Jisho ŋwuhuŋ mbɛɛ nnu i mà kpe wɛɛ mwe
2
Lə joo kah gəŋ, Jisho fiimə chu dɨŋ ə Kapanahuŋ. Bəne wo lə i yo ə chəŋ, 2 bə́ hlə bwo bumə həmə kiŋaaŋkə, je nakə baa lə duŋ nni duŋ ə mbɛɛ ta gbu həmə ə chəŋ ye fwi kə. Yee i dōntə die Chu bə bə́. 3 Bəne bədi bənua ja yee bə́ bwō bə mbɛɛ ju ə wu go, bə́ too wu ə kintaŋ bəŋ, nnu i mà kpee wɛɛ mwe. 4 Fi kah bə́ bənlɛɛ gəŋ bə wu mu yulahalə bəne mà chiŋna mu gbaaŋ. Bə́ hlə biŋ ə fɨŋ, niɛɛli kinchu kie. Ye bə́ nīɛɛli lə nəni, bə́ hlə hlili bwɔ bə mbɛɛ yo ə kintaŋ kkɨŋ i màa i nɔ̄ŋ kie ə ki bəŋ. 5 Lə Jisho ŋəŋ lə bəne bəhŋ yiila tɔ́ŋ ŋəbə ə wu mə, i hlə yɔɔ bə mbɛɛ nnu i mà kpe yo wɛɛ mwe lə, “Ŋiaa nyo, nlaama nə yíwaha yo.” 6 Bəne bədi bbəŋ bə́ màa bə́ kēeh bəŋkɨnə bə Chu bbəŋ bə́ mà shiila həmə wo nəni, hlə yee bə́ ŋwūunə ə tɔ́ŋ ŋəbə go, bə́ bīi ləə, 7 “Mbɛɛ nu yɔ̄ɔ nəni ləhəŋ lə? I yu jə̄ dɔhɔ ki Chu. Ə nyəhə həmə nnu duŋ ə i laamə nə yíwaha kahiŋ kwaa Chu lə?” 8 Jisho kələ ə tɔŋ liih mə fieŋ ffɨŋ bə́ màa bə́ hlē fie, bii bə bə́ ləə, “Bə kə̀nə dɨŋ muŋ munhlenə ə tɔ́ŋ ŋieeŋ mə nəni yulaha lə? 9 Fi chəkə bən'yɔɔ bə mbɛɛ nu duŋ fiɛhɛŋ lə? Bən'yɔɔ lə nlaama nə yíwaha yiih, lii bən'yɔɔ lə, ‘I ja jə kintaŋ kiih yee i jāa lə’? 10 Kwaalə, nlə nfə ə bə kələ lə Ŋwa Mbɛɛ kənə muŋgeni yaŋ kwe bənlaamə nə yíwaha.”I yɔɔ bə mbɛɛ nnu i mà kpe yo wɛɛ mwe lə, 11 “N'yɔ̄ɔ bə wə, ja fa jə kintaŋ ko yee wə kwə̄lə.” 12 I hlə ja fa həmə cha mi jə ki fu yee i gə̄ŋ bəne bənhliŋ chīini wu. Lə bə́ chiini nəni, gəə ŋɨŋ bə́, yee bə́ fāŋ kindohi bə Chu, bə́ yɔ̄ɔ lə, “Kkə yaa hlaa ŋəŋ dɨŋ fɨhŋ fieŋ kə.” Jisho chee jə Lebi lə i duŋ mbɛɛ kintu wi
13 Lə Jisho baa no gəŋ baha ə nɔ tɨŋ, kimɔ ki bəne bwo həmə, yee i kēeh bə́. 14 Lə i ja yee i gə̄ŋ, i ŋəŋ Lebi ŋwa Alfiyu, i shiila ə dɔhɔ kiih ki nimi mə, i kwō kiŋwaati. Jisho yɔɔ bə wu lə, “Yee wə bə̂lə mi.” I hlə ja fa yee i bə̄lə wu.
15 Jisho bə bəne biih bə kintu gəŋ shii yee bə́ dī ə Lebi chəŋ bə bəne kiŋaaŋkə bbəŋ bə́ màa bə́ kwō kiŋwaati maa bəne bə bieŋ biwaha bədi dəŋ. Dɨŋ bəhŋ bəne màa bə́ bā bəmbələ wu kiŋaaŋkə. 16 Bəfalashii bbəŋ bə́ màa bə́ kēeh bəŋkɨnə bə Chu ŋəŋ ye Jisho dīlə bə bəne bə bieŋ biwaha maa bbəŋ bə́ kwò kiŋwaati, bə́ bii bə bəne biih bə kintu ləə, “I dì bə bəne bbəŋ bə́ kwò kiŋwaati maa bəne bə bieŋ biwaha bədi yulaha lə?” 17 Jisho wo ye bə́ bii lə, i yɔɔ bə bə́ lə, “Bəne bbəŋ bə́ dùŋ kɨŋkɨŋkɨŋ kiɛɛ lə ŋwuŋ nche kə. Ə kiɛɛ ə duŋ bə jə́ŋ. Ŋkə mbwoo bənchee jə bəne bbəŋ bə́ dùŋ ntiiŋ kə. Mbwo yu bəne bə bieŋ biwaha.”
Ki nshi biləə
18 Lə yee ə dūŋ ə bwɔɔ ju bəŋ, bəne bə kintu bə Jɔɔŋ, maa bə Bəfalashii shì biləə. Bəne bədi ja bwo bii bə Jisho ləə, “Bəne bə Jɔɔŋ bə kintu, maa bə Bəfalashii shì biləə, bəne bwo bə kintu kə shiee kə yulaha lə?” 19 Jisho chuu bə bə́ ləə, “Duŋ ə bə́ jaŋ bəne bə biah ə bə́ gəŋ yee bə́ shī biləə che biah yo kaani bə bə́ lə? Duŋ ə yee bə́ shī biləə i dùŋ bə bə́ kə. 20 Kwaalə, butuu bwe bu bwō bbuŋ bə́ yá jə no bə che biah yo ə bə́ kwáŋ, ə bə́ yá hlə chɔɔ bənshi biləə ə bwɔɔ yo bəŋ. 21 Mbɛɛ duŋ ə i nakə jəə nshɛŋkɛ kindu kifwɔ, shwaali kindu kiko mu kə. Ə mə fə lə, ə nshɛŋkɛ kindu ye kwiinə bwo shwaŋ kindu kiko kie, ə bwɔɔ kkɨŋ ki dùŋ kie mu gaa ko kah ye ki hə hlaalə duŋ mu. 22 Ə duŋ dəŋ ə mbɛɛ nakə jəə mbihŋ mənfwɔ, yii ə bɛª ki mbihŋ kkɨŋ bə́ fə̀ bə bwa wi nyaŋ, wwuŋ wi dɨŋna kaa kə. Ə mə fə nəni, ə mbihŋ mənfwɔ mie fe bwo kpee bɛ kkɨŋ ki dɨŋna kaa kie, ə mbihŋ mie bə bɛ kie la nya. Fi nwaa duŋ lə, bə́ kənə bən'yii mbihŋ mənfwɔ ə duŋ ə bɛ kifwɔ mə.”
Ki bunte
23 Ə mà duŋ ə bunte budi mə, Jisho bə bəne biih bə kintu jāa bə́ kāh ə wɛɛh ki gɨŋ ŋə bəjaa kidi mə. Bəne biih bə kintu chɔɔ bəŋkaalə bənchachala bie bə́ dī. 24 Lə Bəfalashii ŋəŋ, bə́ bii bə Jisho ləə, “Kee ŋəŋ, ə duŋ yulaha ffɨŋ bəne bwo bə kintu fə̄ fieŋ ffɨŋ ŋkɨnə kə bemi lə mbɛɛ fə ə bunte mə lə?” 25 Jisho bii dəŋ bə bə́ ləə, “Bə mà kə hlaa lə chee ə Kiŋwaati ki Chu mə ye jəbulə mà wu Ŋkɨŋ Daafi bə kintu kiih i fə kə lə? 26 Ə mà duŋ bwɔɔ nnu Abiata mà duŋ che kwoo ki bəche ntofi, Daafi lɛɛ ə chəŋ Chu mə jə kibele kkɨŋ bə́ shaala chi lə ə ki Chu, di baa nə dəŋ kintu kiih mu, ə màa ŋkɨnə lə mbɛɛ di lə kibele kɨhŋ kahiŋ bəche ntofi.” 27 Jisho hlə kaanə yɔɔ bə bə́ lə, “Chu mà chi bunte ə duŋ yu mbɛɛ. I mà kə biee mbɛɛ yu bunte kə. 28 Nəni, Ŋwa Mbɛɛ dùŋ Che Kwoo maa bə bunte.”