Lukaa 5

Jisho dii bəne biih bə kintu bə fwii

Ə mà duŋ butuu budi, Jisho lema baha ə libi li Genishalet tɨŋ, bəne kaala wu kunə yee bə́ wə̄lə die Chu. 2 I ja ŋəŋ bikpɔŋkɔ bifwe ŋgwiŋ hə kpeeli, bəne bbəŋ bə́ mà kənə bie bi mà fwoo kaa mə yee bə́ wīi gi ŋəbə ŋə fiɔŋ. 3 I gəŋ lɛɛ ə mwe mə, ə duŋ ki Shaamuŋ, yɔɔ bə wu lə i yəə yii gəŋ bə ki ə njɔ chɛɛ. I yəə, Jisho hlə shii ə ki mə, bəne duŋ həkpa i kēeh bə́.

4 Lə i keeh kaa, i hlə yɔɔ bə Shaamuŋ lə, “Nua gəŋ bə kikpɔŋkɔ kie ə dɔhɔ ki duumə mə, bə lɛɛ gi ŋieeŋ ŋie bə kwo fiɔŋ.”

5 Shaamuŋ chuu lə, “Che kwoo, kkə hə nɔŋ fa kkə lɛ̄ɛ gi hləŋ hləŋ bu wu, kkə nakə kwoo fieŋ kə. Nlə nlɛɛ kwaa ye wə yɔɔ lə.” 6 Ə chulə bə́ lɛɛ, bə́ kwoo fiɔŋ həmə ŋgɔɔŋgɔ, bwɔɔ nnu bə́ màa bə́ fwōo, gi ŋəbə chu she chɛɛ bənshwaanə. 7 Nəni, bə́ kpaa bəne bəbə bədi bə kintu ə kikpɔŋkɔ kidi kie mə lə bə́ bwo chɨnə bə́. Bə́ bwo fwoo fiɔŋ yé mə yí yii ə bikpɔŋkɔ bibə bie mə, bi chu she chɛɛ bə miili bwɔ hətə. 8 Lə Shaamuŋ Pita ŋəŋ ye fɨhŋ fieŋ mà kah'lə nəni, i hlə gəŋ bɛŋ núh ə Jisho fwi yɔɔ lə, “Butee Baba, no wə fo fəŋ wə tukwaŋ ə mi go, ndùŋ fɨŋŋ ŋwuŋ waha.”

9 I mà yɔɔ nəni, yulahalə wu bə bəne biih bə kintu mà ŋəŋna fiɔŋ yyɨŋ bə́ mà kwo ye, gbo kpe bə́. 10 Wi kpe dəŋ Jɛŋ bə Jɔɔŋ bwɔni bə Jebedee bbəŋ bə́ mà duŋ dəŋ ə kintu ki Shaamuŋ mə. Jisho yɔɔ bə Shaamuŋ lə, “Wə kə lɔɔ kə. Chɔɔ jə fidiɛɛ gəŋ fwi wə lə yee wə kwō chəə ə duŋ bəne.”

11 Lə bə́ wo nəni, bə́ hlə fwoo bikpɔŋkɔ bibə bie ə njɔ, tukwaŋ ə bieŋ bibə go kiɛkiɛ hlə yee bə́ bə̄lə Jisho.

Jisho ŋwuhuŋ ŋwuŋ kinhlanhla

(Matio 8:1-4; Maak 1:40-45)

12 Ə bwo duŋ ə bwɔɔ ju bəŋ, Jisho dùŋ ə kibalaki kidi mə, ŋwuŋ ju dùŋ həmə nnu jəŋ kinhlanhla diee kaa wu gbo. Lə mbɛɛ nu ŋəŋ ə Jisho go, i bwo gbe wu fwi, kɔnɔ wu yɔɔ lə, “Baba, duŋ ə wə fə mi ə nchaa, ə wə leki.”

13 Jisho hlə nɛhiŋ kwaŋ wiih tuu ə wu go yɔɔ lə, “Nleka, ŋwunə yee wə châa.” Cha mi, kinhlanhla kie hlə tukwaŋ ə wu go. 14 Jisho kɨnə wu lə, “Jə bwɔɔ bən'yɔɔ bə mbɛɛ ju. Kwaalə, gəŋ nyii gbo wo bə che ntofi, wə nə nnə lo llɨŋ Mushe mà yɔɔ le lə mbɛɛ kənə bənnə bənyii bə bəne lə i ŋwuna ə jəŋ ni kwáŋ i yu Chāa.” 15 Ye Jisho kɨnə lə mbɛɛ yo nəni, hlɨŋ Jisho ye bu hlaamə gəŋ fwi fwi, bimɔ bi bəne būmə bi bwō bəŋ'wələ keehnə kiih, maa dəŋ lə yee i ŋwūhuŋ jə́ŋ yibə. 16 Kwaalə, Jisho she bə́ gəŋ yee i chēe Chu ə nji.

Jisho ŋwuhuŋ mbɛɛ nnu i mà kpe wɛɛ mwe

(Matio 9:1-8; Maak 2:1-12)

17 Ə bwo duŋ butuu budi bwe Jisho kēeh bəne, muŋga mu Baba duŋ ə wu go bəŋwuhuŋ jə́ŋ. Bəfalashii maa bəne bə keehnə bəŋkɨnə bə Chu shiila həmə, bə́ mà fu ə bitɨŋ binhliŋ bi Galilii mə maa bi Judia bə bi Jelushalɛŋ mə. 18 Fi bwo duŋ lə bəne bədi mà noo yee bə́ bwō bə́ too mbɛɛ ə kintaŋ bəŋ, i mà kpee wɛɛ mwe. Bə́ màa bə́ kīɛɛ lə bə́ bwo lɛɛ nɔhiŋ chi wu ə Jisho fwi. 19 Kwaalə, bə́ nakə bənə je kə, yulahalə bəne mà chiŋna mu gbaaŋ. Bə́ hlə biŋ ə fɨŋ, niɛɛli kinchu kie, hlili bwɔ bə mbɛɛ yo ə bəne mə kintekinte ə Jisho fwi ə kintaŋ kie bəŋ. 20 Lə Jisho ŋəŋ lə bəne bəhŋ yiila tɔ́ŋ ŋəbə ə wu mə, i hlə yɔɔ bə mbɛɛ yo lə, “Mbweŋ, nlaama nə yíwaha yo.”

21 Bəne bbəŋ bə́ kèeh bəŋkɨnə bə Chu bə bintu bi Bəfalashii bie hlə chɔɔ bəŋwuunə bə́ yɔ̄ɔ lə, “Nu lə nyəhə chəə nnu i jə̀ dɔhɔ ki Chu lə? Ə nyəhə nnu duŋ ə i laamə nə yíwaha kahiŋ kwaa Chu lə?”

22 Jisho kələ fieŋ ffɨŋ bə́ ŋwūnə fie, i bii bə bə́ ləə, “Ə laha ffɨŋ bə kənə fie dɨŋ muhŋ munhlenə ə tɔ́ŋ ŋieeŋ mə nəni lə? 23 Fieŋ fi chəkə duŋ fiɛhɛŋ, bən'yɔɔ lə nlaama nə yíwaha yí mbɛɛ nu, lii bən'yɔɔ lə, ‘I ja fa yee i jāa lə’? 24 Kwaalə, nlə nfə ə bə kələ lə Ŋwa Mbɛɛ kənə muŋgeni yaŋ kwe bənlaamə nə yíwaha.” I hlə yɔɔ bə mbɛɛ nnu i mà kpe yo wɛɛ mwe lə, “Ə yɔɔ mi bə wə, ja fa, jə kintaŋ ko yee wə kwə̄lə.”

25 Cha mi, i hlə ja fa lemi ə bəne bie dí, jə kitaŋ kiih kkɨŋ mə hə yee i nɔ̄ŋ kie bəŋ yee i gə̄ŋ ə wu chəŋ, i nə̄ kindohi bə Chu. 26 Bəne ŋəŋ nəni, gəə ŋɨŋ bə́, bə́ kənə gbo wi kpenə, bə́ nə̄ kindohi bə Chu bə́ yɔ̄ɔ lə, “Kkə ŋəŋna bieŋ bi ŋɨŋ gəə daŋ.”

Jisho chee jə Lebi

(Matio 9:9-13; Maak 2:13-17)

27 Jisho ja fu həmə yee i jāa. Ye i màa i gə̄ŋ lə, i ŋəŋ mbɛɛ ju nnu i kwò kiŋwaati bə́ chèe wu lə Lebi ə chu duŋ i shiila ə dɔhɔ kiih ki nimi mə. Jisho yɔɔ bə wu lə, “Yee wə bə̂lə mi.” 28 Lebi no she bieŋ biih binhliŋ, ja fa yee i bə̄lə Jisho.

29 Nəni, Lebi hlə gəŋ fə chɔnɔ kiŋkuntaŋ ə wu chəŋ bəntɨŋ bə Jisho. Bəne bbəŋ bə́ màa bə́ kwō kiŋwaati ŋwɛɛhlɨ həmə maa bəne bədi bbəŋ i màa i dī bə bə́. 30 Bəfalashii maa bəne bəbə bə kintu bə keehnə bəŋkɨnə bə Chu gbe bəŋwuunə, bə́ bīi bə bəne bə kintu bə Jisho ləə, “Ə yulaha ffɨŋ bə dì, bə ŋwì bə bəne bbəŋ bə́ kwò kiŋwaati maa bəne bə bieŋ biwaha lə?”

31 Jisho chuu bə bə́ lə, “Bəne bbəŋ bə́ dùŋ kɨŋkɨŋkɨŋ kiɛɛ lə ŋwuŋ nche kə. Ə kìɛɛ bəne bə jə́ŋ. 32 Ŋkə mbwoo lə mbwo ndii ə duŋ bəne bə ntiiŋ kə. Mbwo yu bəne bə bieŋ biwaha fo bə́ lə fii tɔ́ŋ ŋəbə.”

Bə́ bii bə Jisho ki nshi biləə

(Matio 9:14-17; Maak 2:18-22)

33 Bə́ ja yee bə́ nāamə bə́ bīi bə Jisho ləə, “Bəne bə kintu bə Jɔɔŋ shì biləə maa bənchee Chu bwɔɔ mənhliŋ, ə duŋ dəŋ ye bə Bəfalashii bwò li bə fə̀, kwaalə bwo bie duŋ kwaa fibə bə́ dì bə́ ŋwì.”

34 Jisho chuu bə bə́ ləə, “Duŋ ə bə́ jaŋ bəne bə biah ə bə́ gəŋ, ə mbɛɛ baa fə ə yee bə́ shī biləə che biah yo kaani bə bə́ lə? 35 Kwaalə, butuu bwe bu bwō bbuŋ bə́ yá jə no bə che biah yo ə bə́ kwáŋ, ə bə́ hlə chɔɔ bənshi biləə ə bwɔɔ yo bəŋ.”

36 I baa gba ŋgaŋga ji bə bə́ lə, “Mbɛɛ hləŋ nnu i shwàŋ kindu kifwɔ shwaali kiko mu. Ə mə fə lə, kəə i biha ba kindu kifwɔ kie. Duŋ ə finshɛŋkɛ fifwɔ fie gəŋ yəəŋ bə kindu kiko kie kə. 37 Duŋ dəŋ ə mbɛɛ nakə jəə mbihŋ mənfwɔ, yii ə bɛ ki mbihŋ kiko mə, kkɨŋ bə́ fə̀ bə bwa wi nyaŋ wwuŋ wi dɨŋna kaa kə. Ə mə fə nəni, ə mbihŋ mənfwɔ mie fe kpee bɛ kiko kie kə, ə mbihŋ mie bə bɛ kie la nya. 38 Fi ntiiŋ duŋ lə, bə́ kənə bən'yii mbihŋ mənfwɔ ə duŋ ə bɛ kifwɔ mə. 39 Bə kələ dəŋ lə mbɛɛ hləŋ həmə nnu i ŋwì mbihŋ mməŋ mə bee nnu duŋ ə yee i baa lēki mənfwɔ kə. I dòhi kwaa ə duŋ məmbe mie.”