Matio 9

Jisho ŋwuhuŋ mbɛɛ nnu i mà kpee wɛɛ mwe

Jisho lɛɛ ə kikpɔŋkɔ mə, fiimə le gəŋ ə kibalaki kiih mə. 2 Fi bwo duŋ lə bəne bədi mà too bwo bə mbɛɛ ju həmə ə duŋ i mà kpee wɛɛ mwe, bə́ mà tu wu ə kiŋkaa mə. Jisho ŋəŋ lə bəne bəhŋ yiila tɔ́ŋ ə wu mə, i hlə yɔɔ bə mbɛɛ nnu i mà kpe yo wɛɛ mwe lə, “Mbweŋ, yii tɔŋ. Nlaama nə yíwaha yo.” 3 Fi duŋ lə bəne bədi bbəŋ bə́ màa bə́ kēeh bəŋkɨnə bə Chu chɔɔ bəŋwuunə bə́ bə́, bə́ yɔ̄ɔ lə, “Mbɛɛ nu yu jə̄ dɔhɔ ki Chu.” 4 Jisho kələ fieŋ ffɨŋ bə́ hlē fie, bii bə bə́ ləə, “Bə kə̀nə munhlenə muŋ'waha ə tɔ́ŋ ŋieeŋ mə nəni yulaha lə? 5 Fieŋ fi chəkə bən'yɔɔ duŋ fiɛhɛŋ lə? Bən'yɔɔ bə mbɛɛ nu lə, ‘Nlaama nə yíwaha yiih,’ lii bən'yɔɔ lə, ‘I ja fa yee i jāa lə?’ 6 Kwaalə, nlə nfə ə bə kələ lə Ŋwa Mbɛɛ kə̀nə muŋgeni yaŋ kwe bənlaamə nə yíwaha.” Ye i yɔɔlə nəni, i hlə yɔɔ bə mbɛɛ nnu i mà kpe yo wɛɛ mwe lə, “Ja fa, jə kintaŋ ko yee wə kwə̂lə.” 7 I hlə ja yee i kwə̄lə wu fiih. 8 Lə bimɔ bi bəne bie ŋəŋ ye fieŋ fɨhŋ kah'lə nəni, nɨŋ kwo bə́, bə́ dohi Chu nnu i nəə yo dɨŋ muhŋ muŋgeni bə Mbɛɛ ŋkee.

Jisho chee jə Matio

(Maak 2:13-17; Lukaa 5:27-32)

9 Jisho ja həmə yee i jāa i gə̄ŋ, i ŋəŋ mbɛɛ ju nnu bə́ chèe lə Matio, ə duŋ mbɛɛ nnu i màa i kwō kiŋwaati, i shiila ə dɔhɔ kiih ki nimi mə. Jisho yɔɔ bə wu lə, “Yee wə bə̂lə mi.” I hlə ja fa yee i bə̄lə wu.

10 Jisho ja gəŋ shii yee i dī ə Matio chəŋ, fi duŋ lə bəne bədi kiŋaaŋkə bbəŋ bə́ kwō kiŋwaati, maa bəne bə bieŋ biwaha bədi dəŋ mà bwoo shii yee bə́ dī bə Jisho maa bəne biih bə kintu. 11 Lə Bəfalashii ŋəŋ ye bə́ dīlə nəni, bə́ hlə bii bə bəne biih bə kintu ləə, “Ə duŋ yulaha nnu mbɛɛ weŋ keehnə nu dī bə bəne bbəŋ bə́ kwò kiŋwaati maa bə bəne bə bieŋ biwaha bədi lə?” 12 Jisho wo ye bə́ bii lə, i yɔɔ bə bə́ lə, “Bəne bbəŋ bə́ dùŋ kɨŋkɨŋkɨŋ kìɛɛ lə ŋwuŋ nche kə. Ə kìɛɛ ə duŋ bəne bə jə́ŋ. 13 Bə gəŋ hle ŋəŋ ləə, kinuu ki fieŋ ffɨŋ bə́ bieŋna fɨhŋ Chu yɔ̀ɔ lə, ‘Ŋkiɛɛ lə bəne yee bə kwō hlɨŋ ə duŋ bə bəne, ŋkə ŋkìɛɛ lə lə yee bə fə̄ bəntofi bə mi kə’, fi duŋ lə laha lə? Yee bə kə̂lə lə ŋkə mbwoo bənchee jə ə duŋ bəne bbəŋ bə́ dùŋ ntiiŋ kə. Mbwo bənchee jə ə duŋ bəne bə bieŋ biwaha.”

Bəne bii ki nshi biləə

(Maak 2:18-22; Lukaa 5:33-39)

14 Bəne bə kintu bə Jɔɔŋ N'yiinjɔ ja bwo bii bə Jisho ləə, “Ə duŋ yulaha ffɨŋ be bə Bəfalashii shì biləə, bəne bwo bə kintu kə shiee kə lə?” 15 Jisho chuu bə bə́ lə, “Duŋ ə bə́ jaŋ bəne bə biah, ə bə́ gəŋ yee bə́ jūuli che biah yo kaani bə bə́ lə? Kwaalə, butuu bwe bu bwō bbuŋ bə́ yá jə no bə che biah yo ə bə́ kwáŋ, ə bə́ hlə chɔɔ bənshi biləə. 16 Mbɛɛ duŋ ə i nakə jəə nshɛŋkɛ kindu kifwɔ, shwaali kindu kiko mu kə. Ə mə fə lə, ə nshɛŋkɛ kindu ye kwiinə bwo shwaŋ kindu kiko kie, ə bwɔɔ kkɨŋ ki dùŋ kie mu gaa ko kah ye ki hə hlaalə duŋ mu. 17 Mbɛɛ duŋ ə i nakə jəə dəŋ mbihŋ mənfwɔ yii ə bɛ kiko mə kkɨŋ bə́ fə̀ bə bwa wi nyaŋ wwuŋ wi dɨŋna kaa kə. Ə mə fə lə, ə mbihŋ mənfwɔ mie fe, ə bɛ kie kpe hlaamə, ə mbihŋ mie shoo kwe. Fi yəəŋ duŋ lə, bə́ kənə bən'yii mbihŋ mənfwɔ ə duŋ ə bɛ kifwɔ mə. Nəni, ə mbihŋ mie bə bɛ kie hlə duŋ.”^ª

Jisho fwoo ŋwa ŋwuŋ ŋkuntaŋ ju ə kpe mə

(Maak 5:21-43; Lukaa 8:40-56)

18 Dəŋ ye Jisho màa i kaani lə i yɔ̄ɔ bə bə́ nəni, fi duŋ lə ŋwuŋ ŋkuntaŋ ju mà bwoo bɛŋ núh ə wu fwi kɔnɔ wu lə, “Ŋiaa kpɛ bwaala kpe fidiɛɛ nəni, kwaalə, bwo tuu ə wu go bə kwáŋ ŋo fo mə lə ŋwunə chuu.” 19 Jisho hlə ja fa yee bə́ gə̄ŋ bəə wu, bəne biih bə kintu bə̄lə dəŋ wu.

Kpɛ ju tuu ə Jisho go ŋwunə

(Maak 5:25-34; Lukaa 8:43-48)

20 Fi duŋ dəŋ lə kpɛ ju nnu i màa i gɔ̄ŋ jəŋ kibweenə bigoŋ yuufi ə nchɔ bifwe mà jaa bwo ə Jisho dɨŋ, tuu ə biwu bi kindu ki Jisho go. 21 I mà tuu nəni, mə hə yɔɔla ə tɔŋ liih go lə, “Ə nlə ntuu kwaa ə kindu kiih go, kəə ŋ'wuna.” 22 Ye i mà tuulə nəni, Jisho fiimə ŋəŋ ə wu go, yɔɔ bə wu lə, “Nəh, wə kə yee wə lɔ̂ kə. Tɔŋ lo llɨŋ wə yii le ə mi mə fəə wə ŋwuna.” Ə bwɔɔ yo bəŋ, kpɛ yo hlə ŋwunə.

23 Jisho gəŋ bwii ə ŋwuŋ ŋkuntaŋ yo chəŋ, ŋəŋ bəne bbəŋ bə́ màa bə́ tɔ̄ŋ munlɛlɛ mu kpe maa kimɔ ki bəne kie. Dɔhɔ kie shī choo bə ndəŋ. 24 Jisho yɔɔ bə bə́ lə, “Bə hlaamə, ŋiaŋ kpɛ yo kə kpee kə, i yu nɔ̄ŋ ə duŋ kinɨŋ.” Bəne bie yee bə́ shāa wu ə nshaa mə. 25 Bə́ fwoo bəne bie bweenə, i hlə lɛɛ gəŋ mu chəŋ, kənə ŋiaŋ kpɛ yo ə kwaŋ go, i hlə ja fa. 26 Hlɨŋ ni ki fieŋ fɨhŋ hlaamə gəŋ ə wɛɛ wi kitɨŋ kie mə kinhliŋ.

Jisho wɛ díi ŋə bəmbandii bəfwe

27 Jisho ja fu mu chəŋ, yee i jāa i gə̄ŋ, bəmbandii bədi bəfwe ə duŋ bənəə, yee bə́ kōŋ bə́ bə̄lə wu bə́ gɛ̄ɛmə gbaaŋ bə́ yɔ̄ɔ lə, “Ŋwa Ŋkɨŋ Daafi, kwo hlɨŋ bə be.” 28 Jisho gəŋ lɛɛ ə chəŋ, bəmbandii bie bələ wu, i bii bə bə́ ləə, “Bə bema lə duŋ ə nfə fieŋ ffɨŋ bə dē fɨhŋ lə?” Bə́ bemi lə, “Eee Baba.” 29 Jisho hlə tuu ə díi ŋəbə go yɔɔ lə, “Bələ tɔ́ŋ ŋŋəŋ bə yiila ŋie ə mi mə, fi duŋ nəni bə bəŋ.” 30 Díi ŋəbə bu wɛɛmə. Jisho looŋkə bə́ ntakə yɔɔ lə, “Bə kə mɔŋ nə bənfə lə mbɛɛ ju kələ mu kə.” 31 Kwaalə, bə́ kaka gəŋ hlahi hlɨŋ ye ki nimi li Jisho ə wɛɛ wi kitɨŋ kie mə kinhliŋ.

Jisho ŋwuhuŋ mbambituŋ

32 Ye bəne bie mà nolə yee bə́ gə̄ŋ, fi duŋ lə bəne bədi mà jaa yee bə́ bwō bə mbɛɛ nnu i màa i dūŋ jə kə yɔɔ lə kə ə Jisho tɨŋ, nnu fiŋkwini mà duŋ ə wu mə. 33 Jisho fwoo fiŋkwini fie ə mbɛɛ yo go, i hlə chɔɔ bən'yɔɔ jə. Bimɔ bi bəne ŋəŋ nəni gəə ŋɨŋ bə́, yee bə́ yɔ̄ɔ lə, “Kkə mà kə hlaa lə ŋəŋ dɨŋ fɨhŋ fieŋ yaŋ ə kitɨŋ ki Ishlael kɨhŋ mə kə.” 34 Kwaalə, Bəfalashii yɔɔ fibə lə, “I fwòo bənchinda bə hlaata bəhŋ nəni ə duŋ bə muŋgeni mu ŋkɨŋ muŋkwini.”

Biləə ŋaŋna gbaaŋ, bəne bə buhunə bie chɛɛ

35 Jisho ja yee i jāa ə bibalaki bie mə binhliŋ maa ə ŋəŋkwili ŋie mə i kèeh bəne ə chə́ŋ yí cheenə Chu yibə mə, i baa i dòntə hlɨŋ nwaa ki muŋkɨŋ mu Chu. I màa i jāa nəni, i ŋwùhuŋ dəŋ gbo maa jə́ŋ yinhliŋ yí bəne. 36 Bwɔɔ nnu i mà ŋəŋ ə bimɔ bi bəne go, hlɨŋ kwo wu bə bə́ yulahalə bə́ mà duŋ ə bishi mə, mbɛɛ chɨnənə bə́ mà kə duŋ nə kə, ye shɔ́ŋ yyɨŋ yí dùŋ kə duŋ nə bə mbɛɛ fwoŋnə yí. 37 I hlə ja yɔɔ bə bəne biih bə kintu lə, “Biləə ŋaŋna gbaaŋ, kwaalə bəne bəbuhunə bie chɛɛ. 38 Nəni, yee bə chêe Chu lə Baba Che wɛɛh kɨhŋ faŋ bəne bəbuhunə biləə bie ə wɛɛh kiih mə.”