Jisho ŋwuhuŋ mbɛɛ jəŋ kinhlanhla
8
Jisho ja no ə kɔnɔ go bwɔ, bimɔ bi bəne biŋkuntaŋ bə̄lə wu dɨŋ chuuu. 2 Fi duŋ lə mbɛɛ ju nnu i màa i gɔ̄ŋ jəŋ kinhlanhla, mà jaa bwo bɛŋ núh ə Jisho fwi yɔɔ bə wu lə, “Baba, duŋ ə wə fə ə nchaa, ə wə hə leki.” 3 Jisho hlə nɛhiŋ kwaŋ wiih tuu ə wu go yɔɔ lə, “Nleka, ŋwunə yee wə chāa.” Cha mi, jəŋ kinhlanhla ye hlə ka ə wu go, i chàa. 4 Jisho kɨnə wu lə, “Jə bwɔɔ lə, wə kə yɔɔ lə bə mbɛɛ ju kə. Kwaalə, gəŋ nyii gbo wo bə ŋwuŋ ntofi, wə nə nnə llɨŋ Mushe mà yɔɔ le lə mbɛɛ kənə bənnə bənyii bə bəne lə i ŋwuna ə jəŋ ni kwáŋ, i yu chāa wɛɛŋ.”Jisho ŋwuhuŋ mbɛɛ nimi che kwoo ki bəne bə bicha
5 Jisho no gəŋ lɛɛ ə kibalaki ki Kapanahuŋ mə, che kwoo kintu ki bəne bə bicha kidi bwo ŋəŋ wu yee i kɔ̄nɔ wu, i yɔ̄ɔ lə, 6 “Baba, mbɛɛ nimi ŋgwəŋ yu nɔ̄ŋ i kpē ə chəŋ bə jəŋ, i kpee wɛɛ mwe, i yu wō nlogo gbaaŋ.” 7 Jisho yɔɔ bə wu lə, “Nlə mbwo ŋwuhuŋ wu.” 8 Kwaalə, che kwoo ki bəne bə bicha yo chuu bə Jisho lə, “Baba, ŋkə ŋ'wunə mbɛɛ nnu duŋ ə wə bwo ə mi chəŋ kə. Yɔɔ kwaa die wa, mbɛɛ nimi ŋgwəŋ yo ŋwunə. 9 Nduŋ dəŋ ə muŋgeni mu mbɛɛ ju dɨŋ, nnu bəne bə bicha duŋ ə mi dɨŋ. Ə nlə n'yɔɔ bə ju lə, ‘Gəŋ,’ i yee i gə̄ŋ bu gəŋnə, ə nlə yɔɔ bə ju lə, ‘Bwo,’ i yee i bwō bu bwonə. Ə nlə mbaa yɔɔ dəŋ bə nfwa ŋgwəŋ lə, ‘Fə nəni,’ i yee i fə̄ bu fənə.” 10 Ə chulə Jisho wo fieŋ ffɨŋ i yɔ̄ɔ fie, gəə ŋɨŋ wu. I yɔɔ bə bəne bbəŋ bə́ màa bə́ bə̄lə bie wu lə, “N'yɔ̄ɔ bəŋ kichɛɛŋ lə, ŋkə hlaa lə ŋəŋ mbɛɛ ju yaŋ ə Ishlael nnu i yiila dɨŋ lɨhŋ tɔŋ ə mi mə nəni kə. 11 N'yɔ̄ɔ bəŋ lə bəne kiŋaaŋkə yá yi no ə wɛ́ɛ ŋənhliŋ mə chɔɔ jə wɛɛ wwuŋ kitaŋ fù gəŋ bwii wɛɛ wwuŋ ki gəŋ chɨ̀ŋ, bwo shii yee bə́ dī bə Ablahaŋ, Ayjik maa Jekɔb ə muŋkɨŋ mu buh mə, 12 kwaalə, bwɔni bə kitɨŋ kkɨŋ ki dùŋ kibə, bə́ yá yi lɛɛ tələ bə́ ə bweenə ə jɨbə mə dɔhɔ kkɨŋ bəne yáa bə́ dē, bə́ dì bigəə bibə.” 13 Ye Jisho nachɛ lə nəni i hlə yɔɔ bə che kwoo ki bəne bə bicha bie lə, “Gəŋ, fi duŋ bə wə ye wə yiilə tɔŋ lo ə mi mə.” Mbɛɛ nimi che kwoo ki bəne bə bicha bie hlə ŋwunə ə bwɔɔ yo bəŋ.
Jisho ŋwuhuŋ bəne bə jə́ŋ kiŋaaŋkə
14 Jisho no gəŋ lɛɛ ə Pita chəŋ, ŋəŋ mah kpɛɛ i nɔŋna, i nə̄nə bə jəŋ. 15 Jisho tuu ə kwaŋ wiih go, jəŋ ye hlə fu, i hlə ja fa kiɛɛ fieŋ fidinə Jisho di.
16 Lə ə bwo chu bwɔɔ kitaŋ, bəne yee bə́ bwō bə bəne kiŋaaŋkə bbəŋ muŋkwini fɨ̀hɨŋ bə́. Jisho yee i fwōo bəfiana bie ə duŋ bə kijə kwaa. I ŋwùhuŋ dəŋ bəne bənhliŋ bbəŋ bə́ gɔ̀ŋ. 17 Fieŋ fɨhŋ mà duŋ bənfə lə fi bwo gbeemə yəəŋ ye Ejaya mbɛɛ hlɨŋ Chu mà yɔɔlə lə, “I jəə go ŋiaa, tu jə́ŋ yaa.”
Bəŋgə bə mbɛɛ nnu i bə̀lə Jisho
18 Ə chulə Jisho ŋəŋ lə bimɔ bi bəne biŋkuntaŋ buma ə wu tɨŋ, i yɔɔ bə bəne biih bə kintu lə, “Kkə le libi le gəŋ yaa wi ju yo.” 19 Mbɛɛ ju nnu i màa i kēeh bəŋkɨnə bə Chu hlə baŋ bwo yɔɔ bə Jisho lə, “Mbɛɛ Keehnə, nlə n'yee mbə̄lə wə maa ə wə lə gəŋ fəhəŋ.” 20 Jisho chuu bə wu lə, “Bididi kə̀nə bibwɔɔ bibi, munyini mmuŋ mu tìɛŋ buh kə̀nə chə́ŋ yimwi, kwaalə Ŋwa Mbɛɛ kənə lə dɔhɔ kkɨŋ duŋ ə i nɔhiŋ kwoo kiih kə.” 21 Mbɛɛ kintu wi ju yɔɔ bə wu lə, “Baba, hlaa tukwaŋ ə mi go ŋgəŋ ndiih kaa tah nhlə n'yee mbə̄lə wə.” 22 Kwaalə Jisho chuu bə wu lə, “Yee wə bə̂lə mi, cheekwaŋ bəne bbəŋ bə́ dùŋ lə bə́ kpee diih go ŋəbə.”
Jisho nyieemi kifwuŋ
23 Jisho gəŋ lɛɛ ə kikpɔŋkɔ mə, bəne biih bə kintu bələ dəŋ wu mə. 24 Fi duŋ lə kifwuŋ kintaabə mà jaa chɔɔ yee ki nɛ̄hiŋ nɔ yo, ŋgwiŋ bīŋ buh, mə kīɛɛ lə mə yii ə kikpɔŋkɔ kie mə. Ə mà duŋ Jisho nɔ̄ŋ kinɨŋ. 25 Bəne biih bə kintu gəŋ yee bə́ ŋɛ̄hiŋ wu bə́ yɔ̄ɔ lə, “Baba, chɨnə be, kkə bie kkə kpē.” 26 I ŋənə yɔɔ bə bə́ lə, “Hooo bəne bə kimbemi ki tənə. Bə lɔ laha lə?” Ye i yɔɔlə nəni i hlə ja fa nyieemi kifwuŋ kie maa nɔ yo də, bidɔhɔ də nəni shiiiŋ. 27 Gəə ŋɨŋ bəne bie nəni kakala. Bə́ naamə ləə, “Dɨŋ nu mbɛɛ duŋ nwɛhɛŋ nnu maa kifwuŋ bə nɔ wò wu lə?”
Jisho fwoo muŋkwini ə bəne bəfwe go
28 Jisho ja le kwo ə wikwi ə wɛɛ wi bəne bə Gadala mə.ª Bə bənə bə bəne bəfwe bbəŋ muŋkwini màa mu dūŋ ə bə́ go. Bəne bəhŋ mà fu ə məntiɛ mməŋ bə́ màa bə́ dīih bəne mə. Bə́ màa bə́ lō gbaaŋ ye duŋ ə mbɛɛ nakə kaah mə je ye mə kə. 29 Fi duŋ lə bə́ màa bə́ gɛ̄ɛmə gbaaŋ bə́ yɔ̄ɔ lə, “Ŋwa Nchu, wə kiɛɛ laha ə be go lə? Wə bwo fəŋ bənnə be ŋgə bwɔɔ kaani kə wunə lə?” 30 Ə mà duŋ kikɨŋ kijɔŋ kidi dī ə wɛɛ we mə kiŋaaŋkə. 31 Muŋkwini mwe hlə kɔnɔ Jisho lə, “Butee, ə wə fwoo be, wə faŋ be ə jɔ́ŋ yé mə.” 32 Jisho hlə yɔɔ bə mwi lə, “Bə́ gəŋ.” Mwi hlə fu, gəŋ lɛɛ ə jɔ́ŋ yé mə. Fi duŋ lə kikɨŋ ki jɔ́ŋ kie kinhliŋ bulə gəŋ bwɔ ə yi mə, bwɔ ə nɔ yo mə ki kpe. 33 Bəne bbəŋ bə́ màa bə́ fwōŋ bie jɔ́ŋ yé bwaalə, gəŋ ə kibalaki kie mə, yɔɔ bieŋ binhliŋ dəŋ ye bi mà kah lə bə bəne bbəŋ muŋkwini màa mu dūŋ mwe ə bə́ go. 34 Fi duŋ lə kwili le kiɛkiɛ mà fwoo bəmbwo ŋəŋ Jisho. Lə bə́ bwo ŋəŋ ə wu go, bə́ kɔnɔ wu lə i no ə bidi bibə mə.