Lukaa 3

Keehnə ki Jɔɔŋ N'yiinjɔ

(Matio 3:1-12; Maak 1:1-8; Jɔɔŋ 1:19-28)

1-2 Ə mà duŋ bwɔɔ nnu Jɔɔŋ ŋwa Hlakalia mà duŋ nji, hlɨŋ Chu bwo ə wu mə. Ə bwo duŋ ə kigoŋ kie mə Tibɛliyu hlàah ye Ŋkɨŋ ŋkuntaŋ nnu Luŋ lə ə bigoŋ bəŋ yuufi ə nchɔ bitiŋ. Pwontu Paylɛt hlàah wɛɛ wi kitɨŋ ki Judia mə, Hɛlɔ hlàah ə Galilii. Filip dɨŋ Hɛlɔ màa i hlāah wɛɛ wi Ituliya mə bə wi Telakoniti, Lishania hlàah ə Abileŋ. Ə màa dəŋ bwɔɔ nnu Anash bə Kayifa mà duŋ bikuu bi bəche ntofi. 3 Lə Jɔɔŋ wo hlɨŋ Chu ni, i hlə no gəŋ ə wɛɛ wi bitɨŋ binhliŋ bbɨŋ bi baha ə Kibee ki Joodaŋ mə, yee i dōntə bə bəne lə bə́ fii tɔ́ŋ ŋəbə, i yii bə́ ə njɔ fo Chu lə laamə nə yíwaha yibə. 4 Fieŋ fɨhŋ dùŋ ye Ejaya mbɛɛ hlɨŋ Chu mà bieŋ lə ə Kiŋwaati kiih mə lə,

“Die mbɛɛ yi dīimə ə nji lə,

bə́ bwɛɛ je Baba,

lɛhiŋ yi yee i dūŋ ntiiŋ,

5 kpee bikɔni biŋkuntaŋ bə bitənə binhliŋ,

yiinə fwóŋ ŋənhliŋ,

fə jé yiŋkɔ yí duŋ ntiiŋ,

chɨlə bidu ə jé mə yí duŋ fwɔɔŋ,

6 ə bəne bənhliŋ hlə ŋəŋ ye Chu fwòo bəne.”

7 Ye Jɔɔŋ dontələ nəni, kintu ki bəne hlə bwo lə i yii bə́ ə njɔ. I hlə yɔɔ bə bə́ lə, “Ŋkaani bifɛɛ, ə keeh nyəhə bəŋ lə bə lɔ biwɛɛ bi Chu bbɨŋ bi fwèe bbɨŋ i yá nyii bə bəŋ, maa bə bwo nəni lə? 8 Yee bə fə̂ bieŋ bbɨŋ bi nyìi lə bə fiila tɔ́ŋ ŋieeŋ. Bə kə yee bə yɔ̂ɔ bə go ŋieeŋ lə Ablahaŋ dùŋ Tah ya kə. N'yɔ̄ɔ bə bəŋ lə duŋ ə Chu gaanə tə́ ŋəhŋ ə ŋə chu bwɔni bə Ablahaŋ. 9 Yee bə kə̂lə lə bə́ chiee fú ə binuu bi bite hətɨŋ. Tiɛɛ kinhliŋ kkɨŋ ki dùŋ kə chɔŋ nə sháŋ yinwaa, duŋ ə bə́ shi gba lɛɛ ə gɛŋ go, ki tɔŋ.”

10 Lə bimɔ bi bəne bie wo, bə́ bii bə Jɔɔŋ ləə, “Kkə lə fə ləhəŋ fidiɛɛ lə?”

11 I chuu lə, “Mbɛɛ nnu i kə̀nə bindu bifwe i nə mwe bə mbɛɛ nnu i kə kənə kə, ə mə kənə biləə i ga bə mbɛɛ nnu kə bənə kə.”

12 Bəne bədi bbəŋ bə́ kwò kiŋwaati bwo ə wu go lə i yii bə́ ə njɔ, bə́ bii bə wu ləə, “Mbɛɛ Keehnə, kkə fə ləhəŋ ŋkwo ya lə?”

13 I chuu bə bə́ lə, “Bə kə jəə kpo wi kiŋwaati kahiŋ ye ŋkɨnə yɔɔlə kə.”

14 Bəne bə bicha bwo dəŋ ə wu go yee bə́ bīi dəŋ ləə, “Ŋkwo ya duŋ lə kkə fə ləhəŋ lə?”

I chuu lə, “Bə́ ŋəŋ lə bə́ kə lɔhiŋ bəne bənfaa jə kpo maa bənchaa bieŋ ə bəne go nya kə. Yee bə́ wô njənjə bə fieŋ ffɨŋ bə́ hlùŋ bəŋ mu.”

15 Ye bəne màa bə́ kē lə Nchuu Fwoo nnu Chu mà kaachi yo, bə́ hlə yee bə́ nāamə bieŋ bi Jɔɔŋ, maa yee bə́ hlē lə ləkə ə wu Nchuu Fwoo yo. 16 Jɔɔŋ kələ hlə yɔɔ bə bə́ lə, “N'yīi bəŋ ə duŋ ə njɔ, kwaalə mbɛɛ nnu i kò yo kah mi yu kaani i bwō dɨŋ, ŋkə wunə dəŋ bəmbwɔkwe hlooli gi ŋə bikpa biih kə. Mə yii bəŋ ə njɔ ə duŋ ə Fiana Wɛɛŋ mə maa bə bwii. 17 I yo bə kinfini kiih ə kwaŋ kkɨŋ mə lə yee i hlə̄ gɨŋ ŋə bəjaa ŋie mu, nyaa dɔhɔ ki hlənə kie, buhuŋ gɨŋ ŋə bəjaa ŋie chi ə nchu mə, hlə buhuŋ bibɛɛni bie tɔŋ ə bwii wwuŋ wi fì kə nyɨŋ nə mə.”

18 Ə li nəni ye Jɔɔŋ màa i dōntə hlɨŋ Chu nwaa ni bə bəne i hlə baa nə keehnə ə jé mə kiŋaaŋkə. 19 Kwaalə, i yɔɔ ki fwɔ wi Hɛlɔ nnu i mà duŋ ŋwuŋ hlaahnə, yulahalə Hɛlɔ mà jəə Hɛlɔdia kpɛɛ maani, i baa i yɔ̄ɔ bieŋ biwaha kiŋaaŋkə bbɨŋ Hɛlɔ màa i fə̄. 20 Hɛlɔ hlə kaanə bihi fwɔ wiih we yɔɔ lə bə́ kwo gəŋ fwaŋ Jɔɔŋ ə chəŋ munfwa mə.

Jɔɔŋ yii Jisho ə njɔ

(Matio 3:13-17; Maak 1:9-11)

21 Bwɔɔ nnu Jɔɔŋ mà kaanə yii bəne bie ə njɔ, Jisho bwo dəŋ i yii wu ə njɔ. Lə Jisho yee i chēe Chu, buuli wɛɛmə, 22 Fiana Wɛɛŋ hlili bwo ə wu bəŋ ye kikuuku lə. Die bwo mə buh lə, “Nu lə ŋiaa, nnu i dùŋ tɔŋ lɨŋŋ, ŋ'wò njənjə bə wu gbaaŋ.”

Kichəŋ ki Jisho

(Matio 1:1-17)

23 Jisho mà duŋ ye bigoŋ mbwɛɛnshɔ lə bwɔɔ nnu i mà chɔɔ nimi liih. Bəne mà hle lə i dùŋ ŋwa Joshɛ, Joshɛ duŋ ŋwa Heli. 24 Heli mà duŋ ŋwa Matat, Matat duŋ ŋwa Lebi, Lebi mà duŋ ŋwa Melki, Melki duŋ ŋwa Jana, Jana mà duŋ ŋwa Joshɛ. 25 Joshɛ mà duŋ ŋwa Matatia, Matatia duŋ ŋwa Emɔ, Emɔ mà duŋ ŋwa Nahuŋ, Nahuŋ duŋ ŋwa Eshli, Eshli mà duŋ ŋwa Nagay. 26 Nagay mà duŋ ŋwa Maat, Maat mà duŋ ŋwa Matatia, Matatia mà duŋ ŋwa Shemeŋ, Shemeŋ duŋ ŋwa Joshɛ, Joshɛ mà duŋ ŋwa Joda. 27 Joda mà duŋ ŋwa Juhana, Juhana mà duŋ ŋwa Lesha, Lesha mà duŋ ŋwa Jelubabɛl, Jelubabɛl duŋ ŋwa Shiltiɛl, Shiltiɛl mà duŋ ŋwa Neli. 28 Neli mà duŋ ŋwa Melki, Melki mà duŋ ŋwa Adi, Adi mà duŋ ŋwa Koshaŋ, Koshaŋ mà duŋ ŋwa Elmadaŋ, Elmadaŋ mà duŋ ŋwa El. 29 El mà duŋ ŋwa Joshwa, Joshwa duŋ ŋwa Eliyesha, Eliyesha mà duŋ ŋwa Joliŋ, Joliŋ mà duŋ ŋwa Matat, Matat mà duŋ ŋwa Lebi. 30 Lebi mà duŋ ŋwa Shimiyɔŋ, Shimiyɔŋ duŋ ŋwa Juda, Juda mà duŋ ŋwa Joshɛ, Joshɛ duŋ ŋwa Jonaŋ, Jonaŋ mà duŋ ŋwa Eliyakiŋ. 31 Eliyakiŋ mà duŋ ŋwa Melia, Melia duŋ ŋwa Mena, Mena mà duŋ ŋwa Matata, Matata duŋ ŋwa Nataŋ, Nataŋ mà duŋ ŋwa Daafi. 32 Daafi mà duŋ ŋwa Jeshi, Jeshi duŋ ŋwa Obed, Obed mà duŋ ŋwa Bwash, Bwash duŋ ŋwa Shala, Shala mà duŋ ŋwa Nashɔŋ. 33 Nashɔŋ mà duŋ ŋwa Aminada, Aminada duŋ ŋwa Amiŋ, Amiŋ mà duŋ ŋwa Alni, Alni mà duŋ ŋwa Heshlɔŋ, Heshlɔŋ mà duŋ ŋwa Pele, Pele duŋ ŋwa Juda. 34 Juda mà duŋ ŋwa Jekɔb, Jekɔb duŋ ŋwa Ayjik, Ayjik mà duŋ ŋwa Ablahaŋ, Ablahaŋ duŋ ŋwa Tɛla, Tɛla mà duŋ ŋwa Nahol. 35 Nahol mà duŋ ŋwa Shelu, Shelu duŋ ŋwa Leyu, Leyu mà duŋ ŋwa Pelek, Pelek duŋ ŋwa Ebel, Ebel mà duŋ ŋwa Shela. 36 Shela mà duŋ ŋwa Kana, Kana mà duŋ ŋwa Alfasha, Alfasha mà duŋ ŋwa Sheŋ, Sheŋ duŋ ŋwa Nuah, Nuah mà duŋ ŋwa Lamek. 37 Lamek mà duŋ ŋwa Metushela, Metushela duŋ ŋwa Enɔk, Enɔk mà duŋ ŋwa Jaled, Jaled duŋ ŋwa Mahalalel, Mahalalel mà duŋ ŋwa Kana. 38 Kana nnu i mà duŋ ŋwa Ɛno, Ɛno duŋ ŋwa Shet, Shet mà duŋ ŋwa Adaŋ, Adaŋ duŋ ŋwa Nchu.