Matio 7

Mbɛɛ kə hlaa lə mbɛɛ ju kə

“Bə kə yee bə hlâah bieŋ bi bəne bədi kə, nəni ə Chu nakə hlaah lə dəŋ bəŋ kə. 2 Yee bə kə̂lə lə ə jé yyɨŋ bə hlàah yé bəne bədi ə yí mə, ə yí dəŋ yyɨŋ Chu hlàah bəŋ ə yí mə. Shɔ nni wə fɛ̀hiŋ ye mə nə bə mbɛɛ, ə yi dəŋ nni Chu lə fɛhiŋ mə nə bə wə. 3 Ə duŋ yulaha ffɨŋ wə kèe shikpɔŋ ə mwaa di, kwaalə wə kə ŋəŋ nə shəŋ kpɔŋ nni i dùŋ ye ə wə di lə? 4 Fi gbe jə ləhəŋ maa yee wə yɔ̄ɔ bə mwaa lə, ‘Lemi nfwoo shikpɔŋ ə wə di,’ kwaalə shɛŋ kpɔŋ duŋ ə wə di lə? 5 Wə duŋ mbɛɛ nnu wə nyìi gbo! Hlaa fwoo shɛŋ kpɔŋ nni i dùŋ ye ə wə di, ə wə hlə ŋəŋ shikpɔŋ nni i dùŋ ye ə mwaa di wɛɛŋ, hlə fwoo.

6 Bə kə jəə fieŋ fi Chu nə bə bwí kə. Ə bə fə lə, ə yí fiimə gba bəŋ bu gbanə. Bə kə jəə dəŋ binya bieeŋ nə bə jɔ́ŋ kə. Ə bə fə lə, ə yí diɛŋ piɔtɔ bu piɔtɔnə bə wuh.

Yee bə bîi, bə kîɛɛ, bə kɔ̂ɔ

(Lukaa 11:9-13)

7 Bə bii, Chu lə nə bəŋ. Bə kiɛɛ, Chu lə fə ə bə ŋəŋ mu. Bə kɔɔ wulə, Chu lə wɛ bəŋ ki. 8 Yee bə kə̂lə lə mbɛɛ mənhliŋ nnu i bìi, mə bənə, mbɛɛ mənhliŋ nnu i kìɛɛ, mə ŋəŋ mu, nnu i kɔ̀ɔ wulə, ə bə́ wɛ wu ki.

9 Ə nyəhə ə bəŋ mə nnu ŋiaani lə bii buniɛŋ, ə i nə wu ə duŋ tə lə? 10 Ləkə ə mə bii fiɔɔnə, ə i nə wu ə duŋ yɔ lə? 11 Ə bəŋ dəŋ lə duŋ bəne bəwaha, bə kə̀lə bənnə bieŋ binwaa bə bwɔni bieeŋ, kəə Chwa weŋ nnu i dùŋ yo buh, duŋ ə i nakə nəə bieŋ binwaa bə bəne bbəŋ bə́ dè bie bə wu kahiŋ nəni lə? 12 Fi hlə yee fi dūŋ lə, maa laha ffɨŋ bə kìɛɛ lə yee bəne fə̄ bə bəŋ, ə fi ffɨŋ bə lə yee bə fə̄ dəŋ bə bə́, yulahalə ə fi ffɨŋ fi dùŋ ba fieŋ finhliŋ ffɨŋ Kiŋwaati ki bəŋkɨnə bə Mushe maa Biŋwaati bi hlɨŋ Chu kèeh.

Fwiih wi mbaŋ winfwaa bə wiŋgbɔɔŋkɔ

(Lukaa 13:24)

13 Bə lɛɛ ə mbaŋ nnu i dùŋ yo bə fwiih wunfwaa, yulahalə fwiih wi mbaŋ wwuŋ wi dùŋ we wiŋgbɔɔŋkɔ bə je chəkə gə̀ŋ ə dɔhɔ kkɨŋ bəne lə gəŋ la ə nla mə. Bəne lɛ̀ɛ ə wimbini we mə kiŋaaŋkə. 14 Yee bə kə̂lə lə fwiih wi mbaŋ winfwaa, lə je ntaabə nni i gə̀ŋ ə kinduŋh ki kə kaa mə. Bəne bbəŋ bə́ ŋə̀ŋ ə wi go duŋ kwaa chɛɛ.

Bəne bbəŋ bə́ kàalə yo lə bə́ dùŋ bəne bə hlɨŋ Chu

(Lukaa 6:43, 44)

15 Yee bə jə̂ bwɔɔ bə bəne bbəŋ bə́ kàalə yo lə bə́ dùŋ bəne bə hlɨŋ Chu. Bə́ bwò ə bəŋ mə bə́ nyìi lə bə́ dùŋ shɔ́ŋ, kwaalə mənte dùŋ bəkuula bbəŋ duŋ ə bə́ kaa shɔ́ŋ bu kaanə. 16 Bə kələ bə́ ə duŋ yu fwɔ́ ŋəbə dəŋ yəəŋ ye bə́ kə̀lə lə tiɛɛ yu sháŋ yyɨŋ yí chɔ̀ŋ ə ki go. Ə duŋ ə bə́ kwi kilaamiya ə bimbɛɛnə goo, lii duŋ ə bə́ kwi sháŋ yí ə tiɛɛ ki bituŋ go lə?^ª 17 Fi duŋ lə tiɛɛ kinwaa kinhliŋ chɔ̀ŋ sháŋ yinwaa, tiɛɛ kiwaha chɔ̀ŋ sháŋ yiwaha. 18 Tiɛɛ kinwaa chɔŋ nə sháŋ yiwaha kə. Duŋ dəŋ ə tiɛɛ kiwaha chɔŋ sháŋ yinwaa kə. 19 Tiɛɛ kinhliŋ kkɨŋ ki dùŋ kə chɔ̀ŋ nə sháŋ yinwaa, duŋ ə bə́ gba tələ ki tɔŋ fii. 20 Nəni, bə lə kələ bəne bə yo kaalənə bie ə duŋ yu fwɔ́ ŋəbə.

21 Ə mbɛɛ mənhliŋ nnu i chèe mi lə, ‘Baba, Baba’, nnu i yá lɛɛ ə muŋkɨŋ mu buh mə kə. Ə yá lɛɛ kwaa mbɛɛ nnu i fə̀ fieŋ ffɨŋ Tah nnu i dùŋ yo ə buh kìɛɛ. 22 Ə yáa ə dūŋ butuu bwi nhlaah nnu həŋgbɔŋ, ə bəne kiŋaaŋkə yáa bə́ bīi bə mi ləə, ‘Baba, Baba, kkə mà kə keeh lə hlɨŋ Chu ə yii lo bəŋ, kkə fwòo muŋkwini ə bəne go ə yii lo bəŋ, baa fə bieŋ bi ŋɨŋ gəə ə yii lo bəŋ lə?’ 23 Ə nhlə n'yɔɔ bə bə́ lə, ‘Ŋkə hlaa lə kələ bəŋ kə. Bə no ə mi dí bəne bbəŋ bə́ jə̀ ŋkɨnə kwe.’

Mbɛɛ wɛɛnə nnu i kə̀nə bufe bə nnu i dùŋ nfili

(Lukaa 6:47-49)

24 Nəni, mbɛɛ mənhliŋ nnu i wò díe yɨŋŋ yɨhŋ, i fə̀ ye n'yɔ̀ɔ lə duŋ ye mbɛɛ bufe nnu i wɛɛla chəŋ yi ə libwaa bəŋ. 25 Jaŋ bwo, ŋgwíŋ yii baaa, fwee kah nɛhiŋ chəŋ ye, kwaalə i nakə bulə kə, yulahalə i mà wɛɛla kichili kiih ə libwaa bəŋ. 26 Kwaalə, mbɛɛ nnu i wò díe yɨŋŋ yɨhŋ nakə yee i fə̄ ye n'yɔ̀ɔ lə, duŋ kwaa ye nfili mbɛɛ nnu i wɛɛla chəŋ yi ə duŋ ə choo bəŋ. 27 Jaŋ bwo, ŋgwíŋ yii baaa, fwee kah nɛhiŋ chəŋ ye, i bulə bwɔ nəni wulu dudu.”

Muŋga mu ŋkeehnə mmuŋ Jisho kə̀nə

28 Lə Jisho yɔɔ kaa bieŋ bɨhŋ kiɛkiɛ, gəə ŋɨŋ bimɔ bi bəne bie ki keehnə kiih, 29 yulahalə i màa i kēeh ye mbɛɛ nnu i kə̀nə muŋgeni mu ŋkeehnə. I mà kə yee i kēeh ye bəne bəbə bbəŋ bə́ kèeh bie bəŋkɨnə bə Chu bà lə bəŋkeeh kə.