Lukaa 4

Hlaata mɔŋ Jisho

Jisho mà no ə Kibee ki Joodaŋ mə, i fiila bə Fiana Wɛɛŋ. I fə wu i gəŋ yee i dūŋ ə nji. 2 I mà duŋ mə nji joo mbwɛɛnya Hlaata mɔ̀ŋ wu. I màa i dūŋ mə nəni fieŋ kə diee kə. Lə joo ŋie kah, jəbulə chɔɔ bəŋ'wu wu. 3 Hlaata hlə ja yɔɔ bə wu lə, “Ə wə duŋ Ŋwa Nchu, wə yɔɔ bə tə lɨhŋ li chu biləə.” 4 Jisho chuu bə wu lə, “Fi duŋ bə́ bieŋna lə,

‘Mbɛɛ dùŋ nə kwaa yu biləə kə.’”

5 Hlaata jə wu həmə biŋ ə dɔhɔ kidi bəŋ, nyii wu bitɨŋ binhliŋ bi yaŋ mbiŋ nte. Jisho ŋəŋ nəni mwaaŋ. 6 Hlaata hlə yɔɔ bə́ wu lə, “Bə́ nəə kaa bidi bɨhŋ yaŋ kwe bə mi kiɛkiɛ, nduŋ nnə bə mbɛɛ nnu nlèki. Nduŋ nnə wə yee wə hlāah, wə kə̀nə kiŋkuntaŋ bə muŋgeni mwe munhliŋ. 7 Fɨhŋ duŋ kwaa lə wə bwɔkwe ə mi fwi kohi mi, ə nhlə nnə bieŋ binhliŋ bə wə.”

8 Jisho chuu bə wu lə, “Bə́ bieŋna lə,

‘Yee wə bwɔ̂kwe bə Baba wa Chu,

yee wə nɨ̂ŋ kwaa ə duŋ bə wu.’”

9 Hlaata hlə jə wu həmə gəŋ ə kibalaki ki Jelushalɛŋ mə, bihiŋ chi wu ə kinchu ki chəŋ ntofi bəŋ, yɔɔ bə wu lə, “Ə wə duŋ Ŋwa Nchu, wə tee wa kwe, 10 yu bə́ bieŋna lə, ‘Chu lə yɔɔ ə bənchinda biih fwoŋ wə.’

11 Fi duŋ dəŋ bə́ bieŋna lə, ‘Bə́ jɔŋ wə ə wə nakə kɔɔ lə gbu wo ə tə go kə.’”

12 Jisho chuu bə wu lə, “Kiŋwaati ki Chu yɔ̀ɔ dəŋ lə,

‘Wə kə mɔŋ nə Baba Chu wa kə.’”

13 Bwɔɔ nnu Hlaata mà kaa bə jé yinhliŋ yí mɔŋnə Jisho mə, i hlə no gəŋ yee i kē bwɔɔ ju.

Jisho chɔɔ nimi liih ə Galilii

(Matio 4:12-17; Maak 1:14-15)

14 Jisho mà noo gəŋ chu dɨŋ ə Galilii, i fiila bə muŋga mu Fiana Wɛɛŋ. Hlɨŋ yi ye hlaamə gəŋ ə wɛɛ ŋə bitɨŋ bi həmə binhliŋ. 15 I làanə bəne ə chə́ŋ yí cheenə Chu yibə mə, bəne bənhliŋ dòhi wu.

Bə́ nɨhŋ Jisho ə bə kwuŋ Nashalit

(Matio 13:53-58; Maak 6:1-6)

16 Jisho hlə no gəŋ ə bə́ kwuŋ Nashalit dɔhɔ kkɨŋ i mà ko. Ə màa ə bunte mə, i gəŋ ə chəŋ cheenə Chu mə ye i màa i bā lə bəŋgəŋ. I ja lemi fa bənchee Kiŋwaati ki Chu. 17 Bə́ nə wu kiŋwaati kkɨŋ Ejaya mbɛɛ hlɨŋ Chu mà bieŋ. I hlooli kee dɔhɔ kidi kkɨŋ bə́ mà bieŋ mə lə,

18 “Fiana Wɛɛŋ Baba Chu yo ə mi mə,

yulahalə i ma shaala mi lə mbwo

n'yɔɔ hlɨŋ nwaa ni bə bəne bənjɨnənə.

I ma faana mi lə mbwo

ŋkeeh bəne bbəŋ bə́ dùŋ ə munfwa mə lə bə́ yá yi fwoo bə́,

baa keeh bəmbandii lə bə́ yá yi wɛ díi ŋəbə.

I faŋ dəŋ mi lə mbwo fwoo bəne bbəŋ bə́ kàh munfwa,

19 mbaa n'yɔɔ lə bwɔɔ yo wuna nnu,

Baba ya lə joŋ bəne.”

20 Ye Jisho cheelə kaa nəni, i ka chuu kiŋwaati kie nə bə mbɛɛ nnu i kìli yo ki hlə shii həkwe. Bəne bənhliŋ bbəŋ bə́ mà duŋ bie mu chəŋ cheenə Chu ye mə bɛŋ díi ə wu go. 21 I hlə gbe bən'yɔɔ bə bə́ lə, “Fieŋ ffɨŋ bə wo ə Kiŋwaati ki Chu kɨhŋ mə bwoo wunə ba daŋ.”

22 Bəne wo fi nwaa bə́ gbaaŋ, gəə ŋɨŋ bə́ bə biyɔɔnə binwaa bbɨŋ bi fwoo ə wu jə. Kwaalə, bə́ kaka yee bə́ nāamə, bə́ bīi ləə, “Nu lə ŋwa Joshɛ nəni lə?”

23 Jisho hlə yɔɔ bə bə́ lə, “Ŋkə jɨmə lə bə lə gba ŋgaŋga ni bə mi lə, ‘Mbɛɛ nnu i ŋwùhuŋ bəne, ŋwuhuŋ gbo wo lə.’ Bə lə yɔɔ lə nfə dəŋ bieŋ fəŋ bbɨŋ bə ma wo lə mmà nfəə ə Kapanahuŋ.” 24 Jisho baa yɔɔ bə bə́ lə, “N'yɔ̄ɔ bəŋ kichɛɛŋ lə, kwaalə duŋ ə bə́ bemi mbɛɛ hlɨŋ Chu ə wu kwuŋ kə. 25 Bə kichɛɛŋ, n'yu n'yɔ̄ɔ bə bəŋ lə ə mà duŋ bwɔɔ Elaja mbɛɛ hlɨŋ Chu, jaŋ ba buh bigoŋ bitɔh bə kii buhlɔ, bwi kwo kitɨŋ kie kinhliŋ. Bəkwɛɛ bə bəŋkwu mà duŋ ə kitɨŋ ki Ishlael kie mə ə bwɔɔ yo bəŋ kiŋaaŋkə. 26 Kwaalə, Chu mà kə faŋ nə Elaja ə ju bə go kə, i kaka faŋ ŋkwo wi ə duŋ bə kpɛɛ ŋkwu nnu bə́ mà chee lə Jalefat, ə kitɨŋ ki Shidɔŋ mə. 27 Bə́ hle dəŋ lə, ə mà duŋ bwɔɔ Elisha mbɛɛ hlɨŋ Chu, bəne Bəishlael kiŋaaŋkə kə̀nə jəŋ kinhlanhla, kwaalə mbɛɛ ju ə bə́ mə mà kə ŋwunə kə. Kwaa Naamaŋ wuu mboŋ ə kitɨŋ ki Shilia mə nnu bə́ mà ŋwuhuŋ.”

28 Ye Jisho yɔɔlə nəni, bəne bənhliŋ bbəŋ bə́ mà duŋ ə chəŋ cheenə Chu ye mə wo, tɔ́ŋ ŋəbə bee gbaaŋ. 29 Bə́ ja fa, yəə fu bə wu həmə kibalaki kie mə, bə́ fu bə wu gəŋ ə kəənə kiyi bəŋ kkɨŋ ki mà duŋ ə kɔnɔ ki kibalaki kibə mə, yulahalə bə́ mà kiɛɛ lə bə́ yəə wu i gbe mə. 30 Kwaalə, i bu kah ə bə́ mə kintekinte yee i gə̄ŋ wu fiih.

Jisho fwoo fiana yili ə mbɛɛ go

(Maak 1:21-28)

31 Jisho hlə no bwɔ gəŋ ə Kapanahuŋ, dɔhɔ kidi ə kitɨŋ ki Galilii mə. Lə ə chu ə bunte, i gəŋ yee i kēeh bəne ə chəŋ cheenə Chu mə. 32 Bəne bənhliŋ wə̀lə bə kə̀nə gbo wi kpenə bə keehnə kiih, yulahalə keehnə kiih mà kənə muŋgeni. 33 Mbɛɛ ju mà duŋ ə chəŋ cheenə Chu ye mə, nnu fiana fiŋkwini fi yili dùŋ ə wu mə. I ja yee i gɛ̄ɛmə bə die ntaabə lə, 34 “Hebee Jisho nnu Nashalit, wə kiɛɛ laha ə be go lə? Wə bwo bənləhə laa be lə? Ŋkəla wə. Ə wə Mbɛɛ Wɛɛŋ nnu wə fu ə Chu kwuŋ.”

35 Jisho nyieemi fiana yili yo, yɔɔ lə, “Maalə, fu ə mbɛɛ nu mə.” I hlə tuuli mbɛɛ yo lɛɛ wu həkwe ə bəne dí, hlə fu ə wu go, kwaalə i nakə biaanə wu kə.

36 Bəne bənhliŋ ŋəŋ nəni, gəə ŋɨŋ bə́. Bə́ nāamə, bii ləə, “Bɨhŋ biyɔɔnə nəŋ duŋ ləhəŋ bbɨŋ mbɛɛ nu kə̀nə lə? I kə̀nə muŋgeni bə muŋga muŋkuntaŋ mmuŋ i yɔ̀ɔ bəfiana bəyili bə́ fù ə bəne go.” 37 Hlɨŋ Jisho ni jaa ə bidɔhɔ bie mə binhliŋ.

Jisho ŋwuhuŋ bəne kiŋaaŋkə

(Matio 8:14-17; Maak 1:29-39)

38 Jisho ja fu mu ə chəŋ cheenə Chu ye mə, i gəŋ lɛɛ ə Shaamuŋ chəŋ. Ə mà duŋ gbeni Shaamuŋ kpɛ nə̄nə bə jəŋ. Bə́ noŋ lə Jisho chɨnə wu. 39 I gəŋ ye i màa i nɔ̄ŋ lə, lemi ə wu bəŋ, nyieemi jəŋ ye. I hlə tukwaŋ ə wu go, i ŋwunə. Cha mi, kpɛ yo hlə ja fa kiɛɛ fieŋ fidinə nə bə́.

40 Bwɔɔ nnu kitaŋ màa ki gə̄ŋ chɨŋ, bəne bənhliŋ bbəŋ bə́ mà kənə bəne bbəŋ bə́ màa bə́ gɔ̄ŋ jə́ŋ chili chili hlə yee bə́ jə̄ bə́ bwō bə bə́ ə Jisho go. I hlə yee i tūu ə bə́ go bənhliŋ, bə́ ŋwūnə. 41 Muŋkwini yee mu fū dəŋ ə bəne bədi go kiŋaaŋkə mu gɛ̄ɛmə lə, “Wə dùŋ Ŋwa Nchu.” Kwaalə, Jisho nyieemi lə mu kə yɔɔ lə jə kə, yulahalə mu mà kəla lə Jisho duŋ Nchuu Fwoo nnu Chu mà kaachi yo.

42 Lə butuu fu wu, Jisho no gəŋ ə dɔhɔ kidi mə wuu mboŋ. Bəne she yee bə́ kīɛɛ wu. Bwɔɔ nnu bə́ mà ŋəŋ ə wu go, mə hə chu kiɛɛ lə i no ə kwili libə le mə. Bə́ hlə yee bə́ kīɛɛ jé lə i ba bə bə́. 43 Kwaalə, i nɨhŋ yɔɔ bə bə́ lə, “Ŋkənə bəndontə ba hlɨŋ nwaa ni ki muŋkɨŋ mu Chu ə bidɔhɔ bidi mə dəŋ, yulahalə ə yu fieŋ fɨhŋ ffɨŋ Chu faŋ mi lə mbwo nfə.”

44 I hlə no gəŋ yee i jāa i dòntə hlɨŋ nwaa ə chə́ŋ yí cheenə Chu mə, ə kitɨŋ kie mə kinhliŋ.