Jisho keeh ye duŋ ə yee bə́ chēe Chu
11
Ə mà duŋ butuu budi, Jisho chēe Chu ə dɔhɔ kidi mə, ə chulə i cheela kaa, mbɛɛ kintu wi ju bwo yɔɔ bə wu lə, “Baba, laanə be ye duŋ ə yee kkə chēe, dəŋ yəəŋ ye Jɔɔŋ mà keeh'lə bəne biih bə kintu ye bə́ chèe Chu.”2 Jisho hlə yɔɔ bə bə́ lə, “Bwɔɔ nnu bə́ chèe Chu yee bə́ yɔ̂ɔ lə,
‘Tah ya,
fə yee bəne kôhi yii lo,
muŋkɨŋ mwo bwo.
3 Yee wə nə̂ be biləə joo ŋənhliŋ,
4 laamə nə yíwaha yaa,
ye kkə laamə lə yíwaha yyɨŋ bəne bədi fə̄ bə be.
Wə kə tookwaŋ lə kkə lɛɛ ə bimɔŋnə mə bbɨŋ bi kàh be kə.’”
5 Ye i yɔɔlə nəni, i hlə ma bə bə́ lə, “Bə jə lə mbɛɛ ju ə bəŋ mə noo gəŋ kɔɔ wulə ki dɔɔ wi ə butuu kintekinte yɔɔ lə, ‘Mbweŋ, bu ja kwaa wə fwɔɔ mi chée yí buniɛŋ shɔ. 6 Mbweŋ ju buhla mi gbɛŋ, ŋkə ŋkənə fieŋ ffɨŋ nlə nnə wu kə.’ 7 Jə lə dɔɔ wa nnu wə hə kɔɔ yo wulə kiih kaka chuu ŋkwo wi mu chəŋ lə, ‘Wə kə yee wə fɨ̂hɨŋ mi kə. Bee bwɔni bəŋŋ hə nɔŋna həkwe fwaŋ wulə. Nduŋ ə mbaa ja fa lə ŋkiɛɛ fieŋ nə wə kə.’” 8 Ye Jisho ma lə nəni, i baa yɔɔ lə, “N'yɔ̄ɔ bə bəŋ lə, ə mə lə nakə jaa fa nə buniɛŋ bbuŋ wə bii bwe yulahalə i duŋ dɔɔ wa, kəə mə lə ja ba fa nə fieŋ finhliŋ ffɨŋ wə kīɛɛ fie bwɔɔ nnu wə ba həmə wə kɔ̄ɔ. 9 Nhlə n'yee n'yɔ̄ɔ bə bəŋ lə, yee bə bîi, Chu lə nə bəŋ. Yee bə kîɛɛ, Chu lə fə ə bə ŋəŋ mu. Yee bə kɔ̂ɔ wulə, Chu lə wɛ bəŋ ki. 10 Yee bə kə̂lə lə mbɛɛ mənhliŋ nnu i bīi, mə bənə, mbɛɛ mənhliŋ nnu i kìɛɛ, mə ŋəŋ mu, nnu i kɔ̀ɔ wulə, ə bə́ wɛ wu ki.
11 Ə che ŋiaŋ nwɛhɛŋ ə bəŋ mə nnu ŋiaani lə de fiɔɔnə, ə i nə wu ə duŋ yɔ lə? 12 Lii ə ŋiaani lə de gebi, ə i nə wu ə duŋ kunama lə? 13 Ə bəŋ dəŋ lə duŋ bəne bəwaha, bə kə̀lə bənnə bieŋ binwaa bə bwɔni bieeŋ, kəə Chwa weŋ nnu i dùŋ yo buh, duŋ ə i nakə nəə dəŋ Fiana Wɛɛŋ bə bəne bbəŋ bə́ dè bə wu kahiŋ nəni lə?”
Jisho bəə Beeshebu
14 Jisho màa i fwōo fiŋkwini ə mbɛɛ ju go ə duŋ kinfili. Lə fiŋkwini fie fu, mbɛɛ yo hlə chɔɔ bə n'yɔ̄ɔ jə. Kimbumə ki bəne ŋəŋ gəə ŋɨŋ bə́. 15 Kwaalə bəne bədi yee bə́ yɔ̄ɔ lə, “I fwòo muŋkwini nəni ə duŋ bə muŋgeni mu Beeshebu ŋkɨŋ muŋkwini.”
16 Bəne bədi yee bə kīɛɛ jé yí kwonə wu bə́ yɔ̄ɔ lə i fə fieŋ ffɨŋ fi nyìi muŋgeni mmuŋ mu bwò ə buh. 17 Jisho kələ munhlenə mubə hlə yɔɔ lə, “Kitɨŋ kkɨŋ ki gà ju bə gbo wi ki, ki jù bə gbo wi ki, ə ki gbe. Kichəŋ kkɨŋ ki gà bə gbo wi ki, kəə ki hlaama. 18 Nəni ə Hlaata lə ga bə kintu kiih ə muŋkɨŋ mwii nakə lemi dəŋ kə. N'yɔ̄ɔ nəni yulahalə bə yɔ̀ɔ lə nfwòo muŋkwini ə duŋ bə muŋgeni mu Beeshebu. 19 Ə fi lə duŋ lə nfwòo muŋkwini ə duŋ bə muŋgeni mu Beeshebu, kəə bieeŋ bie bwɔni fwòo ə duŋ bə mu nyəhə lə? Fieŋ ffɨŋ bwɔni bieeŋ bie fə̀ nyìi lə bə́ gbee nhlaa. 20 Kwaalə ə fi duŋ lə nfwòo muŋkwini mwe ə duŋ bə bweenə ki Chu, kəə muŋkɨŋ mu Chu bwoo ə bəŋ bəŋ.
21 Bə kələ lə ə ŋgambɛɛ lə bwɛɛ bieŋ biih bi ntɨmə shii yee i fwōŋ kwili liih, ə mbɛɛ nɛhiŋ fieŋ fiih kə. 22 Kwaalə, ə ŋgambɛɛ ju nnu i kàh wu lə no bwo kah wu, ə i hlə faa bieŋ biih bi ntɨmə bbɨŋ i maa i kə̄ kwoo kiih bəŋ, hlə baa bɛɛni jə bieŋ biih kiɛkiɛ gəŋ bə bi gəŋ ga bə bədɔɔ biih.
23 Ə mbɛɛ duŋ kə duŋ nə wɛɛ wuŋŋ, kəə wu dəŋ chɔŋna kinjɔŋ ə mi dɨŋ. Ə mbɛɛ nakə yee i chɨ̄nə mi bəmbuhuŋ, kəə i hlàhi bu hlahinə.
24 Bwɔɔ nnu fiana yili bwo ə mə fu ə mbɛɛ mə, i gəŋ ə nji, i kìɛɛ dɔhɔ kkɨŋ mə lə duŋ. Kwaalə bwɔɔ nnu mə kìɛɛ hləŋ, ə i hlə yɔɔ bə gbo wiih lə, ‘Nlə nchu dɨŋ ə chəŋ nni nhə nfu ye mə.’ 25 Bwɔɔ nnu i fiimə bwo ŋəŋ bə́ hə nyaala bwɛɛ chi chəŋ ye wɛɛŋ, 26 nəni ə i hlə fiimə chu dɨŋ, gəŋ bwo bə bəfiana bədi fumanyaaŋ kah wu, bə́ hlə bwo lɛɛ yee bə́ dūŋ mu. Bieŋ hlə kaanə fwɔ bee ə mbɛɛ yo go kah ye bi mà hlaalə duŋ.”
Kintɨŋ kiŋkuntaŋ dùŋ ki bə́ nyəhə lə?
27 Ye Jisho màa i kaani lə i yɔ̄ɔ bieŋ bɨhŋ nəni, kpɛ ju ja ə kimɔ ki bəne kie mə kintekinte yɔɔ lə, “Kintɨŋ kiŋkuntaŋ dùŋ ki kpɛ nnu i mà bwee yo wə, bwo mwahiŋ.”
28 Jisho chuu ŋkwo wi lə, “Kintɨŋ kiŋkuntaŋ dùŋ ə duŋ ki bəne bbəŋ bə́ wò die Chu, bə́ fə̀ ye i kīɛɛ lə.”
Bəne yee bə́ kiɛɛ bəŋəŋ kindɔchiŋ ki bieŋ bbɨŋ bi nyìi dɔhɔ kkɨŋ muŋgeni mu Jisho bwò
29 Ye bintu bi bəne màa bi būmə lə bi bwō baha ə wu go, i ja yɔɔ lə, “Ŋkaani fidiɛɛ nu duŋ waha. I kiɛɛ bəŋəŋ kindɔchiŋ ki bieŋ bbɨŋ bi nyìi muŋga muŋŋ, bə́ baalə nyii bə́ ki kə. Kwaalə, kindɔchiŋ ki bieŋ lə kaah bi mbɛɛ hlɨŋ Chu Jɔnah kə. 30 Ye Jɔnah mà fə lə bieŋ bi kindɔchiŋ bɨhŋ bə bəne bə Ninibɛ, ə lə dəŋ yəəŋ ye Ŋwa Mbɛɛ yá fə li dəŋ bieŋ bi kindɔchiŋ bə ŋkaani fidiɛɛ nu. 31 Ə yá bwo duŋ butuu bu nhlaah bwi həŋgbɔŋ, Yaah nnu i màa i hlāah yo kitɨŋ ki Shɛba yá lemi dəŋ butuu bu nhlaah bu həŋgbɔŋ bə ŋkaani bəne bə fidiɛɛ nu fə ə bə́ yii wu ə ŋgə mə, yulahalə i mà noo ə kitɨŋ kiih mə ə ki həŋgbɔŋ ki mbiŋ mə bwo wo bufe bu Ŋkɨŋ Sholomuŋ. Kwaalə bə wələ wo, mbɛɛ ju yo fəŋ bə fieŋ fiŋkuntaŋ fidi ffɨŋ fi kò kah fi Sholomuŋ fie. 32 Bəne bə Ninibɛ yá yi chaa yili ə ŋkaani fidiɛɛ nu mə bumbini bwe lə bə fəə yiwaha gbaaŋ, yulahalə bə mà woo fieŋ ffɨŋ Jɔnah màa i dōntə, bə nakə fii lə tɔ́ŋ ŋieeŋ. Bə wələ wo, mbɛɛ ju yo fəŋ bə fieŋ ffɨŋ fi kò kah fi Jɔnah fie.
Kinchaa ki gbo
33 Mbɛɛ bəələ mɔɔ lə i yii chi ki hətahi kə. Duŋ dəŋ ə i nakə jəə kijee kəə bəŋ kə. Ə mə lə bəə, i chi ə duŋ ə fieŋ ffɨŋ bə́ tɨ̀ŋ chi mɔɔ bəŋ, bwɔɔ nnu bəne lɛɛ mu chəŋ bə́ ŋəŋ ə kinchaa go. 34 Díi ŋo duŋ kinchaa ki mbili wa. Ə díi ŋo lə duŋ kɨŋkɨŋkɨŋ, ə gbo wo winhliŋ yii bə kinchaa. Kwaalə, ə díi ŋo nakə duŋ nə kɨŋkɨŋkɨŋ, ə gbo wo winhliŋ duŋ ə jɨbə mə. 35 Fi duŋ lə, mbɛɛ yee i kêe ləə mə lə yee i jāa ə kinchaa mə lii ə jɨbə mə lə. 36 Ə gbo wo winhliŋ lə yii bə kinchaa wɛɛ wudi kə duŋ nə ə jɨbə mə, ə bieŋ binhliŋ hlə yee bi chāa ye kinchaa lə ə wə go.”
Jisho hla Bəfalashii bə bəne bə keehnə bəŋkɨnə
37 Jisho kaŋnə yo yi, ŋwuŋ Bəfalashii ju yɔɔ bə wu lə i bwo bəə wu gəŋ di biləə. Jisho hlə gəŋ, lɛɛ, shii yee bə́ dī, 38 ə duŋ i kaani kə hlaa lə wii kwáŋ kə.ª Lə ŋwuŋ Bəfalashii yo chiini fi kah wu. 39 Baba kələ fieŋ ffɨŋ i hlē fie hlə yɔɔ bə wu lə, “Bəŋ Bəfalashii wìi bikwooh bə bikwa ə go kwaa, kwaalə bieŋ biwaha bə díi ŋəŋge chiŋna ə tɔ́ŋ ŋieeŋ go. 40 Bənfili bəhŋ! Chu nnu i mà fə yo mbili yo, ə kə duŋ nə dəŋ wu nnu i mà fə mənte lə? 41 Fieŋ ffɨŋ bə duŋ bənfə duŋ lə, yee bə nə̂ bieŋ bbɨŋ bə kə̀nə ə bieŋ bie mə bə bəne bənjɨnənə, ə bieŋ binhliŋ hlə yee bi chāa bə bəŋ.
42 Ŋgə ŋkuntaŋ dùŋ weŋ Bəfalashii. Bə bwò bə nə̀ wɛɛ mwe bə Chu ə wɛ́ɛ ŋə yuufi mə ŋə bichiŋ bbɨŋ bə́ kwì maa bieŋ dəŋ bbɨŋ bə kwì bə yìi ə bichiŋ mə lə bi nwaa jə, kwaalə bə kaka yee bə tūkwaŋ bənfə bieŋ bi kiyəyəŋ bə bəne maa bənleki Chu. Bə mà duŋ lə yee bə́ fə̄ bieŋ bie kiɛkiɛ kə tookwaŋ ə fidi go kə.
43 Ŋgə ŋkuntaŋ dùŋ weŋ Bəfalashii. Bə lèki bənshii ə biŋkaa bi fwi bəŋ ə chə́ŋ yí cheenə Chu mə, bə lèki dəŋ lə yee bə́ chēe bəŋ ə bidɔhɔ bi shi mə bə kiŋkohi. 44 Ŋgə ŋkuntaŋ dùŋ weŋ, yulahalə bə duŋ ye jə́ŋ yyɨŋ yí dūŋ kə nyiee lə kə, bəne jàa ə yí bəŋ kə kələ kə.”
45 Ye Jisho mà yɔɔlə nəni, mbɛɛ ju nnu i mà kələ ba bəŋkɨnə bə Chu yɔɔ bə wu lə, “Mbɛɛ Keehnə, wə kələ lə bieŋ bbɨŋ wə kēeh bie tuula ə be go dəŋ lə.”
46 Jisho chuu lə, “Ŋgə ŋkuntaŋ duŋ dəŋ weŋ bəŋ bəne bbəŋ bə kə̀lə bie ba bəŋkɨnə bə Chu. Bə tòo bəne bəntiɛ bəndili bbəŋ duŋ ə bə nakə tuu lə mu bə fiŋkwaani fieeŋ bənchɨnə bə́ mu kə. 47 Ŋgə ŋkuntaŋ dùŋ weŋ. Bə wɛ̀ɛ jə́ŋ yí bəne bə hlɨŋ Chu bbəŋ bəche chwa bieeŋ mà jiila. 48 Nəni fɨhŋ nyīi lə bə bie bə chēe ba too wi bəche chwa bieeŋ. Bə́ mà jiila bəne bə hlɨŋ Chu, bə hlə shii yee bə bwɛ̄ɛ bə wɛ̀ɛ ə jə́ŋ yibə bəŋ. 49 Ə fieŋ ffɨŋ fi mà fə Chu bə bufe bwii hlə yɔɔ lə, ‘Nlə nfaŋ bəne bə hlɨŋ bəŋŋ bə bəne bə hlɨŋ bəbə, bə́ lə jii bədi baa hlɔɔ wuh ə bədi dɨŋ.’ 50 Nəni, Chu yá yi bii bə ŋkaani fidiɛɛ nu ŋgɔŋ mə bəne bə hlɨŋ biih bbəŋ bə́ mà jii bie gbe jə ye mbiŋ nu mà chɔɔ. 51 I yá yi bii gbe jə ə ŋgɔŋ mə Ɛbɛl go gəŋ bwii mə Hlakalia go nnu bə́ mà jii ə taŋ li kinnə bəŋ ə chəŋ ntofi mə kintekinte. N'yɔ̄ɔ bəŋ kichɛɛŋ lə Chu yá yi bii gbe jə ə ŋkaani fidiɛɛ nu bəŋ ki kpe bəne bənhliŋ ni.
52 Ŋgə ŋkuntaŋ dùŋ weŋ bəŋ bəne bbəŋ bə kə̀lə ba bəŋkɨnə bə Chu kinwaakə. Bə nəla kiwɛnə kkɨŋ duŋ ə mbɛɛ lɛɛ bəŋkələ fieŋ fi kiyəyəŋ. Bə nɨhŋna bənlɛɛ, baa yee bə bāŋ je bə bəne bbəŋ bə́ kìɛɛ lə bə́ lɛɛ lə bə́ kə lɛɛ lə kə.”