Jisho ŋwuhuŋ mbɛɛ nnu bweenə kiih mà kpe
3
Jisho baa gəŋ lɛɛ ə chəŋ cheenə Chu mə. Mbɛɛ ju mà duŋ mu nnu bweenə kiih mà kpee. 2 Bəne bədi bbəŋ bə́ mà duŋ mu, yee bə́ kīɛɛ fieŋ ffɨŋ bə́ bwɛɛ ə Jisho go, hlə tɨŋ díi ə wu go yee bə́ kēe ləə mə lə ŋwuhuŋ mbɛɛ yo ə bunte mə lə. 3 Jisho yɔɔ bə mbɛɛ nnu i mà duŋ yo bə bweenə kiŋkpi lə, “Ja fa wə bwo fəŋ.” 4 Ye i bwolə, Jisho bii bə bəne bie ləə, “Fieŋ ffɨŋ ŋkɨnə duŋ kə bemi lə mbɛɛ fə ə bunte mə duŋ laha lə? Bənfə fieŋ finwaa, lii fieŋ fiwaha lə? Bənfwoo mbɛɛ, lii bənjii bu jiinə lə?” Bə́ ba shiiiŋ. 5 Tɔŋ lo Jisho bə bə́, i kee taa bə́ bənhliŋ, gbo kpe wu yu tɔ́ŋ ŋəbə ŋənyi. I yɔɔ bə mbɛɛ nnu bweenə kiih mà kpe yo lə, “Nɛhiŋ bweenə ko.” I nɛhiŋ ki bu ŋwunə. 6 Bəfalashii fu, bə́ gəŋ bə bəne bə kintu ki Ŋkɨŋ Hɛlɔ, chuŋ cha mi ye duŋ ə bə́ fə hlə jii Jisho.Bəne fù kiwɛɛ kinhliŋ bə́ bwò ə Jisho go
7 Jisho bə bəne biih bə kintu hlə ja həmə gəŋ ə Nɔ nnu Galilii mə. Kimɔ ki bəne kiŋkuntaŋ yee ki bə̄lə wu dɨŋ. Bədi mà fu ə bidi bi Galilii bə bi Judia mə. 8 Bədi fū ə Jelushalɛŋ, bədi ə bidi bi Idumia mə, bədi ə Kibee ki Joodaŋ wukwi, bədi ə bidi bi Taya bə Shidɔŋ mə. Kimɔ kiŋkuntaŋ màa ki bwō nəni yulahalə bə́ mà woo bieŋ binhliŋ bbɨŋ i màa i fə̄. 9 Jisho ja yɔɔ lə bəne biih bə kintu bie kiɛɛ chi wu kikpɔŋkɔ i lɛɛ mə, fo kimɔ kie lə nakə baa lə yee ki yə̄ə gbo ə wu go kə. 10 I mà yɔɔ nəni yulahalə i mà ŋwuhaŋ bəne kiŋaaŋkə, bəne bə jə́ŋ baa bə́ bwō dəŋ bəntuu ə wu go. 11 Bəne bbəŋ bəfiana bəyili màa bə́ fɨ̄hɨŋ bə́, bwɔɔ nnu bə́ ŋə̀ŋ ə Jisho go, bə́ gbè ə wu fwi, bə́ gɛ̀ɛmə bə́ yɔ̀ɔ lə, “Wə dùŋ Ŋwa Nchu.” 12 Ye bə́ gɛ̄ɛmə lə nəni, Jisho gaa looŋkə bə́ lə bə́ kə fəə lə bəne kələ lə ə wu kə.
Jisho bwa bəne yuufi ə nchɔ bəfwe bənduŋ bəne biih bə faŋnə
13 I ja biŋ gəŋ ə kɔnɔ go, chee jə bəne bbəŋ i mà kiɛɛ bie, bə́ bwo ə wu go. 14 I bwa bəne yuufi ə nchɔ bəfwe, chee bə́ lə bəne biih bə faŋnə,ª fə yee bə́ dūŋ bə wu, i fàŋ bə́, bə́ jàa bə́ dòntə die Chu, 15 baa kənə muŋgeni munfwoonə muŋkwini ə bəne go.ª 16 Bəne bie mà duŋ: Shaamuŋ, nnu i mà do yii liih lidi lə Pita. 17 Jɛŋ bə ŋwa mahni Jɔɔŋ bə́ mà duŋ bwɔni bə Jebedee, bbəŋ i mà do bə́ yíih lə “Bwanige” li duŋ lə, “Bəne bə jaŋ kiŋgbaŋgba.” 18 Bədi duŋ Andulu, Filip, Batolomu, Matio, Tɔma, Jɛŋ ŋwa Alfiyu, Tadiyo, Shaamuŋ nnu i mà duŋ mbɛɛ ə kintu ki Bəjilɔt mə,ª 19 maa Judash Ishkalɔt nnu i mà taa yo Jisho.
Bəne màa bə yɔ̄ɔ lə Beeshebu ŋkɨŋ muŋkwini yo ə Jisho go
20 Jisho ja gəŋ ə bweenə, kimɔ ki bəne baa bumə həmə, bə́ bə bəne biih bə kintu nakə baa lə bənə je bəndi fieŋ kə. 21 Lə kichəŋ kiih wo fieŋ fɨhŋ, bə́ gəŋ bəŋgəŋ faa jə wu yulahalə bəne màa bə́ yɔ̄ɔ lə bufe bwii lə yəəŋ kə. 22 Bəne bbəŋ bə́ màa bə́ kēeh bie bəŋkɨnə bə Chu bbəŋ bə́ mà fu ə Jelushalɛŋ bwɔ bwo həmə yee bə́ yɔ̄ɔ lə, “Beeshebu yo ə wu go, i fwòo muŋkwini nəni ə duŋ bə muŋgeni mu ŋkɨŋ muŋkwini yo.” 23 Jisho chee bə́, bii bə bə́ ə ŋgaŋga mə ləə, “Duŋ ə Hlaata fwoo gbo wiih ə mbɛɛ mə ləhəŋ lə?” 24 Ə kitɨŋ lə ja ga yee ki jū bə gbo wi ki, ə ki lemi kə. 25 Ə chəŋ lə ja yee i jū yi yi, ə i baa kaamu bənlemi kə. 26 Nəni, ə Hlaata lə ga bə kintu kiih yee bə́ jū bə́ bə́, ə i lemi kə, kəə ŋkwo wi kaa. 27 Yee bə kə̂lə lə mbɛɛ hləŋ həmə nnu duŋ ə i lɛɛ ə ŋgambɛɛ chəŋ, faa jə bieŋ biih ə kiyəyəŋ mə fu bə bi, fo mə hə kaani kə hlaa lə kwaa ŋgambɛɛ yo. 28 N'yɔ̄ɔ bəŋ kichɛɛŋ lə, duŋ ə Chu laamə nə bieŋ biwaha maa díe yíwaha yinhliŋ yyɨŋ bəne yɔ̀ɔ. 29 Kwaalə, ə mbɛɛ yɔɔ die waha ki Fiana Wɛɛŋ, kəə duŋ ə Chu laamə nə wu kə dududu, yulahalə i fəə ə duŋ yiwaha yyɨŋ yí dùŋ kə kaa kə. 30 Jisho mà yɔɔ nəni yulahalə bəne bie mà yɔɔla lə fiana yili yo ə wu go.
Mah Jisho bə bədɨŋ Jisho
31 Mah Jisho bə bədɨŋ Jisho bwii, lemi bweenə, faŋ mbɛɛ ju lə i chee wu. 32 Ə mà duŋ kimɔ ki bəne shiila kaa wu kunə gbaaaŋ. Bə́ yɔɔ bə wu lə, “Mwah bə bəmwaa bie bə́ kīɛɛ wə wa bweenə.” 33 Jisho bii ləə, “Nəh bə bəŋgwoŋ lə bənyəhə lə?” 34 Ye i bii lə nəni i hlə kee bəne bbəŋ bə́ mà shii bie kaa wu kunə gbaaaŋ, yɔɔ lə, “Fəŋ lə nəh bə bəŋgwoŋ. 35 Mbɛɛ mənhliŋ nnu i fə̀ fieŋ ffɨŋ Chu kìɛɛ, ə wu nnu i dùŋ ŋgwoŋ nyo bə ŋgwoŋ kpɛ maa nəh.”