Lukaa 13

Mbɛɛ mənhliŋ fii tɔŋ liih ləkə ə i kpe

Ə mà duŋ ə bwɔɔ yo bəŋ, bəne bədi ja yɔɔ bə Jisho ye bəne bə Galilii bədi mà gəŋ bəŋgəŋ fə bəntofi bə Chu, Paylɛt faŋ bəne lə bə́ gəŋ nyieŋ bə́, ŋgɔŋ mə bə́ fuunə bə mə nyáŋ yyɨŋ bə́ màa bə́ fə̄ bəntofi mu. 2 Jisho wo nəni, i bii bə bə́ ləə, “Bə hlè lə bəne bie mà kpe dɨŋ kpe ni nəni yulahalə yíwaha yibə mà kaah yí bəne bə Galilii bədi lə? 3 Kwaalə fi kə duŋ nə lə kə. N'yɔ̄ɔ bə bəŋ lə, ə bə nakə fii lə tɔ́ŋ ŋieeŋ, ə bəŋ bənhliŋ yá kpe dəŋ nəni. 4 Ə chutə bəne bə yuufi ə nchɔ nyaaŋ bbəŋ chəŋ ndiɛɛ mà bulə ye ə Shilɔŋ jii bə́? Bə hlè lə bəne bie mà kpe nəni yulahalə yíwaha yibə mà kaah yi bəne bə Jelushalɛŋ bədi lə? 5 Kwaalə fi kə duŋ nə lə kə. N'yɔ̄ɔ bə bəŋ lə, ə bə nakə fii lə tɔ́ŋ ŋieeŋ ŋəŋ, ə bəŋ bənhliŋ yá kpe dəŋ nəni.”

Ŋgaŋga ki tiɛɛ kkɨŋ ki mà ba kə chɔŋ nə sháŋ kə

6 Jisho hlə gba ŋgaŋga ji bə bə́ lə, “Ə mà duŋ bwɔɔ ju, mbɛɛ ju dɔɔ tiɛɛ kidi^ª. Lə bwɔɔ ŋkwinə sháŋ yi tiɛɛ kie wunə, i bwo bəŋkwi i nakə ŋəŋ nə lə sháŋ chɔŋna ə ki go kə. 7 I hlə yɔɔ bə mbɛɛ nnu i màa i fwōŋ yo wɛɛh kie lə, ‘Keeh ŋəŋ, ə bigoŋ bitɔh fidiɛɛ ye mba bəmbwo ŋkiɛɛ lə ŋkwi sháŋ ə tiɛɛ kɨhŋ go, nnakə ŋəŋ nə fieŋ mu kə. Gba tələ ki bu gba nə. Kie ki kə̀ə dɔhɔ nya.’ 8 Mbɛɛ wi nimi yo chuu lə, ‘Che Kwoo, tukwaŋ kwaa ə ki go kigoŋ kɨhŋ, nlə ntɨŋ taa kinuu kie kunə n'yii binfwɔ həmə hətɨŋ. 9 Ə ki lə chɔŋ sháŋ ə kigoŋ kkɨŋ ki bwō kɨhŋ mə, ə fi nwaa, ə ki nakə chɔŋ nə, ə nhlə gba tələ ki.’”

Jisho ŋwuhuŋ kpɛ ju ə bunte mə

10 Lə ə bwo duŋ ə bunte budi, Jisho keeh bəne ə chəŋ cheenə Chu ji mə. 11 Kpɛ ju duŋ həmə nnu fiana ju duŋ ə wu go, ə duŋ nnu i bwò i nə̀ mbɛɛ jəŋ. I mà fəə wu i gɔŋ ə bigoŋ mə yuufi ə nchɔ nyaaŋ kinhlaŋ kiih chu kiŋkɔ, i mà baala lemi fa ntiiŋ kə. 12 Lə Jisho ŋəŋ ə kpɛ yo go, i chee wu lə i bwo, yɔɔ bə wu lə, “Nəh, wə fwoo ba ə kwáŋ ŋə jəŋ wa ni mə.” 13 Ye i yɔɔlə nəni, i hlə nɛhiŋ kwaŋ wiih tuu ə wu go. Cha mi, gbo wiih niinə, i lemi fa ntiiŋ, hlə yee i fāŋ kindohi bə Chu.

14 Kwaalə che kwoo ə chəŋ cheenə Chu ye mə ŋəŋ lə Jisho ŋwuhaŋ kpɛ yo ə duŋ ə bunte mə, fi lo wu go gbaaŋ. I hlə hla bəne bie chɔɔ yee i yɔ̄ɔ lə, “Joo ŋə nimi duŋ buhlɔ. Yee bə bwō bə jə́ŋ yeeŋ bə́ ŋwùhuŋ bəŋ ə joo ŋie mə. Mbɛɛ kə baa lə mɔŋ ə bunte mə kə.”

15 Baba chuu bə wu lə, “Bəŋ bəne bbəŋ bə yɔ̀ɔ chili, bə fə̀ dəŋ chili. Ə bwo duŋ ə bunte mə mbɛɛ mənhliŋ ə bəŋ mə jə lə naŋ wi ləkə hlɔmbwaa wi ə dɔhɔ kkɨŋ i duŋ kie gəŋ nə wu ŋgwiŋ kə lə? 16 Kpɛ nnu i dùŋ nu ŋwa Ablahaŋ, hlaata yiila wu ə munfwa mə bigoŋ yuufi ə nchɔ nyaaŋ, kəə ə duŋ dəŋ ə fi nakə nwaalə lə bə́ fwoo wu ə ŋgə mə butuu bu bunte mə lə?” 17 Ye Jisho yɔɔlə nəni, bəne biih bəlonə kənə giaali, bəne kiŋaaŋkə yee bə́ lēki ə nleki mə yu bieŋ bi ŋɨŋ gəə binhliŋ bbɨŋ Jisho mà fə.

Ŋgaŋga ki ŋgɔ shaŋ ji

(Matio 13:31-32; Maak 4:30-32)

18 Jisho ja bii ləə “Muŋkɨŋ mu Chu duŋ ye laha lə? Fieŋ ffɨŋ duŋ ə nfɛhiŋ bə mwi duŋ laha lə? 19 Mwi duŋ ye ŋgɔ shaŋ ji lə^ª nni mbɛɛ mà lɛɛ ə wu sho, i mɛŋ fu, ko fuu chu tiɛɛ kkɨŋ munyini mmuŋ mu tìɛŋ buh wɛ̀ɛ chə́ŋ ə ki go.”

Ŋgaŋga jɔ

(Matio 13:33)

20 I baa bii ləə, “Ə duŋ ə mbaa fɛhiŋ muŋkɨŋ mu Chu bə laha lə? 21 Mwi duŋ ye jɔ́ yyɨŋ kpɛ ju mà jə fuhuŋ ə luu mə bənchwa bəŋkuntaŋ bəŋkuntaŋ bətɔh, tɔ chi, yí hlə fə lə luu le nu biŋ.”

Fwiih wunfwaa

(Matio 7:13-14; 21:23)

22 Jisho hlə ja yee i gə̄ŋ ə Jelushalɛŋ. Ye i màa i jāa lə, yee i kāh ə bibalaki bə ŋəŋkwili mə i kèeh bəne. 23 Mbɛɛ ju ja bii bə wu ləə, “Baba, ə kwaa bəne chɛɛ bbəŋ bə́ yá fukwoo lə?” Jisho hlə chuu bə bəne bənhliŋ lə, 24 “Yee bə jû ntakə bənlɛɛ ə duŋ ə fwiih wunfwaa we mə. Bə kələ lə bəne kiŋaaŋkə yá yi kiɛɛ bənlɛɛ ə bə́ yá nakə bənə je kə. 25 Bwɔɔ yá wunə, ə che chəŋ yá ja fwaŋ wulə. Bwɔɔ nnu i yá fwaŋ, ə bə yá ba bweenə bə kɔ̀ɔ wulə kie bə kɔ̀nɔ lə, ‘Baba, wɛ wulə kie kkə lɛɛ.’ Ə i chuu bə bəŋ lə, ‘Ŋkə ŋkələ dɔhɔ kkɨŋ bə bwō kie kə.’ 26 Ə bə hlə chɔɔ bənfa lə, ‘Ə be bbəŋ kkə maa kkə shī, kkə dì, kkə ŋwì. Wə maa wə jāa wə kèeh bəne ə bee kwuŋ.’ 27 I baa chuu dəŋ lə, ‘N'yɔ̄ɔ bə bəŋ lə ŋkə ŋkələ dɔhɔ kkɨŋ bə bwō kie kə. Bə no ə mi dí bəŋ bbəŋ bə jàa bə bìhi bieŋ.’ 28 Bə yá ŋəŋ Ablahaŋ, Ayjik, bə Jekɔb maa bə bəne bə hlɨŋ Chu bənhliŋ ə muŋkɨŋ mu Chu kwuŋ, ə duŋ bə́ hə baŋna bəŋ bweenə, ə yee bə dē, bə dì bigəə. 29 Bəne yá no ə wɛ́ɛ ŋənhliŋ mə chɔɔ jə wɛɛ wwuŋ kitaŋ fù gəŋ bwii wɛɛ wwuŋ ki gəŋ chɨ̀ŋ maa wɛɛ wuŋwa bə wunhlili yaŋ mbiŋ nte, bwo shii yee bə́ dī ə muŋkɨŋ mu Chu mə ə Chu kwuŋ. 30 Bə wələ wo bəne bədi bbəŋ bə́ dùŋ bə dɨŋ fidiɛɛ yá duŋ bə fwi, bədi bbəŋ bə́ dùŋ bə fwi fidiɛɛ yá chu bə dɨŋ.”

Jisho de gbo bə Jelushalɛŋ

(Matio 23:37-39)

31 Lə yee ə dūŋ ə bwɔɔ yo bəŋ, Bəfalashii yɔɔ bə Jisho lə, “No gəŋ wə fo wɛɛ wudi yulahalə Ŋkɨŋ Hɛlɔ yu kīɛɛ lə i jii wə.”

32 Jisho chuu bə bə́ lə, “Bə gəŋ yɔɔ bə kididi kie lə n'yu fwōo muŋkwini ə bəne go daŋ, ŋŋwùhuŋ jə́ŋ, ə duŋ dəŋ ye n'ya nfu n'yee nfə̄ mbwaa, maa bwe dəŋ, ə nhlə n'ya ŋkaa nimi lɨŋŋ. 33 Kwaalə, nlə nchɔɔ njaa gbɛŋ wuŋŋ ə Jelushalɛŋ daŋ, fu jaa mbwaa gəŋ bwii bwe. Fi kə duŋ nə yəəŋ lə bə́ jii mbɛɛ hlɨŋ Chu ə dɔhɔ kidi mə kə kahiŋ ə duŋ ə Jelushalɛŋ.”

34 Ye Jisho yɔɔlə nəni, i hlə de gbo lə, “Hebee Jelushalɛŋ! Hebee Jelushalɛŋ! Wə nnu wə jìi yo bəne bə hlɨŋ Chu, baa yee wə tɨ̄ŋ bəne bə tə́ bbəŋ Chu faŋna bə wə! Ə chá miɛhɛŋ ba yyɨŋ mmɔ̀ŋ bəmbuhuŋ bwɔni bwo ye shi kwɛ buhuŋ lə bwɔni biih kəə ə bikulə biih mə, wə nɨ̀hŋ lə? 35 Kee ŋəŋ, chəŋ wa yá yi chu bichili. N'yɔ̄ɔ bə bəŋ lə bə yá baalə ŋəŋ ə mi go kə, gəŋ bwii bwɔɔ nnu wə yá yɔɔ lə, ‘Chu lɛɛ kindunshiiŋ ə mbɛɛ nnu i bwo yo ə yii li Baba bəŋ.’”