Maak 1

Hlɨŋ Nuaa ki Jisho nni

Maak

mà bieŋ

Hlɨŋ nni Jɔɔŋ N'yiinjɔ màa i dōntə

(Matio 3:1-12; Lukaa 3:1-18; Jɔɔŋ 1:19-28)

Ni lə hlɨŋ nwaa ki Jisho Kleto Ŋwa Nchu.^ª 2 I mà chɔɔ jə ye Ejaya mbɛɛ hlɨŋ Chu mà bieŋ Chu yɔ̀ɔ lə,

“Wələ wo, nfaŋna mbɛɛ ŋgwəŋ hlɨŋ lə i hlaa kah wə fwi,

i gəŋ bwɛɛ je wa ə wə hlə yee wə bwō.

3 Die mbɛɛ yi dīimə ə nji lə ‘Bə́ bwɛɛ je Baba.

Lɛhiŋ yi yee i dûŋ ntiiŋ.’”

4 Nəni, mbɛɛ ju nnu bə́ mà chee lə Jɔɔŋ N'yiinjɔ duŋ duŋ fu bwo ə nji, yee i dōntə bə bəne lə bə́ fii tɔ́ŋ ŋəbə, i yii bə́ ə njɔ fo Chu lə laamə nə yíwaha yibə. 5 Bəne yee bə́ fū ə bidi bi Judia mə binhliŋ maa ə kibalaki ki Jelushalɛŋ mə kinhliŋ bə́ gə̀ŋ ŋə̀ŋ Jɔɔŋ, bə́ yɔ̀ɔ yíwaha yibə bə Chu, Jɔɔŋ hlə yee i yīi bə́ ə njɔ, ə Kibee ki Joodaŋ mə.

6 Jɔɔŋ màa i dɔ̄hiŋ bindu bbɨŋ bə́ fə̀ bə lú ŋə nyaŋ nni bə́ chèe lə kamɛɛl, i kwàa kicha chi kkɨŋ bə́ fə̀ bə bwa wi nyáŋ. I dì ə duŋ chə́mə bə kituŋ ki nji. 7 I màa i dōntə, i yɔ̀ɔ lə, “Mbɛɛ ju yu bwō ə mi dɨŋ nnu i kò kah mi. Ŋkə wunə dəŋ bəmbwɔkwe hlooli gi ŋə bikpa biih kə. 8 N'yìi bəŋ ə duŋ ə njɔ, kwaalə, mə yii bəŋ ə njɔ ə duŋ ə Fiana Wɛɛŋ mə maa bə bwii.”

Ye bə́ mà yii Jisho ə njɔ bə ye Hlaata mà mɔŋ wu

(Matio 3:13–4:11; Lukaa 3:21-22; Jɔɔŋ 1:29-34)

9 Ə joo ŋie mə, Jisho no ə Nashalit ə bidi bi Galilii mə, bwo Jɔɔŋ yii wu ə njɔ ə Kibee ki Joodaŋ mə. 10 Ye Jisho màa i fū lə mə njɔ nəni, i ŋəŋ buuli wɛɛma, Fiana Wɛɛŋ hlīli i bwō ə wu bəŋ ye kikuuku lə. 11 Die bwo mə buh lə, “Nu lə Ŋiaa, nnu i dùŋ tɔŋ lɨŋŋ, ŋ'wò njənjə bə wu gbaaŋ.”

12 Cha mi Fiana Wɛɛŋ yo hlə fə Jisho gəŋ yee i dūŋ ə nji. 13 I duŋ mə nji joo mbwɛɛnya, Hlaata mɔ̀ŋ wu. I màa i dūŋ mə nəni bə nyáŋ yí nji. Bənchinda bə Chu fwòŋ wu.

Jisho chee jə bəne bənua lə bə́ duŋ bəne biih bə kintu

(Matio 4:12-22; Lukaa 4:14-15; 5:1-11)

14 Bə́ ja bwo kwo Jɔɔŋ yii ə chəŋ munfwa mə. Ə chu bwɔɔ nnu dɨŋ, Jisho gəŋ ə Galilii, i dòntə hlɨŋ nwaa Chu mə. 15 I dòntə, i yɔ̀ɔ lə, “Bwɔɔ bwoo wunə ba, muŋkɨŋ mu Chu mwe baha baha. Bə fii tɔ́ŋ ŋieeŋ ŋəŋ'waha, bemi hlɨŋ nwaa ni.”

16 Jisho bwo yee i kāh baha ə Nɔ nnu Galilii tɨŋ, i ŋəŋ Shaamuŋ bə maani Andulu. Bə́ lɛ̄ɛ gbi ə nɔ mə, yu nimi libə màa fiɔŋ yí kwonə. 17 Jisho yɔɔ bə bə́ lə, “Yee bə bə̂lə mi, nlə nfə ə yee bə kwô ə duŋ bəne.” 18 Cha mi, bə́ hlə she gi ŋəbə ŋie, yee bə́ bə̄lə wu. 19 Lə Jisho baa gəŋ fwi chɛɛ, i ŋəŋ Jɛŋ bəə maani Jɔɔŋ. Bə́ mà duŋ bwɔni bə Jebedee. Bə́ dùŋ ə kikpɔŋkɔ mə bə́ shwāali gi ŋəbə. 20 Cha mi Jisho hlə chee jə bə́. Bə́ she tili bə́ ə kikpɔŋkɔ kie mə bə bəne bə nimi bie, yee bə́ bə̄lə wu.

Jisho fwoo fiana yili ə mbɛɛ go

(Lukaa 4:31-37)

21 Bə́ bəə Jisho ja gəŋ ə kibalaki ki Kapanahuŋ mə. Lə yee ə dūŋ ə bunte mə, Jisho bu gəŋ ə chəŋ cheenə Chu mə yee i kēeh bəne mu. 22 Bəne wò kindɔ chìŋ bə́ ki keehnə kiih. I màa i kēeh ye mbɛɛ nnu i kə̀nə muŋgeni mu ŋkeehnə. I mà kə yee i kēeh ye bəne bbəŋ bə́ kèeh bie bəŋkɨnə bə Chu ba lə bəŋkeeh kə. 23 Ə bwɔɔ yo bəŋ kichə shəəŋ, mbɛɛ ju ja bwii bwo ə chəŋ cheenə Chu ye mə. Ə màa mbɛɛ nnu fiana yili mà duŋ ə wu mə. 24 Ye i lɛɛlə mu, hlə gɛɛmə lə, “Jisho nnu Nashalit, wə kiɛɛ laha ə be go lə? Wə bwo bənləhə laa be lə? Ŋkəla wə. Ə wə Mbɛɛ Wɛɛŋ nnu i fu ə Chu kwuŋ.” 25 Jisho nyieemi fiana yili yo, yɔɔ lə, “Maalə, fu ə mbɛɛ nu mə.” 26 Fiana yo fə wu i gbe həkwe yee i jū. I wili gbaaŋ, hlə fu ə wu go. 27 Bəne bənhliŋ ŋəŋ nəni, gəə ŋɨŋ bə́, bə́ ŋwūunə bə́ bə́, bə́ bīi ləə, “Fɨhŋ lə laha lə? Ə kinlaanə kidi kifwɔ lə? Mbɛɛ nu kə̀nə muŋgeni mmuŋ i yɔ̀ɔ maa bəfiana bəyili, bə wò wu.” 28 Cha mi, hlɨŋ nih ki Jisho hlaamə gəŋ ə kwíli ŋie mə ŋənhliŋ ə bidi bi Galilii mə.

Jisho ŋwuhuŋ bəne bə jə́ŋ kiŋaaŋkə

(Matio 8:14-17; Lukaa 4:38-41)

29 Cha mi Jisho fu ə chəŋ cheenə Chu ye mə, bəə Jɛŋ maa Jɔɔŋ, gəŋ ə Shaamuŋ bə Andulu chəŋ. 30 Ə mà duŋ gbeni Shaamuŋ kpɛ nɔŋna həkwe, i nə̀nə bə jəŋ. Ye Jisho lɛɛlə mu chəŋ nəni, həmə həmə bə́ yɔɔ bə wu ki kpɛ yo. 31 Jisho gəŋ ə dɔhɔ kkɨŋ i màa i nɔ̄ŋ kie, kənə wu ə bweenə go, jaa wu fa. Jəŋ ye hlə fu ə wu go. I kiɛɛ fieŋ nə bə́ di.

32 Ə bwo duŋ bumbini bwe kitaŋ hə chɨŋna, bə́ tū bə́ bwō bə bəne bənhliŋ bbəŋ bə́ màa bə́ gɔ̄ŋ, maa bəne bbəŋ bənchinda bə hlaata màa bə́ fɨ̄hɨŋ bə́. Bə́ bwō ə Jisho go. 33 Kibalaki kie kinhliŋ bumə həmə fwi. 34 I ŋwuhuŋ bəne kiŋaaŋkə bbəŋ bə́ mà kənə jə́ŋ chili chili, baa fwoo muŋkwini kiŋaaŋkə ə bəne bədi go, yulahalə mu mà kəla mbɛɛ nnu i mà dùŋ yo.

Jisho dontə die Chu ə bidi bi Galilii mə binhliŋ

(Lukaa 4:42-44)

35 Ye butuu kpē lə kwe, Jisho ja fa, fu gəŋ ə dɔhɔ kidi mə wuu mboŋ yee i chēe Chu. 36 Shaamuŋ bə bəne bbəŋ bə́ mà duŋ bie bə wu, she fu gəŋ bəŋkiɛɛ wu. 37 Bə́ ŋəŋ ə wu go, yɔɔ bə wu lə, “Mbɛɛ mənhliŋ yu kīɛɛ wə.” 38 Jisho chuu ŋkwo wi bə bə́ lə, “Kkə le gəŋ ə kwíli ŋəndi mə fo nlə ndontə dəŋ die Chu mə. Fiee fieŋ ffɨŋ mma mbwo fie yu fi.” 39 I hlə yee i jāa ə bidi bi Galilii mə binhliŋ i dòntə die Chu ə chə́ŋ yí cheenə Chu yibə mə, i fwòo muŋkwini ə bəne go.

Jisho ŋwuhuŋ mbɛɛ nnu i màa i gɔ̄ŋ jəŋ kinhlanhla

(Matio 8:1-4; Lukaa 5:12-16)

40 Mbɛɛ ju nnu i màa i gɔ̄ŋ jəŋ kinhlanhla ja bwo bɛŋ núh ə Jisho fwi, kɔnɔ wu yɔɔ lə, “Ə wə hə leki, duŋ ə wə ŋwuhuŋ mi ə n'yee nchāa.” 41 Hlɨŋ kwo Jisho, i nɛhiŋ kwaŋ wiih tuu ə wu go, yɔɔ bə wu lə, “Nleka, ŋwunə, yee wə châa.” 42 Cha mi, jəŋ kinhlanhla ye fu ə wu go, i ŋwunə chaa wɛɛŋ. 43 Jisho kɨnə wu ntakə, həmə həmə kaŋ lə i no, 44 yɔɔ lə, “Jə bwɔɔ lə wə kə yɔɔ lə bə mbɛɛ ju kə. Kwaalə, gəŋ nyii gbo wo bə ŋwuŋ ntofi, wə nə nnə llɨŋ Mushe mà yɔɔ le lə mbɛɛ kənə bənnə bənyii bə bəne lə i ŋwuna ə jəŋ ni kwáŋ, i yu chāa.” 45 Ye Jisho kɨnə lə wu nəni, mbɛɛ yo kaka gəŋ yɔɔ tɔhi fieŋ fie. Hlɨŋ ye hlaamə, je nakə baa lə duŋ nni duŋ ə Jisho lɛɛ ə kibalaki kie mə wɛɛŋ kə. I ba kwaa yee i dūŋ ə nji, bəne nò ə bidɔhɔ mə chili chili, bə́ bwò ə wu go.