Keehnə ki Jɔɔŋ N'yiinjɔ
3
Ə mà duŋ ə bwɔɔ yo bəŋ, Jɔɔŋ N'yiinjɔ fu gəŋ ə nji ə bidi bi Judia mə, yee i dōntə bə bəne lə, 2 “Bə fii tɔ́ŋ ŋieeŋ, yulahalə muŋkɨŋ mu buh mwe baha baha.” 3 Jɔɔŋ nu lə mbɛɛ hlɨŋ Chu nnu Ejaya ə bwɔɔ yo bəŋ mà yɔɔ yo kiih lə,“Die mbɛɛ yi dīimə ə nji lə,
‘Bə́ bwɛɛ je Baba,
lɛhiŋ yi yee i dûŋ ntiiŋ.’”
4 Jɔɔŋ màa i dɔ̄hiŋ bindu bbɨŋ bə́ fə̀ bə lú ŋə nyaŋ nni bə́ chèe lə kamɛɛl, i kwàa kicha chi kkɨŋ bə́ fə̀ bə bwa wi nyáŋ, biləə biih dùŋ chə́mə bə kituŋ ki nji. 5 Ye i màa i dōntə lə nəni, bəne hlə yee bə́ fū ə Jelushalɛŋ bə ə bidi bi Judia mə binhliŋ maa wɛ́ɛ ŋŋəŋ ŋə baha ə Kibee ki Joodaŋ mə ŋənhliŋ, bə́ gə̀ŋ ə wu go. 6 Ye bə́ màa bə́ gə̄ŋ lə nəni bə́ yɔ̀ɔ yíwaha yibə bə Chu, Jɔɔŋ hlə yee i yīi bə́ ə njɔ ə Kibee ki Joodaŋ mə.
7 Kwaalə, bwɔɔ nnu i mà ŋəŋ ye Bəfalashii bə Bəshadushii kiŋaaŋkə bwo lə i yii bə́ ə njɔ, i yɔɔ bə bə́ lə, “Ŋkaani bifɛɛ, ə keeh nyəhə bəŋ lə bə lɔ biwɛɛ bi Chu bbɨŋ bi fwèe bbɨŋ i yá nyii bə bəŋ, maa bə bwo nəni lə? 8 Yee bə fə̂ bieŋ bbɨŋ bi nyìi lə bə fiila tɔ́ŋ ŋieeŋ. 9 Bə kə yee bə yɔ̂ɔ bə go ŋieeŋ lə, ‘Ablahaŋ dùŋ Tah ya kə.’ N'yɔ̄ɔ bə bəŋ lə duŋ ə Chu gaanə tə́ ŋəhŋ ə ŋə chu bwɔni bə Ablahaŋ. 10 Yee bə kə̂lə lə bə́ chiee fú ə binuu bi bite hətɨŋ. Tiɛɛ kinhliŋ kkɨŋ ki dùŋ kə chɔŋ nə sháŋ yinwaa, duŋ ə bə́ shi gba lɛɛ ə gɛŋ go, ki tɔŋ. 11 N'yīi bəŋ ə njɔ yulahalə bə fiila tɔ́ŋ ŋieeŋ. Kwaalə mbɛɛ nnu i yu bwō yo ə mi dɨŋ, i ko kah mi. Ŋkə wunə bəmbwɔkwe hlooli bikpa biih kə. Mə yii bəŋ ə njɔ ə duŋ ə Fiana Wɛɛŋ mə maa bə bwii. 12 I yo bə kinfini kiih ə kwaŋ kkɨŋ mə lə yee i hlə̄ gɨŋ ŋə bəjaa mu, nyaa dɔhɔ ki hlənə kie, buhuŋ gɨŋ ŋə bəjaa ŋie chi ə nchu mə, hlə buhuŋ bibɛɛni bie tɔŋ ə bwii wwuŋ wi fì kə nyɨŋ nə mə.”
Jɔɔŋ yii Jisho ə njɔ
13 Ye Jɔɔŋ màa i yīilə bəne ə njɔ nəni, Jisho hlə ja ə bidi bi kitɨŋ ki Galilii mə gəŋ ə Kibee ki Joodaŋ mə lə Jɔɔŋ yii dəŋ wu ə njɔ. 14 Kwaalə Jɔɔŋ yee i nɨ̄hŋ i yɔ̄ɔ lə, “Ə wə nnu wə hə kənə bən'yii mi ə njɔ, wə kaka yee wə bwō chuu hə mi lə ləhəŋ lə?” 15 Jisho chuu bə wu lə, “Cheekwaŋ fi duŋ nəni fidiɛɛ. Ə ni je mə nni kkə kənə bənfə fieŋ finhliŋ fo fi duŋ ntiiŋ ə Chu fwi.” Nəni Jɔɔŋ hlə bemi bən'yii Jisho ə njɔ. 16 Cha mi Jisho ja yee i fū mə njɔ. Ye i màa i fūlə, buuli wɛɛmə, i ŋəŋ ə Fiana Chu go ye i hlīli i bwō ye kikuuku lə, bwo shii ə wu go. 17 Fi duŋ lə, die bwo mə buh lə, “Nu lə Ŋiaa nnu i dùŋ tɔŋ lɨŋŋ. Ŋ'wò njənjə bə wu gbaaŋ.”