Ŋgaŋga ki mbɛɛ nnu i màa i lēe ŋgɔ
4
Lə Jisho baa chɔɔ yee i lāanə bəne baha ə nɔ go, kimɔ ki bəne buma həmə nəni gbɛɛɛ. I hlə ja lɛɛ shii ə duŋ ə kikpɔŋkɔ mə ə njɔ, kimɔ kie lema nɔ yo həkpa. 2 Yee i kēeh bə́ bieŋ kiŋaaŋkə ə ŋgáŋga mə. I gba ŋgaŋga ji bə bə́ lə, 3 “Bə wələ wo, mbɛɛ ju mà laa bəŋgəŋ lɛɛ ŋgɔ. 4 Lə yee i lɛ̄ɛ, ju yo gbe ə je, munyini bwo dɔɔ di. 5 Ju yo ŋgɔ gbe ə dɔhɔ ki libwaa bəŋ kkɨŋ shishɔ mà kə duŋ nə həmə gbaaŋ kə. I kee bəmɛŋ fu yulahalə shishɔ mà kə duŋ nə həmə gbaaŋ kə, 6 ə chulə ŋwiŋ chɔɔ bəntə, wi kə kpee ŋgɔ yo i ŋɨŋ, yulahalə i mà kə taa gɛŋ kə. 7 Ju yo ŋgɔ gbe ə bimbɛɛnə mə. Bimbɛɛnə bie bwo ko kəə ŋgɔ yo, i nakə chɔɔnə sháŋ kə. 8 Ju yo ŋgɔ gbe ə duŋ ə shishɔ yinwaa mə, mɛŋ fu, ko bwo chɔŋ, ŋaŋ kah ye bə́ mà lɛɛ lə wu, dii mwe chɔŋ sháŋ mbwɛɛnshɔ, lidi sháŋ mbwɛɛbuhlɔ, lidi sháŋ gbi.” 9 Ye Jisho gbalə nəni i hlə kaanə lə, “Mbɛɛ nnu i dùŋ bə bituŋ, i wo.”Fieŋ ffɨŋ fi mà fə lə Jisho yɔɔ ə duŋ ə ŋgáŋga mə
10 Bwɔɔ nnu Jisho màa i dūŋ wuu mboŋ, bəne bədi bbəŋ bəə bə́ mà duŋ maa bəne biih bə kintu bə yuufi ə nchɔ bəfwe bie bii bə wu ki ŋgáŋga yé. 11 I chuu bə bə́ lə, “Ə bəŋ bbəŋ Chu nyiila kinuu ki muŋkɨŋ mwii bə bəŋ. Kwaalə, bə bəne bədi, fieŋ finhliŋ duŋ ə duŋ ə ŋgáŋga mə, 12 fo bə́ lə yee bə́ kēe, kwaalə bə́ kə ŋəŋ nə kə, bə́ wə̀lə, kə woo kə. Yee fi dūŋ lə fo bə́ nakə fii lə tɔ́ŋ ŋəbə, lə Chu laamə nə yíwaha yibə kə.”
Fieŋ ffɨŋ ŋgaŋga nni Jisho mà gba ni nyii fie
13 Jisho duŋ duŋ bwo bii bə bəne biih bbəŋ bə́ mà duŋ bie bə wu ləə, “Ə chu duŋ lə bə kə kələ fieŋ ffɨŋ ŋgaŋga ni yɔ̀ɔ fie kə lə? Ə bə nakə kələ ni, ə bə hlə kələ yidi ye ŋgáŋga ləhəŋ lə? 14 Ŋgɔ nnu mbɛɛ lɛɛ yo lə die Chu. 15 Ŋgɔ nnu i mà gbe yo ə je lə bəne bbəŋ bə́ wò die Chu, həmə həmə Hlaata hlə bwo fwoo die ye ə tɔ́ŋ ŋəbə mə. 16 Ŋgɔ nnu i mà gbe yo ə bidɔhɔ bi tə́ mə lə bəne bbəŋ bə́ wò die Chu, bə́ jə yi cha mi bə kintɨŋ, 17 kwaalə, i kə taa gɛŋ ə tɔ́ŋ ŋəbə mə kə. I ŋɔɔni kwaa chɛɛ, bwɔɔ nnu ŋgə bwò, ləkə bəne hlɔ̀ɔ wuh ə bə́ dɨŋ yu die ye, bə́ gbe chu dɨŋ cha mi. 18 Ŋgɔ nnu i mà gbe yo ə bimbɛɛnə mə lə bəne bbəŋ bə́ wò die Chu, 19 ki yaka ki bieŋ bi mbiŋ, bə kinhle kiŋkuntaŋ maa kidodo ki bieŋ bidi bumə kəə die ye i la nya. 20 Ŋgɔ nnu i mà gbe yo ə shishɔ yinwaa mə duŋ bəne bbəŋ bə́ wò die Chu, bə́ tɨŋ jə yi, yee bə́ fə̄ ye i yɔ̀ɔ lə bə́ gə̀ŋ fwi fwi, yo ŋgɔ nnu i chɔ̀ŋ yo díi ŋə sháŋ mbwɛɛnshɔ, ju yo díi mbwɛɛbuhlɔ, ju yo díi ŋə sháŋ gbi.”
Ki kinchaa
21 Jisho ja bii ləə, “Mbɛɛ bwò ə mə lɛɛ bə mɔɔ ə chəŋ i kəə bə kijee, lii i yii hətahi lə? Nhle lə mbɛɛ lɛɛ i tɨŋ chi ə duŋ ə fieŋ ffɨŋ bə́ tɨ̀ŋ chi mɔɔ bəŋ lə? 22 Yee bə kə̂lə lə fieŋ finhliŋ ffɨŋ fi dùŋ ə nələ mə, duŋ ə bə́ fə fi ə fi nyiee wɛɛŋ, ffɨŋ fi dùŋ dɨŋ dɨŋ finhliŋ, duŋ ə bə́ fə fi ə fi fu ə ŋwiŋ nte. 23 Mbɛɛ nnu i dùŋ bə bituŋ, i wo.” 24 Jisho baa yɔɔ lə, “Bwɔɔ nnu bə wə̀lə die Chu, yee bə wə̂lə kinwaa, bə kə̀lə lə shɔ nni wə fɛ̀hiŋ ye mə nə bə mbɛɛ ə yi dəŋ nni Chu fɛ̀hiŋ mə i nə chuu bə wə, mə nə kahiŋ lə. 25 Mbɛɛ nnu i kə̀nə fieŋ duŋ ə bə́ yá yiinə, mbɛɛ nnu i dùŋ kə kənə fieŋ maa fi chɛɛ ffɨŋ i kə̀nə fie, ə bə́ jə chuu fi ə wu kwáŋ.”
Ŋgaŋga ki ŋgɔ nnu i bà bəŋko
26 Jisho baa yɔɔ lə, “Muŋkɨŋ mu Chu duŋ ye ŋgɔ nnu mbɛɛ lɛɛ ə wu sho. 27 Bwɔɔ nnu ə bwo chu ə butuu, mbɛɛ yo nɔ̄ŋ kinɨŋ, bwɔɔ nnu butuu wu, i ja fa. Ŋgɔ yo hə mɛŋna yee i kō, i kə kələ ləə ŋgɔ yo hə fə ləhəŋ mə hlə yee i kō lə, 28 ə duŋ kwaa shishɔ yyɨŋ yi fə̀ mə hlə yee i kō. I bwo i hlaa hlee, fə binchɔŋ, i hlə chɔɔ bənfə díi. 29 Bwɔɔ nnu i ta, i jə fibɛ lɛɛ mə sho, yulahalə bwɔɔ gbanə wuna.”
Ŋgaŋga ki ŋgɔ shaŋ ji
30 Jisho baa ja yɔɔ lə, “Duŋ ə kkə fɛhiŋ muŋkɨŋ mu Chu bə laha lə? Duŋ ə kkə fɛhiŋ bə ŋgaŋga niɛhɛŋ lə? 31 I duŋ ye ŋgɔ shaŋ ji, ªnni i hlə mundii kah ŋgɔ sháŋ yinhliŋ yaŋ kwe. Bwɔɔ nnu mbɛɛ lɛ̀ɛ sho, 32 i ko, hlə kah bite binhliŋ bbɨŋ bə́ lɛ̀ɛ sho, gahi nyáŋ yiŋkuntaŋ mu yyɨŋ yí nə̀ nfwee, munyini mmuŋ mu tìɛŋ buh mu wɛ̀ɛ chə́ŋ ə nfwee ki yo mə.”
33 Ə nəŋ nnu Jisho màa i dōntə die Chu bə bəne ə ŋgáŋga mə ye yɨhŋ, ə jé yyɨŋ duŋ ə bə́ kaamu bəŋ'wo. 34 I mà kə yɔɔ lə fieŋ bə bə́, i kaani kə yɔɔ lə ə ŋgáŋga mə kə. Kwaalə, bwɔɔ nnu i dùŋ bə bəne biih bə kintu bə́ bə́, i hlə kaanə nachɛ bə́ ki ŋgáŋga yɨhŋ yinhliŋ.
Jisho nyieemi kifwuŋ
35 Jisho kēeh bəne bumbini bwe, ə chu bwo duŋ hə kitaŋ, i yɔɔ bə bəne biih bə kintu lə, “Kkə le libi le gəŋ yaa wi ju yo.” 36 Bə́ she kimɔ ki bəne kkɨŋ ki mà duŋ kie həmə, lɛɛ ə kikpɔŋkɔ kkɨŋ Jisho mà duŋ kie ə ki mə, bəə bə́ yee bə́ lē, bikpɔŋkɔ bidi bələ bə́. 37 Ye bə́ màa bə́ lē lə, kifwuŋ kintaabə mà jaa bwo chɔɔ yee ki nɛ̄hiŋ ŋgwiŋ mie, mə lɛ̄ɛ ə kikpɔŋkɔ kie mə, ki chu kee bən'yii. 38 Jisho mà duŋ ə kikpɔŋkɔ kie mə dɨŋ i nɔ̄ŋ kinɨŋ, i kəə chi kwoo ə kinu ki yufii bəŋ. Bə́ gəŋ yee bə́ ŋɛ̄hiŋ wu bə́ yɔ̄ɔ lə, “Mbɛɛ Keehnə, kpe yi kīɛɛlə i jə be nəni wə yīilə kwoo kə lə?” 39 Jisho ŋənə, nyieemi kifwuŋ kie, yɔɔ bə nɔ yo lə, “Də shiiiŋ.” Kifwuŋ kie hlə də, bidɔhɔ də nəni shiiiŋ. 40 I hlə bii bə bəne biih bə kintu bie ləə, “Bə lɔ laha lə? Bə kə yii lə tɔ́ŋ ə mi mə kə lə?” 41 Gbo kpe bə́, yee bə́ yɔ̄ɔ bə́ bə́ ləə, “Nu lə mbɛɛ nwɛhɛŋ chəə lə, nnu maa kifwuŋ bə nɔ wò wu lə?”