Matio 6

Keehnə ki nnə

“Yee bə jə̂ bwɔɔ lə bwɔɔ nnu bə fə̀ bieŋ binwaa, bə kə yee bə fə̂ ə bəne fwi lə yee bə́ ŋə̂ŋ kə. Ə yee bə fə̂ nəni, ə Chwa weŋ nnu i dùŋ yo buh nakə koŋ nə bəŋ kə. 2 Nəni, bwɔɔ nnu wə nə fieŋ bə mbɛɛ nnu i jɨ̀nə, wə kə yee wə tɔ̂ŋ kiŋgbu ye bəne bbəŋ bə́ nyìi bie gbo fə̀lə ə chə́ŋ yí cheenə Chu mə maa ə jé mə, fo bəne lə yee bə́ kōhi bə́. N'yɔ̄ɔ bəŋ kichɛɛŋ lə bə́ bəna kaa bikoonə bibə. 3 Kwaalə, bwɔɔ nnu wə nə̀ fieŋ bə mbɛɛ nnu i jɨ̀nə, wə kə fəə lə kwaŋ wo wi məə kələ fieŋ ffɨŋ diee ko fə̀ kə, 4 fo nnə lo lə yee li dùŋ ə nələ mə, ə Chwa wa nnu i bà yo bəŋəŋ bieŋ bbɨŋ bi dùŋ ə nələ mə lə koŋ wə.

Keehnə ki cheenə Chu

(Lukaa 11:2-4)

5 Bwɔɔ nnu bə chèe Chu, bə kə yee bə fə̂ ye bəne bbəŋ bə́ nyìi bie gbo ba lə bənfə kə. Bə́ lèki bənlemi ə chə́ŋ yí cheenə Chu mə, maa ye jé taa bə́ chèe Chu, fo bəne lə yee bə́ ŋə̄ŋ ə bə́ go. N'yɔ̄ɔ bəŋ kichɛɛŋ lə bə́ bəna kaa bikoonə bibə. 6 Kwaalə bwɔɔ nnu wə kìɛɛ lə wə chee Chu, wə lɛɛ gəŋ ə chəŋ wa nni nte mə, kəə wulə yee wə chêe bə Chwa nnu i dùŋ yo ə nələ mə. Chwa nnu i bà yo bəŋəŋ bieŋ bbɨŋ wə fə̀ ə nələ mə hlə koŋ wə. 7 Bwɔɔ nnu bə chèe Chu, bə kə yee bə yɔ̂ɔndu ye bəne bbəŋ bə́ jɨ̀mə bie Chu fə̀ lə kə. Bə́ fə̀ nəni bə́ hlè lə bə́ lə wo cheenə kibə yu biyɔɔndu bibə kiŋaaŋkə. 8 Bə kə yee bə dûŋ ye bə́ kə. Yee bə kə̂lə lə bənchu bii weŋ duŋ Chwa weŋ hə kəla fieŋ ffɨŋ bə kìɛɛ fie. 9 Ə nəni nnu duŋ ə yee bə chēe Chu:

‘Tah ya nnu i dùŋ buh,

fə yee bəne kôhi yii lo,

10 muŋkɨŋ mwo bwo,

fə fieŋ ffɨŋ wə kìɛɛ, yee fi dûŋ yaŋ kwe dəŋ yəəŋ ye fi dùŋ lə ə buh.

11 Nə be biləə bi daŋ.

12 Laamə nə yíwaha yaa,

ye kkə làamə lə nə yíwaha yyɨŋ bəne bədi fə̀ bə be.

13 Wə kə tookwaŋ lə kkə lɛɛ ə bimɔŋnə mə kə.

Fwoo be ə mbɛɛ yiwaha yo kwáŋ.’^ª [Muŋkɨŋ duŋ mwo, muŋga dùŋ mwo, kiŋkuntaŋ dùŋ ko bwɔɔ mənhliŋ kə kaa. Yee fi Dûŋ lə.]^ª

14 Yee bə kə̂lə lə, ə yee bə lāamə nə yíwaha yyɨŋ bəne bədi fə̀ bə bəŋ, ə Chwa weŋ nnu i dùŋ yo buh yee i lāamə nə dəŋ yeeŋ. 15 Kwaalə, ə bə nakə yee bə lāamə nə yíwaha yyɨŋ bəne bədi fə̀ bə bəŋ, ə Chwa weŋ nakə yee i lāamə nə dəŋ yíwaha yeeŋ kə.

Keehnə ki shinə biləə

16 Bwɔɔ nnu bə shi biləə, bə kə yee bə nyîee juu juu ye bəne bbəŋ bə́ nyìi bie gbo bà lə bənfə kə. Bə́ bà bəŋgaanə mənhlɨŋ məbə ə bwɔɔ yo bəŋ, fo bəne lə yee bə́ ŋə̄ŋ lə bie bə́ shī biləə. N'yɔ̄ɔ bəŋ kichɛɛŋ lə bə́ bəna kaa bikoonə bibə. 17 Kwaalə, bwɔɔ nnu wə shì biləə, wə wii bushi bwo, lɔɔ kwoo ko, 18 fo ə lə nakə duŋ nə bəne bbəŋ bə́ lə yee bə́ ŋə̄ŋ lə wə yu shī biləə kə, ə yee ə ŋə̄ŋ kwaa ə duŋ Chwa wa nnu i dùŋ yo ə nələ mə. Ə Chwa nnu i bà yo bəŋəŋ bieŋ bbɨŋ bi dùŋ ə nələ mə hlə koŋ wə.

Keehnə ki mbwu

(Lukaa 12:33-34)

19 Bə kə kili mbwu weŋ yaŋ kwe dɔhɔ kkɨŋ duŋ ə jóoni muku wu kə, nnu duŋ ə i yuu kə, nnu duŋ ə bəbuyi kpee lɛɛ yi kə. 20 Yee bə kîli mbwu weŋ ə duŋ ə Chu kwuŋ, dɔhɔ kkɨŋ duŋ ə jóoni nakə muku wu kə, nnu duŋ ə i nakə yuu lə kə, nnu duŋ ə bəbuyi nakə kpee lə lɛɛ yi kə. 21 Yee bə kə̂lə lə dɔhɔ kkɨŋ mbɛɛ chì mbwu wi, ə həmə nnu tɔŋ liih dùŋ dəŋ.

Kinchaa ki mbili mbɛɛ

(Lukaa 11:34-36)

22 Díi ŋə mbɛɛ duŋ kinchaa ki mbili wi. Nəni, ə díi ŋo lə duŋ kɨŋkɨŋkɨŋ, ə gbo wo winhliŋ yii bə kinchaa. 23 Kwaalə, ə díi ŋo lə baŋ, ə mbili wa mənhliŋ yii bə jɨbə. Ə kinchaa ki mbɛɛ lə chu jɨbə, ə jɨbə kie yee ki bēe ləhəŋ lə?

Chu fwòŋ bəne biih

(Lukaa 16:13; 12:22-31)

24 Mbɛɛ ju hləŋ nnu duŋ ə yee i nɨ̄ŋ bə bəche bikuu bəfwe. Ə yee i nɨ̄ŋ nəni, ə yee i lōh bə ju, i lèki ju, i wò ju gbaaŋ, i jə̀ ju kwe. Duŋ ə yee bə nɨ̄ŋ bə Chu bə baa bə nɨ̀ŋ dəŋ bə bieŋ kə.

25 Nəni, n'yu n'yɔ̄ɔ bə bəŋ lə bə kə yee bə fɨ̄hɨŋ gbo ki kinduŋh kieeŋ ləə ə laha ffɨŋ bə lə di, ləkə ŋwi, ləkə maa bə go ŋieeŋ ləə, ə laha ffɨŋ bə lə lee lə. Nhle lə kinduŋh ki mbɛɛ kàh biləə, mbili mbɛɛ kàh dəŋ bindu lə? 26 Bə chiini ŋəŋ ye munyini mmuŋ mu tìɛŋ buh duŋ lə. Mu dɔ̀ lə, ləkə gba biləə buhuŋ chi ə bənchu mə. Kwaalə, Chwa weŋ nnu i dùŋ yo buh lèe mwi. Bə kàh lə munyini kə lə? 27 Ə nyəhə ə bəŋ mə nnu duŋ ə i de lə bə́ yiinə bwɔɔ maa mwi ə kinduŋh kiih bəŋ lə? 28 Bə fɨ̀hɨŋ gbo yu bindu yulaha lə? Bə kee ŋəŋ ye binchɔŋ kò lə ə nji bi dùŋ. Bi nɨ̀ŋ nə ləkə tɨŋ bindu kə. 29 Kwaalə, n'yu n'yɔ̄ɔ bə bəŋ lə maa Ŋkɨŋ Sholomuŋ dəŋ bə kiŋkuntaŋ kiih kinhliŋ kkɨŋ i mà kənə, i mà kə hlaa lə kwaa gbo bwii binchɔŋ bɨhŋ kə. 30 Ə Chu yee i dɔ̄hiŋ biyaa bi nji nəni, biyaa bbɨŋ bi kò daŋ, mbwaa bə́ tɔŋ fii bi bə bwii, kəə duŋ ə i nakə dɔhiŋ bəŋ kah nəni lə? Hooo bəne bə kimbemi ki tənə! 31 Nəni, bə kə yee bə fɨ̂hɨŋ gbo bə yɔ̀ɔ lə ə laha ffɨŋ kkə lə di, ŋwi laha, ləkə lee laha ə go lə. 32 Bieŋ bɨhŋ kiɛkiɛ duŋ bbɨŋ bəne bbəŋ bə́ dùŋ kə duŋ nə Bəjuu yìi bufe ə bi mə. Bə duŋ ŋkwo weŋ, nnu Chwa weŋ nnu i dùŋ yo buh yu kə̄lə lə bə bie bə kīɛɛ bieŋ bɨhŋ binhliŋ. 33 Bə hlaa yii bufe bweeŋ ə duŋ ə muŋkɨŋ mu Chu mə maa bə bieŋ bbɨŋ bi dùŋ ntiiŋ ə wu fwi, ə i nə bəŋ bieŋ bɨhŋ binhliŋ. 34 Fi hlə yee fi dūŋ lə, bə kə yee bə fɨ̂hɨŋ gbo yu mbwaa kə. Bu mbwaa ya duŋ bə ŋgə bwi. Ŋgə butuu wunə kwaa bə butuu bwe.”