Lukaa 2

Meeli bwee Jisho

Ə mà duŋ ə bwɔɔ yo bəŋ, nlaŋ fu lə bə́ fa bəne bənhliŋ bbəŋ bə́ dùhŋ ə bitɨŋ bi mbiŋ nnu Luŋ mə. I mà fu ə kayisha Agoshtu jə, nnu i mà duŋ yo Ŋkɨŋ ŋkuntaŋ nnu həmə. 2 Nfa nu mà duŋ nnu fwii bwɔɔ nnu Kwilinu mà duŋ mbɛɛ ŋkɨnə nnu Luŋ nnu i hlàah wɛɛ wi kitɨŋ ki Shilia. 3 Nəni, bəne bənhliŋ hlə yee bə́ kwə̄lə bə́ chù dɨŋ ə kitɨŋ kibə kwuŋ, lə bə́ bieŋ yíi ŋəbə, fa bə́.

4 Joshɛ mà fwoo dəŋ ə Nashalit ə kibalaki kitənə kidi ki Galilii mə, biŋ gəŋ ə Bɛtuluhɛŋ ə wɛɛ wi kitɨŋ ki Judia mə kkɨŋ bə́ mà bwee Ŋkɨŋ Daafi. I mà gəŋ mə yulahalə i mà duŋ mbɛɛ ə kichəŋ ki Ŋkɨŋ mə. 5 Joshɛ mà gəŋ bəə Meeli nnu i mà lɛɛla lə i yá bwo duŋ kpɛɛ, i dùŋ bə te. 6 Ye bə́ mà gəŋ bwiilə həmə, bwɔɔ wi bweenə bwo wunə. 7 I bwee ŋiaani nnu fwii ə duŋ ŋiaŋ nyo, bini wu ə kindu mə, nɔhiŋ chi wu ə gbuh wwuŋ nyáŋ dì mə, yulahalə bə́ mà jɨna dɔhɔ ki nɔŋnə ə chəŋ bəne bə kpuuni mə.

Nchinda Baba yɔɔ ki bwee le bə bənfwoŋ shɔ́ŋ

8 Ə mà duŋ ə bwɔɔ yo bəŋ, bənfwoŋ shɔ́ŋ bədi duŋ baha ə kwili le go, bə́ fwòŋ shɔ́ŋ yibə ə butuu. 9 Nchinda Baba bu gənə fu bwo ə bə́ fwi, kinchaa ki Chu tə ə dɔhɔ kkɨŋ bə́ mà duŋ kie mə, nɨŋ kwo bə́ gbaaŋ. 10 Kwaalə, nchinda yo yɔɔ bə bə́ lə, “Bə́ kə lɔɔ kə. Bə́ wo, mbwoo chəə bəŋ bə́ hlɨŋ yeŋ nwaa, nni mə lə nə kintɨŋ kiŋkuntaŋ bə bəne bənhliŋ. 11 Butuu bu daŋ buhŋ bə́ bweela Nchuu Fwoo ə kwili li Ŋkɨŋ Daafi mə nnu i duŋ Kleto Baba. 12 Fɨhŋ lə duŋ kinyii bənyii bəŋ ŋiaŋ yo. Bə́ lə gəŋ ŋəŋ ə wu go, bə́ bina wu ə kindu mə nɔhiŋ chi ə gbuh wwuŋ nyáŋ dì mə.”

13 Həmə nəni, bə́ gənə ŋəŋ nchinda Chu yo bə kimɔ kidi kiŋaaŋkə bə́ nə̄ kindohi bə Chu bə́ yɔ̄ɔ lə,

14 “Kiŋkohi yee ki dūŋ bə Chu nnu i dùŋ yo ə buh

kindunshiiŋ yee ki dūŋ yaŋ kwe bə bəne bbəŋ Chu wò njənjə bə bə́.”

15 Bwɔɔ nnu bənchinda bə Chu bie mà too bənfiimə biŋ chu buh, bənfwoŋ shɔ́ŋ bie yɔɔ bə go ŋəbə lə, “Kkə gəŋ ə Bɛtuluhɛŋ fidiɛɛ, kkə gəŋ ŋəŋ fieŋ ffɨŋ fi duŋna fie ffɨŋ Chu fəə lə kkə kələ.”

16 Cha mi, bə́ hlə no lələ gəŋ chichii gəŋ ŋəŋ Joshɛ bəə Meeli maa ŋiaŋ yo bə́ nɔhaŋ wu ə gbuh wi nyáŋ mə. 17 Ə chulə bə́ gəŋ ŋəŋ lə, bə́ hlə gbe bənachɛ bieŋ bɨhŋ binhliŋ bbɨŋ nchinda Chu hə yɔɔ bə́ ki ŋiaŋ yo. 18 Gəə ŋɨŋ bəne bənhliŋ bbəŋ bə́ wo bieŋ bbɨŋ bənfwoŋ shɔ́ŋ bəhŋ hə yɔɔ bə bə́. 19 Kwaalə, Meeli wo wu fiih i chi hə dɨŋ yee i hlē bwɔɔ mənhliŋ. 20 Bənfwoŋ shɔ́ŋ bie fiimə yee bə chū dɨŋ bə́ dòhi Chu yulahalə bə́ gəŋna gəŋ ŋəŋ bieŋ binhliŋ mə dəŋ yəəŋ ye nchinda Chu hə nachɛ lə bə́.

Bə́ gəŋ nə Jisho bə Chu ə chəŋ ntofi mə

21 Lə ŋiaŋ yo bwii joo nyaaŋ, bə́ yieŋ wu jo, hlə do wu yii lə Jisho, yii lɨhŋ duŋ dəŋ ye llɨŋ nchinda Chu mà yɔɔ bwɔɔ nnu mahni mà fwaa te liih.

22 Bwɔɔ mà bwo wunə bəntofi lə bə́ wii go ŋəbə ye bəŋkɨnə bə Mushe mà kiɛɛ lə. Bə́ hlə jə ŋiaŋ yo biŋ ə Jelushalɛŋ bəŋgəŋ nə wu bə Baba. 23 Fieŋ fɨhŋ duŋ ye bə́ mà bieŋ ə Kiŋwaati ki Bəŋkɨnə bə Chu mə lə,

“Ə mbɛɛ yá bwee ŋiaani nnu fwii ə duŋ ŋiaŋ nyo,

i nə wu bə Chu.”

24 Bə́ gəŋ bəŋgəŋ ntofi bə bikuuku bifwe, ləkə bə bwɔni bə nyɔ́ŋ bəfwe bələ ye fi mà duŋ ə Kiŋwaati ki Baba ki Bəŋkɨnə mə.

25 Ə mà duŋ ə bwɔɔ yo bəŋ, nyo ju mà duŋ ə Jelushalɛŋ nnu bə́ chèe wu lə Shimiyɔŋ. I mà duŋ mbɛɛ ntiiŋ i nɨ̀ŋ ye Chu kiɛɛ lə, i màa i kē mbɛɛ nnu i yá bwo diɛɛ tɔ́ŋ ŋə bəne Bəishlael. Fiana Wɛɛŋ mà duŋ ə wu mə, 26 i ma fəə ba i kələ lə kpe yá jəə wu i kaani kə ŋəŋ nə ə Nchuu Fwoo Baba nnu i mà kaachi yo go kə. 27 Fiana Wɛɛŋ ja fə Shimiyɔŋ gəŋ ə chəŋ ntofi mə. Ə chulə Joshɛ bəə Meeli bwo bə ŋiaŋ ə chəŋ ntofi mə bənfə ye bəŋkɨnə kìɛɛ lə, 28 Shimiyɔŋ jə ŋiaŋ yo kwaamə hlə chɔɔ bənfaŋ kindohi ki Chu, yɔɔ lə,

29 “Baba, ye wə fə lə ŋkaachi wa yo bwoo wunə,

bu jə kwaa mbɛɛ wa nimi ə kindunshiiŋ mə.

30 Díi ŋəŋŋ ŋəŋna ə Nchuu Fwoo

31 nnu wə faŋ yo, nnu bəne bənhliŋ lə ŋəŋ ə wu go.

32 I yá yi duŋ kinchaa ki bəne bbəŋ bə́ dùŋ kə duŋ nə Bəishlael,

fo bə́ dəŋ lə yee bə́ hlē wə,

fə bə́ tuuli yii li bəne bwo bə Ishlael hə buh.”

33 Che ŋiaŋ bə mah ŋiaŋ yo wo bieŋ bbɨŋ Shimiyɔŋ yɔɔ bie ə kwoo ki ŋiaŋ nu bəŋ, gbo kpe bə́. 34 I hlə hləmə bə́, yɔɔ bə Meeli mahni lə, “Chu ma bwaa ŋwa nunu, mbwo wi nu lə fə ə bəne Bəishlael kiŋaaŋkə gbe, ə bədi yá ja bu janə. I yá duŋ kinyii kkɨŋ bəne yá yɔɔ bieŋ ə wu go. 35 Nəni, ə fɨhŋ hlə yee fi nyīi bieŋ bbɨŋ bəne nə̀lə ə tɔ́ŋ ŋəbə mə. Bieŋ bɨhŋ binhliŋ yá yi fə ə tɔŋ lo duŋ ye bə́ bɛŋ lə bə fibɛ.”

36 Ə mà duŋ dəŋ ə bwɔɔ yo bəŋ, kpɛ ju mà duŋ bə́ chèe wu lə Ana, ə duŋ mbɛɛ hlɨŋ Chu. I mà duŋ ŋwa Fanuɛl mbɛɛ ə kichəŋ ki Asha mə. Kpɛ nu mà dɨŋna gbaaŋ. I mà duŋna ə biah mə bəə nyimi bigoŋ fumanyaaŋ kwaa, nyimi hlə kpe. 37 I ba kwaa wu fiih kpɛɛ ŋkwu, i ba ba ə chəŋ ntofi mə bəŋkohi Chu ə butuu bə bushi, i shì biləə, i chèe Chu. Bigoŋ biih mà duŋ gbi nyaaŋ ə nchɔ binua (84). 38 Kwaa ə bwɔɔ yo bəŋ nnu bə́ hə bwo yo bə ŋiaŋ yo ə chəŋ ntofi mə, kpɛ yo bwo ŋəŋ bə́, hlə nə kimbaafɛɛ bə Chu, yɔɔ ki ŋiaŋ nu bə bəne bənhliŋ bbəŋ bə́ màa bə́ kē bwɔɔ nnu Chu yá yah bəne bə Jelushalɛŋ ə ŋgə mə.

39 Bwɔɔ nnu Joshɛ bə Meeli mà fə kaa bieŋ bɨhŋ binhliŋ ye bəŋkɨnə bə Chu mà kiɛɛlə, bə́ hlə fiimə chu dɨŋ ə kwili libə li Nashalit ə wɛɛ wi kitɨŋ ki Galilii mə. 40 Ŋiaŋ nu hlə yee i kō, i tà gbo, i fiila bə bufe buŋkuntaŋ, kwáŋ ŋə Chu dùŋ ə wu bəŋ.

Jisho gəŋ she ə chəŋ ntofi Chu mə

41 Che Jisho bə mahni màa bə́ bā bəmbiŋ gəŋ ə Jelushalɛŋ bigoŋ binhliŋ ə Chɔnɔ ki Ŋkabəŋ mə. 42 Lə Jisho bwii bigoŋ yuufi ə nchɔ bifwe, bə́ dəŋ baa biŋ ə Chɔnɔ kie mə ye bə́ màa bə́ bā lə bəmbiŋ. 43 Ye bə́ mà dilə kaa Chɔnɔ kie, ə chulə yee bə́ kwə̄lə, ŋiaŋ nu Jisho she dɨŋ ə Jelushalɛŋ, kwaalə tili bə mahni mà kə kələ kə. 44 Bə́ jaa butuu bumbɨŋ, bə́ hlè kwaa lə i yo ə kintu ki bəne kkɨŋ bə́ həə bə́ jāa kie bə ki. Bə́ hlə chɔɔ yee bə́ kīɛɛ wu ə kichəŋ kibə mə maa ə binshiŋ mə, 45 bə́ kiɛɛ hləŋ hləŋ, hlə fiimə chu dɨŋ ə Jelushalɛŋ bəŋkiɛɛ wu mə. 46 Ə chu bwɔɔ nnu dɨŋ ə joo bəŋ tɔh ye bə́ mà chɔɔ bəŋkiɛɛ wu, bə́ ŋəŋ ə wu go i duŋ ə chəŋ ntofi Chu mə, i shiila bə bəne bə keehnə, i wə̄lə keehnə, i bīi bibiinə. 47 Bəne bənhliŋ bbəŋ bə́ màa bə́ wə̄lə bie mà kəna gbo wi kpenə gbaaŋ yulahalə i mà duŋ ŋkələ bieŋ gbaaŋ i chuu dəŋ bibiinə yəəŋ. 48 Ye mahni bə tili mà ŋəŋ lə ə wu go, gəə ŋɨŋ bə́. Mahni chee wu yɔɔ lə, “Ŋiaa wə fɨhɨŋ be nəŋ ləhəŋ lə? Kee ŋəŋ, bee chwa kkə ma kiɛɛla wə hləŋ hləŋ biwɛɛ bee be.”

49 I chuu lə, “Ə chu bə həə bə kīɛɛ mi yulaha lə? Bə hə kə kələ lə ŋkənə bənduŋ ə chəŋ Tah mə fəŋ lə?” 50 Kwaalə, bə́ nakə woo tɔ fieŋ ffɨŋ i yɔ̄ɔ fie kə.

51 I hlə no bəə bə́ yee bə́ bwɔ̄ ə Nashalit. I gəŋ yee i wō bə bə́ kinwaakə. Ye bieŋ bɨhŋ mà kah'lə nəni, mahni chi hədɨŋ yee i hlē bwɔɔ mənhliŋ. 52 Jisho hlə yee i kō, i kə̀nə bufe buŋkuntaŋ, Chu lèki wu maa bəne dəŋ lèki wu.