Lukaa 1

Hlɨŋ Nuaa ki Jisho nni

Lukaa

mà bieŋ

Kinchɔɔ

Tiofilo ŋwuŋ ŋkuntaŋ, bəne kiŋaaŋkə mà joo bəmbieŋ bieŋ bbɨŋ bi mà kah ə be mə. 2 Bə́ mà bieŋna bieŋ yəəŋ yəəŋ bbɨŋ kkə mà wo ə bəne bbəŋ bə́ mà ŋəŋ bə díi ŋəbə, bə́ dəŋ yee bə́ dōntə ye bi mà chɔɔ lə. 3 Ye njəə bwɔɔ bəŋkiɛɛ bieŋ bɨhŋ kiɛkiɛ ye bi mà chɔɔ lə həmɛɛ, ŋŋəŋna lə ə nwaa lə mbuhuŋ mbieŋ dəŋ ə jé yinwaa mə yu wə. 4 Nfə fɨhŋ lə wə kələ kichɛɛŋ ki bieŋ bbɨŋ bə́ mà nachɛ bə wə.

Nchinda Chu yɔɔ lə bə́ yá yi bwee Jɔɔŋ N'yiinjɔ

5 Bwɔɔ nnu Ŋkɨŋ Hɛlɔ màa i hlāah bidi bi Judia, che ntofi ju mà duŋ bə́ chèe wu lə Hlakalia. I màa i nɨ̄ŋ ə kintu ki bəche ntofi bə Abija mə, kpɛɛ mà fu dəŋ ə kichəŋ ki Ɛlɔŋ mə, nnu bə́ chèe wu lə Lishabɛ. 6 Bəne bə bəfwe bəhŋ mà duŋ bəne bə kiyəyəŋ ə Chu fwi, bə́ chì bəŋkɨnə bə Baba bənhliŋ, bə́ mà kə kənə gbenə kə. 7 Kwaalə, bə́ mà kə kənə ŋiaŋ kə, yulahalə Lishabɛ mà duŋ gbɔmbu, bə́ bənhliŋ mà duŋ bə́ hə dɨŋna.

8 Bwɔɔ mà bwoo wunə, kintu ki Hlakalia nɨ̀ŋ ə chəŋ ntofi Tah Chu mə. Ə màa wu ŋwuŋ ntofi ə Chu fwi butuu bumbini bwe. 9 Bə́ mà bwa wu bələ ye bə́ màa bə́ bwālə bəne bə ntofi ə too wibə mə. I hlə lɛɛ ə chəŋ ntofi mə tɔŋ kijooni. 10 Lə bwɔɔ wunə tɔŋnə kijooni kie, bəne bənhliŋ bbəŋ bə́ mà duŋ bweenə yee bə́ chēe Chu.

11 Nchinda Baba gənə fu bwo lemi ə wu fwi ə kwaŋ wi diee wi taŋ li kijooni le tɨŋ. 12 Bwɔɔ nnu Hlakalia mà ŋəŋ ə wu go, tɔŋ kaanə wu, i kənə nɨŋ gbaaŋ. 13 Kwaalə nchinda yo yɔɔ bə wu lə, “Nɨŋ wə kə kwoo kə. Chu ma woo Chu cheenə wa. Pwaa Lishabɛ lə bwee ŋiaŋ nyo ə wə yá do wu yii lə Jɔɔŋ. 14 I yá bwo bə kintɨŋ ə wə mə, ə bəne kiŋaaŋkə yá wo njənjə yu bwee liih. 15 I yá duŋ ŋwuŋ ŋkuntaŋ ə Chu fwi. I yáa i dūŋ kə ŋwee mbihŋ, gbentɛlɛ məntaabə. Fiana Wɛɛŋ yá yii ə wu mə^ª i kaani ə mahni bulə. 16 I yá fə bəne Bəishlael kiŋaaŋkə fii tɔ́ŋ ŋəbə fiimə chu bə Baba Chu bə́. 17 I yá kah Tili fwi bə́ tɔŋ maa bə́ muŋga mu Elaja, bənfii tɔ́ŋ ŋə bəche bwɔni, bənduŋ ə bwɔni bəbə mə. I yá fə bəne bənta bikuu tukwaŋ ə bikuu bitanə go, gaanə fwɔ́ ŋəbə, kənə kinhle ki bəne bə kiyəyəŋ. I yá fə nəni fo bəne yá mbwɛɛ go yee bə́ kē Baba.”

18 Hlakalia bii bə nchinda yo ləə, “Fieŋ ffɨŋ fi yá fə ə ŋkələ ye bee mah chəŋ ŋgwəŋ nu dɨŋna kaa lə duŋ laha lə?”

19 Nchinda Chu yo chuu lə, “Ə mi Gabliya, nlèmi ə Chu fwi bwɔɔ mənhliŋ, ə faŋ wu mi lə mbwo n'yɔɔ hlɨŋ nwaa ni bə wə. 20 Kee ŋəŋ, ye wə nalə kə bemi hlɨŋ nih, bwɔɔ yá yi wunə nnu fɨhŋ kənə bənduŋ, wə yá chu nfili, kə yɔɔ lə jə, gəŋ bwii bwɔɔ nnu fɨhŋ fieŋ yá duŋ.”

21 Lə fi bwo duŋ nəni, gəə ŋɨŋ bəne bbəŋ bə́ mà duŋ bie bweenə bə́ kē Hlakalia ləə ə duŋ laha ffɨŋ fi kwo fie wu mu mə hlə kɛhiŋ bwɔɔ mu gbaaŋ nəni lə?. 22 Bwɔɔ nnu i mà fu mu, i mà kə baa lə kələ bən'yɔɔ jə bə bə́ kə. Bə́ hlə kələ lə Chu nyiila fieŋ fi ŋɨŋ gəə bə wu mu. I hlə yee i mā bieŋ bə kwáŋ, jə kə yɔɔ lə kə. 23 Hlakalia kaa nimi liih ə chəŋ ntofi mə hlə chu ə wu chəŋ. 24 Lə joo kah, kpɛɛ Lishabɛ fwaa te, hlə yee i dūŋ kwaa chəŋ chəŋ kii tiŋ. 25 Lishabɛ hlə yɔɔ lə, “Fidiɛɛ Baba kwoo hlɨŋ bə mi, i fwoola giaali ə mi fi.”

Nchinda Chu yɔɔ lə bə́ bwee Jisho

26 Ə chulə te li Lishabɛ le bwii kii buhlɔ, Chu faŋ nchinda wi Gabliya ə kibalaki ki Galilii mə kkɨŋ bə́ chèe lə Nashalit. 27 I mà faŋ wu hə hlɔŋ ŋiaŋ kpɛ ju nnu i kaani kə kələ nyo nnu bə́ chèe lə Meeli. Ə mà duŋ bə́ hə chee chi lə i yá duŋ kpɛɛ Joshɛ ə kichəŋ ki Ŋkɨŋ Daafi mə. 28 Nchinda Chu yo gəŋ ŋəŋ Meeli hlə chee wu lə, “Baba ma shaala wə, i yo bə wə.”

29 Lə i wo fɨhŋ fi kah wu bəŋ gbaaŋ, yee i nāamə ləə dɨŋ kɨhŋ cheenə duŋ kiɛhɛŋ kie nəni lə. 30 Kwaalə, nchinda Chu yo hlə yɔɔ bə wu lə, “Meeli wə kə lɔɔ kə, Chu ma bwaa wə. 31 Kee ŋəŋ, wə lə fwaa te, bwee ŋiaŋ nyo, ə wə do wu yii lə Jisho. 32 Mə lə duŋ ŋwuŋ ŋkuntaŋ, bə́ lə yee bə́ chēe wu lə Ŋwa Nchu, Chu nnu i dùŋ yo Kwoo ki Bieŋ Binhliŋ. Baba Chu lə chi wu ə kabala Ŋkɨŋ Daafi bəŋ nnu i dùŋ yo che kichəŋ kibə. 33 Mə lə yee i hlāah kichəŋ ki Jekɔb bwɔɔ mənhliŋ, nnu muŋkɨŋ mwii yá kənə ki həŋgbɔŋ kə.”

34 Meeli bii bə Nchinda Chu yo lə, “Fieŋ fɨhŋ lə jaa nəŋ ləhəŋ lə, ye ŋkaani lə kə kələ nyo.” 35 Nchinda Chu chuu bə wu lə, “Fiana Wɛɛŋ yá yi bwo ə wə mə, ə muŋga mu Chu nnu i dùŋ yo Kwoo ki Bieŋ Binhliŋ yii ə wə mə. Nəni, ŋiaŋ nnu wə lə bwee yo lə duŋ wɛɛŋ, ə bə́ yá hlə chee wu lə Ŋwa Nchu. 36 Kee ŋəŋ, dɨŋ mwa Lishabɛ nnu i dɨŋna yo kaa nəni maa yee bə́ chēe wu lə gbɔmbu, i yo fidiɛɛ bə te kii buhlɔ, mə lə bwee ŋiaŋ nyo. 37 Fieŋ fidi hləŋ ffɨŋ duŋ ə fi kah Chu bənfə.” 38 Meeli hlə yɔɔ lə, “Nduŋ fɨŋŋ ŋwuŋ nimi Chu. I fə fi duŋ bə mi ye wə yɔɔ lə.” Ye i mà yɔɔlə nəni, Nchinda Chu yo hlə no.

Meeli la Lishabɛ kpuuni

39 Ə joo ŋie mə, Meeli bwɛɛ gbo ja yee i gə̄ŋ chichii ə kibalaki ki bikɔni bi Juda mə, 40 i gəŋ bwii mə, lɛɛ ə Hlakalia chəŋ chee kpɛɛ Lishabɛ. 41 Ye Lishabɛ mà wolə cheenə ki Meeli kie nəni, ŋiaŋ yo nənə mə wu bulə gbaaŋ. Fiana Wɛɛŋ fiili ə wu mə. 42 I hlə gɛɛmə gbaaŋ, yɔɔ lə, “Kinhləmə ki Chu kie ə wə mə kah bəkwɛɛ bənhliŋ, kinhləmə kie bə ŋiaŋ nnu wə yá bwee yo. 43 Fɨhŋ fieŋ fiŋkuntaŋ nəŋ jaa ləhəŋ, lə mah Baba ŋgwəŋ nu laa mi kpuuni lə? 44 Kee ŋəŋ, bwɔɔ nnu nhə ŋ'wo cheenə ko, ŋiaŋ yo nənə mi bulə bə kintɨŋ kiŋkuntaŋ. 45 Kintɨŋ kiŋkuntaŋ dùŋ bə wə, yulahalə wə mà bema lə ŋkaachi nnu Chu mà kaachi yo bə wə yá yi bwo wunə.”

Meeli kohi Chu

46 Meeli yɔɔ lə,

“Tɔŋ lɨŋŋ kohi Baba Chu,

47 ŋ'wo njənjə yulahalə ə Chu nnu i dùŋ Nchuu Fwoo ŋgwəŋ.

48 I hlee mi, ye nchɔɔlə duŋ kwaa mbɛɛ wi nimi tənə.

Gbe jə fidiɛɛ gəŋ fwi, ŋkáani yinhliŋ yáa yí yɔ̄ɔ lə,

Chu ma hləma mi,

49 yulahalə Chu Muŋgeni Munhliŋ ma fəə

bieŋ biŋkuntaŋ kiŋaaŋkə bə mi.

Yii liih kənə lə mantanə kə.

50 I kwò hlɨŋ bə bəne bbəŋ bə́ bwɔ̀kwe bə wu.

Hlɨŋ yi kwonə yiih yɨhŋ ye ə ŋkáani yinhliŋ go.

51 I ma nyiila muŋgeni mu kwáŋ wiih,

hlahi bəne bbəŋ bə́ hlə̀ə, munhlenə mubə hlaamə.

52 I fwoola bəŋkɨŋ bəŋkuntaŋ bəŋkuntaŋ ə biŋkaa bəŋ,

bihiŋ bəne bənya chəə.

53 I leela kaa bəne bbəŋ jəbulə wù bə́,

bə́ fiili bə bieŋ binwaa,

kohiŋ bə kpo kwáŋ ŋə ŋɨmə.

54-55 I chɨna Ishlael mbɛɛ nimi wi,

hlə hle bəŋkwo hlɨŋ bə Ablahaŋ bə kichəŋ kiih,

gəŋ kpee həŋgbɔŋ ye i mà kaachi bə bəche tah biaa.”

56 Ye Meeli yɔɔlə nəni, i duŋ bə Lishabɛ kii tɔh hlə kwələ chu ə wu kwuŋ.

Lishabɛ bwee Jɔɔŋ N'yiinjɔ

57 Bwɔɔ Lishabɛ bweenə bwii, i bwee ŋiaŋ nyo. 58 Kichəŋ kiih bə bəne bbəŋ bə́ dùŋ baha bə wu wo lə Baba kwoo hlɨŋ bə wu gbaaŋ, yee bə́ tɨ̄ŋ bə wu.

59 Lə joo bwo bwii nyaaŋ, bə́ nyieŋ ŋiaŋ yo jo, hlə yee bə́ kīɛɛ lə bə́ do wu yii lə Hlakalia ye yii li tili lə, 60 kwaalə mahni looŋkə, yɔɔ lə bə́ chee wu lə Jɔɔŋ.

61 Bə́ yɔɔ bə wu lə, “Mbɛɛ ju hləŋkə ə kichəŋ kieeŋ mə bə yii lɨhŋ.” 62 Bə́ hlə ja yee bə́ mā bə kwáŋ bə che ŋiaŋ yo, bəŋkələ lə i kiɛɛ lə bə́ do ŋiaŋ yo yii lə nyəhə lə.

63 I hlə ma dəŋ lə bə́ bwo bə fieŋ i bieŋ yii le bəŋ. Lə bə́ bwo bə fi i hlə bieŋ lə, “Yii liih lə Jɔɔŋ.” Lə bə́ ŋəŋ nəni gəə ŋɨŋ bə́. 64 Cha mi, kijə ki Hlakalia hlə wɛɛmə, linini liih hloonə, i hlə baa gbe bən'yɔɔ jə. Yee i fāŋ kindohi bə Chu. 65 Gəə ŋɨŋ bəne bə wɛɛ wi mə we gbaaŋ. Hlɨŋ bieŋ bɨhŋ kiɛkiɛ hlaamə gəŋ ə kitɨŋ ki kɔnɔ ki Judia mə kinhliŋ. 66 Bəne bənhliŋ bbəŋ bə́ mà wo bieŋ bɨhŋ kiɛkiɛ kənə gbo wi kpenə hlə yee bə́ bīi ləə nu ŋiaŋ yá duŋ ləhəŋ lə, yulahalə fi mà nyiila ba lə muŋgeni mu Baba mwe ə wu mə.

Hlakalia dontə hlɨŋ Chu

67 Fiana Wɛɛŋ fiili ə Hlakalia mə nnu i dùŋ yo che Jɔɔŋ, I hlə yee i dōntə ye mbɛɛ hlɨŋ Chu lə, i yɔ̀ɔ lə,

68 “Kkə kohi Baba nnu i dùŋ yo Chu bəne Bəishlael.

I bwoo yah bəne biih ə ŋgə mə.

69 I ma chiee taŋ muŋgeni nnu i yá fwoo be,

i fu ə kichəŋ ki Ŋkɨŋ Daafi mə mbɛɛ wi nimi.

70 Fɨhŋ duŋ ye i mà kaachi ə kijə ki bəne bə hlɨŋ biih bə wɛɛŋ mə

ə kaani ə bwɔɔ ko yo mə,

71 lə i yá yi fwoo be ə kwáŋ ŋə bəne bbəŋ bə́ kìɛɛ lə bə́ ləhə laa be,

maa bə bəne bbəŋ bə́ dùŋ bə be.

72 I mà kaachi lə i yá kwo hlɨŋ bə bəche tah biaa

hlə yee i shī i hlè tɨmə kiih kkɨŋ wu Chu mà nə.

73 I mà nəə ŋkɨnə bə che tah ya Ablahaŋ kaŋ lə,

74 i yá fwoo be ə kwáŋ ŋə bəne biaa bbəŋ bə́ dùŋ kə diee njənə bə be,

fo kkə lə yee kkə nɨ̄ŋ yu wu kə lɔɔ kə,

75 fo kkə lə yee kkə dūŋh bə fwɔ wu wɛɛŋ bə wu ntiiŋ ə wu dí

joo ŋənhliŋ ə kinduŋh kiaa mə.

76 Wə ŋiaa, bə́ yáa bə́ chēe wə lə mbɛɛ hlɨŋ Chu,

Chu nnu i dùŋ yo Kwoo ki Bieŋ Binhliŋ,

yulahalə wə yá hlaa kah Tah fwi

bənfə je yi.

77 Wə yáa wə dōntə bə bəne biih ə jé yyɨŋ duŋ ə bə́ fukwoo ə yí mə,

yyɨŋ yí duŋ kinlaamə kkɨŋ Chu yá laamə nə yíwaha yibə,

78 yu hlɨŋ yi kwonə gbaaŋ yyɨŋ i kə̀nə bə bəne biih.

I yá faŋ Nchuu Fwoo ə i bwɔ bwo buh

ye kitaŋ bɛɛ lə.

79 I yá nə kinchaa bə bəne bbəŋ bə́ dùŋ ə jɨbə mə

maa bbəŋ bə́ dùŋ ə kpe jə,

hlə chi be ə je kindunshiiŋ mə.”

80 Ŋwa Hlakalia yo hlə yee i kō i kə̀nə muŋgeni, maa bə fiana wi. I hlə no gəŋ yee i dūŋh ə duŋ ə nji, gəŋ bwii bwɔɔ nnu i mà fu bwo nyii gbo wiih bə bəne Bəishlael.