Matio 2

Bəne bəŋkələ bieŋ gəŋ kohi Jisho

Bə́ mà bwee Jisho ə kwili li Bɛtuluhɛŋ, ə bidi bi Judia mə. Ə mà duŋ ə bwɔɔ yo bəŋ, Hɛlɔ dùŋ Ŋkɨŋ nnu Judia. Fi duŋ lə bəne bəŋkələ bieŋ bədi mà fwoo ə kitɨŋ kidi kwuŋ wɛɛ wwuŋ kitaŋ fù, bwo ə Jelushalɛŋ yee bə́ bīi ləə, 2 “Ŋkɨŋ Bəjuu nnu bə́ bwee yo, yo fəhəŋ lə? Kkə bīi nəni yulahalə kkə ŋəŋna ə fintoola fiih go wɛɛ wwuŋ kitaŋ fù, kkə hlə yee kkə bwō bəmbwɔkwe bə wu.” 3 Bwɔɔ nnu Ŋkɨŋ Hɛlɔ mà wo hlɨŋ nih tɔŋ nənə wu, nənə maa bəne bə Jelushalɛŋ bənhliŋ. 4 I dii bəche ntofi bəŋkuntaŋ bəŋkuntaŋ bənhliŋ bə bəne bənhliŋ bbəŋ bə́ kèeh bəŋkɨnə bə Chu, bə́ bumə. I bii bə bə́ ləə, ə fəhəŋ kibɛɛ nnu bə́ duŋ bəmbwee Jisho Kleto Nchuu Fwoo nnu Chu mà kaachi yo lə? 5 Bə́ chuu lə, “Bə́ duŋ bəmbwee wu ə kwili li Bɛtuluhɛŋ mə, ə bidi bi Judia mə. Fɨhŋ nini duŋ ye mbɛɛ hlɨŋ Chu mà bieŋ lə lə, 6 ‘Wə Bɛtuluhɛŋ ə kitɨŋ ki Juda mə,

wə kə hlee lə wə duŋ kwili litənə gbaaŋ ə kitɨŋ ki Juda mə kə.

Wə kələ lə mbɛɛ yá yi fu ə kwili lɨhŋ mə nnu

mə lə yee i hlāah bəne bəŋŋ bə Ishlael.’”

7 Ŋkɨŋ Hɛlɔ hlə dii bəne bəŋkələ bieŋ bie ə nələ mə bii ntakə bə bə́ bəŋ'wo bwɔɔ nnu fintoola fie mà fu yo. 8 Ye i wo lə, i hlə faŋ bə́ ə Bɛtuluhɛŋ yɔɔ lə, “Bə gəŋ diɛɛ gbo bəŋkiɛɛ ŋiaŋ yo kinwaa. Bwɔɔ nnu bə kiɛɛ ŋəŋ ə wu go, bə fiimə bwo yɔɔ chuu mi, fo nlə ŋgəŋ mbwɔ dəŋ kwe bə wu.” 9 Bəne bie wo ye Ŋkɨŋ yo yɔɔlə nəni, bə́ hlə fu yee bə́ jāa bə́ gə̄ŋ. Bwɔɔ nnu bə́ màa bə́ gə̄ŋ, fi duŋ lə fintoola ffɨŋ bə́ mà ŋəŋ fie ə wɛɛ wwuŋ kitaŋ fù we mə mà fwoo yee fi jāa fi gə̄ŋ bə́ fwi fi nyīi bə́ je. Fi hlə gəŋ nəni gəŋ bwii dɔhɔ kkɨŋ ŋiaŋ yo duŋ kie, hlə lemi ba həmə. 10 Ye bə́ mà ŋəŋ lə ə fintoola fie go nəni, kintɨŋ duŋ bə bə́ gbaaŋ, gbo nwaa bə́. 11 Bə́ hlə lɛɛ gəŋ mu chəŋ nni ŋiaŋ yo dūŋ ye, ŋəŋ ŋiaŋ yo bəə mahni Meeli, hlə gbe ə wu fwi bəŋkohi wu. Ye bə́ kōhi lə wu nəni, bə́ hlə wɛ bibwa bibə fwoo nnə́ ŋəbə nə wu. Bieŋ bɨhŋ mà duŋ chwaa kikpo kige, bə kijooni kidi kkɨŋ bə́ chèe lə flaŋkinshiŋ, maa mɛŋ mənfuchee məndi mməŋ bə́ chèe lə mɛɛl. 12 Chu hlə kɨnə bə́ ə yobutuu mə lə, bə́ kə baa lə chu dɨŋ lə bə́ gəŋ ŋəŋ Ŋkɨŋ Hɛlɔ kə. Bə́ hlə chu dɨŋ ə bə́ kwuŋ ə je ji mə chili.

Joshɛ jə ŋiaŋ yo bəə kpɛɛ lɔ gəŋ ə Ijip

13 Ye bəne bəŋkələ bieŋ bie no lə gəŋ, fi duŋ lə nchinda Baba mà fwoo bwo ə Joshɛ go ə yobutuu mə yɔɔ bə wu lə, “Jaka, wə jə ŋiaŋ yo bəə mahni bə lɔ gəŋ ə kitɨŋ ki Ijip mə, bə duŋ mə gəŋ bwii bwɔɔ nnu n'yá yɔɔ lə bə fiimə. N'yɔ̄ɔ nəni yulahalə Ŋkɨŋ Hɛlɔ lə yee i kīɛɛ bənjii ŋiaŋ yo.” 14 Joshɛ hlə ja fa, jə ŋiaŋ yo bəə mahni ə butuu lɔ gəŋ ə Ijip, 15 bə́ duŋ mə gəŋ bwii bwɔɔ nnu Ŋkɨŋ Hɛlɔ mà la. Fi mà duŋ nəni bənfə lə fi bwo fu yəəŋ ye Chu mà yɔɔlə ə biwu bi mbɛɛ hlɨŋ wih mə lə, “Ncheela jə Ŋiaa, mə lə fu ə duŋ ə kitɨŋ ki Ijip mə.”

Ŋkɨŋ Hɛlɔ jii bwɔni ə Bɛtuluhɛŋ

16 Bwɔɔ nnu Hɛlɔ mà ŋəŋ lə bəne bəŋkələ bieŋ bəhŋ fiha wu, fi fwee wu hədɨŋ gbaaŋ. I hlə faŋ bəne lə bə́ gəŋ ə Bɛtuluhɛŋ maa ə wɛ́ɛ ŋŋəŋ ŋə baha mə ŋənhliŋ, bə́ jii bwɔni bəniɛ bbəŋ bə́ dùŋ gbe jə ə bigoŋ bəŋ bifwe chu dɨŋ. I mà nə bigoŋ bɨhŋ nəni bələ ye i mà bii lə bə bəne bəŋkələ bieŋ bie wo kinwaa bwɔɔ nnu bə́ mà ŋəŋ yo ə fintoola fie go. 17 Bə́ gəŋ jii bwɔni bie nəni, fi hlə wunə ye mbɛɛ hlɨŋ Chu Jelimia mà yɔɔlə chi lə,

18 “Bə́ woo liwili ə kwili li Lama mə.

Mbɛɛ dē bə die ntaabə, i dē i bɨ̄nə,

ə duŋ Lachɛ nnu i dē bwɔni biih.

Bə́ dɛ̄hiŋ wu hləŋ hləŋ i nɨ̄hŋ,

yulahalə bwɔni biih kaa.”

Bə́ Joshɛ no ə Ijip fiimə chu dɨŋ

19 Ə chulə Ŋkɨŋ Hɛlɔ laa, fi duŋ lə nchinda Baba mà fwoo bwo ə Joshɛ go ə yobutuu mə ə kitɨŋ ki Ijip mə, hlə yɔɔ bə wu lə, 20 “Jaka wə jə ŋiaŋ yo bəə mahni bə fiimə chu dɨŋ ə kitɨŋ ki Ishlael mə, yulahalə bbəŋ bə́ màa bə́ kīɛɛ bie lə bə́ jii ŋiaŋ nu mà kpee.” 21 Nəni Joshɛ hlə ja fa jə ŋiaŋ yo bəə mahni yee bə́ chū dɨŋ ə kitɨŋ ki Ishlael mə. 22 Kwaalə, bwɔɔ nnu i màa i bwō, i wo lə Akiliyu ŋwa Ŋkɨŋ Hɛlɔ diee kiŋkaa ki tili mə Judia i yu hlāah, i lɔ bəŋgəŋ mə. Bə́ baa kɨnə wu ə yobutuu mə lə, i kə gəŋ nə mə kə. I hlə gah gəŋ ə duŋ ə bidi bi Galilii mə, 23 i gəŋ yee i dūŋ ə kwili lidi mə llɨŋ bə́ chèe lə Nashalit. Fi mà kah nəni bəmbwo gbeemə ye mbɛɛ hlɨŋ Chu mà yɔɔlə chi lə, “Bə́ lə yee bə́ chēe wu lə mbɛɛ nnu Nashalit.”