Matio 1

Hlɨŋ Nuaa ki Jisho nni

Matio

mà bieŋ

Kichəŋ ki Jisho Kleto

Ŋəhŋ lə yíi ŋə bəche Jisho Kleto: Jisho Kleto mà duŋ ŋwa kichəŋ ki Ŋkɨŋ Daafi, nnu i mà duŋ ŋwa Ablahaŋ. 2 Ablahaŋ mà duŋ che Ayjik, Ayjik duŋ che Jekɔb, Jekɔb duŋ che Juda bəə bəmaani biih bəniɛ, 3 Juda duŋ che Pele bə Jela, mahni bə́ duŋ Tamal. Pele duŋ che Heshlɔŋ, Heshlɔŋ duŋ che Laŋ. 4 Laŋ duŋ che Aminada, Aminada duŋ che Nashɔŋ, Nashɔŋ duŋ che Shalmuŋ. 5 Shalmuŋ duŋ che Boash nnu mahni mà duŋ Lahab. Boash duŋ che Obed nnu mahni mà duŋ Lut. Obed duŋ che Jeshi. 6 Jeshi duŋ che Ŋkɨŋ Daafi.

Ŋkɨŋ Daafi duŋ che Sholomuŋ nnu mahni mà duŋ kpɛɛ Yulia. 7 Sholomuŋ duŋ che Lihobwaŋ, Lihobwaŋ duŋ che Abija, Abija duŋ che Asha. 8 Asha duŋ che Jehoshefat, Jehoshefat duŋ che Jolaŋ, Jolaŋ duŋ che Yushaya. 9 Yushaya duŋ che Jotaŋ, Jotaŋ duŋ che Ahash, Ahash duŋ che Hejikia, 10 Hejikia duŋ che Manashi, Manashi duŋ che Amɔŋ^ª, Amɔŋ duŋ che Joshia. 11 Joshia duŋ che Jekonia bə bəmaani biih. Bə́ mà bwee bə́ ə shiee chɛɛ lə ə duŋ bwɔɔ nnu bəne bə Babilɔŋ mà kwo bəne Bəishlael gəŋ bə bə́ ə kitɨŋ kibə ki Babilɔŋ mə.

12 Ə chu bwɔɔ nnu dɨŋ, ye bə́ mà kwolə bəne Bəishlael gəŋ bə bə́ Babilɔŋ, Jekonia mà duŋ che Shiltiɛl, Shiltiɛl duŋ che Jelubabɛl, 13 Jelubabɛl duŋ che Abiyud, Abiyud duŋ che Eliakiŋ, Eliakiŋ duŋ che Ashɔ, 14 Ashɔ duŋ che Jadɔk, Jadɔk duŋ che Akiŋ, Akiŋ duŋ che Ɛliyud, 15 Ɛliyud duŋ che Ɛliyasha, Ɛliyasha duŋ che Mataŋ, Mataŋ duŋ che Jekɔb. 16 Jekɔb duŋ che Joshɛ nyimi Meeli, Meeli duŋ nnu i mà bwee yo Jisho, nnu bə́ chee yo lə Kleto.

17 Nəni bəche kichəŋ ki Jisho kɨhŋ duŋ yuufi ə nchɔ binua chɔɔ jə ə Ablahaŋ go bwo bwii ə Ŋkɨŋ Daafi go, baa duŋ dəŋ yuufi ə nchɔ binua chɔɔ jə ə Ŋkɨŋ Daafi go bwo bwii bwɔɔ nnu bə́ mà kwo bəne Bəishlael gəŋ bə bə́ ə Babilɔŋ. Chɔɔ jə bwɔɔ nnu bə́ mà kwo yo bəne Bəishlael bwo bwii bwɔɔ nnu bə́ mà bwee Kleto mà duŋ dəŋ bəche kichəŋ kibə duŋ yuufi ə nchɔ binua.

Ye bwee li Jisho mà jaa lə

(Lukaa 2:1-7)

18 Bwee li Jisho Kleto mà jaa li ə je ni mə nəni. Mahni Meeli mà duŋ bə́ hə kaachi lə i yá duŋ kpɛɛ Joshɛ. Bə́ kaani kə kwaalə biah le, fi bwo fu lə i yo bə te ə muŋgeni mu Fiana Wɛɛŋ mə. 19 Ye fi mà kah'lə nəni, Joshɛ nyimi Meeli mà duŋ mbɛɛ ntiiŋ, i nakə leki bənnə wu giaali kə, i ŋəŋ lə bəə wu lə ga biah le ə nələ mə. 20 Ye i màa i kaani lə i hlē bənfə nəni, fi duŋ lə nchinda Baba mà jaa bwo ə yobutuu mə bwɔɔ nnu i màa i nɔ̄ŋ kinɨŋ yɔɔ bə wu lə, “Joshɛ, ŋwa Ŋkɨŋ Daafi, wə kə lɔɔ bənjə Meeli mah chəŋ wa kə, yulahalə te llɨŋ i yo le bə li, i fwaa li ə muŋgeni mu Fiana Wɛɛŋ mə. 21 Mə bwee ŋiaŋ nyo ə wə do wu yii lə Jisho^ª, yulahalə mə fwoo bəne biih ə yíwaha yibə mə.” 22 Bieŋ bɨhŋ binhliŋ mà duŋ bənfə lə fi bwo fu yəəŋ ye Baba mà yɔɔlə ə biwu bi mbɛɛ hlɨŋ wih mə lə, 23 “Bə wələ wo, hlɔŋ ŋiaŋ kpɛ ju nnu i kaani kə kələ nyo kə, mə lə fwaa te, bwee ŋiaŋ nyo ə bə́ do wu lə Ɛmanuwel.” Yii lɨhŋ duŋ lə, “Chu yo bə be.” 24 Ye yobutuu ye kwolə Joshɛ nəni, lə i ŋənə, i hlə fə ba ye nchinda Baba yo hə yɔɔlə bə wu. I mà jəə Meeli ye kpɛɛ lə ə wu chəŋ, 25 kwaalə bə́ bəə wu nakə yee bə́ nɔ̄ŋ kintaŋ kə. Bə́ hlə duŋ nəni gəŋ bwii bwɔɔ nnu Meeli mà bwee yo. Joshɛ do yii li ŋiaŋ yo lə Jisho.