbee mə.]^ª 15 Ŋgə ŋkuntaŋ dùŋ weŋ, bəŋ bəne bbəŋ bə kèeh bəŋkɨnə maa bəŋ Bəfalashii. Bə duŋ bəne bbəŋ bə yɔ̀ɔ chili, bə fə̀ chili! Bə ja bə jaa taa mbiŋ nu kiɛkiɛ baa le nɔ lə bə kìɛɛ mbɛɛ mwi nnu mə fiimə chu mbɛɛ weŋ kimbemi. Bwɔɔ nnu i fiimə chu mbɛɛ weŋ kimbemi, ə bə fə ə ŋkwo wi kaanə fwɔ, ə i duŋ mbɛɛ bwii wuŋkuntaŋ dəŋ ye bəŋ lə.

16 Ŋgə ŋkuntaŋ dùŋ weŋ. Bə dùŋ bəmbandii bə yɔ̀ɔ lə bə́ nyìi je bə bəne! Bə dùŋ bəne bbəŋ bə́ yɔ̀ɔ lə, ‘Ə mbɛɛ lə yɔɔ fieŋ, kaŋ yii li chəŋ ntofi, kəə i duŋ nə fieŋ kə. Kwaalə, ə mbɛɛ lə yɔɔ fieŋ kaŋ ə duŋ yii li chwaa ki ge ki kpo kkɨŋ ki dùŋ kie ə chəŋ ntofi mə, kəə i kənə bənfə ye i yɔɔlə kaŋ.’ 17 Bəmbandii bəhŋ! Bə duŋ bənfili! Fieŋ fiŋkuntaŋ ffɨŋ fi kàh fidi duŋ laha lə? Ə ko chwaa ki ge ki kpo, lii chəŋ ntofi nni i fə̀ chwaa ki kpo kie hlə yee ki dūŋ fieŋ fi Chu lə? 18 Bə yɔ̀ɔ dəŋ lə, ‘Ə mbɛɛ lə yɔɔ fieŋ kaŋ yii li taŋ li nnə, kəə ə fieŋ kə. Kwaalə ə mbɛɛ yɔɔ fieŋ kaŋ ə duŋ yii li fieŋ ffɨŋ mbɛɛ nə̀ ntofi mu, kəə i kənə bənfə ba ye i yɔɔlə kaŋ.’ 19 Bəmbandii bəhŋ! Fieŋ ffɨŋ fi kò kah fidi duŋ laha lə? Ə ko nnə, lii taŋ li nnə llɨŋ li fə̀ nnə le hlə duŋ fieŋ ffɨŋ fi dùŋ fi Chu lə? 20 Fieŋ ffɨŋ fi dùŋ, duŋ lə ə mbɛɛ lə kaŋ yii li taŋ li nnə, kəə i kàŋ nəni i kàŋ dəŋ bieŋ binhliŋ bbɨŋ bi dùŋ mu. 21 Ə mbɛɛ kaŋ yii li chəŋ ntofi, kəə i kàŋ nəni i kàŋ maa Chu nnu i dùŋ yo mu. 22 Ə mbɛɛ kaŋ kitɨŋ ki buh, kəə i kàŋ ə duŋ kabala Chu maa wu Chu nnu i shìi yo ə wu bəŋ.

23 Ŋgə ŋkuntaŋ dùŋ weŋ, bəŋ bəne bbəŋ bə kèeh bəŋkɨnə maa bəŋ Bəfalashii. Bə dùŋ bəne bbəŋ bə yɔ̀ɔ chili, bə fə̀ chili! Bə bwò bə nə̀ wɛɛ mwe bə Chu ə wɛ́ɛ ŋə yuufi mə ŋə bieŋ chili chili bbɨŋ bə kwì bə yìi ə bichiŋ mə lə bi nwaa jə, kwaalə bə lɛ̀ɛ bə tə̀lə fieŋ findili ffɨŋ ŋkɨnə yɔ̀ɔ lə yee bə fə̄, fi duŋ lə yee bə fə̂ bieŋ bi kiyəyəŋ bə bəne, bə kwò hlɨŋ bə bəne, bə yìi tɔ́ŋ ə Chu mə. Bə mà kənə bənfə bieŋ bɨhŋ kiɛkiɛ kə tookwaŋ ə fidi go kə. 24 Bəmbandii bbəŋ bə́ nyìi je bə bəne! Bə shàŋ bə fwòo muŋkpiŋ ə mbihŋ mə, kwaalə bə me nyaŋ ŋkuntaŋ ə bulə!

25 Ŋgə ŋkuntaŋ dùŋ weŋ, bəŋ bəne bbəŋ bə kèeh bəŋkɨnə maa bəŋ Bəfalashii. Bə dùŋ bəne bbəŋ bə yɔ̀ɔ chili, bə fə̀ chili! Bə wìi bikwooh bə bikwa ə go kwaa, kwaalə bieŋ bbɨŋ bi yiila mənte duŋ bbɨŋ bə fàa ə nfaamə ə bəne kwáŋ maa bbɨŋ bə gè díi mu. 26 Bəmbandii bə Bəfalashii, bə hlaa wii bikwooh bə bikwa ə nte, fo bi lə yee bi chāa dəŋ yaŋ go.

27 Ŋgə ŋkuntaŋ dùŋ weŋ, bəŋ bəne bbəŋ bə kèeh bəŋkɨnə maa bəŋ Bəfalashii. Bə duŋ bəne bbəŋ bə yɔ̀ɔ chili, bə fə̀ chili! Bə duŋ ye jə́ŋ yyɨŋ bə́ bwɛɛla lɔɔ yí yí wùunə yí nùaa dí, kwaalə mənte yiila bə bikuu bi bəŋkpi maa bieŋ kiɛkiɛ mə. 28 Ə li dəŋ yəəŋ ye bə nyìee yaŋ dí lə bə dùŋ bəne bə kiyəyəŋ, kwaalə mənte yiila bə fihinə maa fwɔ wu waha.

(Lukaa 11:47-51)

29 Ŋgə ŋkuntaŋ dùŋ weŋ, bəŋ bəne bbəŋ bə kèeh bəŋkɨnə maa bəŋ Bəfalashii. Bə dùŋ bəne bbəŋ bə yɔ̀ɔ chili, bə fə̀ chili! Bə wɛɛ ə jə́ŋ yí bəne bə hlɨŋ Chu bəŋ, bwɛɛ dəŋ jə́ŋ yí bəne bbəŋ bə́ kə̀nə fwɔ wi kiyəyəŋ bwɛɛ yí kinwaa. 30 Bə fə̀ nəni bə yɔ̀ɔ lə, ‘Ə kkə màa duŋ ba ə bwɔɔ bəche tah biaa mə, ə kkə màa nakə lemi fiaa ə fieŋ ffɨŋ bə́ mà fə fɨhŋ mə lə bə́ jii bəne bə hlɨŋ Chu kə.’ 31 Bə yɔ̀ɔ nəni, bə yɔ̀ɔ ki bikuu bieeŋ, hlə yee bə́ fwɔ̄ŋ bə biwu lə bə́ duŋ ba bwɔni bə bəne bbəŋ bə́ mà jiila bəne bə hlɨŋ Chu. 32 Bə gəŋ kwaa fwi fwi, bə kaanə bə nimi llɨŋ bəche chwa bieeŋ mà chɔɔla le! 33 Yɔ́ yɨhŋ! Ŋkaani yɔ́ yɨhŋ! Bə hlè lə duŋ ə bə́ yá nakə yii lə bəŋ ə bwii wuŋkuntaŋ mə kə lə?

34 Ye fi duŋ lə nəni, nhlə n'yee nfāŋ bəne bə hlɨŋ Chu ə bəŋ mə maa bəne bə bufe bə bəne bbəŋ bə́ kèeh bəŋkɨnə. Bə yá yi jii bədi, bweeni bədi ə kiŋgwa go, hloo bədi ə chə́ŋ yeeŋ yí cheenə Chu mə, hlɔɔ wuh ə bədi dɨŋ ə bibalaki mə binhliŋ bbɨŋ bə́ gə̀ŋ ə bi mə. 35 Bə yáa bə fə̄ nəni fo ŋgɔŋ mə bəne bənhliŋ bbəŋ bə́ mà duŋ ntiiŋ ə mbiŋ nu mə bə bbəŋ bə́ mà jii duŋ ə bəŋ fí. Ŋgɔŋ məhŋ yá yi duŋ ə bəŋ fí chɔɔ jə ə Ɛbɛl nnu bə́ mà jii i kə kənə yiwaha, bwo bwii mə Hlakalia ŋwa Belekaya nnu bə́ mà jii ə chəŋ ntofi mə bə ə taŋ li nnə mə kintekinte. 36 N'yɔ̄ɔ bəŋ kichɛɛŋ lə, kwoo kiwaha ki bieŋ bɨhŋ binhliŋ yá yi kwo ŋkaani bəne bə fidiɛɛ bəhŋ.”

Jisho kwo hlɨŋ bə bəne bə Jelushalɛŋ

(Lukaa 13:34-35)

37 Ye Jisho yɔɔlə nəni, i hlə de gbo lə, “Hebee Jelushalɛŋ! Hebee Jelushalɛŋ! Wə nnu wə jìi yo bəne bə hlɨŋ Chu, baa yee wə tɨ̄ŋ bəne bə tə́ bbəŋ Chu faŋna bə wə! Ə chá miɛhɛŋ ba yyɨŋ mmɔ̀ŋ bəmbuhuŋ bwɔni bwo ye shi kwɛ buhuŋ lə bwɔni biih kəə ə bikulə biih mə, wə nɨ̀hŋ lə? 38 Kee ŋəŋ, Chu lə gbee tələ ba chəŋ wa, mə lə chu kichili. 39 N'yɔ̄ɔ bə wə lə duŋ ə wə baa ŋəŋ ə mi go kə, gəŋ bwii bwɔɔ nnu wə yá yɔɔ lə, ‘Chu lɛɛ kindunshiiŋ ə mbɛɛ nnu i yu bwō yo ə yii li Baba bəŋ.’”